Hossam’s
Comments
(group member since Apr 18, 2012)
Showing 1-2 of 2
بسم الله الرحمن الرحيم بحمد الله تم تانى لقاء لينا و اللى ممكن نعتبره بفضل مجهودات الناس اللى حضرت مفيد لكل اللى شارك
كان ضيف اللقاء بتاعنا الكاتب عمر طاهر وجوده اضاف كتير للقاء و بنشكره جدا على حضوره و على مساهمته فى تسهيل دخولنا للقلعه
************************************************
شويه معلومات بسيطه عن اللقاء
1- عدد اللى قال انه هيحضر على فيسبوك اكتر من اللى قال انه هيحضر اللقاء اللى فات بس عدد اللى جم اقل :)
2- لتانى مره جت طفله عمرها 10 سنين حضرت اللقاء و كان عندها امتحان تانى يوم و جت تذاكر
3- كان تنوع الكتب الموجوده اكتر من المره اللى فاتت و عدد الكتب كان اكتر
4- شاركنا اصدقائنا من حمله هات و خد * اللى ليها نفس الهدف بتاعنا من نشر الوعى و القراءه
5- الدنيا كانت حر جدا جدا جدا و نشكر كل واحد جه اللقاء و ضحى بدماخه اللى ساحت فى اللقاء ده
************************************************
سير اللقاء
1- اللقاء بدأ بحوالى ساعتين قراءه
2- بعد كده الكاتب عمر طاهر ادانا مقدمه عن نفسه و الحاجات اللى بيحب يقرأ فيها و يكتب فيها
3- الجزء التالت (كان مفيد جدا) كل واحد قال فى عجاله حوالى 5 دقائق عن الكتاب اللى كان بيقرأ فيه و كذا واحد
قرر انه هيقرأ كتاب من اللى سمع عنه . شكرا لكل اللى اقترح الاقتراح ده
4- كان فى شويه اقتراحات بسيطه فى الاخر بس مكانتشى كتيره زى المره اللى فاتت
************************************************
اخر حاجه كلمه بسيطه عن العميد هشام غريب الراجل ده الكاتب عمر طاهر يعرفه و هوه رئيس مباحث الاثار و مقرها القلعه
اما عرف اننا عايزين نعمل اللقاء فى القلعه جهز و دخلنا كلنا مجانا و فى وسط اللقاء عزم كل القراء على عصير ( كنا هنموت من الحر الصراحه) و لمعلومات زياده عن مواقفه
تقدروا تقروا المقال ده عنه http://tahrirnews.com/%D9%85%D9%82%D8...
*************************************************
* حمله هات و خد https://www.facebook.com/HatW5odonline
بسم الله الرحمن الرحيم دى معلومات بسيطة عن أول لقاء لينا في قرّاء مصر. في المجمل اللقاء كان الحمد لله ناجح أكتر ما كنا متوقعين و العدد كان كويس الحمد لله و بنشكر كل واحد شارك فى أول لقاء و نقوله لولا وجودك مكانش اللقاء بقى بالشكل ده
اللقاء تم يوم السبت 14 أبريل في مسجد السلطان حسن
*****************************
ثانياً شوية احصائيات بسيطة
عدد الناس اللى جه تقريبا حوالى 50 واحد
أكبر المشاركين سنا كان سنه تقريبا فى الخمسينات
أصغر حد كان طفلتين 10 سنين و 8 سنين
أبعد المشاركين جه مخصوص للقاء من المنيا و رجع تانى- احنا بنشكره جدا وجودك كان دفعه قوية لينا و اسعدنا جدا
عدد الكتب اللى كان موجود يقارب ال 80 كتاب
كان موجود تقريبا كل تصنيفات الكتب من الأدب الساخر للسياسة و التاريخ و الإسلاميات . و كان فى كتاب عن الحمل.
*****************************
شوية ملاحظات
المصريين كانوا شايفنا من سريلانكا
فى ناس كتير كانت جاية تحضر اللمة* و لما إتأخروا فى البدء جم معانا يقروا لحد اما اللمه بدأت
الناس شاركت مش بس قراءة كمان بإقتراحات
المكان كان رائع جدا و ذو عبق تاريخى
فى كذا حد كان جاى من مدن بعيده عشان يشارك معانا و يروح تانى
*****************************
الإقتراحات اللى اتقالت فى اخر اللقاء
عدد مرات اللقاء شهريا (موجود فى سؤال على الصفحة) تقدروا تختارو براحتكم
هل هنكتفى بالقراءة ولا قراءة و مناقشة
المكان هيبقى فى المسجد ده بس ولا نلف مساجد شارع المعز كلها
إمكانية إننا نختار كاتب معين يبقى اليوم بالكامل عنه
امكانية إننا كل لقاء أو أتنين نستضيف كاتب معروف معانا يحضر اليوم و يشاركنا أفكاره و إقتراحاته
معظم الناس اقترحت كذا طريقة نزود بيها الدعاية للفكرة
******************************
دى تقريبا كل الاحداث اللى حصلت فى اللقاء لو اى حد ليه اقتراحات يضيفها يبعتها فى أى وقت . أى حد مش عاجبه حاجه و عايزها تتغير يبعت و إن شاء الله نتجاوب معاه . الاقتراح كان بتاعنا إنما الفكره بتاعت الكل، أى حد ليه الحق أنه يعدلها للأحسن.
فريق قرّاء مصر
https://www.facebook.com/EgyptReaders
صور اللقاء
https://www.facebook.com/media/set/?s...
******************************
* لمزيد من المعلومات عن اللمة زوروا صفحة دواير هتستفيدوا كتير
https://www.facebook.com/Dawayr
