غنوة وذكرى

by Mii Tarek

رواية تجمع بين الذكرى والغنوة في إطار اجتماعي رومانسي وجانب من الغموض والاثاره

****

يا رحلة يا أحلى ما فيها.. كل ما اختار اعيش فيها.. تسوقها مهما اسوق فيها.. مكاني.. مسافات.. لو مشيت مسافات.

282 pages, Paperback

Published July 1, 2021

Reviews

[Sara Ismail · Rating 5 out of 5]

الرواية دى من امتع الروايات اللى قريتها مؤخرا... الرواية اللى بقت ذكرى طيبه لقلبي ❤️❤️ ماكنتش عاوزة اخلصها بس الاكيد ان كل ما همسك الرواية هحن لكل مشاعرى و انفعالاتى معاها و هعوز اقراها تانى واعيش معاها💖💖
متعتها فوق الوصف حقيقي
انت مش مجرد بتقري مشهد حلو وخلاص و يعجبك الشخصيه و عاوز تعرف اللى هيحصل... لالا مش كده خالص
ده فيه إضافة مميزة جدا عملتها الكاتبه منبهره بيها
دخول الاغانى الاقرب لقلبنا فى الحوار.... الاغنيه ف كل فصل مرسومة بالمللى على الحدث
انت بتسمع الموسيقي التصويرية للحوار بمقطع بيعبر فعلا عن حالة المشهد و احساسه بمنتهى الرقي و النعومه
يعنى انت مش، بتقري رواية و السلام... انت بتشوف فيلم سينمائي عبقري ف حوار شخصياته و انفعالاتهم... كل لحظة رومانسيه بغنوتها حسيت بيها بجد..و دخلت قلبي جدا

انا بالنسبه لي نادر او يكاد يكون معدوم ان احس ف رواية مكتوبة انى شايفاه قدام عيني فعلا ❤️❤️

و دى اهم نقطه كان لازم تاخد حقها ف الريفيو بتاعى💖💖💖

نيجي بقي للحدوته نفسها...ف منتهى الجمال و قصه جديده جدا ما اتعملتش ولا متاخده قبل كده
ب تتسارع نبضات قلبك وانت عاوز تعرف ايه هيحصل... عنصر التشويق والاثارة اللى عند مى طارق بحبه جدا
بتفكر دماغك شغالة وانا بعشق النوع ده جدا... يا ترى كريم هيعمل ايه وغنوة موقفها ايه و ذكرى هتفاجئنا ولا ايه؟ 😂

و المبهر بقي الجزء الاخير من الرواية اللى مختلف كليا كليا عن اول الرواية... يعنى انت مش هتفضل على نفس الوتيرة طول الحدوتة... الكاتبه هتاخد خيالك وقلبك ومشاعرك وهتطلعك برة نفسك تماماااا عشان تمزجكك بجد!! ❤️❤️

انا مهما كتبت مش كفايه لفرحتى بعمل محترم زى ده.. كومبو زى ما بيقولوا فيه كل حاجه 💖
استمتعت بيه جدا
مش قادرة احرق عليكو الاحداث ف كلامى
بس مش هتخرج من الرواية دى الا وانت كسبان متعه و فكر جديد يخليك يحس بمسئوليه تجاه كلمه بحبك اللى بتقولها للى بتحبه...و ان مهم جدا تملك زمام امورك وما تسمحش لحد يهز ثقتك بنفسك ولا يتحكم فيك 💕

شكرا بجد استاذة مى على اثرك الطيب اللى سيبتيه فيا ❤️

[Abeer ElMorsy · Rating 5 out of 5]

رواية : غنوة وذكرى للكاتبة/ مي طارق
عدد الصفحات: 282
نوع الرواية: اجتماعية رومانسية تشويقية

