أنا استاهل

by سمر درويش

Unknown Binding

Published June 30, 2021

About the author

سمر درويش - معالج نفسي بالفن
تمهيد ماجستير جامعة عين شمس - ماجستير University of Sydney (قائم)
دبلومة فى العلاج بالفن University of Florida (UF)
دورات في الدعم النفسي - الهلال الأحمر المصري
دورات في علم النفس الإيجابي

مؤلفة كتب : أنا استاهل - مُنعطفات قلب - الربح النفسي - خائنون ولكن
المسئول التنفيذي - اكاديمية بيت العيلة للخدمات النفسية والتربوية
المسئول الإدارى - Family Academy for kids

Reviews

[علا طارق · Rating 5 out of 5]

الكتاب حلو أوي ومريح نفسيًا ومن أول صفحة شعاره عاجبني جدًا
" امنح الحب ولكن ضع نفسك في المقدمة"
جميل أننا نحب وندي ونسامح ونقبل ونعدي ونغفر ونصبر وننصح ونحارب بكل قوتنا عشان اللي بنحبهم، لكن حق نفسنا علينا أننا منجيش عليها في سبيل ده ولا ندوب حدودها ولا نسلب منها حلاوتها ولا نشوهها عشان تليق ولا نهز ثقتها في نفسها...عشان هي تستاهل نفسك تستاهل أنك تقدرها وتسعدها ...
أنت تستاهل تكون سعيد ومرتاح ومطمن ومستكين وحاسس أنك محبوب ورحمة اللي بتحبهم بيك محوطاك .
زي ما بتخاف على حبك وعلى الناس اللي بتحبهم خاف على نفسك أنت مش مسؤول عن مصلحة حد غيرها (*لحد ما تخلف عشان ولادك منها) ❤🥀

أنا استاهل الحلو كله 🥀❤ وأنت كمان تستاهل❤🥀😉
Highly recommended
27.08.2021

#انا_استاهل #كتاب #القراءة #highly_recommended #review #reading #love #grateful

[Hadeer Ahmed · Rating 4 out of 5]

كتاب حلو جدا لو انت في طريقك تحب نفسك وعايز تاكد علي النقطه دي معاك بكل صورها وفيه كمان امثله لعدم حب النفس وازاي حب الذات بيساعدني في اختياراتي وبيغير مسيرة حياتي كلها
كتاب لذيذ خلصته في يومين فيه كزا نقطه حلوه زي مقلت للتذكره والتاكيد وتخلي فيه حماسه كده انك تمشي وتهتم بالموضوع ده

بس معجبنيش انه عنوان الباب مثلا اللي بتكلم عنه اوقات بتوه لما اقرا فيه ايه العلاقه بين الكلام المكتوب ده وعنوان الباب مفيش تاكيد علي العنوان حتي في اخر الباب اللي هو اقدر اربط بين الشرح وبينه

الكلام شويه بيدخل من حته لحته خصوصا في الامثله

غير كده حلو جدا وانصح بيه للقرايه

[Radwa Attia · Rating 4 out of 5]

