Զահրատ > Quotes

“ՀՈՂԻ ՄԱՍԻՆ

Հողը շատ կը սիրէր –
Երկինքէն ինկած աստղի մը պէս էր Կիկօ
կ՚ ուզէր գիրկ գիրկի պառկիլ հողին հետ
կ՚ ուզէր հողը գրկել – գրկել հիանալ
մեռաւ – հասաւ մուրատին

Սակայն – չեմ գիտեր ինչու – աստղերը կու լան
Կամուրջը կու լայ
-Ողջութեանը Կիկօ ուրիշ մտերիմ չունեցաւ –”
― Զահրատ, Համառոտ կենսագրություն Կիկոյի

“ՈԽ

Միտքը դրեր է Կիկօ
Պիտի չմեռնի

Դուք բոլորդ պիտի մեռնիք
Աշխարհ Կիկոյի պիտի մնայ

Ու Կիկօ աշխարհի վրայ միսմինակ
Բոլոր հայելիները պիտի կոտրէ”
― Զահրատ, Համառոտ կենսագրություն Կիկոյի

“ԱՐԿԱԾԱԽՆԴՐՈՒԹԻՒՆ

Կիկոյի միտքը ման կու գայ քաղաքէ քաղաք
-Կիկօ աշխարհի մասին կը խորհի –

Կիկոյի միտքը կը սաւառնի մոլորակէ մոլորակ
-Կիկօ կը մտածէ արեգակնային դրութեան վրայ –

Կիկոյի միտքը կը ճախրէ աստղէ աստղ
-Կիկօ տիեզերք մը կ՚ երեւակայէ

Լոյսէն ալ արագ
-Կիկոյի միտքը կ՚ ուզէ սլանալ աւելի անդին

-Կը մոլորի – չի կրնար

Ձրի ճամփորդելն այսքան”
― Զահրատ, Համառոտ կենսագրություն Կիկոյի

“ՍԴՐԻՓ – ԴԻԶ

Նախ հագուիլ պէտք է
ՅԵՏՈՅ արուեստով հանուելու համար

Կիկօ արուեստը սորվեր է ՇԱՏՈՆՑ
ՀԻՄԱ հագուստին կը սպասէ”
― Զահրատ, Համառոտ կենսագրություն Կիկոյի

“ԿԻԿՕ ՄԵՌԱՒ

Բացօթեայ շատ պառկեցաւ
Թող քիչ մըն ալ հողին տակ քնանայ

Հանգիստ իր կօշիկներուն”
― Զահրատ, Համառոտ կենսագրություն Կիկոյի

“ՍԵՐԵՆԱՏԻ ՊԷՍ

Բարի սիրուհիի մը նման
մառախուղը թեւերուն մէջ է առեր Կիկոն
Երբ ամենուրեք խոնաւ է գիշերանց
խոնաւ – կայմերը կամ Կիկոյի յիշատակները –
պէտք է բոլոր լամբարները մտերմաբար բարեւել
պէտք է փայփայել Կամուրջին բազրիքները
յետոյ կծկուիլ մառախուղին ծոցին

Մառախուղը – բարի մառախուղը որ թեւերուն մէջն է առեր ամէն ինչ

ամէն ինչ – կայմերը Կղզիները կամ Կիկոն
բարի սիրուհիի մը նման կ՚ ըսէ
Ի՞նչ բան կայ աւելի հաւատարիմ
Քան մեծ վիշտ մը – առանձնութեան մէջ –

-Կիկօ կ՚ երազէ –
Բարի սիրուհիի մը նման
Մառախուղը թեւերուն մէջ է առեր Կիկոն”
― Զահրատ, Համառոտ կենսագրություն Կիկոյի