السكان الأصليين للقلب

by عبدالرحمن حجاج

جريمة غريبة تفتح الأبواب المغلقة لسنوات على فندق "القلب" الذي يحمل بين جدرانه الكثير من الحكايات والأسرار.
بقراءتك لتلك الجملة فأنت تؤكد حجزك بهذا الفندق لتصبح أحد سكانه الأصليين، هذا الحجز يشمل المبيت، الإفطار، وسلسلة لا تنتهي من الجرائم، الحنين والهلاوس.
أتمنى لك إقامة سعيدة ورحلة هادئة.

Genres: Novels

200 pages, Paperback

Published January 26, 2023

About the author

عبدالرحمن حجاج كاتب وروائي مصري (مواليد الاسكندرية ١٩٩٢) تخرج من كلية الاعلام قسم اذاعة وتلفزيون، يعمل في مجال الاعلام كمدير ابداعي، معد برامج، صحفي ومخرج.

صدر له ( حنين اضطراري-آخر أيام آدم-زي كل سنة- ثلاثية كوابيس قبل النوم-في حضرة الموت-السكان الأصليين للقلب-بتوقيت الفراق).

Reviews

[MARIAM · Rating 4 out of 5]

حلوه أوي!
مليانة تفاصيل حلووة بشكل مُتقن! و دا اللي مخليني أثق ف أعمال حجاج و ابقي عارفه ان في حاجة حلوه مستنياني
عمل مثير من أول صفحة لآخر صفحة، النهاية كانت تراجيدية شوية و كنت حاسة اني مش مَرضيه، بس منطقية، يمكن أكبر انتقام كان ممكن يتردلهم هو ان السر اللي عاشوا عمرهم دافنينه، يطلع للنور و يدفنهم مكانه، و يدوقوا من نفس الكاس!

[zahraa esmaile · Rating 3 out of 5]

#قراءات2023
#السكان_الأصليين_للقلب

رواية تنتمي لأدب الجريمة، بتدور حوالين سلسة حوادث بتحصل جوة واحد من فنادق الإسكندرية العتيقة،

الحوادث بتحصل بفواصل زمنية متفاوته...ياترى مين السبب وراها؟؟ وايه حكاية القلب.. وياترى دي لعنة ولا قات..ل متسلسل؟؟

اسئلة كتيرة وعلامات استفهام بدون حدود مع كل فصول الرواية، اللي الكاتب قدر وبحرفية شديدة أنه يحافظ على تركيزي الكامل فيها ويبهرني بالنهاية كمان

الرواية مكتوبة بلغة عربية فصحى غالبا ف السرد، عامية غلبت على اغلب الحوار

الفلاش باك كان كتير ولخبطني جدا ف الاول خاصة مع عدد شخصيات الرواية الكبير...بس بعد كدة كام تمام وحسيته ف مكانه الطبيعي

وصف المشاهد كان لطيف، مشهد الانكشاف كان حلو قوي وفيه فلسفة عالية

ف المجمل...رواية مشوقة...ممكن تخلص ف قعدة واحدة، مناسبة جدا لتسريع تحدي القراءة أو لفك البلوك
#قراءات_ابجد
10/70
7-فبراير

[Hager Moharram · Rating 3 out of 5]

Quite different from حاوي but I like it
Although it could have been more

[كيرلس عاطف · Rating 4 out of 5]

رأيي في رواية #السكان_الأصليين_للقلب من تأليف الكاتب عبد الرحمن حجاج وانتاج دار الرسم بالكلمات

الحدوتة
الرواية بتتكلم عن فندق القلب السعيد اللي بتحصل فيه سلسلة طويلة من الاحداث البشعة، زي الاختفاء او التعذيب او القتل وغيره، تفتكروا بقا اية سببب الجرايم دي كلها، هل فعلا في لعنة بتصيب كل زوار الفندق بكل سكانه الاصليين؟ ولا الموضوع ليه علاقة بقاتل مستخبي بين السكان اللي كلهم اسرار؟

