Mohamed Ragab > Mohamed's Quotes

“واللي إنكتب بالجاف مبيتمسحش خلاص
و الدُنيا مفيهاش حرف بينكتب برصاص !”
― مصطفى إبراهيم

“يا ناس يا عبط يا عشمانين..
ف فرصه تانيه للقا..
بطلوا اوهام بقي..
وكفايه أحلام واسمعوا..
عيشوا بذمه و ودعوا..
كل حاجة بتعملوها..
وكل حد بتشوفوه..
وكل كلمه بتقولوها..
وكل لحن بتسمعوه..
عيشوا المشاهد... كل مشهد..
زي مايكون الأخير..
واشبعوا ساعة الوداع ….
واحضنوا الحاجه بـضمير..
دا اللي فاضل مش كتير ….
اللي فاضل..
مش كتير”
― مصطفى إبراهيم, ويسترن يونيون فرع الهرم

“بدون ما أعرف سبب واضح ...
عشان أزعل...
أنا زعلان !”
― مصطفى إبراهيم

“و الدنيا جمع و بس مفيهاش علامة طَرح !”
― مصطفى إبراهيم

“الدنيا اساساً م الاول ..
شيء يشبه سلك السماعة ..
يتلعبك منك ف ثواني ..
و عشان يرجع مفرود تاني ..
لازم تتعذب و تعاني ..
و تفكه ف أكتر من ساعة ..”
― مصطفى إبراهيم, ويسترن يونيون فرع الهرم

“عشان فيكى منى فى طبع الجنان ..
عشان فيا منك فى طبع الحنان ..
عشان احنا نسخة ..
عشان احنا مُسخة ..
عشان فيه تشابه بشكل ابن وسخة ..
عشان فى ف دروبنا علامات كزالك ..
وعشان فيه ف دروبنا علامات كذلك ..
برغم ان مفهاش ولا درب سالك ..
وعشان احنا أصلًا سوا من زمان ..
بحبك ..
لذلك ..
وأكتر ..
كمان ..
عشان مش ضرورى ..
يكون فيه عشان”
― مصطفى إبراهيم, ويسترن يونيون فرع الهرم

“أنا أحسن واحد يقنعك تحكي…

ومابيحكيش…

وأحسن واحد يقنعك تبكي…

...وما بيبكيش…

أنا أحسن واحد يقنعك تفرح….

وأحسن واحد يقنعك تجرح…

أنا أحسن واحد ميت….

يقدر يقنعك….تعيش…”
― مصطفى إبراهيم, المانيفستو

“وأسمع حكايات صاحبي الأنتيم
ونكلم بعض واسرح
ف ادوس علي حرف الميم دوستين ورا بعض
وبسيبه ساعات لما أزهق من كتر الحكايات
وأكتبله حاجات ملهاش معني زي الشفرة
وابعت للناس ف وشوش صفرا
وازعل منها ف أكتب طيب
وأزعل أكتر ف اكتب ماشي
وبراحتك اصلا أنا ماشي
واما أضحك ادوس علي حرف ال هه
وعلي قد الضحكه أفضل دايس
ازعل ملاقيش للحزن زرار
وبرغم بأنى معبّي وشوش
فعلا ملهوش.... إزاي حختار؟
فيه وش واحشنى وعمره ما جه
....مصطفى بيقولك
ب
ر
ب
......فيرد يقولي
ت
ى
ت

ف اطلع واقفل نور الاوضه....
واسند بدراعى على الشباك
وابص لفوق
واتمنى ساعتها اكون وياك
واسرح وافوق
واما ازهق م الوقفة لواحدى
اكمن مفيش حد معدي
ف بطّلّع شباك الدنيا
......واكتبله انا باك”
― مصطفى إبراهيم

