Ang Kartograpiya ng Pagguho: Mga Tula

by Ralph Fonte

Ang Kartograpiya ng Pagguho ay kuwento ng bigong pag-ibig sa apat na yugto. May iniiwan umanong bakas ang bawat pagdaraop. Sa gayon, tungkol din ang koleksiyon sa iba’t ibang paglalakbay at lunan, sa bawat sandaling nag-uumapaw ang damdamin sa katawan at nag-uukit ng alaala sa iniiralang sandali at lunan. Subalit hindi lamang gunita ang Kartograpiya kundi isa ring liham ng pag-ibig sa lahat ng nawaglit: mga taong minahal, mga iniwanang lugar, ang buong daigdig nating nasusunog sa bingit ng pagguho. Mga limot na bayan. Mga lumulubog na pulo. Mga basyo ng punglo. Bahagyang luksampati at bahagyang paluwalhati, tangka nitong imapa ang pagguho ng mundo sa iba’t iba nitong anyo, maging ang pagbalong ng rilag sa lahat ng pagkabigo. Sa lahat ng pag-ibig kahit nabigo. Sa lahat ng guho. Hindi dahil alindog lagi ang paglalaho kundi dahil minsan tayong nagmahal at minsan nitong binago ang mapa ng mundo.

Genres: Poetry

249 pages, Paperback

First published January 1, 2022

Reviews

[Led · Rating 4 out of 5]

Ninilayin ko munang maigi ang damdamin ko matapos nito...

[chi · Rating 5 out of 5]

Ayaw ko munang mawala

[Dean Gabriel · Rating 5 out of 5]

May angking mahika ang mga tula ni Ralph Fonte tungkol sa agham na makikita sa Ang Kartograpiya ng Pagguho. Bukod kasi sa kakayahan niyang lunurin ka sa kaniyang paghaharaya sa haynayan at pisika, walang humpay rin ang kaniyang hagod sa wika sa pag-akit sa iyo na huwag tumigil sa pagbabasa. Puno ng ambisyon, ang libro niya ay isang elehiya para sa mga taong minahal, iniwanang lugar, lumubog na pulo, at nilimot na bayan. At bagaman kinukumutan ng karimarimarim na realidad ng paglisan ang koleksiyon, nananatili sa mga siwang ang pag-ibig: Magkaiba ang minatamis at ang matamis. / Ang litrato at ang ngiti mo. / Liham at tinig. Na kahit sa tula tungkol sa pagsasalin ng materya sa liwanag, matututuhan mo na may pag-ibig sa pamamaalam: Ganito ang mundong walang araw: / laging hinahabol ang hininga at ang iyong alaala. Sa pagmamamapa ni Fonte ng pagguho, kasama ka sa mga madudurog. Ngunit, kaakibat nito ang pagkakatanto na ang bawat bitak na iyong sisimutin, ay minsan ding naging iyong puso—na gaya ng ating makatang kartograpo, minsan ka ring nagmahal. Isang doktor sa tunay na buhay, ipinapakita ng kaniyang mga tula ang kakayahan niyang hiwain ang iyong puso gamit ang matatalim na talinghaga. Tiyak siya sa kaniyang pagtistis, planadong maigi ang rubdob ng mga salita gaano man kahaba ang mga taludtod. At ang lunas na kaniyang inihahain ay ang hiwaga ng kaniyang mga talata.

Sa ganang akin, nararapat lamang na marahan mong bagtasin ang lumbay kasama si Fonte sa librong ito. Sabay niyong danasin ang pagguho, sabay tingnan ang puso at paglamayan ang minsang dati’y buo.