التعليق
١- اخر مرة قرأت فيها للكاتب كانت من سنتين او تلاتة، وحاولت بقدر الامكان مقارنش الرواية دي بأي عمل قراتهوله قبل كدة، بس مقدرتش.. لاحظت في الرواية دي تطور ملحوظ في كل حاجة تقريبا، اللغة والأسلوب والحبكة، حتى طريقة الكتابة نفسها كان واضح انها متغيرة ومش مستعجلة

٢-عجبني ان الحوار في الرواية كان موزون، يعني الحوار كان على قد الكلام المهم بالظبط، بعيدا عن الاطالة بتاعت، صباح الخير، وانت عامل اية، مبتسألش لية يا عم

٣-مفيش مشهد واحد في الرواية دي تم سرده على لسان الابطال، بمعنى ان كل المشاهد تم تجسيدها بالتفاصيل، ولو حد من الابطال حكى حاجة، بيبقا لحظث احنا شفناه بالفعل او ممكن عشان يزود تفصيلة صغيرة

٤-رغم ان في خطوط زمنية كتير في الحدوتة، لكن ده ملغبطنيش في فهم تسلسل الاحداث، كل فترة زمنية كانت مميزة بشخصياتها او بحالتها الخاصة، اللي قدرت افرق بينهم بسهولة من غير ما اقرأ التاريخ في بداية الفصل

٥-في نهاية الرواية الكاتب استعان بالفلاش باك كتير، ده طبعا عشان نحل لغز الرواية.. اللي ازعجني في الموضوع ان الكاتب كان بيضيف صفحات كاملة فلاش باك، في حين انه ممكن بفقرة واحدة يفكرني باللي عايز يقوله.. ده في مشهد بالكامل مكون من ثلاث صفحات، اتعاد فوق الثلاث مرات برضة، عشان كل مرة نزود سطر صغير في الاخر وخلاص

٦-نسبة التشويق في بداية الرواية كانت عالية جدا، وفعلا كنت عايز اعرف لغز السكان الاصليين، فكنت منتظر نهاية جهنمية تعوضني كل التشويق ده، لكن مع الاسف مكنتش حاسس انها مرضية، او على الاقل كانت محتاجة تفاصيل اكتر من كدة او مبررات.. يعني مثلا كنت عايز تفسير لتصرفات عماد، او يوم الصيد، طبعا ابسط تفسير هو
المرض العقلي، بس انا كنت عايز اشوف اسس وركائز للمرض العقلي ده اكثر حجة وقوة

٧-عجبني الربط بين الرواية دي برواية كوابيس قبل النوم، رغم انه ربط بسيط جدا جدا ممكن محدش ياخد باله منه، لكنه عجبني لانه بيثبت ان كل او اغلب روايات الكاتب في عالم واحد، انا بحب اي حد بيعمل الحركة دي لاني انا نفسي بعملها

الخلاصة
رواية السكان الأصليين للقلب رواية جميلة، هتعيش معاها جو جميل من التشويق، هتحاول تحل فيها الغاز كتير لكنك هتفشل

وشكرا
#كيرلس_عاطف

[Youssry Effat · Rating 4 out of 5]

المراجعة المرئية ع اليوتيوب
https://youtu.be/4YPURILGjvM

[REEMUU · Rating 1 out of 5]

*مكملتهاش

[Habiba · Rating 3 out of 5]

في أحد أيام التسعينات، و فى مدينه الإسكندرية تحديدًا توجد أسره يونانية. و من شده تعلق ألكسندر بهذه المدينه الساحره يقرر أن يرسخ اسمه بإنشاء فندق بالإسكندرية و يسمي الفندق "القلب السعيد"
و بعد فتره من الزمن تبدأ أشياء غريبه تحدث في الفندق و جرائم على مدار سنوات متتاليه .
فما يمكن أن يكون السبب فى هذه الأحداث ؟ أهي حقًا لعنة الفندق كمان يقول البعض أم ماذا؟
رأيي المتواضع في الرواية :
الروايه صغيره قرائتها سلسه اللغه مزيج مبين الفرحه و القليل من العاميه في الحوارات . الروايه حلوه جدا تخرجك من فتور القراءه . فكره الروايه جديده بالنسبالي عجبتنى جدا . التشويق بيبقى عالى فى كل صفحه الحوار مظبوط مش كتير على الفاضي . الشخصيات كتير شويه ، الانتقال بين فترات الزمن تقيله ف أول الروايه و الحبكه اللى في الاخر مكنتش منطقيه اوى بالنسبالي . الروايه خرجتنى من فتور القراءه و مش اخر مره أقرأ للكاتب
تقييم الروايه : 3.5/5 ⭐