“يارب
ياللي سايبلي الحبل ع الغارب
أنا غرقان بدون قارب
ومعرفتش أعوم وحدي
وكل ما امدلك يدي
وتنشلني
وأعوم شبرين
إديا يفلفصوا الاتنين
وأقولك سيبلي انا الباقي
تسيبلي الحبل ع الغارب
تخش المية حلقي .. اشرق
فاصرخلك .. وأقول بغرق
وأقولك عمري ما حسيبك
فتنشلني
أعوم شبرين
إديا يفلفصوا الاتنين
وأسيب إيدك
وأعيد الكرّه ميت مره
وماتخذلنيش ولا مره
تقوللي حضنهم بره
لا عمره يساع دراع سيدك
ونا لسه
بسيب إيدك !”
― مصطفى إبراهيم, ويسترن يونيون فرع الهرم

“العيال اللى كانت بتقعد ف أول ديسك وبيتصاحبوا على المدرسين ويفتنوا على أصحابهم، غالبًا لما يكبروا بيبقوا إخوان. والعيال عديمة الموهبة اللي نفسهم يبقوا حاجة بالعافية، بيكبروا ويبقوا ظباط. والعيال اللى كانت بتجيب معاها حلويات مستوردة والمقلمة أم دورين، هم وأصحابهم بيبقوا فلول. والعيال اللى كانت بتقعد معاك ورا تقشّر يوستفاندى وتقزقز لب سوبر وتقلب ريحة الفصل، بيكبروا يبقوا ليبراليين ويطلع ميتين أبوهم علشان علّموا على كل العيال دى وهمّ صغيرين.”
― مصطفى إبراهيم

“يا غنوة ما بتكملش
يا دمع يا محبوس
ليه كل ما أحلم حلم
بقى يتقلب لكابوس

بسأل ساعات نفسي
لو جيتي على بالي
هي الحقيقة صحيح !
مكانتش باينالي ؟

ولا ساعات بنخاف
نعرفها تجرحنا
ولا صدق نجانا
ولا كدب ريحنا

هنعيش بنتألم مـ الدنيا
طول ما احنا ،
بنبيع قلوبنا رخيص
وبنشتريه غالي ،،
يا غنوة ما بتكملش”
― مصطفى إبراهيم

“لو دامت فى إيد غيرك ..
مكنتش وصلتلك ..
حصلت لميت واحد ..
زى أما حصلتلك ..
علشان كدة بزعل ..
لكن مبتأزمش ..
و ساعات كتير بفرح ..
لكن ما بتعَشّمش ..
ف حاجات ما بتدوّمش ..
الدنيا سوق كانتو ..
مفيهوش حاجات زيرو ..
و زبونه أنا و انتوا ..
علشان مفيش غيره ..
و انتا زبون عادى ..
ف مفيش حاجات مخصوص ..
و مفيش قميص واحد ..
فى الدنيا مش ملبوس ..
ميت مرة من قبلك ..
كل اللى هيقابلك ..
كان ماضى و اتسابلك ..
حتى الصحاب و الصيت ..
حتى الكلام الحلو ..
كله كدة يا عبيط ..
ماشى بنفس السلو ..
نظرتها ليك حتى ..
ساعة ما بصتلك ..
لو دامت لعين غيرك ..
مكنتش وصلتلك ..”
― مصطفى إبراهيم, ويسترن يونيون فرع الهرم

“ماسبيرو أخطر م الرصاص والقصر
ملّى عنيك بالدم... قبل الطلوع قدام”
― مصطفى إبراهيم

“الجاي مِش أد اللي راح ؟
وللا إللي جاي أكتر ؟
الشاش على أد الجراح ؟
وللا الجِراح أكبر ؟”
― مصطفى إبراهيم

“مِين فينا عارفَك يارب ...
و مين فينا لأ ...
مين اللي فينا لو قال بَحِبَك .. قالها بحق ؟!!”
― مصطفى إبراهيم

“أنا عايم على وش المية ..
وأنا سايب ايدى ورجليا ..
والموجة اللى تفوتنى بسيبها ..
وأتشعلق فى الموجة الجاية”
― مصطفى إبراهيم, ويسترن يونيون فرع الهرم

“أنا مش فاكر ..
آخر مرة بكيت كات امتى ..
أنا مش فاكر .. آخر دمعة عليها القيمة ..
أنا مبقتش بصدق ولا مشهد فى الدنيا ..
أنا مبقتش بدمع .. غير وأنا جوة السـيما”
― مصطفى إبراهيم, ويسترن يونيون فرع الهرم

