Amira > Amira's Quotes

“لو دامت فى ايد غيرك مكنتش وصلتلك .. حصلت لميت واحد زى اما حصلتلك ... علشان كدا بزعل لكن مابتأزمش وساعات كتير بفرح لكن مابتعشمش فى حاجات مابتدومش”
― مصطفى إبراهيم

“العيال اللى كانت بتقعد ف أول ديسك وبيتصاحبوا على المدرسين ويفتنوا على أصحابهم، غالبًا لما يكبروا بيبقوا إخوان. والعيال عديمة الموهبة اللي نفسهم يبقوا حاجة بالعافية، بيكبروا ويبقوا ظباط. والعيال اللى كانت بتجيب معاها حلويات مستوردة والمقلمة أم دورين، هم وأصحابهم بيبقوا فلول. والعيال اللى كانت بتقعد معاك ورا تقشّر يوستفاندى وتقزقز لب سوبر وتقلب ريحة الفصل، بيكبروا يبقوا ليبراليين ويطلع ميتين أبوهم علشان علّموا على كل العيال دى وهمّ صغيرين.”
― مصطفى إبراهيم

“إزاى تعرف مين سابق مين جوا الدايرة و مين فيها فطع أطول مشوار .. مش ممكن برضه اللى ف ضهرك يطلع سابقك و انت اللى حمار ؟؟”
― مصطفى إبراهيم, المانيفستو

“لو دامت فى إيد غيرك ..
مكنتش وصلتلك ..
حصلت لميت واحد ..
زى أما حصلتلك ..
علشان كدة بزعل ..
لكن مبتأزمش ..
و ساعات كتير بفرح ..
لكن ما بتعَشّمش ..
ف حاجات ما بتدوّمش ..
الدنيا سوق كانتو ..
مفيهوش حاجات زيرو ..
و زبونه أنا و انتوا ..
علشان مفيش غيره ..
و انتا زبون عادى ..
ف مفيش حاجات مخصوص ..
و مفيش قميص واحد ..
فى الدنيا مش ملبوس ..
ميت مرة من قبلك ..
كل اللى هيقابلك ..
كان ماضى و اتسابلك ..
حتى الصحاب و الصيت ..
حتى الكلام الحلو ..
كله كدة يا عبيط ..
ماشى بنفس السلو ..
نظرتها ليك حتى ..
ساعة ما بصتلك ..
لو دامت لعين غيرك ..
مكنتش وصلتلك ..”
― مصطفى إبراهيم, ويسترن يونيون فرع الهرم

“ارجوك يا زمان خبى المقدور
الضلمة براح اكتر من النور
سيبنى اتخيل .. ان انا بختار
قبل اما اعرف .. ان انا مجبور”
― مصطفى إبراهيم, المانيفستو

“مفيش احساس لحسن الحظ و لسوئه مبيعديش .. مفيش ولا طعم حاجة من اللى بتدوقه مسيره يعيش .. بحلوه و بمره كله بيتسخط لمفيش
يا سبحان اللى بيعودنا ع الحاجة فننساها .. و بيخفف كاسات الناس بميه بدال ما يملاها .. عشان طعم اللى فيها يروح .. عشان طعم اللى فيها يجف
يقولوا مجازا المجروح اذا خد ع الوجع .. بيخف .... تلف عليه سواقى الكون تدوب اللى فات ف الجاى
فسبحانه لما قال منها جعلنا ( كل شئ حى )”
― مصطفى إبراهيم, المانيفستو

“كل يومين .. بكبر و ارمي حاجات
و اكتشف إن أنا .. كان ممكن أعيش
من غيرهم اصلا من ألاول
ما اعرفش بقى اليأس اتحول
و قلب زهد
و لا دا جين صوفي من الأول مش محتاج جهد ؟”
― مصطفى إبراهيم, المانيفستو

“ثم دارت اللمونة
دورة كاملة… ثم داخت
ثم جه إخوانّا ولامونا
ثم إن الثورة باخت
ثم هُمّا هُمّا برضه
اللى باعوا الطول وعرضه
يِصحُوا يتخانقوا ويعارضوا
ثم إن الرِّيحة فاحت
ثم مش نازلين معاكو
ثم إن الجيش حمونا
ثم تاخدوا على قفاكو
ثم دارت اللمونة…….
ثم قال حانزل لوحدى
ثم دقن ف كل حتة
ثم يعمل مليونية
ثم يمشى الساعة ستة
ثم يعمل فيها عنتر
ثم ياخد علقة سخنة
ثم حيخزوقنا عسكر
ثم يطلع من نافوخنا
ثم فيه أصلا مؤامرة
ثم ناس مش لاقية تاكل
ثم تيت الثورة حمرا
إحنا مش عايزين مشاكل
ثم دارت اللمونة
دورة أكبر… ثم دخنا

ثم فجأة الكل يتعب
ثم إن الجيش حيقتل
ثم إحنا حمارنا يغلب
ثم جيم الدومينو يقفل
ثم مصر عاوزة زَقَّة
ثم ناس ماتقولش لأه
يركبوا عَ الثورة تانى
ثم نخسر… ثم نكسب”
― مصطفى إبراهيم

“قلبك في قديمك وجديدك
تلقي الموضوع كله في إيدك
بتعيد نفس الحركات ف الدور
وبتستغرب لما يعيدك”
― مصطفى إبراهيم , المانيفستو

“بلاش تنده حاجات ماتت
وسيب الذكري مرتاحه متندهاش
مدمت قدرت تنساها
بلاش ترجعلها ببلاش
اكيد في الجاي حدوته ومحتاجة
انها تتعاش”
― محمد السيد, أبيض غامق

“فرحت كتير ومش بنكر
زعلت كتير كمان واحلف
بإن العمر مستحلف
يزغلل عيني بالفرصة وفجأة تروح
حاولت كتير ومش دايما يكون مسموح
اطول الحلم بإيديا واقول حققت
كأن العمر متقسم
وبابتسم شوية وقت
واروح تاني واقول نفسي
يطول الوقت من نفسي
والاقي حاجة احكيها وانا قاعد مع نفسي
يارب انا برضه مش طماع
ومش عايز حاجات يامة
شوية ستر من عندك
يعدو الرحلة بسلامة”
― محمد السيد