[Ahmed Charisma · Rating 2 out of 5]

رواية سريعة مفيهاش ملل لكن للاسف الاسلوب مش أحسن حاجة والأحداث أغلبها متوقعة حتى التويستات إللي في الأخر كانت متوقعة برضه .. في تصرفات غير منطقية كتير وبدون أسباب واضحة .. والنهاية كانت غريبة جداً الصراحة .. كمان الفلاش باك كان كتير مكانش مستاهل كل ده لأن الموضوع كان مفهوم

[Adam Sherif · Rating 5 out of 5]

"مشاعرنا بتقدر تكدب علينا باسوء الطرق ، زيها زي البشر ، مشاعرنا بتقدر توعد و بتعرف تخون الوعود دي "

رواية قادرة تسحلك في كل تفصيلة فيها من غير اي زهق من اي نوع
رواية قادرة تعيشك في عالم و احداث و شخصيات و تنسي الواقع
رواية قادرة تخليك تشك في اي حد حواليك حتي نفسك
باختصار رواية قدرت فعلا تكون رواية متكاملة الاجزاء و تستاهل كل دقيقه انت هتاخدها علشان تقراها و تتمعن في تفاصيلها و تحب شخصياتها .
5/5 ⭐️⭐️⭐️⭐️⭐️

[Asmaa Mohamed · Rating 4 out of 5]

📌كل اللي بيجي القلب بيدور علي حاجه من الاتنين يا عزلة يا إجابات وللأسف مش بيطول حاجه منهم😈
📌ألا تمتلك الوحوش قلوبًا؟!
📌كل غلط لازم يتصلح بطريقة غلط😯

📌اسم العمل: السكان الأصليين للقلب
📌اسم الكاتب: Abdelrahman Haggag
📌عدد الصفحات: 197
📌تصنييف: جريمة، غموض، نفسية
📌إصدار: الرسم بالكلمات
________________________

📌نبذه:

📌أيها الضيف العزيز.
لقد حجزت لك غرفة مميزة بالفندق. هذا الحجز يشمل البيت والإفطار، والهلاوس، بالإضافة الى شعور مخيف بالحنين، وسلسلة لا تنتهي من الجرائم وحالات الانتحار
اتمنى لك اقامة سعيدة، ورحلة هادئة. 🫣😈

📌التقييم:

📌تدور أحداث الرواية في الفترة من عام 1909 وحتي عام 2034 في مدينة الأسكندرية، الشخصيات والاحداث بيتم التعريف بيهم بالتدريج بداية عندما بني "ألكسندر" اليوناني فندق "القلب السعيد" فندق غريب الأطوار توجد به لعنه تصيب كل من خطت قدماه هذا الفندق الا سكان القلب الأصليين جرائم متتالية الغاز كثيرة قصص غامضة فندق قديم يحمل بين جدرانه وأبوابه الكثير والكتيير من الحكايات والقصص والأسرار، تولي البحث في هذه الجرائم المحقق العبقري "طه" الذي فقد زوجته بداخل فندق "القلب السعيد" يبدأ البحث ليعرف ما هو سر الفندق؟! أهي يد خفية؟! أم أن السر له علاقة بالماورائيات والأشباح؟! تتوالي الأحداث إلي أن يتم الكشف عن الحقيقة وتأتي النهاية الصادمة عزيزي القارئ أعدك أنها نهاية غير متوقعة.

📌رواية تأخذ بالألباب تشعرك بالتوتر وشدة الأعصاب من اندماجك مع أحداثها وأنك تريد إنهائها لتعرف ما هو السر الخفي؟! أجد سلاسة في الاندماج سريعا في أحداث الرواية عنصر الغموض والتشويق ظل محافظ عليه الكاتب لـِ اخر صفحاتها.