أنا استاهل ♥️♥️
"أمنح الحب ولكن ضع نفسك في المقدمة "
أوقات بنكون محتاجين نسمع كلام وحواديت عشناها احنا او مع ناس بنحبهم تاني يمكن تحرك او تحرر حاجه كانت مكبوته جوانا واحنا مش حاسين .. !!
الحواديت عن الحب والعلاقات سواء بحب ذاتك وتقديرها او تقدير غيرك .. الكلام المكبوت الموجود جوه العيادات النفسيه اللي ينروح نلجأ بالنهاية نتكلم مع حد متخصص قد تكون مشكله متراكمه جواك .. لكن الشخص المتخصص قادر يفك كل الكلام المكبوت ده ويبسطه علشان تفهم وتفكر مع حد بصوت عالي .!
ماركيتنج العلاقات .. الحياة عبارة عن سوق .! ناس بتقابلهم وبنعرفهم وبيأثروا فيك وتأثر فيهم .. وذاتك اللي محتاج كل فترة لتانيه تبص علي امور بشكل تاني ..
الأجندة ... العلاقات ونظرتك لها ومفهومك وتصورك لشريك ولعلاقتك بيه تمشي ازاي !
هل فعلا انت وهو تصورتكم للحياة وللمستقبلكم واحد ولا كل واحد فيكم ماشي في اتجاه.!
المتاهه .. جوه المتاهات حواديت وألغاز لنفسك محتاج كل فترة تطلع بره متاهتك وتفهك صح علشان تحصل في النهاية للتقدير اللي يخليك قادر تكمل متاعب الحياة سواء لذاتك او لما تفهم احتاج اللي حواليك وتقدرهم زي ما هما عازوين .!!
🌿 أوقات الكلام المتخزن جوانا بيكون افضل لو طلع بالقلم او بصوتك وتعرف نفسك لنفسك لان ساعات كتير بنتوه من نفسنا وده بسبب ان حياتنا مبيكنش لها طعم او معني .!!
🌿الكتاب لمسني .. جالي في وقت محتاجه أبسط كلام ممكن لنفسي .!
لكذا سبب شخصي وأهمهم اني كنت في block reading شهور ..
نصيحه لو عاوز تقرأه هتحتاجه أوي و انت محتاج تفصل .. او تخرج من بلوك زي حالاتي هيكون افضل حل ليك 💚
🌿 الكتاب بالعامية المصرية داخل العيادة النفسيه ممزوج بفصحي الكاتبة لتشبيهاتها .!
وانا هعتب عليها جدا لانه لخبطني أحيانا .!!

وأخيراً عاوز أشكر سمر علي الكتاب لان كنت محتاجه اقرأه وهعتبره مرجع بسيط لنفسيتي اللي بتوه احيانا 😅

[أسماء العقيد · Rating 5 out of 5]

بجد شكرًا للكاتبه سمر
الكاتبة الجميلة سمر درويش جزاك الله خير يادكتور 💕 Samar Darwish
أجمل هدية والله ربنا يبارك فيك، والكتاب يستحق القراءة

💜مقتطفات رائعة من الكتاب:-

باب العلاقات - الحب هو القانون العكسي للاشياء
عذابه حلو، ومره عذب، وسرقته حياة، وروتينة وثباته موت … الغباء في العلاقات بيموت … يموت حُب عشته سنين

باب الاجندة - أنا طلباتي بسيطه! لا أحتاج غير الحنية… أريد ان أعيش، لا أريد ان أتخيل إنني أعيش

باب رحلة البحث عن الروح - الخوف لما يدخل القلب يسرق لحظات العمر الجميلة

باب المتاهة - التعلق أعمق ما في الحب، التعلق احتياج نفسي ، الحب وتعلق لابد ان يكون بينهما حكمه

باب حلقة في ودنك - إنصافك وعدلك مع نفسك هتلاقي السماء بتحتويك 🧡
كتاب مبدع زيك يا سمر 🌸

[Perry Makhlouf · Rating 5 out of 5]

الكتاب عبارة عن وجبه دسمه ف العلاقات اهم حاجة علشان تكون علاقه صحية سليمة إنك يكون عندك ثقه بنفسك وتقدير لذاتك ورافع استحقاقك ودا بالظبط الرساله اللى بيوصلها الكتاب وبيدلك وعى وطرق حل المشكلات اللى بتحصل ف العلاقات تقريبا هو ملم بكل حاجة بالنسبالى الكتاب اسلوبه سهل وفيه كميه لذاذة مش طبيعيه يدخل القلب قبل العقل أنا خلصته مرة وعيدته تانى بجد يستحق إنه ياخد جوايز مش جايزة واحدة ويارب دايما من نجاح لنجاح افضل منه🌹

[Nora Magdy · Rating 5 out of 5]

كتاب رائع حسيته صديق شخصي ليا بيتكلم بلساني في كل سطر فيه بقول "أيوه أنا مريت بده" ، "أيوه أنا حسيت كده ومحدش كان فاهمني" مفيش حد فينا محسش أو ممرش بتجربة شبه المكتوبه ، الاسلوب سلس وقريب من القلب وبيوصلك لحل مريح يخليك ترضى عن نفسك وتحب اللي حواليك .. أنا بنصح بقرائته جدا رجاله وستات لأنه منصف للجميع بصورة متوازنة ، وأعتقد إني كل ما هخلصه هحتاج أعيده من البداية لأنه اداني دفعه إيجابيه جميله

