رسم بالكلمات

by حسين بيكار

Genres: Poetry

159 pages, Paperback

First published April 1, 1981

About the author

حسين أمين بيكار (2 يناير عام 1913 - 16 نوفمبر 2002) هو فنان تشكيلي مصري من أصل قبرصي تركي. يدين بالبهائية
فنان تشكيلي متميز ينتمي إلى الجيل الثاني من الفنانين المصريين. وهو صاحب بصيرة نافذة، وذوق رفيع، أحب الموسيقي منذ نعومة أظافره، كما كتب رباعيات وخماسيات زجلية تمتلئ حكمة وبلاغة، ظل معطاء طوال حياته، ومعلما للكثير من الأجيال. وهو صاحب مدرسة للفن الصحفي وصحافة الأطفال بصفة خاصة، بل هو رائدها الأول في مصر. له أسلوب بسيط واضح ارتفع بمستوى الرسم الصحفي ليقترب من العمل الفني، أما لوحاته الزيتية فتتميز بمستواها الرفيع في التكوين والتلوين وقوة التعبير، فهو فنان مرهف حساس ،وناقد فني شاعري الأسلوب.
ولد حسين أمين بيكار في 2 يناير عام 1913 بحي الأنفوشي بالإسكندرية، التحق بكلية الفنون الجميلة عام 1928، وكانت وقتها تسمى مدرسة الفنون العليا وكان عمره آنذاك 15 عامًا، ليكون من أوائل الطلبة المصريين الذين التحقوا بها. درس في البدايات على أيدي الأساتذة الأجانب حتى عام 1930، ثم على يد يوسف كامل وأحمد صبري. عقب التخرج عمل في تأسيس متحف الشمع، وانجاز بعض الأعمال في ديكور المعرض الزراعي.
انتقل بيكار بعد ذلك إلى المغرب حيث قضى ثلاث سنوات مدرسا للرسم وهي مرحلة هامة في تكوين، حيث رسم بيكار أول رسومه التوضيحية هناك عندما وضع مدرس اللغة الإسبانية كتابا لتعليم اللغة للتلاميذ، طلب من بيكار مدرس الرسم آنذاك أن يترجم الكلمات إلى صور. عاد بيكار إلى القاهرة عام 1942، وعمل معاونا لأستاذه وصديقه الفنان أحمد صبري، وتولى رئاسة القسم الحر خلفا لصبري الذي انتقل لرئاسة قسم التصوير، وسرعانما تولى بيكار رئاسة هذا القسم بعد إحالة صبري للتقاعد.
المؤهلات العلمية :التحق بمدرسـة الفنون الجميلة العليا عام 1928 وتخرج عام 1933
عمل معيدا بكلية الفنون الجميلة
صاحب مدرسة للفن الصحفي وصحافة الأطفال
رسام ومصور وشاعر وفيلسوف
للفنان حسين بيكار ابنة واحدة هي (راندا) وتعيش في لندن مع إبنتها (روزا)

Reviews

[Draziza Ali · Rating 4 out of 5]

ممتاااااز ...يستحق اكثر من قراااءة
مجموعة من الكلمات البسيطة حاملة معانى كبيرة تبقى بوجدان حى ..
و مما اعجبنى ...
*و بدال ماتفنى عمرك تستغفر ذنوبك بالسبحة و السجادة ....
*افتح فى شارع الاحقاد للحب... مستشفى و عيادة ..

[Huda Aweys · Rating 3 out of 5]

حسين بيكار كان رسام و مصور و شاعر غاوي موسيقى و فلسفة ، من أصل قبرصي تركي ، و بهائي الديانة .. كتابه (رسم بالكلمات) كان جامع لبعض أشعاره ، و بعض رسومه اللي كان الغرض منها توضيح المعنى اللي في الأشعار ، .. و اللي التمست من خلالهم روحه الطيبة ، و الحقيقة ان القراءة لأصحاب الروح الطيبة ، بتزكي الأرواح و تطهرها
:) *****
(آسفة على عدم وضوح الصور)
**
اوعى تفتكر انك لو نفخت الشمس راح تنطفي
و اياك تظن انك لو شربت البحر راح يختفي
**
علمتني الحياة ان سهم يصيب و سهم يطيش
و علمتني الدنيا ان الأناني ياخد و لا يعطيش
و علمتني الحكمة ان الجبان يعري و لا يغطيش !
و علمتني الكرامة ارفع راسي و لا أوطيش
**
ياقلم ياللي بتبني أمم و بتزلزل عروش
بلاش تشك (الرمم) . لأنهم ما بيتوجعوش !
و بلاش تكلم سكان القبور و التوابيت و النعوش
لأنهم ... مابيسمعوش !

