Eman Ghunaim > Eman's Quotes

“عزيزي الساعي إلى أن تعيش ندلاً، حتى تموت مستورًا.. للندالة أصول!”
― وليد كساب

“ناقص حته
وكل ما أوزن
ألاقي لسه
ناقصلي حته
أحط حته
تقل حته
وأجيب قميص
تضيع چاكته
وأعيش لي ساعة
يفوتني سته
وكل ما أوزن
ألاقي ناقص
أقول بناقص
لو هي حته
أتاري لسه
ولسه تاخد
سنين وحته
وحاجات تسيبني
وحاجات تاخدني
لحاجات تخبط
في كل حته
وأقول ها نفرح
ف يوم
ها نفرح
ويوم مانفرح
علي الله يفضل
في القلب حته”
― علي سلامة, ناقص حتة

“معرفش ليه ...
تنحت للدنيا كده .. !
وفجأة لقيتني مسكون بالملل ...
لاعندي رغبة ف البكا ..
ولا في الكلام ...
ولا عايز أنام ...
ولا حتي بسأل إيه ده ليه ..
وآخرتها إيه ..
وإيه العمل .......
وأخاف أقول لأي حد ….
أحسن يقوم يقلبها جد …
حد صاحبي ينزعج ...
يمد إيده جوه قلبه من باب الكرم ..
عشان يشاركني الألم ...
أو يستلفلي من لئيم حبة أمل ..
حالة كده ....
معرفش إيه ...
ملهاش معاد ..
ساعات تزورني ف الربيع ..
ف الحر ...
وف عز الشتا ...
وتجيب حاجات ...
لا فيها روح ولا ميته...
حالة كده ....
لا معاها تنفع كلمتين ولا غنوتين ...
ولا لقطة من ألبوم صور ..
آلاقي قلبي ف الهوا ويا الكور ...
أخاف أقول لأي حد ....
أحسن يقوم يقلبها جد ..
حالة كده ..
معرفش إيه ..
لكني بطلع منها بعد السكات ..
فاهم شويه ف اللي فات ..
حاسس أوي بحضن الصحاب ...
محظوظ أنا ...
ساعات أشاور ...
ينفتحللي ألف باب…
لكني باغلط ف الحساب ..
ومعرفش ليه
تنحت للدنيا كده ...”
― علي سلامة

“عارف ؟
حلوة قوي ضحكتك
لكنها بتكشفك
وتقول إنك موجوع”
― علي سلامة

“لما تقوم الصبح لوحدك
فايق أوى فرحان
والدنيا بتاخدك بالحضن من غير لف ودوران
وإنه كمان مسموح لك تحلم وبدون استئذان
لما تحس بروحك طايرة وبتقرب منك
وقلبك رغم الحزن يقولك مش زعلان منك
وإنك لسه بتقدر تعشق
وإن الكلمة بتطلع سهلة مش غصب عنك
وإن حياتك كلها تفرق عن كام ساعة فاتوا
وإن النقط السودة ف توبك اختفوا أو ماتوا
وإنك حد مصالح روحه وبيحب حياته
إياك تسأل ليه وإزاى وتدور على تفسير
وامسك فيها بعمرك كله وأوعى تسيبها تطير
أصلها حالة جميلة جميلة ومابتحصلش كتير”
― علي سلامة

“أما الدنيا دى حلوة حلاوة
يخرب بيت كده..
تمد إيدك تساعد حد
يرد عليك بنظرة رضا..
ما تعرفش ساعتها
مين اللى كان محتاج للتانى ..”
― علي سلامة

“معلش بقى اسمحلى
لو هنتكلم عن الحلاوة
أنا طقاطيعى مجرمة
صحيح ودانى كبيرة
لكن مناخيرى منمنمة

...وكل ما أطلع سلمة
يقولولى شد حيلك
لسه بدرى على السطوح
عيونى جريئة جريئة
لكن فى الحقيقة
لا بتعرف تدارى ولا بتقدر تبوح

شعرى صحيح مش ناعم
لكن لايق على رأسى
ولما يصدق احساسى
معرفش فين من روحى أروح

بحبك لما بتستعبط
وبتقولى مالك
وبتبكى ليه
وليه كده مجروح”
― علي سلامة

“هي ساعات بتضيق جوانا
بس بتضحك لنا ف الآخر”
― علي سلامة

“ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر

خايف يوم أصحي..
وأفتح الشباك..
مالاقيش مصر


ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت..
تعبت..
إتخنقت
أصلنا زودناها..
أكننا استعمرناها..
ورثناها


