سيرة الأراجوز

by خالد عبد القادر

سيرة الأراجوز

حبِّني الشارع
و حبيتُه
عضّ قلبي.. الليل
و عضّيتُه
خضِّني الإنسان
و خضِّيتُه
لمّا بان
من وشُّه.. عفاريتُه
***
كنت اشوف النور
و اشوف ضلِّي
كان يونِّسني الشَّبه
و اللي
عدّا فيّا مسابش نقطة دم
عدّا فيّا القمح
سمّرني
عدّا فيّا الفجر
صبّرني
عدّا فيّا الحزن
غيّرني
عدّا فيّا العُمر
كبّرني
خدني مِ اللفة
لمريلتي
خدني مِ التسنين
لحصالتي
خدني من مدرستي
عَ الجامعة
خدني مِ الترعة
على الأسفلت
خدني من بيتنا
لِحد القطر
سابني فوق عشرين سنة .. و خمسة
سابني للتوهة
ف محطة مصر
***
خدت مِ الأتوبيس
مراياتُه
خدت مِ السوّاق
حكاياتُه
خدت مِ الركاب
تذاكر موت
لفّ بيّا الموت
محطاتُه
***
شفت في الإشارات
بواقي الدم
شفت عَ الأسفلت
ساكسونيا
شفت في الشُعرا
القلق.. و الخوف
شفت ياااااما شفت
خُفت لاشوف
قلت اعيش أعمى
ف عز الشوف
***
حُزن يا بقال
ورا الجامع
هات بنص ريال
عسل في الكوز
خُد سنين الجري
و سنيني
هات لي سن غزال
دهب عيني
قطّع الأسفلت
شراييني
هات بياض القطن
شاش اللوز
دا اللي كان عيّل
بقا شاعر
و اللي كان ضاحك
.
.
.
بقا........... أراجوز

Genres: Poetry

75 pages, Paperback

First published January 1, 2007

Reviews

[BookHunter M ُH َM َD]

ياللي واحشاني
متوحشنيش
ضحكك السكر
ماحلانيش
خفت م المطره
قفلت الشيش
ليه فضل اسمك على الشباك

ديوان سيرة الأراجوز من الدواوين التي قرأتها ثم خرجت منها بخيط واحد فقط. خيط لا يلمع لكنه لا ينقطع. الديوان لا يصدم ولا يبتكر لكنه يتحرك في مساحة إنسانية هادئة. مساحة فقد وخفة وتردد. شعر لا يرفع الصوت لكنه لا يغيب.

أكثر ما بقي معي هو قصيدة سيرة الأراجوز. ربما لأنها تحمل هذا التوتر الطفيف بين الهزل والوجع. وبين جسد يتحرك بخفة وداخل يثقل كلما حاول الابتسام. وربما لأنها الوحيدة التي تركت في صدري ارتعاشة بسيطة. و هي أصلا سبب قرائتي للديوان بعد أن استمعت للأغنية بأداء فرقة عمدان النور الأكثر من رائع.

الديوان كله يسير بهذا الإيقاع. محاولة للتمسك بظل حياة هشة. ومحاولة أخرى لكتابة هذا الظل قبل أن يذوب. لم أجد فيه ما يشدني على امتداد الصفحات. ولم يهبني بيتًا أرجع إليه. لكنه أيضًا لم يخن الشعر. ولم يسقط في المباشرة الباهتة.

ثلاث نجوم لديوان لم يدهشني ولم يخذلني. فقط مرّ من خلالي وترك وراءه شعاعًا خفيفًا يشبه حركة الأراجوز نفسه. خفة لا تثبت لكنها لا تختفي تمامًا.

[حازم]

الديوان أكثر من رائع، مستغرب من كون الديوان عمل طبعة واحدة فقط، وأن خالد عبد القادر، لم ينل شهرة يستحقها. الديوان يتحدث عن ذلك الصعيدي، الذي جاء إلى القاهرة، باحثاً عن كل شيء، ففقد تقريباً كل شيء. كئيب لكنها كآبة من التي تحب أن تقرأها، تحمل تجربة حية، وشعر نابض، يرقص أحياناً، لكنها دائماً ما تكون رقصة الوداع.