**
كرنفال الوجوه
لو كنت أفوت على كل الوجوه ، و أشيل منها القناع
اللي بيخللي أجبن جبان عامل بطل و شجاع ..
كان يبقى اللي فوق السطح ، تمام زي اللي تحت القاع
و ما كانش تفضل حواجز تداري النفاق و الخداع

**
الناس يا ابني يستهويها الأبهة و الفخامة
و مايفرقوش بين فص العقيق و حتة رخامة
و العبرة يا ابني موش بالشكل و لا بالضخامة
الرك على نفاسة المعدن و أصالة الخامة

**
عارف يا طويل العمر ، يعني إيه سحابة صيف ؟
غمامة فايتة في السما زي الشهاب و الطيف
و كل واحد في الحياة .. عابر سبيل ، أو طيف
و العمر واحد .. لو كان ع السرير أو بحد السيف

**
يالي بتسأل عن الحب . الحب عطف و أدب
الحب مهره غالي ، مايتوزنش بفضة و دهب
و ان كنت عاوز تعرفه شوف الفراش و أمره العجب
من كتر حب النور ، بيترمي في حضن اللهب

**
نفسي أتمدد تحت جميزة بلدنا و اتمطع
و اسمع غناوي الساقية و الكروان و اتمتع
و انسى اني جاي م البندر و انسى اني راح أرجع
أحسن كل ما افتكر الرجوع اتألم و أتوجع ..

**
أقصر طريق
فضلت أدور على طريق دوغري ، لا يميني و لا شمالي
طريق واضح زي ضي النهار .. ممتد طوالي
طريق أجعله زادي .. و زوادي .. و رسمالي
لقيته في كلمة حق .. أقولها من غير خوف بصوت عالي
و لقيته في لمسة حب ، ألون بيها موالي ..
**
مشيت في الدروب أخبط على كل باب
و اسأل سكان البيوت من الشيوخ و الشباب
و أقول : " لكل شئ في الوجود سبب من الأسباب ..
لكن قولولي ايه سبب قلة الأحباب ؟! "

**
افتح شبابيك الأمل .. و بص ع الدنيا و طل
و قول ياصباح الهنا .. ياصباح الريحان و الفل
و ادعي من صميم قلبك ، و اطلب النعيم للكل
ده صاحب القلب الكبير ما يرضاش لغيره الذل

**
نخيل بلدنا بيتباهى بتمره و طوله و استقامته
فارع و شامخ ، و الذعف تاجه و عمامته ...
أعلامه خضرة بترفرف لضحك النيل و ابتسامته
و جريده بيناجي السما ، و عمره ما بتنحني هامته
...
سألوني بتحب ليه النخلة أكتر من الصفصافة و الجميزة
قلتلهم عشان النخلة رافعة راسها . و دي عندي أكبر ميزة

**
الفرق بين كلمة عذب و عذاب حرف واحد اسمه
(ألف)
مش ممكن أقدر أشيله مهما أدور ، و مهما ألف
و الحبر اللي في عروق القلم .. مسيره يوم يزول و
(يجف)
و النقطة اللي تحت "الجيم" انقلها فوق الـ
(ح)
ان كنت يا صاحبي عايز في يوم تروق و
(تخف)

**
ميثاق شرف
لو أجبروك يا ابني تكنس الأرض برموشك .. اكنسها
و لو أرغموك تاكل اللقمة الحرام .. اوعى تلمسها
و لو هددوك بالموت تنكس راسك .. اياك تنكسها
و كلمة الحق خلليها على لسانك من غير ما تحبسها
و خللي نيتك صافية ، و اياك بالنفاق تنجسها

**
ياللي عايش حياتك محتار بين الخطأ و الصواب
و بتسأل على معنى الحلال و الحرام و لا انت لاقي جواب
الجنة باب مفتوح . لافيه حارس و لا بواب
للي يطهر من الذنوب قلبه .. و ربك للعباد تواب

**
يا عاشق النور يالي جعلت النور زادك و طبعك
بدال ما تلعن الضلام ، و بدال ماتشتكي مواجعك
ولع في الضلام شمعة ، و ان مالقيت ولع صوابعك !!