📌تشعر أن الكاتب فتح لك أقفال وابواب الفندق وأقحمك بداخله وأغلق عليك لتتفاجأ بعالم برع في رسمه وأيقن كل تفصيلة فيه لكي لا يستطيع القارئ فكاكا منها.

📌أول عمل قرأته للكاتب كان "اخر أيام أدم" ولحظت تطور رهيب في الأسلوب واللغة حقيقي 👏🏻👏🏻 استمتعت جدا جدا جدا بالرواية وحقيقي مكنتش عاوزه انها تخلص بس امر لابد منه لكل بداية نهاية
#سكان_القلب_الأصليين
#عبدالرحمن_حجاج
#مراجعات_أسماء
#ترشيحات_أسماء
#قراءات_2023

[Amiraelmahdy · Rating 4 out of 5]

اسم الرواية:السكان الأصليين للقلب
اسم الكاتب:عبد الرحمن حجاج
دار النشر: دار الرسم بالكلمات
غلاف: إسلام مجاهد
عدد الصفحات :200 ورقي
تقيمي ⭐ ⭐ ⭐ ⭐

أيها الضيف العزيز. لقد حجزت لك غرفة مميزة بالفندق. هذا الحجز يشمل اامبيت، و الإفطار، والهلاوس، بالإضافة إلي شعور مخيف بالحنين، وسلسلة لا تنتهي من الجرائم وحالات الانتحار. أتمنى لك إقامة سعيدة، ورحلة هادئة.

هل حبنا لشخص يدينا الحق نحجر على كل تصرفاته وتعلقنا بيه وخوفنا عليه يوصل لحد القتل 🤔 لعنة فندق القلب السعيد كانت سبب تعاسة لكل ملاكه بس هل هي لعنة من الفندق ولا باختيار ملاكه انهم يستمروا في اللعنة وميبعدوش ويعيشوا حياتهم بعيد عن القلب.

يأخذنا الكاتب في رحلة داخل جدران فندق القلب السعيد عل مر أزمنة مختلفة، الانتقال بين الأزمنة كلها كان سلس وزاد من التشويق، كنت كل ما افتكر اني فهمت اللي حصل يحصل حاجة مختلفة لحد اخر لحظة، ممكن بس كان في تكرار لبعض الاحداث بسبب الفلاش باك واظهار حقائق مختلفة لكن كان بالنسبة ليا كويس بجل ما ترجع تاني للأحداث، عجبني جدا ظهور يونس ل إعجابي بشخصيته وتعلقي بيه، مش أول قرأتي للكاتب وبرشح كوابيس قبل النوم بجزئيها جدا.

اقتباسات :
⭐إلى الأشباح التي تطاردنا بلا هوادة، أشباح الخوف، الندم والحنين: فلترحلوا مع نهاية تلك الرواية. وإلى كل من سكن قلبي ولم يحسن سكنه :أثرك بالقلب ينتهي مع الصفحة الأخيرة من الرواية.
⭐القلب دايماً مفتوح للي بيدور على أمان أو ملاذ من العالم
اللي برا.. بس عمره ما كان مفتوح للي بيدخلوه عشان يفتشوا عن أسراره.

[Aiat Khalifa · Rating 5 out of 5]

عبدالرحمن حجاج
السكان الأصليين للقلب
احد مقتنيات معرض الكتاب❤️❤️❤️❤️
الذي حان عليه الدور في القراءة رغم اني لا وقفت شراء كتب ولا توقفت عن القراءة ولله الحمد
بس الكتاب ده لمًا خلصته زعلت اني استنيت عليه كل ده 🫶🫶🫶
الكتاب دمج ثري لأدب الجريمة و الرعب و الاهم علم النفس و دراسة الأشخاص من عدة نواحي كأصل شخصية و كيفية تحويلها لشخص اخر من خلال اغراءات متعددة و بيئة محيطة
بداية تكشف العديد من الجرائم التي تقع في فندق القلب السعيد
فندق كبير بعدد موظفين لا تتعدى أصابع اليد الواحدة
من يتوارثه يتوارث معه سر القلب ويجب عليه الحفاظ على هذا السر بحياته
أحداث سريعة من الحاضر و الماضي في أزمنة مختلفة و مُلاك جدد للقلب
نهاية مفاجئة بكل المقاييس تعكس براعة الكاتب
حين وصلت للجزء ما قبل النهائي كتبت:
إحذر ان تكون يومامن السُكان الأصليين للقلب
الغلاف غاية في الروعة و معبر جدا ف تحية 🫡 للمصمم إسلام مجاهد
اقتباس:
أصبح يقوم بمهامه بنفس لاقت حتفها.
ساعات بنحب الأماكن اللي بتفكرنا بذكريات وحشة لمجرد إنها بتفكرنا باللي بنحبهم.
يعلم ان أشباح القلب يقيمون بغرفها إقامة دائمة تشمل الإفطار و العشاء و الندم.
وضع أحد الأصفاد حول القدم حتى تظل حبيسة حتى و هي داخل محبسها.
مشاعرنا بتقدر توعد و بتعرف تخون الوعود.
حطام إنسان فقد كل شيء حتى روحه.
فقد مات كثيرا قبل موتته الأخيرة.

