“زمان لما كنت أكتب
ماسيبش سطور
وكنت أحب أوي إسمي عشان م النور
كنت لسه صغير متبغدد
والكون متحجّم متحدد
كبرت لقيت الكون على واسع
كل ما أقرّب..كل ما يبعد
ملوش آخر وعالي السور
زمان لما كنت أكتب
ماسيبش سطور
بخاف يبعد كلامي عن بعضه
ومعناه يروح..
دلوقت بقيت أكتب على سطر
وبسيب سطر
بخاف يقرّب كلامي من بعضه
ويبان بوضوح..
أنا نقطة ضعفي إني أكون واضح
مع ناس الغموض ف كلامها مش عايز يبوح
ساعات أمسح جميع ما كتبت
وأقطّع كل أوراقي وأرميها
وساعات أزوّد عليها حاجات
وبضطر أحتفظ بيها وأخبيها..”