“يا حـلم متكلفت بنوايـا متبعترة

يا كرسى خلانا ديابة مستكترة

تاخد ف يوم هدنة

و الـدم بياخدنا

ف كل يـوم واحد

يا مصر كام واحد

دمه على أرضك

وصديقه يترجاكى

ويقول انا ف عرضك

تارى لازم أخده

فتطبطى شوية

على دهره المحنى

و تقولى إلمحنى

بعد الغلان دول

ما يوزعوا الغنمات

ونثور كما ثورنا

ونكـون كما كـنا

وسط الميدان تانى

ف من النهاردة مفيش

باطش على شعبه

و لجل الكرامة تعيش

لازم يكون قلبه

من جوه مصرواى


يا عتمة جواها ... نور وميكروفونات

خايفة على الشاشة وللا على الأموات

سعر الدقيقة بكام

كام شركة راعيانا

خلى المحبة أوام

دى الثورة واخدانا

سنتين فلوس قدام

ريحنا فى دقيقتك

واكسبنا يا ابن الناس

السعر لا مؤاخذة

عفواً ..

مفيش فيه فصال

عَـتّـم عشان تكسب

ضلّم عقول الناس

اقبض كمان واحسب

ضحايا داقوا الكاس

وانت مبتقولشى

كام قطرة ع الأسفلت

ترجع ومتنامشى

تقول يا ريتنى سألت

ترجع تكدب نفسك

وتقول مانا عارف

وتسرح تصيغ أسفك

لكن بأيه هيفيد

الدم كان بيزيد

وانت ف أسئلتك

تطرحها لضيوفك

يبقى هناك لمة

وتقولوا دول قلة

وتجيبوا ع الشاشة

صورة الشهيد لما

لما العدد يكتر

والناس تدب الأرض

وتسمعوا صوتهم

فتقولوا دول نزلوا

إزاى نـغيّبـهم ؟؟

رجع يا بنى البث

وانقل عليهم بس”