قطط الكهوف

by Mahmoud Ezzat

حاجة وتلاتين سنة
باكتب:
للمجد وللجايين والخلود والعِند والنجاح والصعود والأسئلة والتوهان والردود والعينين والشفايف والخدود واللهفة والهجران والصدود وكسر الحواجز ونط الحدود
واللي في علم الغيب
واللي أكلهم دود
يتهيألي دلوقتي
جه وقت اكتب لي



عن الشاعر

محمود عزت، كاتب وشاعر مصري
تخرج من كلية الطب جامعة القاهرة، ويعمل حاليا ككاتب سيناريو للسينما والتلفزيون
كتب فيلم "سعاد" بالمشاركة مع المخرجة آيتن أمين، أُعلن كاختيار رسمي لمهرجان كان السينمائي الدولي ٢٠٢٠
فيلم “أبو صدام” ٢٠٢١
شارك في كتابة فيلم "فيلا ٦٩"

ومن أعماله في الدراما
المشاركة في كتابة مسلسل "ما وراء الطبيعة" أول مسلسل مصري على نتفلكس، ومسلسل "دراما كوين" بطولة أبلة فاهيتا على نتفلكس، ويدير ورشة كتابة مسلسل "الآنسة فرح" الأعلى مشاهدة على منصة شاهد.
أدار ورشة كتابة برنامج أبلة فاهيتا لخمسة مواسم

صدر له
ديوان "شغل كايرو" بالعامية المصرية ٢٠٠٨
ديوان "عن الكائنات النظيفة" قصيدة نثر فصحى ٢٠١٠
ديوان "أحلى فيلم شفته ف حياتي" بالعامية المصرية ٢٠١٢
ديوان "زمني وزمن غيري" قصيدة نثر فصحى ٢٠١٩

Genres: Poetry

160 pages, Paperback

Published November 1, 2021

Reviews

[لبنى علاء · Rating 3 out of 5]

‏"يمكن خسرنا
يمكن لسه مكسبناش
يمكن يكون الآن..
أوان الهمج
وأواننا لسه مجاش
يمكن
ويمكن لا"

[Yosra Ali · Rating 5 out of 5]

ديوان #قطط_الكهوف ديوان صعب كتابته أوى بالنسبة لى. ديوان عايز شجاعة وتحدى كبير للذات. الكتاب بيقول ببساطة "لأ فى ناس سهلة وجريئة وماشية تخبط فى الدنيا بس عارفة تحط إيدها على عيوبها و مميزاتها. تواضع محمود مبهر، إزاى قادر يتكلم عن تجربته بجمالها ونجاحها وفشلها مع نفسه ومع إبنه وكتير حواليه! الصورة أخذتها عشان افتكر اليوم اللى قريت فيه الديوان وإن من كتر ماعجبنى، قريت ديوانه التانى وراه على طول.

[Zahraa Hussin. · Rating 4 out of 5]

حميمٌ وشخصي، أحببتهُ.

[Huda Abdelaziz · Rating 2 out of 5]

لطيف

[Mariam Hamdy · Rating 4 out of 5]

ديوان جميل أوي، بقالي فترة ماقرأتش شعر عامي كويس من الساحة
فيه قصايد ممتازة زي اقف هنا نبكي- زمني وزمن غيري- دوران- اعترف
قصيدة قطط الكهوف لطيفة، لكن كنت متوقعاها أحسن من كدا
الكاتب له لون مميز خاص بيه وقاموس مختلف

[Amr Ahmed · Rating 3 out of 5]

لطيف وصادق.

حاجات كتير انتهت،
مالحقتش احزن عليها
مالحقتش احزن لها…
اقف..
وابطل جري
وارفع ايديا لوشي
وانتحب م القهر
والافتقاد
والندم..

مالحقتش اتكوم..
واسيب الحزن يتصفي
يعدي بالي انتهي
م الضفة للضفة
يدفنه و يتنهد..
وياخد وقته
وهو بيحفر علاماته
على مشيتي و صوتي و كلامي و عينيا

[Mona · Rating 5 out of 5]

جميل. جميل. جميل.

