ايرين يوسف

“أيّوبة ..
عروسة قماش ..
قلبها موعاش ..
غير ع القصاقيص
عملتها الجِدة بباقى التوب .. وسابتها لحد ما ييجى عريس
واستنّوا كتير ..
- جه؟ - لسة مجاش
استنوا أكتر ..
القلب اتفتّح واتدوَّر..
دبت فيه الروح..
أصبح ممنوع كل المسموح
طِولت ضفايرها.. فخبوها ..
عِليت ضحكتها.. فربوها ..
زعلت من خالها ومن أبوها
قعدت تستنَى، الباب خبط
- جه؟ - لسة مجاش.. لسة مجاش..
دا الواد الحلو البكاش
بيبص ويوعد وبيجرى
مابيستناش الكداب ..
- طب نسمع هيقول ايه يامّا!
اتسك على ايديها الباب ..
أيوبة هتنسى وهتعدى ..
وهترفِى الفستان الوردى ..
القلب قماش لكن قيمة ..
هينام على أغنية قديمة ..
وهيصحى تمام ..
وهيستنّى .. الباب خبط
- جه؟ - لسة مجاش .. ابدئى خافى
دا الواد ابن الكلب الحافى
بيقول شارى ومعهوش مليم
- استنَى ماتطردهوش يابا
- اتلمى. بلا شغل حريم
أيوبة هتنسى وهتعدى
وهترفِى الفستان الوردى
القلب قماش لكن قيمة
هينام على أغنية قديمة
وهيصحى تمام ..
وهيستنّى .. الباب خبط
- جه؟ - لسة مجاش.. طفّوا وقيدوا
دا الناس بيقولوا وبيعيدوا
أيوبة اتأخر ليه عَدَلها
- والناس يامّا مالنا ومالها
- لا مالنا ازاى ادينى أتَرك
لو مش معيوبة ما كان سترك
- طب مانا مستورة ومرضية
اتنفضوا خدهوا على مشامها
- انا عمرى شكيت م العيشة دية؟
أيوبة ملوش لازمة كلامها
بقى زار فـ مزار/ وحريمه كتار/ لف ودوران/ وطبول ودفوف
وفَكك وفكوك/ تحاويج عطار/ وتدوخ وتقع/ وتشيلها كفوف
وحجاب فـ حجاب/ الصوت يحتد/ وصويت وصراخ/ من تحت لفوق
تهرب. تتجاب ../ تبعد. تتشد ../ وتنام وتقوم../ وتغيب وتفوق
الزار طوِّل .. عمرين عدّوا ..
ملعون دا زمان ملعون دا مكان
الناس وامها سكتوا اتهدّوا
بعد ما جابوا أجل الفستان
وكَسوها الأبيض بالعافية
لاجل ما يكتموا على أى لسان
أيوبة هتنسى؟
هتعدى؟
ايه ذنب الفستان الوردى؟
ايه ذنب القلب الغلبان
القلب قماش بس مصدى
كان حلو بيلمع وستان ..


ايرين يوسف”
― ايرين يوسف