أنا راعي بقر وحيد

by خالد كساب

منمنمات غجرية
الصبر
مفتاح الفرج..
ماشي..
أوكيه..
الصبر بقى..
مفتاحه إيه؟!

Genres: Poetry

114 pages

First published January 1, 2010

Reviews

[sarah Elmshd · Rating 5 out of 5]

فلبى العبيط.. الحمد لله / لسـَّاه عبيط...
مع انه عارف .. انه مش هيسكر
/حتى لو يشرب محيط.../عمال يكربع فى ازازه الدراما
ويمز بالحواديت
قلبى العبيط...
فلينه واقعه فى ازازه نبيت....

[مصطفي سليمان · Rating 4 out of 5]

خالد كساب الربط الشرطي بتاعه
هو الدستور
ضربة شمس
الشعر الصغير
الصور
منير
الكلام المريب العجيب اللي جي من جوه لدرجة انك
تحس ان استحالة هيعرف يعبر عنه
يجي هو وبكل بساطة يكتبه
تقراء مرة واتنين وكتير
ويفضل السؤال
هو جاب المعني دا منين؟
بس مش مشكلة
المهم انك تبقي مستمع

[منار هانى · Rating 5 out of 5]

[Yasmina Faisal · Rating 1 out of 5]

لم يعجبني الكتاب على الإطلاق ذلك لان الإنطباع الأول للكتاب لم يكن جيدا أبدا بسبب سؤ تصميم الكتاب من قبل دار النشر .. كان الأفضل ان يكون حجم الكتاب في حجم كتب الجيب حتى لا ينزعج القارئ ببياض 90% من الصفحة .. فتجد صفحة كاملة مكتوب بها منمنمة واحدة مثل:

البنات
لغز
اللى يحله
يستاهله

وباقي الصفحة فراغ كامل ، الحقيقة اعتبرته استهتار وإستخفاف بالقارئ وإهدار لمئات من الصفحات الفارغة كان يتمنى اي شاب يهوى الكتاب ان يُنشر له ما يكتب في هذه الصفحات الفارغة !

على الغلاف الرائع لوليد طاهر وجدت الكاتب يصف محتوى الكتاب ( منمنمات غجرية ) تخيلت ان الكتاب كُتب بالفصحى ولكني وجدته مكتوب باللغة العامية !!! لم يأخذ مني الكتاب سوى نصف ساعة قراءة .. ينقسم إلى ثلاث أجزاء .. أنا - البنات - السكريبت ... أسوأ الأجزاء ( أنا ) وأفضلهم (السكريبت) ، المنمات بشكل عام باهتة ، سطحية ، ونمطية تدعي العمق ، أرى ذلك بوضوح في هذه المنمنة

كل الكتب
بتقول كلام
لكن كلام
عن كلام يفرق
تمام
زي الشقايف
كلها بتعرف تبوس
بس بوسة
عن بوسة تفرق


ورغم ذلك فأنا مقتنعة تمام الإقتناع بمقولة العقاد : ليس هناك كتابا أقرأه و لا أستفيد منه شيئا جديدا ، فمنمنات الجزء الأخير من الكتاب جيدة ، أعجبتني بالتحديد تلك المنمنة


المجد
للي أتمرد ع التابوهات
وأتعلم من الحكايات
واللي وصلوا
قد ما اتعلم من حكايات
اللي ضاعوا
المجد لكل حد
خلق لنفسه العالم بتاعه

وتلك أيضا

في ناس
ما بيدفعوش
تمن حاجات كتير
عملوها
وناس بيدفعوا
تمن حاجات كتير
ما عملوهاش
هي الحياة كدة
مجهدة
مش معمولة عشان تتفهم
معمولة
عشان تتعاش

[Shaimaa Rady · Rating 5 out of 5]

كل ما أفتكر حكياتي اللي فاتت أسرح..وأبتسم...وأتعجب...!!! وماافوقش غير علي فوران القهوة وأكبها..واحط سكر تاني وبن تاني ومن تاني ...أقلب

حياتك فيلم طويل...لسة أحداث كتير المفروض فية يحصلوا..حياتك فيلم جميل...يا تقعد ع القهوة وتتفرج عليه...ياتقوم حالا وتمثلة ..!