**
ما بين الألف و الواو ، عقلي الضعيف احتار
حروف بتنطقها الشفايف ، و ياما في الحروف أسرار
صحيح حرفين صغار .. و ياعجبي على الحروف الصغار !
الهدى في (النور) يا صاحبي ، و الويل و الهلاك في
(النار)

**
كبير القلب . عفيف اللسان . أبو الايدين النضاف
سلطان زمانه . مايهموش بكرة . و من الزمن ما يخاف
الدنيا داره . و الأرض مرتبته . و السما غطا و لحاف
شرابه الندى . و زاده الرضا . و بيته ضلة الصفصاف
**
في ليلة حلمت اني راكب مركبة
مزوقة بالورد و الدفة مدهبة
و الميه صافية و النسمة غنوة مطربة
لكن على البر شفت مناظر مرعبة
ناس شقيانين ، و نفوس كتير متعذبة
سألت النسمة بلهجة ناعمة مهذبة
ليه النعيم هنا و هناك نار ملهلبة
قالت لي أصل سلام النفس نعمة و موهبة

**
سألوني ايه لون الأمل ؟؟ ، قلت من غير ما افكر
ما دام الأمل هو الحياة .. يبقى الأمل أخضر
و الغل نار جوه العروق .. و لونه لون أحمر
و الأزرق عشان لون السما .. باحب الزراق اكتر !
و الأصفر لون الذبول .. عشان كده باكره الأصفر

**
نعامة قالت للحمامة .. أنا صنفي نادر و انتي زيك يامه
و ريشي غالي و فاخر . و شكلي في منتهى الفخامة
...
قالت لها الحمامة ، لو كان عندك شوية شهامة
ماكنتيش تخبي راسك كل ماتعوزي السلامة
أما أنا .. فدايما طايرة جنب السحاب و الغمامة
و ح افضل كده رمز السلام .. لحد ماتقوم القيامة

**
بصيت من الشباك لقيت الشمس طالعة و بترمش
و لقيت الربيع مغطي الغصون بزهرة المشمش
قلت لو ميت ربيع يروحوا من عمري ما يهمش
لكن لساني يفضل عفيف ، يمدح و لا يذمش

**
في دنيا الرحم يا ابن آدم عديت من الشهور تسعة
و ف دنيا العذاب جيت .. عشان تشقى و عشان تسعى
و ليه ماليك الغرور مادام ما تستحملش م الناموس لسعة !
و ليه ما ترحمش العباد . مع ان رحمة الاله واسعة ؟!
**
من جهله كان فاكر ان السعادة في الغنى و راحة الأبدان
سأل الحكيم .ليه واحد مش لاقي اللضا . و التاني عنده ميت فدان ؟؟
و ليه واحد لحافه حرير . و التاني نايم في الخلا بردان ؟؟
و ليه الحظ أعمى بيدي الحلق للي مالهش ودان ؟؟
قال الحكيم : صبرك ياولدي .. دا كل وقت و له أدان !!

**
يا صاحب القلب الرقيق ، ماتغركش دمعة التمساح
و لا تفتكرش أنياب الدياب ابتسامة حب و مزاح
دي رنة الأجراس مش دايما اعلان عن الأفراح
و ياما ابتسامات بتنطوي على الألم و الجراح

**
يا فاعل الخير يا اللي الأدب بيزين كل أعمالك
ان كنت عايز تحسن للفقير بجزء من مالك
ماتخلليش يمينك تشوف اللي بتقدمه شمالك

**
اضرب الرمل . و اقرأ الفنجال . و افرد الكتشينة
و حاول تخطي خط الغيب بطيارة أو سفينة
لا الطيارة راح تنفعك . و لا المراكب راح ترسى على مينا ..

**
يا عايش في الدنيا وحدك . من غير حبيب و لا صاحب
و واخد معاك وحدتك .. تتباهى بيها و تتعاجب
انت اللي مغلوب على أمرك . و فاكر انك الغالب
دي الدنيا صحرا كبيرة ، و رفيق الرحلة شئ واجب

**
يا صاحب القلب الكبير افتح شبابيك قلبك
و خلي نور الحب يطلع من ضلوع جنبك
و ان كنت ترسم بسمة على شفة حزين يغتفر ذنبك
و ان كنت تدمع عين ، يا ويلك من عذاب ربك

**
ان كنت عايز طريقك ينفرش بالزهور و الورد
أو كنت عايز حياتك كلها تبقى شهد في شهد
ماتقيمش بينك و بين الأمل جدار أو سد
و ابني مصيرك بالشرف و العمل و العرق و الجد
تعيش حياتك ملك . و عمرك ماتتحوجش لحد