[Ayat · Rating 4 out of 5]

زي ما قلت وهفضل اقول، انا غير متذوقة للشعر، بس فيه بالرغم من كده اشعار بحبها وبتقدر توصلني، جزء مش قليل من الأشعار اللي هنا وصلتني وحسيتها، ولكده أنا ممتنة وسعيدة ❤

[قسمت خالد · Rating 4 out of 5]

العزلة حلوة
‫ لو ف ضهر الباب
‫ طرقة ف آخرها دوشة الأحباب.
‫ باكتب لكم أحسن وانا لوحدي
‫ احتمال
‫ بس الأكيد
‫ باكتب لكم
‫ عشان ماكُنش وحيد.

[Nashwa Mahmoud · Rating 3 out of 5]

❞ يمكن يكون الحل في المحنة..
تعرّفنا في وسط الخلق
وتعرّفنا
مين إحنا
ومين محناش ❝

[Marwa · Rating 5 out of 5]

جميل أوي، مقرأتش ديوان عامي بالرقة دي من زمان، ويمكن لما الكاتب اختار إنه يكتب عن نفسه المرة دي، كتب عننا كلنا وهو مش واخد باله، ودي كانت أجمل لافتة بالنسبالي، أنا قرأته مباشرة بعد انتهائي من ديوان "زمني وزمن غيري " ومخيبنيش طبعًا، مبسوطة أوي لاكتشافي الشاعر ؛)

[دينا شحاتة · Rating 5 out of 5]

مفيش حاجة تحسسني بالأمل أكتر من الكتابة الحلوة الصادقة الأصلية
من أخر مرة قرأت ديوان " مانيفستو" لمصطفى إبراهيم، مفيش ديوان بالعامية المصرية لمسني، لحد دلوقتي، لحظة قراءتي لديوان قطط الكهوف لمحمود عزت.
يمكن أكتب أكتر عن جمال الديوان، يمكن أنسى، لكن الأكيد أنه ساب فيا أثر لايمكن محوه، وفي كام جملة، سنين كتير بفكر فيهم مش عارفة أصيغهم في كلام،لقيتهم قدامي مكتوبين
مش أجمل من كده مدعاة للأمل في جدوى الكتابة
شكرا والله

[Heba Ahmed Tawfik · Rating 4 out of 5]

"الصبح بصبح نوح
‫ بالليل أنام أيوب
‫ يمكن في آخر الحكاية
‫ أطلع نبي مجنون
أطلع نبي معيوب..
‫ بس هبني
‫ وإلا إيه هيكون
‫ معنى اللي كان ويكون؟
‫ مش مهم..
‫ أنا خلاص..
‫ اخترت:
‫ أطلع نبي معيوب..
‫ ولا أباتش يوم مغلوب."

ديوان بيوجع
بس في النهاية زي ما قال محمود درويش:
ما حاجتنا للشعر إذا قال الشاعر:
إن السماء صافية وإن
الحديقة خضراء!

[Rofaida Belal · Rating 3 out of 5]

" ما لحقتش اتكوّم
واسيب الحزن يتصفى ‫
يعدي باللي انتهى ‫
م الضفة للضفة ‫
يدفنه ويتنهّد. ‫
وياخد وقته ‫
وهو بيحفر علامته ‫
على مشيتي وصوتي وكلامي وعينيا ‫
يديني حاجة تقوللي ‫
إن اللي راح كان هنا
إن اللي راح كان عزيز"

‏--
يمكن خسرنا
‫يمكن لسه ما كسبناش
‫يمكن يكون الآن..
أوان الهمج
‫وأواننا لسه ما جاش
يمكن
ويمكن لأ
--
خليك نبيل ولو بنظرة حنينة :))

[Khaled Soliman · Rating 4 out of 5]

‏” يمكن نكون أنبيا

في المعركة الظالمة

يمكن نكون أغبيا

بنخشّ في الضلمة

بس احنا مش أوباش “
..
”يا بخت من شاف الحبيب فـي زهرته
ويا بخت من شافه حبيبه ورقّ له“
...
مستحيل الأرض دي
تكون حاسّة..
باللي بيدور فوق كتافها..
وتفضل تدور..
حتى ولو لفة
غير إنها بتلفّ للمجهول..
...
ديوان مليان ونس وكلام مكتوم يفجر منك الدموع أنا حبيته أوي.