[Rana · Rating 5 out of 5]

من أحلي الكتب اللي بتتكلم عن التنمية الذاتية وبتتكلم عن العلاقات

[Rasha Eltanbdawy]

كتاب حلو اوىىىىىىى كلها حاجات من الواقع انا قريته كله وكنت
مستمتعه جدا وانا بقرأه فعلا من أجمل الكتب اللى قريتها شابووووه بجد كتاب انا استاهل❤❤❤للرائعه (سمر درويش) 🌹🌹🌹❤

[Shurouk Mashhour]

كتاب خفيف جدا من حلاوته خلصته في ٣ أيام عرفني أزاي أ قد در قيمة نفسي وأحبها اتعلمت كتير من القصص الواقعية اللي تم الاستشهاد بيها كأمثلة .بجد هو فرق معايا جدا وأثر علي طريقة تفكيري في العلاقات بصفة عامة بشكل إيجابي

[Ghada Darwish · Rating 5 out of 5]

كتاب ناقش موضوعات كتير جميله وعلميه وفهمناها زي الكارما وتؤام الروح ❤❤
كتاب ممتاز من كاتبه متألقه ❤❤❤❤❤

[Marwa Mohamed · Rating 5 out of 5]

ما أعظم شعور الاستحقاق، وما أجمل أن تحب نفسك وتقدرها، لكى تستطيع أن تحب الآخرين وأن تمنحهم الأمان قدر المستطاع.
كتاب "أنا استاهل" للمعالجة النفسية والكاتبة العبقرية "سمر درويش" ، تطرق لقيم ومعانى كثيرة من خلال قصص حقيقية، ومشاكل قد نتعرض لها، أو ربما نكون عشنا تفاصيلها يوما ما.
رسالة الكتاب التى وصلتنى من خلال قرائته، مضمون هذه الرسالة هو الاستحقاق، وقيمة تقدير الذات، وهل تقدير الذات مكتسب أم إنه شعور فطرى، يولد الإنسان به.

هناك جهد كبير مبذول فى هذا الكتاب، من خلال وضع وشرح مفاهيم ومصطلحات فى علم النفس، وتوضيح الهدف المقصود وشرح هذا المصطلح، مع ربطه بالمشكلة المعروضة فى صورة قصة، مما جعلنى اشعر بعدم الملل والتشتت. كما أن اسلوب الكاتبة فى عرض هذه القصص والمشكلات، كان فى منتهى السلاسة والوضوح.

عندما تقتنى هذا الكتاب، ثم تبدأ فى قرائته، حتما ستجد نفسك بين سطوره، ستجد مشكلتك، أو ربما ستقرأ قصة حياتك فى صفحاته، ومن المؤكد أنك ستجد حلا أو على الأقل ستعرف من أين تبدأ طريقك من جديد.

لغة الكتاب تبدو سهلة، بسيطة، ولكن بداخلها رسائل عميقة، معانى قد تصلح حياتنا للأفضل، قد تجعلنا ننعم بحياة سوية ومستقرة.
أولى خطوات التغيير تبدو صعبة من الوهلة الأولى، ولكن الشجاعة تكمن فى اتخاذ القرار بالتغيير، لأن هذا القرار يساعد فى بناء أنفسنا بشكل صحى وسليم، وهذا التغيير سيجلب الرخاء والاستقرار لكل من حولنا.

"أنا استاهل" هو بوصلة مرشدنا إلى التعرف على أنفسنا من جديد، فقبل أن نعطى الحب والأمان لمن حولنا، يجب أن نمنحه لا نفسنا، أن نرتب اولوياتنا، نضع نفسنا فى المقدمة فى كل شعور نمنحه للآخر.

[دينا ممدوح · Rating 3 out of 5]

كتاب: أنا استاهل
الكاتبة: سمر درويش
دار النشر: دار تشكيل
سنة النشر: ٢٠٢١

*عنوان الكتاب جملة نقولها دائما كعتاب للنفس أعتقد إنه في مرات قليلة جدًا أمكننا أن نقول أنا استاهل الحاجات الحلوة دي، لكن دائمًا نقول أنا استاهل أن ده حصل.. أنا استاهل أن حد اذاني بالشكل ده، دائمًا ما ننظر إلى انفسنا في الكثير من الأوقات نظرة الشعور بالذنب وكأننا السبب في كل الخطايا، نعم الإنسان سبب في الخطايا ولكن الإنسان أيضا يملك الجنه والنار داخله، لذا اسم الكتاب بالنسبة لي كان لافت للنظر واخترته من بين الكثير من الكتب التي تصفحتها من دار تشكيل على تطبيق أبجد.

