ميدو زهير > Quotes

“تدوّر وترجع وجع واعتكاف
وتطبع عليك السنين العجاف
وأول ما حُبك يقابلك يسيبك !
وأول ما حُبك يسيبك تخاف
صنعت سجنك م الهوا ودخلته بإرادتك
وإديت حبيبك نفسك، ما سألت فين حطك
وإكمن كله أذاك قررت تعشق ملاك !
يا اللي عشقت الملاك حتى الملاك صدّك”
― ميدو زهير

“انساب وليه تنربط
ياللى ف ضهرك جناح
احزن عشان تنبسط
وموت علشان ترتاح
دا الموت يعيدك لأصلك
بس انت موتك معصلج
ياللى انت وشك غريب
ياللى انت قلبك محاصرك
انساب و ليه تنربط
ياللى فى ضهرك جناح
احزن عشان تنبسط
و موت علشان ترتاح
امشى فى حظر التجول
واضحك فى عين التسول
تعتـر على المفتــاح
انساب”
― ميدو زهير

“ولأن خط الميرى أزرق
القلم ف الفصل أزرق..
ختمُه ختم النسر لازرق
واما قال مقلوب وهطفح
ركبوه البوكس لازرق
لبسوه ف السجن أزرق
واما أصبح جوا لعنة.. دق وشم اللعنة لازرق
والبنات القطر فاتهم
بخ تحت عنيهم أزرق
واللى ضايعة تستخبى
تحت ليل الهلس لازرق
والجميلة كى لا تُحسد
كان لابد الفص لازرق
والولد لفلف ودخن
فخ كان دخانه أزرق
مص دمه ودارى همه
فبنطلونه الجنز لازرق
وان قال حرام يرموه فمكان
ميعرفوش الجن لازرق
يبقى ليه لاحمر ولابيض ف العلم
لما هى لونها أزرق.”
― ميدو زهير

“ضايع منى إزازة الميه
و مش راضية الطيارة تطير
راح الصبر و رجع الصبر
و تعب القلب و لسه كتير
آه يا تى شيرت العمر ياأبيض
لفيت بيك مشاوير مشاوير

أملك صورة أنا فيها صغير
شكلى اتغير ما عرفتوش
كان فى جيوبى مكعب سكر
داب السكر ما لقيتهوش
و امّا اتقطعت منى الساعة
وقع الوقت لاقيتنى كبير

أعرف واحد قال لواحد
إهمل صاحبك و اقسى عليه
واحد قال للواحد نفسه
انت مزعل صاحبك ليه
واحد حاول يعرف واحد
طلع الواحد صفر كبير”
― ميدو زهير

“أنا أعمى على المكشوف
أربع أبعاد الشوف
البعد الأول روحي
والبعد التاني طموحي
والبعد التالت جهلي
والبعد الرابع خوف

العرض بيسرق مني
والطول مش راضي يعيني
والعمق اتحول سطحي
والوقت بتاكله ظروف

ويميني ناسية تسمي
وشمالي بتشرب دمي
وجبرني الحزن و هَمَي
عالمعنى المش معروف”
― ميدو زهير

“يا بلدي طول الطريق
بابلع ترابك ريق
و يوم ماعطشي اتسقى
كان سم في الأباريق
علّمني كتر البكا
أشحك في عزّ الضيق
و اتعلّم التريقة
ع الدنيا و المخاليق
و لحدّ امتى بقى
أطفي الحريق بحريق
يا سفينة متزوّقة
جوّاها ألف غريق
زهقت منّك بقى
و حاشوفلي أي طريق
مع إنّي طول الطريق
بابلع ترابك ريق”
― ميدو زهير

“وفضيت عليك نفسك..ياغاوى بنى أدمين..والقلب فيه حاجة..والحاجة يعنى الحين..والحين ماهواش مناسب ..ولا عمر ناسبك حين ..فرجعت برضك حزين ..رجعت برضك حزين....يا حد خايب وجداً..عرفت قبلين ما تحزن ..هتدى حزنك لمين..وتدى حضنك لمين...أحزن بقى على روحك..أدَن بقى على روحك..يمكن حاجات جواك..تنطق تقولك آمين”
― ميدو زهير

“أعوذ بالله قد عمري ما دام
وأعوذ بالله نفسي أبقي تمام

أعوذ بالله من يأس ف الشكوة
ومن الحوجة اللي ف الشهوة
ومن العوجة اللي ف الأجسام

أعوذ بالله من غواية العين
وأعوذ بالله من لقاء جنسين
وأعوذ بالله من النَفَسين
من السُكر و من البرشام

أعوذ بالمية تنَضَف الأعضاء
وأعوذ بالنار تحرق الأخطاء
وأعوذ بالنفس اللي غاوية عطاء
وأعوذ بالصفا لجل بس أنام

أعوذ بالناس تجتمع وتفوق
وأعوذ بالرحمة اللي ليها حقوق
وأعوذ بالله من دقن قاتلة الحمام

أعوذ بالله من وطن سايب
وأعوذ بالله من ضمير دايب
وأعوذ بالله من رئيس هَدام

أعوذ بالله من دخول الخوف
وأعوذ بالله م الأذي المحدوف
أعوذ بالله ف امتداد الشوف
و ف الرغبة ل خطوتين قُدام
أعوذ بالله...
نفسي أبقي تمام.”
― ميدو زهير

“والصدق سبيرتو في ازازة ، تفتحها يطير”
― ميدو زهير

“الكرسى اللى قعدت عليه
زهقان من نفسه
وانا حاسه
فسالنى طب نعمل ايه
قلت له ايه
افرد رجلك
ريح ضهرك
ضهرك متخشب كده ليه
فقالى يابيه
ضهرى الناس مسنوده عليه
وسيادتك ساند من بدرى
قمت وخد الكرسى فحجرى
دعكتله ضهره
وبوست ايديه”
― ميدو زهير, حقنة هوا