[محمود قدري]

http://wwwmahmoudkadrycom.blogspot.co...
القول المحجوز في شرح قصيدة سيرة الأراجوز

لا يحكي في التاريخ العربي سوي سير الأبطال والقادة ومشاهير التاريخ,نتابع بطولاتهم وحروبهم بعطش حارق لتلك النماذج,التي حفرت أسماءها بحروف خالدة في التاريخ-علي الأقل الرسمي والمتداول,نحب نحن بعد المديح في المكمل والصلاة علي النبي الزين,أن نعيش قصص الأبطال وفتوحات المقاتلين,لكن هل فكرت يوماً في الاستماع إلي سيرة الأراجوز؟

سيرة الأراجوز قصيدة تحولت إلي أغنية,القصيدة لخالد عبد القادر والأغنية لفرقة عمدان النور,وكعادة أي عمل فني حين يتحول من وسيلة إلي أخري,قام يحيي نديم وفرقته بعملية حذف وإبدال وتغيير في القصيدة,لكن عبقرية الأغنية أنها لم تشوه القصيدة بل حولتها لأنشودة وصفها البعض بأنها إدمان.

البحث عن وطن هو ما يجمع معظم أدباء هذا الجيل.نشر الديوان عام2007,زمن الإحباط المستمر للآن,رغم بارقة الثورة التي لمعت ولا يزال المحبطون رغم إحباطهم يحاولون المحافظة علي جذوتها,لو كتب كاتب كلام لا يفهمه القارئ بدعوي الحداثة والتفكيك,وما إلي ذلك من أستار يتداري ورائها,فاعلم أن الحالة الفكرية في زمنه حالة متردية إلي أقصي درجة ممكنة,وقد كان الأدب عموماً حتي فترة قريبة عبارة عن ألغاز لا يفهمها القارئ,فكان لابد من خوفه المغلف باحتقار واستهزاء أمام الثقافة ككل,قبل البعث الأخير علي يد روائيون كعلاء الأسواني ويوسف زيدان,وشعراء كمصطفي إبراهيم,وخالد عبد القادر... مهضوم الحق في الشهرة التي يستحقها.

في كواليس الحياة الأدبية توجد أسماء لم يقدر لها الشهرة والانتشار للآن,وخالد عبد القادر نموذجاً,ولو لم ينتشر عبر فريق عمدان النور التي روت سيرة أراجوزه,ربما ما سمع الكثيرون عنه.غيره الكثيرون...

يثور سؤال هام:لماذا تحظي الأغنية بإعجاب طاغ من الشباب؟
قد يجيب سؤال عن السؤال:وهل ليس فيهم من لم تعبر عنه كلمات مثل:
حبنى الشارع وحبيته
عض قلبى الليل وعضيته
خضنى الأنسان وخضيته
لما بان من وشه عفاريته
**
عدى فيا القمح سمرنى
عدى فيا الفجر صبرنى
عدى فيا الحزن غيرنى
عدى فيا العمر كبرنى
**
خدنى م اللفة لمريلتى
خدنى م التسنين لحصلتى
خدنى من مدرستى ع الجامعة
خدنى م الترعة على الاسفلت
أليس فيهم من لم يعاتب صديقه أو ربما ذاته قائلاً:

مر انا يا صاحبى لو دوقتنى
جيت اقول الآه ما صدقتنى
يطرح ايه الملح غير مالح
يطلع ايه م الجرح غير مجروح

خالد عبد القادر في الديوان طفل لم يكبر,أو رجل ندم علي كونه لم يعد طفلاً,يحاول أن يستعيد براءته وذكرياته لكن الحزن في لسانه دوماً:
حزن يا بقال ورا الجامع هات بنص ريال عسل فى الكوز
ده اللى كان عيل بقى شاعر واللى كان ضاحك بقى أراجوز