[Rawhia Basem · Rating 5 out of 5]

السكان الأصليين للقلب وللحقيقة مكانتش رواية عادية نهائيًا بالنسبة لي ومن أفضل الروايات اللي قرأتها السنة دي، سرد تحفة، حوار تحفة، حبكة رهيبة ومظبوطة، الرواية مزيج رهيب بين أدب الرعب النفسي وأدب الجريمة وحبة فانتازيا ورومانس وغموض فالأكيد إنك هتلاقي ذوقك والرواية هتعجبك من غير شك..شخصيات الرواية كتير فأكيد وأنت بتقرأ هتلاقي نفسك في شخصية منهم، الرواية مليان بلوت تويست وصدمات تحفة وكمان هتبقى متحمس جدًا تعرف ايه اللي هيحصل، الرواية احداثها بتدور عن فندق القلب السعيد بإسكندرية واللي حقيقي مكانش سعيد زي إسمه والغريبة إن الفندق ده أي حد بيدخله مش بيطلع منه بل وكمان في جرايم كتير من قتل وإنتحار وغيره مش عارفين سببها.. يا ترى ايه اللعنة اللي الفندق عاشها لمدة 100 سنة وإيه سبب كل الجرايم دي؟
كل ده هنعرفه في السكان الأصليين للقلب. 🤎🤎🤎🤎🤎🤎🤎🤎

[Malak Sherif · Rating 5 out of 5]

قصة فندق القلب السعيد
عالم جديد وغريب بنعيش فيه مع ابطال الرواية المختلفين واللي كلهم كان ليهم دور عظيم وكل شخصية كانت مرسومة بشكل كويس جدا عشان تكمل الصورة.
رواية رتمها سريع شدتني إني مسيبهاش من ايدي لحد ما أخلصها واعرف
ايه سر الجرائم اللي بتحصل بشكل غريب في الفندق؟
ياترى مين اللي وراها؟
والظابط اللي بيحقق في القضية ايه دخله بالموضوع ؟
وليه كل اللي بيدخل القلب مش بيخرج منه؟
طب ايه سر اختلاف الفندق ده ؟
ازاي مهما يمر عليه الزمن هيفضل بشخصيته الفريدة وسكانه الأصليين؟
و مين هما أصلا السكان الأصليين للقلب ؟
كل الأسئلة دي أجوبتها هتعرفوها لما في رحلة ممتعة ومشوقة بقراءة العمل ده
أتمنالكم إقامة سعيدة ❤️

[Mariam Ayman · Rating 5 out of 5]

بجد أنا مش قادره أتخيل ان لسه في حد مقرأش الكتاب …
حقيقي احلي حاجه في الكاتب ان كل القصص منفده علي بعضها يعني في حضره الموت و السكان الأصلين الي القلب منفذين علي الجزء الثلا من كوابيس قبل النوم انت متخيلين القوه في الكتابه و الروعه و التشويق عامل أزي ♥️
حقيقي أنا واحده بيحبها Block reading من اقل كتاب أنا خلصت التلت كتب في ٢٤ ساعه انتم متخيلين اد اي هم تحفه ♥️
مرجعتي للكتاب انه قصه دراميه تحفه طريقه كتابه تحفه بس كان عندي مشكله بسيطه ان حبكه الكاتب في النقل من موضوع لموضوع و الرجوع ليه مره تانيه مكنتش احسن حاجه بس الموضوع داه تتطور جدا في كوابيس قبل النوم و في الناب الأخير للكاتب( حاوي)♥️