**
واحد حكيم قال : لو كان معاك قرش اشتري بنص الفلوس وردة
و بنص قرشك التاني اشتري رغيف تسكت به المعدة
و ان كنت موش عارف تريح راسك على فرشة و مخدة
دورعلى صدر حنون يشيل عنك قسوة الوحدة

**
آه منك يا تليفون النكد . يا محطم الأعصاب
ياللي خليت عيشتنا بقت هباب في هباب
ياللي ماعلموكش الخشا لا ف مدرسة و لا ف كتاب
...
**
عجبي على اللي جيوبه مليانة و برضه بيطلب مزيد
و عجبي على اللي بيستعبده المال و عايش عيشة العبيد
و عجبي على أساور الدهب اللي زي أطواق الحديد ..
بتلف حوالين الرقب . و تكبل الدراع و الايد
و الله على اللي بيكسر قيوده ، أو يموت موت الشهيد
**
بخمسة جنيه تبيع كيلو الجنبري ؟
يا شيخ قول كلام معقول .. يا ظالم .. يا مفتري !
منين يجيبهم العامل . و الموظف . و الكمسري ؟
اللي عشان تمن الرغيف ياعيني عضمه بينبري ..
**
مسلسلات أصبحت كيف زي الدخان اللي متعسل
لا الست قادرة تدخل المطبخ ، و لا فاضية يوم الغسيل تغسل
غلبنا نترجى الشاشة الصغيرة ، و غلبنا نتوسل ..
تقلل شوية من الحلقات .. من غير ما تسترسل
لحد ما فقدنا الأمل ، و غرقنا في مسلسل ورا مسلسل
*****

[A.khalifa · Rating 4 out of 5]

لو كنت افوت على كل الوجوه ..وأشيل منها القناع

اللي بيخللي أجبن جبان عامل بطل وشجاع

كان يبقي اللي فوق السطح,تمام زي اللي تحت القاع

وماكانتش تفضل حواجز تداري النفاق والخداع

----------------------------------

شايل قلبه على كفه, وواقف في مهب الريح

لاقادر يخلص من قلبه, ولا عارف ازاي يستريح

حب يفتح بيبان قلبه عشان يداوي التجاريح

دور على المفاتيح , مالقاش يا عيني المفاتيح

--------------------------------------

النجاح يا بني مش مسرح ولا سيما تدخلها بتذاكر

عشان تنجح,لازم تسهر الليالي الطويلة وتذاكر

واللي يعلمك حرف اذكره, وخليك للجميل فاكر

ده فضله عمره ما يتنسى,و ملعون اللي للجميل ناكر

------------------------------------------------------

[Ahmed · Rating 3 out of 5]

الرسومات رائعة
لكن الخواطر بها الكثير من المثالية و الخيال

[Amr Ezdwag · Rating 5 out of 5]

من الكتب اللي قرأتها اكثر من مرة .. اشعار عامية تتميز بالخيال و المعاني القوية و الرسومات رائعة طبعاً و بتكمل الحالة الفنية

[Ahmad · Rating 4 out of 5]

بيكار كان فيلسوف متنكر في زي شاعر ورسام، الأزجال هنا بتتغنى بحب الطبيعة وزيف الحضارة وكلها حب للونس والصحبة ونفور من الوحدة والغدر
الرسوم أقرب للفن التشكيلي من الكاريكاتير
لا يُقرأ على عجل إطلاقًا، لازم الواحد يستطعم كل كلمة فيه على مهله
الصور الشعرية عبقرية وجديدة ميتشبعش منها
خسارة إن الكتاب الجميل دة مبقاش تنزل منه طبعات جديدة
لكن ربنا يخليلنا ال pdf، موجود الحمد لله نسخة واضحة
http://www.mediafire.com/file/mjogvd1...

[Mohamad Hallak · Rating 4 out of 5]

مجموعة من الكلمات البسيطة حاملة معانى كبيرة تبقى بوجدان حى ..

[marwa · Rating 3 out of 5]

حروف تنطوى على حكم حياتيه تغزلها انامل فلسفى ,رسام وفنان بحق ...أعجبنى رؤيته وإنتقائه لمواضيع تمسنا بالفعل بأوقات غفوتنا ليأتى هو ويعيد تذكيرنا بها بصياغه تجدد منها ومنّا