هل يجلدك الطفل بداخلك أم تحاول أنت قتل الطفل؟
وببساطة طفل أيضاً,يشرح ما يحبه في الوطن والناس دون زعيق أو "أفورة" كلاسيكية:
و احب الناس
و احب البيت على البيت يبات مسنود
و احب الشارع
رافع ..كفه للضلمة بضي عمود
و احب القهوة و المترو
و احب المشي عالكورنيش
و احب النيل و لو مرضيش
يشرّبني و قالي مفيش
و احب بنات شبابيكي
و اقول بالعامي و الفصحى
" باموت فيكي "
يا سهرانة كما قمرات بيتغنوا
و احب الشعر
و خصوصا صراخ دنقل
كلام درويش
و احب منير.. غناه
" قلب الوطن مجروح , و حدوتة
سيرة الأراجوز,ملحمة تستحق أن تروي,رغم الكثير من الكلام المحجوز من الشاعر والقارئ,فكما تعلم العالم مسرح,والإنسان دوره معروف!

[إبراهيم عادل]

من الروائع طبعًا

حُزن يا بقّال ورا الجـامع .. هات بنص ريـال عسـل ف الكوووز
خد سنين الجري وسنيني .. هات لي سن غزال دهب عيني ..
قطّع الأسفلت شراييني .. هـات بيــااااض القطن شـاش اللوووز
دا اللي كـان عيِّل بقا شــاعر .. واللي كــان ضـاحك بقا أراجـوووز

نسخة الكترونية من الديوان
http://www.4shared.com/office/ovQWvwy...

[Marwa Eletriby]

حبيبت أقراه بعد ما سمعت الاغنيه
" سيره الاراجوز "


الديوان عموماً
مختلف ..
احساسه عالي


بعض القصائد عجبتني اوي ..

[Rogius]

الضرب ف الميت حرام . :)

...

" شكرا على غيابك
عشان
خلاني احس برعشة الكف اللي ماتت
من زمن . "
/
" شكرا
لأنك سبت خايف وسط خوفه
سبت الغبار يملاه
و يفرد عنكبوت الوحدة فوق صدره بيوت . "
/
" انا طيب
بتوحشني عيون الكل
ماحدش قال هـ توحشني . "

[Amira Mahmoud]

شعر يعني قافية موزونة
ومزيكا بترن بين السطور
فبعد اللي قرأته ده أقدر أقول وبدون ذرة تردد
*أنا قرأت شعر* :))

[Ahmed Oraby]

يا أرض عمار
بيحكمها الحديد والنـار
يا شفـة ورد بتبوس العطش تحتـار
ما بين موتة وبين موتة
يا ناس عايشة وأحلامهُم على النوتة
محدش شـاف ولد فايق
لكن سـكران ف حدوتة !

[Ahmed Mohsen]

عرفت خالد عبدالقادر من أغنية " سيرة الأراجوز " وبعدها قريت القصيدة كاملة عجبتنى جدًا ، وكنت عاوز الديوان عشان القصيدة دى ، وكنت متوقع إنى مش هلاقى فى الديوان غيرها ، قريت الديوان مع واحد صاحبى كنت أنا أقرا قصيدة وهو يقرا قصيدة والقصيدة اللى فيها كذا شخصية نتقاسمها - بالمناسبة الموضوع دة حلو جدًا " ، المهم الديوان كله جميل فى المجمل فعلًا ، كل القصايد فيها نفس الريحة ، ريحة ذاك الغريب ، سيرة الأراجوز عبقرية لحد كبير ، لكنى حبيت " الباب اللى مستنيه " - على ما أتذكر اسمها - أكتر ، قصيدة عبقرية . عجبنى الديوان ، وهقراه كتير إن شاء الله

[Amr Mohamed]

جبت لي صاحب وحبيته
زقنى فى المترو زقيته
واما مات فيا ومت انا فيه
روحتله بيته وعزيته