إركب قطر الدنيا..طلع راسك من شباكة..عشان تتفرج..واوعك تزعل...لما دماغك تخبط في العواميد..وسنينك تتدحرج من شباك القطر

[أسما حسين · Rating 5 out of 5]

كساب..دماغ :)
زى الرقصة الغجرية اللى بترعش السطور ع النغمة

[Sermeen Abdallah · Rating 3 out of 5]

الديوان او زى ما سماها خالد منمنمات مقسم لثلاث أجزاء : الاول " أنا " والثانى " البنات " والثالث " السكربيت " ، كتاب بالرغم من بساطته الا انه عميق مش بس فى المعنى دا هيخليك تفكر هو ازاى قال كدا مع ان الكلام بسيط اوووى ومش مكلكع :)


اقرأروه هتلاقوا فيه حاجات كتير منكم او بتعبر عنكم او كنت حاسس بيها بس مش عارف تعبر عنها :)

اكتر الاجزاء اللى عجبتنى الاول والتالت

بس كدا
:)

[ياسمين Thabet · Rating 4 out of 5]

خالد كساب الشاب الاسمر وشعره الكتير اوي في الصورة وكلماته اللي بتدخل القلب بطريقة غريبة

وضربة شمس ايام ما كنت باقرا الدستور قبل الثورة

كل اربع تقريبا كنت باستنى يوم ضربة شمس وباستنى كلمات كساب

ويصادف ان حفل توقيع كتابه الجديد يكون قبل حفل توقيعي مباشرة وفي نفس المكان
وااقابل الشاب الاسمر واخد توقيعه واتكلم معاه
صدفة جميلة وغريبة



طبعا خلصت الكتاب كله في طرفة عين وحاكتب الريفيو بتاعي بعيدا عن اني بحب خالد كساب

اول حاجة العنوان...انا راعي بقر وحيد...عنوان حلو جدا جديد ومبتكر وبيصف كساب بشكل دقيق...راعي بقر ترمز للتمرد والتيه ووحيد وهو فعلا تحسه كدة

تاني حاجة الغلاف وليد طاهر...رفيقه في ضربة شمس...مش كل الناس بتحب النوع ده من الفن الغريب بس انا بحبه

وحبيت انه اعتبر الكلمات مش شعر بل منمنات غجرية
الغلاف الخلفي والوانه عجبتني جدا

الكتاب مقسم لتلات اقسام انا – البنات – السكريبت
كل قسم فيهم عجبني فيه كلمات كتير



اكيد في بعض الكلمات تعتبر عادية بس في كلمات انا بعتبرها لوح تجريدية غاية في البساطة والعمق
وبحب نهايات الكلمات بتاعته
ودي الكلمات اللي عجبتني

[Tasneem · Rating 3 out of 5]

مفاجأة الحياة..
مليانة بميت مفاجأة..
و حاجات ليها العجب..
و لا تحزن ع اللي فات..
و لا تقلق م اللي جاي..
و لا تشعر بالغضب

يجيء راعي بقر وحيد و منمناته الغجرية كوجبة سريعة سهلة الأكل و الهضم و إن كانت طيبة المذاق..

توقفت فيها أمام بعض المنمنات و لم تعلق ببالي إلا واحدة..

أراه بصورة عامة عملا جيد.. و أظن أن هذه المنمنات بالرغم من سلاستها و صعوبة تصنيفها تحت مسمى .. نصوصا متعوب عليها


دا ياما كتير حاجات..
بتسيب الذكريات ..
و تروح من غير سبب..
و لسه ياما ناس..
في سيناريو الحياة..
ياما حتنكتب..

فبلاش تِتعِب في نفسك..
و تدّور ع السبب..