[tal5esa · Rating 5 out of 5]

رواية السكان الأصليين للقلب
للكاتب : عبدالرحمن حجاج
دار النشر: الرسم بالكلمات
الرواية دي من اكتر الحاجات اللي كانت مميزة بالنسبالي فيها هو رتم الأحداث اللي كان سريع و مش ممل اطلاقاً ، لأن يا عزيزي القارئ في فندق القلب السعيد هيكون ليك حجز شامل البيات ،الفطار ، الهلاوس الحنين للماضي ، و سلسلة كبيرة من جرايم القتل و الانتحار

و عجبني استخدام الكاتب للتكنيك السينمائي اللي من خلاله بينقل القارئ بين الأحداث و المشاهد كأنه قاعد بيتفرج على فيلم ، ودي من الطرق اللي انا عن نفسي بفضلها في اي رواية

واخر وأهم نقطة بالنسبالي في اي رواية وهى الشخصيات ، اللي مع ان عددهم مش قليل و على فترات زمنية مختلفة الا اني كنت قادرة افهم البعد النفسي لكل شخصة و افهم الدوافع بتاعتهم

[Marwa Samir · Rating 3 out of 5]

رواية جريمة وتشويق ورغم انه مش ذائقتى المفضلة لكن بسهولة تقدر تعرف ان الكاتب موهوب فعلا لكن الافكار متزاحمة معاه شخصيات وخيوط وتصرفات كتيرة غير منطقية من الشخصيات اخلت بحبكة الرواية وكمان واضح جدا التأثر ببعض الافلام الاجنبية من نفس النوع بالذات فى مشهد النهاية ..
الوصف جيد جدا والفلاش باك كان ظريف وكان هيبقى احلى لو وافى لانى كنت باشعر انه بيتقطع قبل ما اعرف الغرض الرئيسى منه
الرواية مناسبة للشباب وبخاصة هواة اللون ده من الادب والكاتب يستحق التشجيع

[Rofida Mansour · Rating 2 out of 5]

كرواية رعب حساها مش قوية للدرجة إلى تخليني أرشحها لحد، أعترف إنها بدأت بداية غريبة شديتني إني أكملها بس علشان أشوف فين الصدمة والرعب إلى جاية أدور عليه بس للأسف مش لاقيته، وإيه النهاية دي كمان وحتى القافلة الغريبة إلى المفروض لما أقرأها أروح بعدها أقرأ سلسلة كوابيس قبل النوم بقة وكده معلش مش حمستني خالص بل مكانش ليها لازمة خالص من وجهة نظري
يمكن مستقبلا لو قرأت السلسلة ألاقي الرابط إلى بينهم، ولكن أعترف أن الرواية دي أطفت حماسي لقراءات عبد الرحمن حجاج كلها

[Sarah Elsayed · Rating 5 out of 5]

حقيقي يا حجاج ابهرتني
طبعا دا مش اول عمل اقرأه لحجاج انا قرأت كل أعماله وبالرغم من حبي الشديد لكوابيس قبل النوم 1&2 بس حقيقي الرواية دى تحفة خطفتني جواها مقدرتش اسيبها غير مع اخر صفحة انا عيشت جوه الفندق مع كل سكانه وضيوفه حبيتهم وخوفت منهم واتعاطفت معاهم واشفقت عليهم السرد عظيم واللغة بسيطة وسلسه والتويست اخر الرواية عبقرى حقيقي وفرحت اوى برجوع يونس ومنتظراه جدا 🥰

[Malak Adel · Rating 5 out of 5]

الروايه بتاخدك في رحله غامضه فندق القلب السعيد مكان ليه تاريخ طويل واسرار مظلمه بتنقل لك من كل جيل لجيل الروايه روايتنا بتبدا بخواجه يوناني اسمه الكسندر قرر انه يبني فندق في اسكندريه ويسميه فندق القلب السعيد يا ترى بقى ايه اللي هيحصل في فندق القلب السعيد ده اللي هنشوفه مع الروايه حقيقي من احسن الروايات اللي قراتها

[Haneen tharwat · Rating 1 out of 5]

الرواية بدايتها قويه و كويسه جدا و حمستني لدرجة عملت فنجان قهوة الساعه ٤ الفجر عشان نويت اخلصها مره واحده.