حزن يا بقال ورا الجامع
هات بنص ريال عسل فى الكوز
دة اللى كان عيل بقى شاعر
واللى كان ضاحك بقى أراجوز

حبنى الشارع وحبيته
عض قلبى الليل وعضيته
خضّنى الأنسان وخضّيته
لما بان من وشه عفاريته

عدى فيا القمح سمّرنى
عدى فيا الفجر صبّرنى
عدى فيا الحزن غيرنى
عدى فيا العمر كبرنى

خدنى م اللفة لمريلتى
خدنى م التسنين لحصلتى
خدنى من مدرستى ع الجامعة
خدنى م الترعة على الاسفلت

خدت م الاتوبيس مراياته
خدت م السواق حكاياته
خدت م الركاب تذاكر موت

ياللى وحشانى متوحشنيش
ضحكك السكر محلانيش
خفت م المطرة قفلت الشيش
ليه فضل اسمك على الشباك

كنت جايب دبلة وغويشة
كنت شارب خمرة مغشوشة
شفت شبهك قاعدة فى الكوشة
قلت هى لا مش هى
فتشتنى الدمعة عن ميه
كنت أنشف من حطب محروق

حزن يا محول خطوط سيرى
حزن يا عطار فى باب اللوق
شوفلى تحويجة لتفسيرى
حط ريحة بن لضميرى
شوفلى عود أصلب من المغشوش

حزن يا بقال ورا الجامع
هات بنص ريال عسل فى الكوز
دة اللى كان عيل بقى شاعر
واللى كان ضاحك بقى أراجوز


ردنى عالباب عطب روحى
جابلى ناى وزتونة مطروحى
مُرّ .. أنا يا صاحبي لو دوقتنى
كنت أقول الآآآه مَا صدقتني
يطرح ايه الملح غير مالح
يطلع ايه م الجرح غير مجروح

قصيدة اراجوز حلوة جدا جدا ولو القصيدة لوحدها في الديوان كان التقييم خمس نجوم
وباقي الديوان لم يعجبني واللي خلي القصيدة احلي بكتير الاغنية من عمدان النور وترتيب الديوان مختلف عن الأغنية
لينك لأغنية سيرة أراجوز

[إسراء البنا]

"و احب الناس
و احب البيت على البيت يبات مسنود
و احب الشارع
رافع ..كفه للضلمة بضي عمود
و احب القهوة و المترو
و احب المشي عالكورنيش
و احب النيل و لو مرضيش
يشرّبني و قالي مفيش
و احب بنات شبابيكي
و اقول بالعامي و الفصحى
" باموت فيكي "
يا سهرانة كما قمرات بيتغنوا
و احب الشعر
و خصوصا صراخ دنقل
كلام درويش
و احب منير.. غناه
" قلب الوطن مجروح , و حدوتة "


كانت سيرة الأراجوز على قمة الديوان ، و لكن الديوان لما يكتفِ بها .. "قميص شرقي" أكثر من رائعة
و كذلك "لـِ عِلمك" .
الديوان عمق شخصية الرجل الصعيدي الآتي للقاهرة ، و بناتها و شوارعها و تلك المدينةالمفتوحة التي أذاقته مُرها و حلوها .
استمتعت بالديوان جداً :)

[Aliaa Mohamed]

“فضلت تحب .. كل الناس
؟!وهما فين .. مُحبينك”

“أنا طيب
بتوحشني عيون الكل محدش قال.. هَتوحشني”


“الأستيكة
بحتاجها كتير
- و ياريت العُمر سطوره رصاص –”


“يا ناس عايشة و أحلامهُم
على النُوتَة
محدِّش شاف
ولد فايق
لَكِنْ سكران فِ حدوتة”

عدّا فيّا الحزن
غيّرني
عدّا فيّا العُمر
كبّرني

[Nabil Hamed]

ياللي واحشاني متوحشينيش
ضحكك السُكر محلّانيش
خُفت م المطرة قفلت الشيش
ليه فِضِل إسمك على الشباك !

