“الظلم ف الدنيا زاد عن الحد

وكتر الجفا قطع خيوط الود

وأذية الناس لبعضها بقت لاتحصي ولا تعد

ولا عاد الاب ايده لإبنه بالمساعدة تتمد

عايشين الحياة ع طول ف جذب وشد

ومحدش همه المعبد ع راس مين يتهد

وتزيد الفجوة بين البشر يعاندو ويزيدوا ف البعد

معتش ف قولة اعمل الخير .. فيه بس هات وخد

الكل ماشي عكس الاتجاه مبقوش مع.. بقو ضد

بنوا مابينهم حاجز كبير أوي وسد

خرج الدفا م قلوبهم

مفضلش غير البرد

وعن طريق الخير كله بعد وارتد

وأما الواحد يستغرب حال الدنيا يقولوله إيه جد

محدش راضي بعيشته ولا عاجبه يعيش ع الأد

الكل عايز يعيش ند لند

وأما تقولهم فكروا ف بكرة الغد

بكرة تكبرو وتضعفو يقابلوك بالصد

ومحدش عايز يبقي زيه حد

كأنه كاتب مع الشيطان كونتراتو وعقد

أنه مايرجع أبدا للخير ويوفي بالوعد

والدنيا تتشال تتحط لاهمه برق ولا رعد

مع إنه إيه مجرد انسان ضعيف فرد

ولابياخد بنصيحة ولا برأي غيره بيعتد

ناسي انه بإيده خلق أعداؤه انه نايم ع شوك مش ورد

وأنه اللي معاه ومقويه مجابوش لابكد ولا بجهد

وإن دعوة المظلوم بحرقة بتبقي مرة علقم مش شهد

مسيرها تبكيه ليله نهاره وتعيشه ف سهد

واللي مش قادر النهردة يتكلم وضعيف بكرة يقوي يكبر وعليه يرد ويحتد

الحق نفسك بقي يابن آدم كفاية مكابرة عيش أيامك تقوي وزهد

استغفر ربك استسمح اللي انتا ظلمتهم احفظ مرة ف عمرك مسؤليتك وإوفي العهد”