[عبد الله عماد الدين · Rating 3 out of 5]

"ما بين ضلوعك وَحش لازم تعرفه
لو سبته ضال.. هينش اللي بيحمله
الناس جناين لو دخلت لأيُّهم
هيدوَّقك بالعِشرة عنبه وحنضله
صاحب عزيز النفس واقبل يخذلك..
مرة.. مافيش أصحاب ملايكة بينزلوا
دوَّر عينيك لو شفت عيبه وطمّنه
لكن في قلبك افرز العيب وافصله"

[Sherine · Rating 4 out of 5]

❞ خرّجنا منها عرايا

⁠‫زي ما دخلنا..

⁠‫لا وزرا ولا حاشية

⁠‫لا نلبس النياشين..

⁠‫خرجنا منها جُداد

⁠‫زي ما نزلنا

⁠‫عيال كتير ماشية

⁠‫من حدّ مش خايفين..

⁠‫خرّجنا منها الآن..

⁠‫نجّينا م التجربة..

⁠‫المعركة مرعبة

⁠‫نجّينا م التجربة..

⁠‫المعركة مرعبة. ❝

[Mohamed Khairy · Rating 3 out of 5]

جميل وصادق .
حبيت معظم الديوان، وبالأخص أوله وآخره .

[Nour Salah Nasr · Rating 4 out of 5]

إزاي أحس حنين لشيء
وأنا واقف قصاده؟
—

حاجات كتير انتهت،
مالحقتش أحزن عليها
مالحقتش أحزن لها
اقف
وابطل جري
وارفع ايديا لوشي
وانتحب م القهر
والافتقاد
والندم

—

شكرًا ع الونس اللطيف :))

[M.Elshahawy · Rating 4 out of 5]

واحد من أجممل الدواوين اللي قريتها
وفيه كام قصيدة عظمة العظمة.

[Ahmad Hussien · Rating 2 out of 5]

عجبني صلاة الخوف، ويمكن ويمكن لأ، المشي بنية النسيان.

[Badr El-Serwy · Rating 3 out of 5]

وسبقني حط في قلبي أحلام مؤلمة
عشّمني بالشط اللي عمري ما هوصله!

[Rania Sabry · Rating 4 out of 5]

بقالي كتير ما قرأتش حاجة أثرت فيَّ بالشكل دا.

[Nada Bedawy · Rating 4 out of 5]

جميل ومؤنس.. 💚

[خالد رضا · Rating 4 out of 5]

مستحيل الارض دى تكون حاسة
باللى بيدور فوق كتافها
وتفضل تدور
حتى ولو لفة
غير انها بتلف للمجهول

[Samar Hshim · Rating 4 out of 5]

❞ لعلّ وعسى.

‫ قلبي النهارده خفيف..

‫ على كل شيء كاين

‫ على كل شيء بيكون
‏

[سلمى المهدي · Rating 3 out of 5]

أنا من اللي بيعيشوا دلوقتي،
كإنه زمان.
وبيعيشوا اللي جاي،
كإنه الآن.

[fathi esam · Rating 2 out of 5]

بخاف عليّا م الأمل

‫ أكتر من اليأس الطويل.

‫ أبص له بتهويش

‫ لكن ما بشتمهوش

‫ وباقول: هذا الظلام زايل

‫ وحتما منتهي

‫ وفي قلبي عارف

‫ إن قولي فاشوش

‫ لكن هاقوله..

[Mohanad · Rating 3 out of 5]

لطيف جدا، في قصايد شديدة الجمال.