[Eslam Sami]

أنا طيب
ماليش في الغربة و الترحال
ماليش في اللعب
وكل كروتي خسرانة
ولد يتقش
عمره ما قش
و لد محروق..
مالوش في الغش
و لا شايله
حصانه القش
بييجي
الليل
و من غير صوت
بینده.. کش
و اکش و اموت
طوابي الحلم مهدومة
و لا بتحمي اللي طار م العش
و بيسافر في مليون وش
يشوف بسمة
على وش الكلام تترش
و ينزل يلقط البسمة
يلاقي الفخ مصطاده
و صياده بريء منه
ملاك أبيض
أنا طيب
بتوحشني عيون الكل
محدش قال.. هـ توحشني

[Ahmed Ibrahim]

فتشتني الدمعة
عن مية
كنت أنشف
من حطب محروق

[إسراء فكري]

"حُزن يا محوِّل
خطوط سيري
حزن يا عطّار
ف باب اللوق
شوف لي تحويجة
لتفسيري
حُط ريحه بُن لضميري
شوفلى عود أصلب من المغشوش..
شوف لي حد يكون بيشبه لي
لو شبه شبهي
مايشبهْليش
لأ .. ده أنا شبهي
رغيف العيش
ولّا يشبهلي..حمام بيتنا؟
ولّا.. شجرة سُنط
مالية الحوش؟
لأ ميشبهليش غير اللّي غاب
حد لُه إسمي ولُه شكلي
كنت بضحك لُه ويضحك لي
"
..
"يا بنت يا أم الضل أخضر
طبطبي على ضهر محني
وقولي كلُّه يهون
ولكن..
كُلُّه إلا الإنتظار يا بنت
يحرق كل شيء
كان أو.. يكون"


مبيضحكش.
حارة سدّ.
ديوان مليان بالدنيا.. حقيقي.
شكرًا

[منى أبوزيد]

أقول ايه !!

الكلام بعدها ماسخ معنى و إحساس !..

[رنا]

دا جمال مصفّى

[Zeinab]

وكأن الكتاب ده اتبعتلى ف لحظه كان نفسى فيها اقرأ حاجه حلوه ، بس مكنتش اعرف انه هيبقى حلو اوى كده
شكرا لان لسه فى فى الدنيا دى ابداع بالشكل ده

[eman]

أنهيت قراءته مرتين في يوم واحد ،لم تمنعني لإيلاف داوود التي لم أفهم المغزى من كتابتها إلى الآن من تكرار تجربة القراءة لخالد عبد القادر
الكتاب دة أصبح من كتبي المفضلة :)

[Heba Tariq]

أنا طيب
بتوحشني عيون الكل
محدش قال.. هــ توحشني

بتخلق حالة جميلة

[Nada Elshabrawy]

انا يأست اني الاقي نسخة ورقية للديوان ده, ولكن لسة عند وعدي و أول مالاقيه هشتريه : )

أبيات أعجبتني :

و أحب الناس
شوارعهم دي مفتوحة على قلبي
و أعدي في صباح الخير
و أقول خبّي يا واد خبّي
عن الصاحب لايفتكرك بتحتاجه
عن البنت لاتعكر فساتينها
عن الشيخ - اللي شبه جدك ـ
لاتفرط سبحته عيونك
يا واد خبي على الدنيا
أكيد في السر, بتخونك !!

مالساعة كام للساعة كام
الوقت فات
لأ
مافاتش
كل اللي فاكره
إتأخرت
لكن ماجتش !

حتى شكل الضحك, بقى ميري .

