Alma > Alma's Quotes

“! يا مخربين يا قلة يا مندسة
بألقي في عذابكم لذة
نام يا وطن و اتمسي
الليل بيفتح سجون
!! اتلهي
النور صحي ، و احنا تلاتة مليون
بنغني في التحرير
و إذا كنت رافض للتغيير
بالعند فيك الدنيا بتتغير
و إذا كنت مصر تبقي صغير
الثورة قامت في الميدان
قولتلها بحبك في الميدان
قالت لي و أنا كمان !”
― أحمد حداد

“في الغربة

سلملي ع الكراريس و ع الأوتوبيس وفرن العيش
سلملي ع العشــــاق ومشـــــيتهم على الكــورنيش
سلملي ع البنت اللي فـاتحـة من زمـــان شـــــــباك
يمكن يعــدّي ابن الحـــــلال لابس هـدوم الجــــيش

سلملي ع الجــرنـان .. موظف شــايله تحت البـاط
سلملي ع الدلـع اللي بيكــهــرب و ع الحـــــركات
يامــــا ألف شـــاعر للعـــيـون والغــــمازات غنّى
سلملي ع الـواد اللي عقله من غـــرامهم شــــــاط

سلملي ع الحـــلــوة وعلى غــنـــوة قــــالتــهــالي
فـاتت عـلـيـهـا ســــنين وتــاه اللـحــن من بــــالي
سلملي ع الصـــــحـبـة و ع الســـــهـيرة وفـلـوكة
مـاشـــية في وسط النيـــل تغني والمـــــزاج عالي

سلملي ع الحــــكايات من الجــــدات و ع البراويز
سلملي على ســـاعة العصارى وضـحكة العواجيز
سلملي على مكنة خـــياطة قـديمـــة في لاظوغلي
سلملي على طـبقين "كـريم كرامِّل" طـعمه لذيـــذ

ســكران و قلبي بالغـنـــــا والفــضــفــضــة والـع
ســكران ببـحـر إســـــكـنـدرية وســـرها البــــاتع
ســكران بليــل القــــــــاهـرة ... سـلّم وســمعـني
دقـة حـوافـر خـيل في عـز الليــل على الشـــارع”
― أحمد حداد

“من غير بكا وضحكة أمل
تبقى الحياة لا تحتمل
من غير ما ننسى من غير ما نحلم
من غير مانغلط من غير ما نندم
من غير ما نكره إزاى ح نعشق
وإزاى ح نوصل من غير ما نبدأ
من غير صحاب...
راحة وعذاب....
تبقى الحياة أكبر سراب

-أكبر سراب”
― أحمد حداد, حبة تراب

“الجزمة بتشيلنا و تودينا و تجيبنا
لحضرة الشارع حبيبنا”
― أحمد حداد, دولاب الهدوم

“تسمحيلي بالرقصة دي
ياسعاد ياحسني
فستانك شيك
تسمحي لي أنحني
وأثني على جمالك ياحلوة
بدأت الغنوة
بازعل قوي لو فاتني أولها
أحنا في ليل صيفي سنة ستين
يلا اطلعي ع البيست
نرقص تويست
ونشرب سينالكوا ع البيسين
والا احنا سنة خمسة وخمسين
وانتي فاتن حمامة
مشغولة مع عمر الشريف
متنكرين في الحفل
والبوسة على غفلة
والا في أواخر الاربعينات
ومصر بتغني قلبي دليلي
تسمحي لي ..
أقطفك من جنينة زمان
وأعلقك على الحيطان
والا احطك جوا زهرية
والا أشيلك في عينيا
الحب وردة رقيقة
عطرها ساحر وشاعر رومانسي
والورد هو المصريين
وهو أفلامنا القديمة
والأغاني القديمة
والشمس الشتوية
والقمر الصيفي
الحب طير اهبل وقط عبيط
وحنان ..
وفستان سهرة متعلق وله حواديت
..”
― أحمد حداد, دولاب الهدوم