Sesselía Ólafs lauk námi í leiklist og leikstjórn í London árið 2012. Síðan þá hefur hún leikið hérlendis og erlendis, á sviði sem og í kvikmyndum.
Hún er einn stofnenda bæði gríndúettsins Vandræðaskálda og leikhópsins Umskiptinga, en undir þeirra formerkjum hefur hún verið höfundur og í höfundateymum fimm leikverka. Þá hefur hún samið og leikstýrt tveimur verðlaunastuttmyndum og var valin bæjarlistamaður Akureyrar árið 2023.
Sesselía hefur einnig lokið BA gráðu í enskum bókmenntum, gefið út pastelritið Leiðslu og árið 2025 gaf Bókabeitan út hennar fyrstu skáldsögu, Silfurberg.