جمال بخيت > Quotes

“مش باقى منى
غير شوية ضى فى عنيا
انا حديهملك
وأمشى بصبرى فى الملكوت
يمكن فى نورهم تلمحى خطوة
تفرق معاكى بين الحياة والموت”
― جمال بخيت

“و ماذا قَد يضيرُ الشَّمس ,
إن هُم أغلَقوا الشّباكْ !؟”
― جمال بخيت

“إرجع بأه
وفك حبل المشنقة
وامسح همومنا باللقا
ياجدرنا تحت التراب
يا حلمنا فوق السحاب
يا عمرنا طال العذاب
فى الإنتظار
رجعوا التتار
لكننا أشواك بتتحدى العطش
وجنود بتتحدى الفرار
نسقط ساعات
لكننا نفضل كبار
نفتح عيون للانبهار
متشوقة”
― جمال بخيت

“مش باقي مني غير شوية ضي في عينيا..
أنا حأديهم لك وأمشي بصبري في الملكوت ..

يمكن بنورهم تلمحي خطوة تفرق معاكي بين الحياة والموت..

مش باقي منهم غير شوية قوة في إرادتي حاسبي عليهم وإنتي بتخطي..

مش باقى مني غير شوية ضي في عينيا .. أنا مش عايزهم لو كنت يوم ها ألمحك وإنتي بتوطي في معركة ما فيهاش ولا طيارات ولا جيش.. وإنتي في طابور العيش بتبوسي إيد الزمن ينولك لقمة من حقك المشروع..

مش باقي مني غير شَرقة في نفس مقطوع .. وأنا صوتي مش مسموع يا حلمنا الموجوع .. من المرور ممنوع.. وأنا صوتي مش مسموع .. مستني لما يمر موكب سلاطينك ..

ومش باقي مني غير شوية كفر بشروقك على شوية رحمة من طينك .. على شوية صبر من دينك..

مش باقى مني غير شوية لحم فى كتافي ..

بلاش يتبعتروا فى البحر ..

بلاش يتحرقوا في قطر الصعيد في العيد..

بلاش لكلب الصيد تناوليهم..

خدي اللي باقي من الأمل فيهم، وابني لي من عضمهم في كل حارة مقام..

وزوريني مرة وحيدة لو كل ألفين عام.. ألم الجراح يتلم..

ومش باقي مني غير شوية دم متلوثين بالهم .. مرين وفيهم سم..

مقدرش أسقيكي مواجعهم .. وبرضه ما قدرش أرميكي وأبيعهم..

يمكن فى مرة تطلبيني شهيد، ها أحتاج يوميها الدم يمضي على شهادتي..”
― جمال بخيت

“كانت رنا
وكنت أنا
وتالتنا حكمة ربنا
يؤمر .. نطيع ..
هو احنا نملك أمرنا ؟!
(كونوا)..
بقينا لوحدنا .. رغم الزحام
(حبوا)
ودوبنا ف حبنا
من غير كلام
دوقوا الحلال
دوقوا الحرام
واتمتعوا
جوه مقام العشق
تسجد لكو شمس المقام
أو مطر .. للابتسام
شفايفنا بدأت الانتقام
من كل لحظة اتسرسبت
من عمرنا
من غير ما نعرف بعضنا
كانت رنا
مكتوبة آيتي .. بسحرها
وخطوط حياتي في كفها
منقوشة روحي
في علنها وسرها
تهرب عيوني من عيونها
وتستخبى في نهدها
كانت رنا
وكنت أنا
وكان هوانا بينتشر
شمس وحنين
يملا قلوب العاشقين
والمحتاجين
حضن ووطن
والمنشدين رغبة وغنا
والعازفين
والعارفين
والموعودين بعد الضنا
كانت رنا
وكنت أنا
شمس .. وكواكب في المدار،
كعبة .. وحجيج
بيدوروا – ف أرض الهدى –
على نفسهم،
نارالهوى..
وفراشة جاية من المدر
فاكراها نور..
كانت رنا
غنوة تغنيها خلايا القلب
لزوايا الطيور
المجذوبين.. جوه فؤادي المنتشي
طلقوا البخور..
طالبين رنا توهة وسحر
والغواصين
في مهجتي ندروا الندور
عايزين رنا أرزاق وبحر
وانا رب أمة من الشعور
حارس على باب الغرور
مين يملك اللي بملكه
لحظة هنا..
بتختصر مليون سنة..
كانت رنا
وانا هاكون
زمن الجنون
واقف على كل الغصون
باعلن وفاة المستحيل
إشرب يا نيلي من البحار
وكفاية صمت أو انتظار
وكفاية نومة رحلتك
ف حضن راحة الانحدار
الانكسار..
عمره ما كان طلعة نهار
هاتي صهيلك يا رنا
يرمح ما بين دم العروق
خليني اغيب..
خليني افوق..
خليني ادوق حريتك
واغرق مع نور شهوتك
مجبور على حب الحياة
لو حتى املك الاختيار
إشرب يا نيلي من البحار
واكتب بدم المهزومين
غنوة.. مصيرها.. الانتصار
أول قصيدة كفر بشطوط الحصار
أو قصيدة شعر تتحدى الفنا
أو قصيدة حب
مكتوبة لرنا..”
― جمال بخيت

“انا فيلسوف
وعينيكى شوك الاسئله
عملالى حته مشكله
نظرت يمكن التقى فى الكون جواب
ما لقيتش غير حبه سحاب
متنتورين
اما اللى ثابت ف الفضا
وع الارض
وف طعم السنيين
سكه حنيين
خطوه جنون متبرجله
وتأملات الفلسفه متأجله
انا فيلسوف
وانتى ارتباكه عقل
او عمق ارتباكه
لا انتى شيطان
ولا ملاكه
ولا اى شئ واضح
يدل على الثبات
فكرت ابات فيكى
لقيت صدرك حجر
فكرت اهجر نظرتك
فلمحت فوق غصنك حنان
رمان بيوعد بالامان
وفواكه الكون كلها
بتهز فيا الاتزان
وكل لفته بمعجزه
وكل لمسه امتحان
يا ميت ندامه يا فلسفه



يا ميت ندامه يا فلسفه
شفايفها محتاجه الدفا
وشفايفى لسه بتعتزر
عن الزياره الخاطفه
عقلى اللى بيخاف م الشطط
هدد ف قلبى العاصفه
انا فيلسوف وانتى الحياه
محتاج الى طوق النجاه
طاوعى الجناح
وادينى احضانك فضا
او مصيده
انا فيلسوف
واحب اوصل للحقيقه مجرده
احب اوصل للحقيقه العاريه
فكى الضفاير
والزراير
والسدود
فكى الحدود
وحركى فيا الرعود
اروى اشتياقك بالمطر
وادوقك طعم الخلود
انا فيلسوف
وكرهت طعم الفلسفه
وباحب نور الموجودات
وبحب ايه تانى
البنات
والصبايا والبنات
ما ترسينيش يارب على بر الحقيقه
وكفايه طعم الغمازات
شهد وعجب
وديم عليا الانفلات
وبلاش تعب
شوفتى الجنان
انتى السبب
فجرتى فيا رغم عقل الفلسفه
ادب على قله ادب”
― جمال بخيت