*كل كتب تطوير الذات أو العلاقات تبدأ بفصل اسميه أنا الإشارة والتنبيه للنفس وكأنه يجعلك تنظر إلى نفسك نظرة من أعلى، تكون خارج نظرتك المعتادة إلى نفسك، ترى مميزاتك وحتى عيوبك وكأنه يصنع منك بورتريه يساعدك على رسم باقي خطوط الكتاب وأنت تعرف ذاتك حقًا، ماذا تريد ومدى أهميتك لدى نفسك، في هذا الكتاب بدأ الفصل الأول وهو يضع يديه على هذه النقطة بالتحديد، فكانت بداية قوية.

ومن هذه البداية تحدثت الكاتبه عن تسويق العلاقات كيف يمكن أن تنجح العلاقات وما هي التابو أو الشكل الثابت الذي يتم التسويق له، وفي صورة العلاقات الجيدة تجد نفسك( عمر ما حد هيقنعك أنك جميل إلا إذا كنت أنت مقتنع أنك جميل فعلًا).

احساسك بذاتك ومشاعرك هي وقود كل العلاقات واولها علاقة الزواج والحب، تحكي الكاتبة عن حالات كثيرة مات فيها الحب لأن أحد اطراف العلاقة لم يستمع للأخر لم يرى مشاعره ومن هنا بدأت الاتهامات من المقصر ومن قتل الحب؟ في حين أن ممكن يكون الطرفين قتلوه سوا!!

*في الفصل الثاني (الأجندة)
(لازم كل واحد هيبدأ علاقة أو داخل علاقة يقول لية أنا عايز أتجوز؟)
انهت الكاتبة في الفصل الأول حديثها بهذا السؤال واستكملته في بداية الفصل الثاني، كثير من العلاقات تبدأ بين طرفين متضادين، واحد رومانسي والأخر جاف في تعامله، واحد مرح والاخر عملي، كيف يمكن أن تتواجد سمات مشتركة بينهم ولكل منهم جزيرة خاصة يعيش فيها، ومن هنا تبدأ العلاقات في السير نحو النهاية إذا لم يتواجد مسار بين الجزيرتين!
عقلك وألا قلبك؟؟ في الأغلب العقل هو الأهم، ولكن الأقرب للقلب هو الراحة النفسية، بعض العلاقات العقل يجعلها تستمر ولكن تختفي فيها الراحة النفسية والعكس صحيح، وفي الحالة الأولى وبناءً على الكثير من الحكايات التي ذكرتها الكاتبة كانت الراحة النفسية هي الأهم فأنتهت العلاقات التي كان يحكمها العقل حتى وأن بدت مثالية.

*(رحلة البحث عن الروح) عنوان الفصل الثالث وتكملة لفكرة الفصل السابق، بعد أن حددت اختياراتك واستبعدت المتنافر معك والذي لا يشبهك في الاهتمامات والأحلام والصفات، كيف يمكنك أن تجد تؤام روحك؟؟
إزاي تعرف انك قابلت تؤام روحك؟ سؤال تطرحه سطور الكتاب، قد تتوافق مع شخص ما من حيث الظروف أو الأفكار ولكن هل هو تؤام روحك بالفعل؟ الإجابة هي اختبره بالبُعد.. نعم البُعد سيجعلك تعرف هل يمكن أن يمتلئ مكان هذا الشخص في حياتك بأي شخص أخر أم سيظل معنون باسمه إلى الأبد؟ تؤام الروح الحقيقي لا يمكن أن يأخذ مكانه أي شخص أخر، وأن رحل سيغلق ويكتب باسمه وحده.