الحزن مالوش سبب..
و الفرح مالوش سبب

[shaymaa osama · Rating 1 out of 5]

الكتاب ادبيا

فيه حاجات تترواح بين العادى و الجيد و لاتتعدى دا

و اخلاقيا بقى
فى حاجات
كفيلة بالقاء الكتاب فى اقرب باسكت

صفح ترشح الكاتب يقدم سنياريوهات بدل وديع بتاع اعلانات ميلودى


الكتاب فعليا لا يستحق الشراء

[سارة درويش · Rating 3 out of 5]

حصلت على نسخة إلكترونية، أعتقد أنها غير كاملة
أحببت بعض المنمنمات وبعضها بالنسبة لي بدون أي معنى. تمامًا كالكتابات في صفحة ضربة شمس.
أعجبني ربما لأنه ذكرني بضربة شمس، بتلك الفترة السعيدة، وبنفسي وقتها..

[Abdelmoneim Hamdy · Rating 3 out of 5]

“المجد للي أتمرد ع التابوهات..وأتعلم من الحكايات واللي وصلوا قد ما اتعلم من حكايات اللي ضاعوا...المجد لكل حد خلق لنفسة العالم بتاعه”

“في لعبة الحياة
لما حاجة تزعلك
أرجوك..
ماتكتئبش
هي اللعبة كده ..
مافيهاش حلول وسط
ياتتلعب
ياماتتلعبش..”


لكل حاجة فى الحياة
اسطمبة وقالب و سقف وباب و شيش
اكسرهم وعيش

:)))

[Sahbaa · Rating 5 out of 5]

شتا و شارع و بنت
ايدها فى جيب الجاكيت
ماشيه حزينه و كمشانه
وعيونها فى الاسفلت
فجأه
ظهرنا قصاد بعض
اتثبتنا دقيقتين
بعدين
سبنا نفسنا لبعض
وف عز ما هى فى حضنى
لقيتنى
باصص للسما و انا بانزف
وباصرخ
مش فااهم

رد عليا صدى صوتى
و حتعمل ايه يا عبيط
يعنى لو فهمت ؟!
شتا و شارع و بنت ..

♥
تحفه :D

[Wafaa Farouk · Rating 4 out of 5]

عجبني ،، صادق وبسيط .. خلق عندي حالة غريبة بس مريحة
بغض النظر عن المستوى الأدبي أنا بحب الكتب اللي بتبسطني
و الكتاب بسطني :-)

[Lamia selim · Rating 5 out of 5]

المجد
للى اتمرد
على التابوهات ...
واتعلم من حكايات
اللى وصلوا ..

قد ما تعلم
من حكايات
اللى ضاعوا..

المجد
لكل حد
خلق لنفسه
العالم بتاعه

[Mohamed Alwakeel · Rating 5 out of 5]

خالد كساب رائع فعلاً! ممتع جداً وأفكاره رائعة..! بس عنده سنة نرجسية لا بأس بها ^^

[Yousra · Rating 2 out of 5]

كتاب صغير جدا وحابة أكتب مراجعة عنه على حاجتين

أولا: الشكل الداخلي للكتاب

الكتاب كان ممكن يبقى في حجم كتب صدرت مؤخرا عن دور نشر تانية غير الشروق زي حجم كتاب نيكرفيليا أو جذع تنون أو رسائل ترد للمرسل

الموضوع مش محتاج كل الفراغ الموجود في الكتاب

ولو سلمنا بإن الكتاب يفضل على حجمه أفضل ممكن القطع اللي واخدة صفحتين يتمضغطها في صفحة واحدة

مثال : الجزء الأول -أنا- في القطعة (4) ليه تتعمل صفحة كاملة لأربع سطور متشعلقين أعلى الصفحة بينما اول القطعة بادي من نص الصفحة اللي قصادها؟؟!! كان هينفع تتكتب في نفس الصفحة ويتبقى معاها فراغ كبير كمان... وزي المثال دة كتير