أولاً الرواية مُختلفة وكأنها فيلم سنيمائي أو مسلسل.. وصف الشخصيات والأماكن والألوان دقيق.
ومزج الأحداث بالأغاني المناسبة جداً مع الأحداث رائع.. وخصوصاً مع الاختيار الزكي للأغاني سواء قديمة أو جديدة.
كل شخصية فريدة و مختلفة عن الأخرى برغم أن القصة تحكي عن موقف واحد تسبب في تغير مجرى حياة جميع الأشخاص.
تتناول الرواية فكرة (من الحُب ما قتل) و حب السيطرة باختلاف الظروف والشخصيات..
وهذا الجانب مختلف و مميز و اعتقد إن تناوله بهذا الشكل مختلف عن أي عمل.
الحبكة وتسلسل الأحداث ممتاز و مرتب والصراع في القصة في حالة هبوط وصعود مستمر، وهو سبب أساسي لانجذابي لتكملة الرواية في وقت قليل برغم كوني مُقلة في القراءة منذ فترة طويلة.

"الأشخاص هي أساس الذكرى مش الأغاني"
اقتباسة من الرواية وهي جزء من رسالتها أيضاً..
هل الذكريات تترسخ بالعقل بسبب التعلق بالأشخاص أم الأجواء المُحيطة.
وأخيراً نهاية الأحداث في الرواية كانت صادمة و غير متوقعة بالمرة ولهذا اعتبر اسلوب الكاتبة مميز جداً في وضع النهايات.

رواية غنوة وذكرى مختلفة وتستحق القراءة و كانت رحلة ممتعة بعد انقطاع عن القراءة

[Neveen · Rating 4 out of 5]

انتهيت من قراءة الرواية المُمتعة دي..
بجد حبيتها جداً

بجد استمتعت بقراءتها جدا وحبيت كل شخصيه فيها سواء بمميزاتهم و عيوبهم.
ودى مش اول مره اقرأ وأتشد لروايه كتبتها مى طارق
دايما أحداث رواياتها بتعجبنى.. جذابه وممتعه وفيها حاجه حلوه
فيها تشويق وأحداث غير متوقعه بحب طريقة كتبتها وسردها للمواضيع بتخلينى عايشه جواها ومتخيله كل حاجه فيها.
شكل الشخصيات وملامحهم والمكان والبيوت والصوت والضوء كل حاجه بجد..
وربط الغنوه بالمواقف عجبنى،مع اسماء بطلات الروايه بتحطها فى مكان تانى خالص
ودايما الأحداث والنهايات كالعاده غيرمتوقعه ودى احلى حاجه فى كتبتها ومميزه بيها.
والأهم من دا كله الرساله او النصيحه اللى تحتويها الروايه.
كل الحب والتقدير ليكى ياحبيبتى واتمنالك مزيد من التقدم والتوفيق
ومنتظرة الجديد من دلوقت .. ياريت متغيبيش علينا.

[Hoda · Rating 5 out of 5]

اولا غلاف الكتاب حلو و بيلفت نظر اي حد بيحب المزيكا و المغنين اللي ع الكفر بالنسبالي احبهم لقلبي وردة اتبسطت لما شفتها ❤
ندخل للرواية بقة
اولا رسم الأشخاص ووصفهم للقارئ يخليك كانك شايفهم بوضوح + ان كل تفصيلة ف شكل الشخصيات ليها دلالة بصفة معينة ف الشخصية ف ده هيخليك تحس انك مش شايفهم بس لا ده انت صاحبهم و عارفهم كويس
القصة متماسكة جداا و تسلسل الأحداث ايقاعه سريع ف مش هتحس بملل بالعكس
اي فلاش باك معمول ف الرواية معمول بطريقة متخليش القارئ يتلخبط و دي حاجة انا بقدرها جدا
توظيف الاغاني ف الرواية فكرة ذكية جداا و بتخلي الواحد يحس الأحداث و تحطه ف مود الرواية اكتر
المفاجأت اللي ف الرواية مش متوقعة و بتخبط الواحد ف دماغه كدة😅
يمكن في شخصيات ف الرواية حسيت اني عوزة اعرفهم اكتر من كتر ما كنت متأثرة بيهم
رواية ممكن جدا تتخيلها ك مسلسل 😍
Highly recommended 👌

[Mai Galmad · Rating 5 out of 5]