*الفصل الرابع (المتاهة) هل بعد أن قابلت تؤام روحك ستنجو من المتاهة؟؟ العلاقات بجميع أنواعها معرضة أن تدخلك المتاهة ولكن هل ستخرج منها كما كنت؟ هل يمكنك أن تشعر بالألم لو لم تعيشه قبلًا؟ كلنا معرضون للخذلان والفقد ولكن المرونة هي ما تجعلنا نتخطى كل شيء، هل يمكن أن تخرجك المرونة من المتاهة؟
اية اللي بيعيق استمتاعك بحياتك وعلاقتك مع شريكك؟ في كثير من الأوقات تكون المتاهة وهم في رأسك فقط، المتاهة داخلك، ترغب في الراحة فقط دون بذل أي مجهود لرؤية مختلفة، في هذا الفصل تركت الكاتبة مساحة للقارئ أن يكتب رؤيته للعلاقة وما هي النعم في حياته وما الذي يمنعه من الاستمتاع بهذه النعم.
منظومة الزواج ليست فاشلة ولكنها تفشل بفشل من يديرها وتعليق اخطاءنا على فكرة الزواج نفسها وليست التصرفات التي قمنا بها في الزواج والتعامل مع الشريك.

* الفصل الخامس (حلقة في ودنك) - دايمًا بندخل الدرس عشان نتعلم، لكن الحياة بتدخلنا الدروس والأمتحانات والعقبات إجباري والغبي اللي ميخرجش فاهم ومتعلم كويس أوي- في الفصل الختامي بالكتاب وبعد توضيح الكثير من أنواع العلاقات ومشاعرنا فيها وتصرفاتنا التي يمكن أن تكون نتائجها سلبية أو إيجابية ضروري أن تكون هناك وقفة لمعرفة الإستفادة من كل هذا.
بالمناسبة يمكنني أخذ هذا الفصل الختامي بالكامل كاقتباسات وكأنه كان خلاصة كل الأفكار التي ذكرت في الكتاب.

*الكتاب بالكامل باللهجه العاميه البسيطه إلا بعض الفقرات التي كانت بالفصحى وبالنسبة لي كانت تسبب التشتت، أما عن الاقتباسات في منتصف الفقرات فكان يمكن أن تكون مميزة كمثال أن تكون مكتوبة بخط داكن مثلًا لتكون واضحة أكثر.

الفصول كانت طويلة وغير مقسمة والموضوعات فيها متتالية وراء بعضها، فلم أفضل تقسيم الكتاب بهذه الطريقة، إلا في فصل المتاهة.

ترك مساحة في نهاية الفصل الأول للإجابة على السؤال الختامي فيه كانت فكرة ذكية وأعتقد انها مرجع للقارئ لكل ما بُبني عليه كل الفصول التالية في الكتاب.
من أجمل الكتب التي قراءتها عن العلاقات.

*اقتباسات:
❞ أغلب كلام أساتذة التسويق قالوا عشان تسوق حاجة بطريقة صح وتجيب نتيجة أربط الشيء بقيمة أو بمشاعر، بيسموه التسويق العاطفى، إنك مش بتبيع منتج أنت بتبيع رسالة اتفاعل معاها الجمهور إنك تكون مهتم بالانطباعات الأولى❝

❞ الحب هو القانون العكسي للأشياء
‫ عذابه حلو، ومـره عـذب وسرقـته حياة، وروتينه وثباته موت. ❝

‏❞ ستارة المسئوليات تقيلة محتاجة عقل قوي وإيد تطبطب وقلب متداوي مش متكسر ❝

❞ يموت الحب لو ملقاش غلاف احتواء يحميه. يموت الحب لو اتولد الخوف. لما نقرر منهربش منه ولا نواجهه ‫ يموت لو حس إن بينا مسافة ولما نفكر في الكلام قبل ما نقوله ولما نقوله نندم عليه ‫ لما نتهم بعض مين اللي موته بدل ما ننقذه.. ❝
‏
❞ الراجل اللي يلاقي ست قوية ويضعفها راجل أحمق ده ممكن تكون جيشه وقوته وعتاده. ❝
‏❞ اسعى إنك تحسن من نفسك وابدأ بيها، بلاش تدخل معركة مع خصم وهمي ممكن تكون أنت فعلًا خصمك الوحيد، وترجع تقول تأتي الرياح بما لا تشتهي السفن ❝
‏
‏❞ كم تمنت هي أشياء لكنها تخلت عنها بكل سهولة لحظة اكتشافها أنها تعكر صفو سلامها النفسي. ❝
‏❞ «متدخلش علاقة وانت عندك أزمة أو معاناة»، متهربش من مشكلتك لمشكلة أكبر، متدخلش في علاقة وانت لسة خارج من علاقة، اهدأ على نفسك واتعلم الدرس وقيم الأمور. ❝