ثانيا: محتوى الكتاب

بعض القطع مميزة وبسببها إديت النجمة التانية

وبعضها حسيت إنه ملو فراغ...بتقول أي كلام

وعن جزء البنات: إيه حكاية البوس بالظبط؟؟؟ والله مكسوفة وأنا بكتب السؤال؟؟ عدوا الكلمات المتعلقة بالبوس هتلاقوها يمكن قد قطعة كاملة من الحجم المتوسط الواردة في الكتاب

والسؤال اللي مجنني ليه إستخدام الفصحى في كلمة واحدة وسط كل العامية

أنا الذي كل شوية
تتدألج الأيام بيا

كنت في دماغي بقولها

أنا اللي كل شوية
تتدألج الأيام بيا

وزيها في القطعة اللي في الصفحة اللي قصادها

ثانية واحدة
السؤال الورطة
هذا الحد
مفروض ينام امتى

وفي دماغي

ثانية واحدة
السؤال الورطة
الحد دة
مفروض ينام إمتى

حصلت على الكتاب من مشروع هات وخد وإلى هات وخد يعود

[محمد شعبان · Rating 2 out of 5]

الكتاب أدبيا لطيف ولا يتعدى ذلك .. هناك بعض القصائد فيها فكر وإسلوب ولكن على المستوى الأخلاقي والفكري فهناك من السلبية وسوء الخلق ما يجعلك ترفض الإعجاب بالقصيدة لأنها لا تعبر سوى عن كاتبها أو عن شريحة محددة من الناس .. زي تعامله مع البنات على إنهم شيء عادي ويقبوسهم عادي والسجاير بقى وغيره وغيره من نشر أفكار سلبية وغير أخلاقية تؤثر على قرائتك للقصيدة أو الخواطر .. على عكس بعض الشعراء الذين يراعون ما يمكن كتابته من ما لا يكتب

[Wael Mansour · Rating 2 out of 5]

إنتهيت من قرائتها فى ساعة واحدة فقط!!!!
ليس لجودتها، إنما لصغر حجمها المبالغ فيه.

مجموعة خواطر على هيئة شعر، بعضها جيد جدا و بعضها ليس له مغزى.

[Ghada · Rating 1 out of 5]

كتاب فيه حاجات حلوة عادية يعني وحاجات ملهاش أي لازمة ...الصراحة مكنش ليه لازمة إن الواحد يجيبه والحاجات الحلوة اللي فيه اخدها واكتبها على جنب والباقي يترمي !

[أحمد حسين · Rating 4 out of 5]

كتاب جميل جداً .. .. عجبتني حاجات كتير فيه .. ودي واحده منهم ..

كل اللي ناقصك
عشان تضحك بجد من قلبك
وسط الهموم الكتير إللي بتبكّي
يطلعلك هم واحد
بيضحّك .

[Eman Mourad · Rating 3 out of 5]

ديوان خفيف ماخدتش قرأته غير نص ساعة ، مقسم ل ثلاث أجزاء أنا،البنات والسكربيت
عجبني الجزء الاول و الثالث بس ، الجزء الثاني حسيته مبالغ فيه!

[ياسمين السعيد · Rating 1 out of 5]

مش عارفه الديوان ده ايه جابه عندي المهم انه من اسوء ما قرأت

[Hosam · Rating 4 out of 5]

كالعاده ، تقييمى للشعر العامى بتاع الناس اللى بيدورو حوالين جيلنا ،، اكبر شوية ،، بيكون كالتالى
تقراه ،، تحبه ،، تقراه تانى ،، تحس انه بيتكلم عنك ،، بيفاجئك ان بيكتشف اسرارك و حكاياتك
شعر خالد حقيقى و بيعيشك معاه ،، بس مش بيعيشك مع نفسك فى كل الديوان ،، فى جزء بتعيشه مع خالد
بتعيش مع بنى ادم ليه تجربه وحكايه ، واحد صاحبك بيحكيلك يعنى من الاخر
بيفكر معاك ،، وبيقولك على شوية هلاوس ،، عيش معاها بقى :)
-----------
انا الذى بعت روحى
للتوتر
و القلق
والتمن
حبة ورق..
-----------
لو كل البنى ادميين
ع كوكب الارض
اتفقو مع بعض
ع لحظة واحدة
يخرجو فيها كلهم للشوارع
ويبصو للسما
و يقولو آآآآه
تفتكرو يمكن ساعتها
يصدر قرار فورى
بالعفو عنهم
من حيرتهم
ولا هتزيد عقوبتهم
للحيرة.. مدى الحياة
!!!

