“فلما تعددت الوقفات!!!
من كام سنه كنا بنعزم بعض على الفطار فى رمضان ونعمل جدول للعزومات ، نعزم بعض على الشاى ، على فنجان قهوة ، لكن دلوقتى كل شويه الاقى دعوه لوقفة سواء احتجاج او تأييد وفى مشكلتين محدش من اصدقائى عايز يفهمهم اولهم انى كبرت يعنى مش بقدر اقف زى الاول يعنى كبيرى اقف نص ساعه قووووول ساعه والتانيه والاهم انى مش فى مصر اصلا .
فقولت مينفعش اسكت لازم اعمل ((قعده احتجاجيه )) وفعلا كنت خلاص نويت اعملها ((القعده)) بس خفت قولت ياوااد اعقل لحسن امريكا تاخد ابوك واخواتك واصحابك وخصوصا حسن عبدالرحيم ويعذبوهم بتهمة تنظيم القعدات مع انى كان نفسى ياخدوا حسن عشان وزنه يخف شويه ، بس بينى وبينكم خفت وشلت الفكره من دماغى .
قولت اسال مصر ، ما هو مش معقوله تبقى مصر صاحبة الليله دى ومحدش ياخد رأيها فى اللى حاصل اظن عيب وعيب قوى كمان
طيب هى مين مصر وعلى راى الممثل اللى مش فاكر اسمه ((لما نحب نكلم مصر ، نرن على مين ؟؟؟؟؟))
انا هاجاوبه دلوقتى مع انى متاكد انه مات
مصر بلد الغلابه ، بلد الناس الطيبين اللى اكتر من نصهم ميعرفوش سكه لميدان التحرير ولا للعباسيه .
اسال ابويا واهلى بلدى الناس اللى شقيت وبتحمد ربنا على كل حاجه .
مصر بلد الناس المؤدبين ((ولاد الناس الكويسين )) اللى بيغسلوا اسنانهم قبل ما يناموا وبياكلوا كورن فيلكس .
مصر الفلاحين اللى بياكلوا غداهم وسط الغيط الضهر بصل اخضر وجبن قريش . ولما واحد يعزم على التانى يقولوا تعالى يا ابو احمد لفمه تستاهل بقك .
مصر ياميش رمضان وكحك العيد .
مصر جمعيه بتتلم عشان طقم الصينى لجهاز عروسه
مصر ناس بتسب فى الايام من قلة وتختم السب بالاستغفار والحمد لله على اللى احنا فيه احنا احسن من غيرنا.
مصر تمنين مليون مدرب كوره ومحلل رياضى على قهوة فى السيده بتتفرج على الاهلى والزمالك .
مصر 50 مليون جلابيه بيضا رايحه تصلى الجمعه
مصر بتعيط على حربى فى خالتى صفيه والدير
مصر 50 مليون ملاك بيقرا قرآن بعد صلاة العصر فى نهار رمضان
مصر فى خناقه على دوشة عيال ساعة العصارى وتصالحهم لقمه على ما قسم فى العشا
مصر البؤس والفرح والحزن والضحك والبسمه والدمعه متغلفين بالرضا وبالاستغفار
مصر مش فى الميدان
ومتزعلوش منى انا لا هاقف فى التحرير ولا فى العباسيه ولا عند المنصة .
انا هاستنى مدفع رمضان مع العيال على ناصية الشارع”