رواية "غنوة وذكرى" للكاتبة مي طارق
رواية تصنيفها اجتماعية واحداثها مشوقة

الرواية تتناول أكثر من جانب من جوانب الحياة ويمكن ده سبب إنها بتشد جداً إنك تخلصها في يوم.
الأهم من كل ده.. إني كأني شايفة الأحداث قدامي وكأنه مسلسل أو فيلم.
الشخصيات كلها عندها مشاكل وده شيء واقعي جداً..
أظن الكاتبة هدفها الرئيسي عكس أي رواية، إن اللي بيقرأ مش هيتعاطف مع أي طرف من أطراف الحكاية.
وفي نفس الوقت محافظة على متعة الأحداث و المفاجأت طول الحكاية الصادمة.
كل الأحداث غير متوقعة تقريباً.. قضيت وقت حلو جداً مع الرواية وانصح مُحبي النوع ده يقرأوها لإنها فعلاً مميزة

[Lailaosama · Rating 5 out of 5]

من احلى الكتب اللي قرأتها كتاب جميل وممتع وفكرته جميلة 😍😍😍

[Amira Rashad · Rating 5 out of 5]

رواية جميلة اوووى جدا يا مى كعادتك
هى غنوة و ذكرى فعلا و مش غريب عليكي يا عاشقة الورد 🌹♥️
بالتوفيق دايما و يا رب الى جاي كله نجاح يا رب ♥️♥️👏🏻

[Asmaa Mohamed · Rating 4 out of 5]

📌"الحُب بيزورنا مرة واحدة فـِ العمر .. وبنقفل الباب ورا القصة الأولى، ونقرر إن مفيش بعدها ولا زيها"

📌"أنتَ عارف عيبك إيه..طول الوقت خايف، بتخاف تخسر.. بتخاف.. بتخاف تغلط أو تفشل.. دايمًا عايز تظهر بصورتك المثالية.. ضعيف وضعفك هو الي ضيعني منك"👌🏼👌🏼👏🏻👏🏻

📌"مش سهل على الست أبدًا إنها بعد ما تحس إن اللى معاها ده بيجذبها ليه وهي تفضل تقاوم وتقاوم لحد ما تقع فـِ حُبه أو حتى تُعجب بيه .. فيرفضها"
ـــــــــــــــــــــــــــــــــــــــــــ
📌اسم الكاتب: مي طارق
📌اسم الرواية: غنوة وذكري
📌نوع العمل: اجتماعي ممزوج بالرومانسيه
📌عدد الصفحات: 282
📌اصدار: لو غاريتم للنشر والتوزيع
📌التقيم: ⭐⭐⭐⭐
ـــــــــــــــــــــــــــــــــــــــــــ
📌نبذة:

📌مستمعي برنامج ذكري فـِ أغنيه أهلا بيكم فـِ أول حلقة وطبعا مفيش مستعمي للبرنامج لسه لكن أتمني بعد أول حلقه تحبو أفكارنا وموضوعتنا ويكون فـِ جمهور للبرنامج، معاكم أرسطو ده أسم أكيد وهمي ولكن ده الأسم الا لو حد بيقرأ لي من عشر سنين هيعرفه أظن مش مهم أسم الشخص قد ما مهم هو هيقولنا إيه..
من أسم البرنامج أكيد عرفنا إن البرنامج هيفكرنا بذكريات فـِ الأغاني..
ـــــــــــــــــــــــــــــــــــــــــــ

📌التقيم:
{بدون حرق}
📌أنا مش هحكي حاجه عن تفاصيل الرواية هسيبكم انتوا تكتشفو اي هي قصه "غنوة وذكري"

📌رواية إجتماعية بـِ إيقاع كلاسيكي وذوق ناعم ورشيق.

📌أحيانًا الإنسان بيبقي عقله وقلبه رافض ينسي ذكرياته أي كان ذكريات حزينه أو سعيدة لـِ أسباب معينة ولـِ أسباب تعلقه بها.

📌أحيانًا بتظهر فـِ حياتنا مواقف بتبقي متعلقة بـِ ذكرياتنا وساعتها يـَ هتشعر بالفرح او الحزن وده اللي حصل معي عندما قرأت "غنوة وذكري" وارتبطت عندي بـِ ذكري لا عمري هنسي الذكري دي ولا عمري هنسي الرواية اللي أيقظت فيا هذه الذكري تاني.