[Belal Magdy · Rating 5 out of 5]

خالد كساب ..ادين له بالفضل هو وفريق ضربة شمس في جريدة الدستور الغراء /2009-2010 باني اقرا واحب القراية ..صفحته اللي كانت سبب في اني أشتري الدستور ..هو وطارق امام وعمر طاهر واحمد خالد توفيق وابراهيم عيسي..هو من أسباب اني احتفظ ب 100 عدد أسبوعي من جرنال الدستور فوق دولابي لحد دلوقت .
-----
حاجات كتير
فى حياتى اللى فاتت
راحت
بس لسه
عندى امل فيها
عشان كده
الزرعه الميته
فى بلكونتى
مع انها خلاص
ماتت
يوماتى باسقيها ...
-----
فلسفة خالد كساب ..جميلة ..رايقه ..علي نار هادية ..فنجان قهوة واغنية لمنير وحياة بسيطة ..وصفحتين ضربة شمس ..خلطة بسيطة جدا قادرة انها تفصلك عن الدنيا واللي فيها .

[Menna Kh. · Rating 4 out of 5]

أنا عايزه أشتري نسخ لحبايبي عشان يقروه
لغه جميلة و واقعية جداً و من كتر ماهي تعبر عنك تجدها مريبة
أنا لو هكتب كل حاجه عجبتني يبقى هكتب كتير
في بعض الأشعار مش مبهرة بس مش مهم

عجبني طريقة تقسيم الكتاب ل3 أقسام. قسم البنات كان عذب لكن أكثر ما تماثل معي هما قسمي (أنا) و (السكريبت)

تجربة رائعة وأتمنى أشوف لخالد كساب منمنمات أخرى :)))

[Mohamed El-Attar · Rating 4 out of 5]

.

الصبر
مقتاح الفرج
ماشى
أوكيه
الصبر بقى
مفتاحه ايه ؟؟

وقعت على هذا الديوان بالصدفة الباحتة
وأغرمت به كثيراً ، وأغرمت بصدق كلماته ومشاعر كاتبه
بسيط وعميق وواضح وقوى ، وينفذ إلى القلب بمنتهى القوى ومنتهى الرقة

كل ما افتكر
حكياتى اللى فاتت
اسرح
وابتسم
واتعجب
ومافوقش غير
على فوران القهوة
اكبها
احط بن تاني
وسكر تاني
ومن تاني
أقلب


.

[Mahmoud · Rating 3 out of 5]

الكتاب مقسم إلى ثلاثة أقسام

*انا
*البنات
*السكريبت


اعجبت جدا بثلثه الاول وبه الكثير من الاشعار المميزة
ولكن جاء الثلث الثانى اقل بكثير من الاول واقل كذالك من الاخير
الثلث الاخير جاء متوسطا ملئ بالحكم

احببت الكتب جدا ومن الممكن اعادة قراته فى المستقبل



كل اللي ناقصك
عشان تضحك بجد من قلبك
وسط الهموم الكتير إللي بتبكّي
يطلعلك هم واحد
بيضحّك

[Nahed Samir · Rating 5 out of 5]

كساب دماغ

[Eslam Elsayed · Rating 3 out of 5]

فيه حاجات عالية وتستاهل التأمل ، وحاجات تانية للحشو
ممكن إختصار صفحات الكتاب في نص العدد ده !!