يا باب يا مستنيه َ
رجع لك منِ حنين سواقيه
يادوب يقعد على الدكة
ف شد الزير
و صُب إسقيه
يا باب عدّيه
و يرجع تاني للسكة و هيسيبك
ف عّز حضوره مستنيه

يا ترى هي القضية تحب مين ؟
ولا القضية
انت ابن مين علشان تحب من الأساس ؟

[رويدا عبدالفتاح]

أول عهدي بسيرة الأرجواز كانت على يدِ فرقة عمدان النور و لسبع سنين كانت مفضلتي .. و لكني لم أهتم كثيراً بقراءة كامل الديوان .
المهم أني بسبب ما كلما سمعت سؤال introduce yourself وددت أن أقول أني :
عدّا فيّا القمح ... سمّرني
عدّا فيّا الفجر ... صبرني
عدّا فيّا الحزن... غيرني
عدّا فيّا العُمر... كبّرني
خدني مِ اللفة
لمريلتي
خدني مِ التسنين
لحصالتي
خدني من مدرستي
عَ الجامعة
خدني م الترعة
على الأسفلت .
_________________________
الشاعر صعيدي و أنا من الشرقية و الصعايدة و الشراقوة ولاد عم .. و أنا و ابن عمي في القاهرة كما قال خدنا من الأتوبيس مراياته و من السواق حكايته ومن الركاب تذاكر موت .

في الديوان كامل كانت مفضلتي ( الباب و اللي مستنية )

[Esraa Mohamed]

شفت ياما شفت..
خفت لاشوف..
قلت أعيش أعمى..
في عز الشوف

[Eslam Elsayed]

في الكواليس ناس كتير مُبدعة !
إزاي خالد عبد القادر مش مشهور ؟

ديوان شعر عامي ، من زمان مقرأتش حاجة زيّه كدا !

يستحق القراءة جداً :)

[Sabrin Gharib]

خدت مِ الأتوبيس
مراياتُه
خدت مِ السوّاق
حكاياتُه
خدت مِ الركاب
تذاكر موت
لفّ بيّا الموت
محطاتُه

[Ahmed Faid]

يا واد خبّي عن الدنيا
أكيد في السر بتخونك
و تعشقها
......

جرَّب تشوف دمك وتختبرُه
يمكن يكون أسفلت
مِتنَكَّر
في شريانك
يمكن تكون شرايينك نفسها
أنابيب
و بتكرَّر في قطرانك
يمكن تكون انتَ
صفَّاية بني أدميين
كُلّ اللي بيعديك بيسيب سوادُه
فاعجِن دراعك و احتِمل
لمّا تِغرز في الوريد
مواسير هوا
و انْزِف

اكتر قصايد عجبتني : طبعا سيرة الأراجوز "عشان الأغنية "
شفت في الإشارات
بواقي الدم
شفت عَ الأسفلت ساكسونيا
شفت في الشُعرا
القلق و الخوف
شفت ياما شفت
خُفت لاشوف
قلت اعيش أعمى
ف عز الشوف
......
جرن العيال "يا عيال نُضاف القلب
إيه اللي جابِركم
على الوطن ال .. وِسخ."
............
وسط البلد "لسه عيونك.. مصر جديدة محدش زارها
عايش قلبك.. رغم الضلمة
ف نوره الصافي
دوس ع القاهرة يا احمد
دوس بال ...
" أحمد حافي " !!""
...........
مبيضحكش
شايف.. حد قصاده في البلكونه"
و خايف يطلع هاجِس ضلمه
خيال للشيش
تعِب الواد
بص يمين و شمال
و ضِحِك
لكن هيَّ ..
البنت الواقفة ف نص أوضتها
ما بتضحكش""
.......
سيف خشب
"ولد مُدْهِش
بيعرف يدهِن الشباك
بِلون البُن
وِ يبرْوِز صور حالُه
فِ فِنْجالُه
يشدُّه الصبر بحبالُه
و هوَّ يضفَّر السِّكة
بخطوة بنت تستناه
و لكن لمّا غابِتْ
تاه.""
........
قميص شرقي
....
و رائعة " أبريق الشاى "

[Fatema Hassan , bahrain]

اختصر هشام الجخ هذا الألم المترامي في هذه النصوص الشعرية بكلمتين
( رافض أقولك يا وطن شعر وقصايد
رافض أصوغك يا وطن شعر وأدب )