“الكوتشي اللي باش
م اللف ف شوارعك
يحرم عليه
يبوس ارض غيرك

والقلب القماش
اللي مكوي بعمايلك
لساه معبق
بريحة عبيرك

والواد اللي عاش
طول عمره يحايلك
ونفسه اسمه
ييجي في رسايلك

وتبعتيله تطمنيه
ان انتي عارفة
ان انتي ليه
وان انتي قايمة ونايمة بيه

وقت الشتا يتدفي بيكي
ووقت الخطر تتحامي فيه
وساعة اما بيقسي عليكي
وساعة اما بتدعي عليه
محدش فيكوا بيهنالوا بال

واول ما تصفي تفكي الريال
وتروحي تجيبيلوا كوتشي بدال
الكوتشي اللي باش”
― مصطفى إبراهيم

“يا بشر عرفاني و عارفه أنا مين
بلغوا أسفي لكل البلالين
كلنا كنا ف يوم بالونة
فقعتنا تجارب بني أدمين”
― مصطفى إبراهيم, ويسترن يونيون فرع الهرم

“في حاجات لازم علشان نعرف درجة قوتها بنكسرها ... وحاجات في إيدينا علشان نعرف إننا عايزينها بنخسرها .”
― مصطفى إبراهيم

“بعد طرحك من الحساب
للعساكر والكلاب والارانب والفيران
والاجانب والغيلان والارايل والقرون
والمرايل والدقون
اللي فاضل يا افاضل
...هو دا تعداد وحصر
للعيال اللي جبتهم
في الحلال الست مصر”
― مصطفى إبراهيم

“أبعد نُقطة بِالنِسبالك
جُوَّا الدايرة... هِيَّ مكانك
ولأن أساساً ف الدايرة
هنا هوَّ هناك
ف طبيعي تحس انك عايش
باتنين جُوَّاك”
― مصطفى إبراهيم, المانيفستو

“لو دامت فى ايد غيرك مكنتش وصلتلك .. حصلت لميت واحد زى اما حصلتلك ... علشان كدا بزعل لكن مابتأزمش وساعات كتير بفرح لكن مابتعشمش فى حاجات مابتدومش”
― مصطفى إبراهيم

“أنا لِسه يارب . . بحطة إيدك ع المسرَح....
أنا لِسه بحاوِل أستوعِب ف طبيعة الدور ....
معييش النَض ... و خايِف بس أتوه و أسرَح...
وقت أما تقرر تِكشِفني بـ سبوتّ النور.....”
― مصطفى إبراهيم

“عارفه إن أنا يوميا بكبر ؟
وبعجز اكمني مابنساش
أنا فاكر أيام بالميللي
أنا فاكر أيام بالتفصيل”
― مصطفى إبراهيم

“الزهد .. نعمة الله العظمي .. وابتلائه الأعظم”
― مصطفى إبراهيم

“غني و لو حسك مدبوح
الصمت داء بيموت .. بوح
و لو نسيت الغنا صرخ
إنشالله حتي يا صاحبي تنوح”
― أحمد حداد, حبة تراب

“ممنوع تمنع نفسك تحلم
احلم و أكيد مش راح تندم
بس الحلم بتاعك برضه
في الغالب ح يكون ممنوع”
― أحمد حداد, حبة تراب

“ده مكتبى و ده شبشبى
و ده سريرى ...
اللى حَضن ضحكى و تكشيرى
ده الشباك ..
باصص أكيد ع الشمس
هى هناك ..”
― أحمد حداد, دولاب الهدوم

“من غير بكا وضحكة أمل
تبقى الحياة لا تحتمل
من غير ما ننسى من غير ما نحلم
من غير مانغلط من غير ما نندم
من غير ما نكره إزاى ح نعشق
وإزاى ح نوصل من غير ما نبدأ
من غير صحاب...
راحة وعذاب....
تبقى الحياة أكبر سراب

-أكبر سراب”
― أحمد حداد, حبة تراب