‏❞ «من رضى بقدرى أعطيته على قدري». ارضى بالقضاء عشان ربنا يبين لك الحكمة في هذا القضاء. ❝

‏❞ يقولون الكارما هي العدل الأخلاقي فمن يفعل الخير يجده ومن يفعل الشر يجده، فكل شخص مسئول عن نيته وأفعاله ولن يجني إلا نتاج فعله، هي الـتغذية الراجعة Feedback لحياتنا. ❝

❞ فالبعض يفهم الكارما أنها عقاب فقط لكن المفهوم الصحيح أنها إما أن تكون عقاب أو مكافأة، كما تدين تدان، ليس في الشر فقط بل بالجبر والإحسان وتطييب الخاطر، تدان في الخذلان والجرح والخيانة، وتدان في الأمل والنجاح والعيش الرغد. ❝

❞ ربنا هيرتب لك الخيارات الكتير اللي حواليك اللي متوهة قلبك وعقلك لما ترضيه وبس.. ساعتها هيراضيك فوق ما تتوقع من حيث لا تحتسب ❝

‏❞ اسمح لمشاعرك الحلوة تجمل أيامك، ومتسبش شيء جواك إلا ما تناقشه مع نفسك كويس، حياتك تستاهل طاقة سلام، هما يستاهلوا ولا لا دي بتاعتهم… المهم انت تستحق إيه؟!
‫ اللهم سلام أينما كنا. ❝
‏

[MoniCa Abdel-Malak · Rating 5 out of 5]

انا استاهل
دكتورة سمر درويش
١٨٦ صفحه
#ابجد

مفيش اجمل من شهور اني اقرا كتاب مناسب ف وقته بالظبط ❤️

انا استاهل كتاب بيتكلم عن الاستحقاق النفسي .. وعن تقدير الذات ..
الكتاب باللغه العاميه بسيط جداا .. ممكن يخلص ف قعده قرايه واحده لكنه بسبب اهميه المادة المقدمه . لازم يتاخد علي كذا قعده ..

الكتاب كمان بيتكلم عن بعض المشاكل النفسيه والعاطفيه وازاي تتصرف لو وقعت ف الفخ دا .. والاجمل ان دا ف صوره حوار بين الكاتبه والعميله 💌
استمتعت جدا بقراءته ، ونصائح كتير حددتها عشان استخدمها ف حياتي .. شكراا

بعتذر كمان للكاتبه .. لاني بسبب خداعي من التقييم علي الجودريدز ف بعض الكتب ، ظنيت ان التقييم العالي دا مجرد مجامله للكاتبه .. لكنه طلع كتاب يستحق ⚘️⚘️و ف انتظار كتاب الربح النفسي علي تطبيق ابجد لانه غير متوفر ف المكتبات🌷

[رضوى أحمد عيد · Rating 1 out of 5]

كتاب غريب مكتوب بالعامية والفصحى بطريقة مش حلوة تبقى بتقرا بالعامية فجأة تلاقي نفسك دخلت في الفصحى بطريقة تخليك مش عارف تركز 😒 الطريقة دي مقبولة في الروايات لما يكون السرد فصحى والحوار عامية لكن الكتب الأفضل إنها تتكتب كلها بطريقة واحدة يا عامية يا فصحى.. دي حاجة الحاجة التانية إن الكتاب اسمه أنا استاهل وبصراحة اللي جوة الكتاب ملوش علاقة بالعنوان يعني مفيش موضوع واحد مكتوب فيه أنا استاهل إيه..! وحتى الكلام اللي مكتوب أنا مقدرتش أطلع منه بحاجة مفيدة ومعرفش هي كانت عايزة توصل لإيه حسيته رغي ع الفاضي وكلام مش مترابط واقتباسات كتير حسيتها مقحمة في المواضيع وكنت بقراه بالعافية.. بس ع العموم أنا استاهل إني ضيعت وقتي ع الفاضي 😎

[Alaa Mohammed · Rating 5 out of 5]

Must-read ⭐