وتناثرت الكلمتين بوحاً شفافاً على يد خالد عبدالقادر
وكلاهما أجاد في رسم الحدود الخارجية والداخلية للوطن
وببوحهما
تشكل الوطن
والمجد الوطن
بألمه وببساطته بناسه المنهكين من الطيبة و رغيفهم العاري من الشبع بغيطهم العامر بالخيرات وحلوقهم جافة و نيلهم الذي يجري لحريهم ويلهث لتعبهم ويمد كفوف أهرامه ليظللهم عن الشمس
قلوب تبحث عن الحب وحناجر ترتجي حق البوح
ومحاجر بتبص على بكره و يا ويلي من بكره
بكره مالوش أول عشان نسمي عليه
لما نشيله شيل
و مكانش له آخر عشان نبكي عليه
لو مره أخده السيل
في كل حته وطن جواه طيور حره
تعبانه من الطيران و مستنيه بكره


هي عادة قديمة كلما حركني الشعر
فردت جنحاتي
،،!،،

مقتطفات شعرية من ١٨ نص شعري ببساطتها تصل للقلوب


يا أرض عمار
بيحكمها الحديد والنار
يا شفة ورد
بتبوس العطش تحتار
ما بين موته ومابين موته
يا ناس عايشه
وأحلامهم على النوتة
محدش شاف ولد فايق
لكن سكران
في حدوتة
و لا بيخاف
شوارع فاضية بتعديه
ويعديها ومش بأيديه
ما بيحسش بأزمة ليل
وترمي له البنات مناديل
عشان ينزف عليها الجرح


بسيط ومؤثر

[Hager Abdelmonem]

اسم الكتاب: سيرة الأراجوز
عدد الصفحات: 78 صفحة
للكاتب خالد عبدالقادر
نوع الكتاب: شعر بالعامية المصرية
..
لو مامرتش عليك الأغنية دي يبقى فايتك كتير، اسمع
https://soundcloud.com/alsanhawy/aragooz

..
هنلاقي الشاعر بيبدأ بنفس كلمات الأغنية مع زيادات اختُزِلَت في الأغنية بالطبع 💜 القصيدة دي لوحدها 11 صفحة من الجمال💜 وفي الحقيقة ترتيب النَص مختلف فاقرؤوه🌸
بيقول:
"كان يونسني الشبه واللي
عدِّا فيا مسابش نقطة دم"
.
"يا اللـ وحشاني ماتوحشنيش
ضحكك السُّكر ماحلانيش
خُفت م المطرة قفلت الشيش ليه فضِل اسمك على الشباك"
.
"مُر أنا يا صاحبي لو دوقتني .. جيت أقول الآه ما صدقتني"!!
.


بيقول:
يا أرض عمار
بيحكمها الحديد و النار
يا شِفة ورد بتبوس العطش
تحتار
ما بين موتة و ما بين موتة

يا ناس عايشة و أحلامها
على النوتة
محِّدش شاف
ولد فايق
ْ لكِن سكران ِف حدوتة

[دعاء]

الحالة اللي انا فيها دلوقتي ما حصلتليش غير مرتين.
أولهم كانت لما كانت أول قراية ليا ليوسف إدريس قصة "بيت من لحم".. ومن ساعتها وأنا مش عارفة اقرا حاجة ليوسف إدريس بسبب إني بدور في كل قصة على (بيت من لحم) تانية.

والمرة التانية لما قريت الديوان دا.. (سيرة الأراجوز) كانت القصيدة اللي بدور على شبهها في بقية القصايد، ومش لاقية، ومش عارفة استمتع بالقصايد بطريقة استمتاعي واندماي مع سيرة الأراجوز.

غالبا دا عيب فيا أنا.
لكن القدر المتيقن منه ان الكاتب هو حد مش قليل.
على كل، هحاول اقراه تاني بعد فترة .. من غير سيرة الأراجوز عشان اعرف استمتع بالباقي، ولحين ما دا يحصل فهيكون الrate 3 نجمات