و اسلوب حجاج عموما سلس و سهل و يشدك انك تكمل قراءه حتى لو القصه مش عجباك.

لكن النص التاني بدا يبقى مش محبوك حسيت فجأه ان في حاجه غلط.

و بعدين جت النهاية اللي قتلت احساسي نحية الرواية، حسيت ان النهاية مش مفروشلها صح و غير منطقيه معجبتنيش و مأقنعتنيش ابدا.

[مي صالح · Rating 5 out of 5]

مش أول مرة أقرأ لحجاج بس الرواية مبهرة، الشخصيات والتعريف بيهم بيتم بالتدريج، فيه تويست في الأحداث النهائية مبهر وصادم جدًا جدًا، أجزم إن محدش هيقدر يتوقع النهاية فعلا، اللغة العامية للحوار ملائمة للأزمان بدقة واللغة الفصحى للسرد بسيطة وممتعة.. مبسوطة بالرواية دي جدًا

[The blue sticky note🌧️ · Rating 3 out of 5]

الفكره كانت بدايتها حلوه جدا ومشوقه بس حسيت ان الحبكة كانت محتاجه عدد اكبر من صفحات وكانت محتاجه تظهر واحده واحده عن كده كان محتاج يكون فيه تمهيد لازاي الانسان العزله تقدر تحوله لوحش ،الفكره كان يجي منها بس مكنتش مفروض تبقي قصيره او تخلص بسرعه دي

[Mave Samir · Rating 4 out of 5]

كان حلو اوي بس في النهايه كان الكاتب بيكرر الكلام و الصفحات بشكل مبالغ لدرجه اني عملت سكيب لصفحات و يمكن فصول كامله. بس كعموم ف الروايه كانت رائعه و طريقه الكتابه كانت جميله و البلوت تويست لاول مرا في روايه متوقعهاش +كفان اصلا لكوابيس قبل النوم ظهور يونس كان رائع و بسطني جداا!!

[RO.o Reads| Rahma · Rating 4 out of 5]

الجميع يعرف هذا جيدا مايحدث في القلب يبقى في القلب للأبد
الفندق ليس كما يبدو وكذلك الاشخاص..
قصه مختلفه عن كل قصص الفنادق الملعونه
كنايات كتير عن القلب الحقيقي بس في شكل اسم الفندق
تويستايه في الاخر غريبه جدا
رواية صغيره مختلفه وتستحق القرايه

[Mariam Ziedan · Rating 5 out of 5]

تحفه بجد، بتتكلم عن فندق بتحصل فيه حاجات غريبة في أزمته مختلفه وبننتقل بين الازمنه وبنشوف الترابط اللي بينهم، الروايه حرفيا خرجتني من ال reading slump عشان هي اساسا صغيرة 200 صفحه والفصول فيها صغيرة ف ده ساعد أن هي تخلص بسرعه ف تحفه بجد

[Nadeen · Rating 4 out of 5]

بما اني اعرف الكاتب تحمست جدا لقراءة هذا العمل لاني اعرف الكاتب كويس اعماله دايما فيها صدمات ولاكن النهاية كانت غير متوقعة بالمرة ادي للكتاب ٤ من ٥ لاني توهت شوية في الشخصيات و الزمان و الأحداث بس فهمت خلصتة الكتاب بقعدتين بس بجد الكتاب كان خطيرر

[Hana · Rating 3 out of 5]

هي رواية حلوة وكل حاجه بس مين يونس ؟؟ 🤔

[Maha Ahmed · Rating 3 out of 5]

حلوة وكل حاجة بس طريقة الكتابة مش احسن حاجة

[Retal Rady · Rating 5 out of 5]

حلوه ومليئه بالغموض والاثاره ونهايتها غير متوقعه "ابداع"❤️💥