📌من أول ما فتحت الرواية وأنا شعرت أني أشاهد فيلم سينمائي جميل ذو ذوق كلاسيكي أثر بـِ وشعرت بـِ غصة وأيقظ بداخلي ذكري لا ترحل عني ولا تذهب مني حقيقي تعاطفت مع شخصيات الرواية بغض النظر عن أخطائهم وعن عيوبهم ومن وجهة نظري كل شخصية مخطئة من ناحية التفكير وبعض اتخاذ القرارات، ولو اعتبرنا أن الشخصية الانسانية فـِ بعض الأحيان فـِ هيئة الفريسة فالمفترس الأكبر بـِ إتجاهها هو "الشك" "وعدم الثقة" فالشخصية إن لم تحصن بـِ اليقين فتكتسب منه ثباتًا ورشادًا وحكمة وخاصة حين إتخاذ القرارات تؤكل من قِبل المفترس الأكبر وهو "الشك" فتكون يومها الشخصية ضعيفة مترددة ليس قادرة ع المواجهة ولا حل المشكلات ولا إتخاذ القرارات وده حصل مع بعض الشخصيات فـِ الروايه لا كان عندهم القدرة فـِ إتخاذ القرارات ولا المقدرة فـِ حل مشاكلهم ودائمًا كانوا بيهربوا منها وده إنعكس ع حياتهم بشكل سلبي طبعًا.

📌حزنت لحزنهم وبكيت معهم فـِ لحظات ضعفهم وفرحت لفرحهم من النادر جدًا أني أتأثر بـِ أحداث رواية بالطريقة ممتنة جدًا للكاتبة المبدعة "مي طارق" ع صفحات هذه الرواية الرائعة وع انتقائها للاغاني لائقة مع كل موقف وكل حدث.

📌قصة وفكرة جديدة مقرأتهاش قبل كده ممتعة ورائعة قصة لها ذوق ومذاق مميز أحداث كلاسيكية حقيقي تفاجئت من نهاية القصة وكنت اتمني تتختم نهاية حلوة بس القصه عجبتني جدا اسلوب سهل وبسيط وجذاب لـِ أبعد حد.

📌شخصيات الرواية مرسومة بدقة بتناقش قضايا واقعية، أحداث متسلسلة كل فصل وكل موقف مرتبط بـِ غنوة أحلي من اللي قبلها وعجبتني الفكرة وحبيت عنصر التشويق والإثارة مقدرتش أتركها إلتهمتها فـِ جلسة واحدة.

📌حقيقي تركتني الرواية فـِ مود رائع بالرغم من نهايتها الغير متوقعة الرواية مفيهاش أي مط أو ملل ولا هيتزهق منها والفلاش باك فـِ الرواية مرسوم بطريقة متوهش حد كل حاجة متصلة ببعضها.

📌ده غير الغلاف الرائع اللي جذبني أصلا أني أقتني الرواية غلاف كلاسيكي بـِ رائحة زمن جميل لا يذهب عنا ولا يذهب منا.

📌أول قراءة ليا للكاتبة وان شاا الله مش الأخيره وهقتني باقي أعمالها.

#غنوة_وذكري
#مي_طارق
#مراجعات_أسماء
#قراءات_2022
Mii Tarek

[Khaled Magdy · Rating 5 out of 5]

حقيقي عظيمه بجد ♥️♥️ تسلسل احداث وترابط مش طبيعي بجد لدرجة انه يخلي الواحد بيصورها في دماغه وبيتخيلها 😅
لا وكل شخصيه بأدق ادق تفاصيلها واسلوب الحوار مابين الشخصيات عظيم ♥️
من الاخر لازم تتصور وتتعرض ♥️ بدون مبالغه والله
كل مره بقرألك حاجه بتبهريني استمري وبإذن الله تحققي كل اللي نفسك فيه ♥️

[Mii Tarek · Rating 5 out of 5]

اعتز بكتابي جداً و اتمنى تستمتعوا بقراءة كل صفحة♥️