مصر البنوتةالحلوة
اللي زي القمر
بقت عجوزة وشايبة
وبان عليها الكبر


خايف يوم أصحي..
وأفتح الشباك..
مالاقيش مصر”
― علي سلامة

“لو موصوفلك

لو موصوفلك ترجع.....جوة الهيصة

وعيش

لو موصوفلك ترجع....روح ويارايت

متجيش

لو موصوفلك تضحك......اضحك

على أحزانك

لو موصوفلك تعشق...حب واقف فى

مكانك

لو تختار فى زمانك........أحسن

ماتنقيش

لو موصوفلك تحلم....قضى الليل

بردان

واعمل روحك ترتاح....ناسى انك

انسان

لو موصوفلك ترتاح....نادى وقول

يا جراح

ما يغركش براح ساكت ما بيبكيش......


ساكت ما بيبكيش !”
― علي سلامة

“زهقت من قولة
دي بنت بألف راجل
أنا عايزة أحس
إني معاك مخلوق ضعيف
وإني فعلا بنتمي لجنسي اللطيف
تحميني من حزني
ومن إحساس مخيف

طول النهار مكشرة
وواخداها جد
ولمّة شعري على ورا
ومش شايفة حد
والدنيا حر موت
وأنا مليانة برد
وكل ده عشان يا دوب
أعدي الرصيف

ما عادش في الشارع شجر
بيرمي ضل
وكل يوم حاجات تضيع
وحاجات تقل
وأنا خلاص
ماعرفش ليه بقيت أملّ
واعذرني لو كان الكلام
مُر وسخيف”
― علي سلامة

“أنا لما بافرح
بحكى للدنيا كلها
حتى لطوب الأرض
واحزن.. أخبى
واسكت كأنى
عمرى ما عرفت الكلام”
― علي سلامة

“أصعب شئ في الدنيا
تبقي مفلس
وجيبوبك مليانه فلوس”
― علي سلامة

“الرزق على الله قوم يلا نرمي الشباك
بحبك يا أمل يا بكرى وبستناك
الرزق على الله ..مَت يلا نرمي الشباك
بحبك يا أمل يا بكرى وبستناك....
وياك تغير الموضوع إياك

أقلك قلب الوطن موجوع تقلي العيب على السباك!

إذا كان الأهلي بيدور على مهاجم
والزمالك عايز مسالك

مصر حتموت من زمان على حتت شباك
تطل منو على الأمل”
― علي سلامة

“بُص .. حا أقولك
م الآخر
أنا عندي عربية
ماركبتهاش
ومعايا فلوس
ماكسبتهاش
وجوزوني بنت حلوة
ماحبتهاش
وإشتريت بدلة جديدة
مالبستهاش

كسرت الحمام وغيرته
ماحستش بأي إنتعاش
خدت بعضي علي جنب
وكان يوم حر .. رطوبة
وقُلت لروحي.
إيه ياعم
إنت طوبة
قاللي لأ
يا صاحبي دي حسبة
ومحسوبة

أنا أصلي زمان
لمست قلبي
غنوة حب جميلة .. جميلة
لكن يا خسارة
ماحضنتهاش”
― علي سلامة

“محدش فينا يا ابني بيختار الوقت.امتى هيعشق وهيعشق مين.يارب لو كان مكتوب علينا "الفراق.يفضل في قلوبنا الحنين”
― علي سلامة

“وسط اوراقى القديمة ....
اللى لسه منها باقى ...
شوفت صورتى بين زميلى ...
و احنا لسه فى إبتدائي ...
الوشوش كانت بسيطة ...
طاهرة لكن مش عبيطة ..
نرسم الأحلام خريطة ....
فى قلبها نقطة تلاقي ....
هو صاحبى
لما كان فى الدنيا صاحب
اما دول كانوم جيرانى .....
كل واحد فينا حقق ...
جزء من بعض الأمانى ...
ا ما دى الشاطرة البليدة ....
العنيدة أم الضفاير ….
تبقى حبى الأولانى .....
أد ايه حزنت عليها ...
لما راحت فصل تانى ....
ما احنا كنا تخته واحده ...
فى تانيه تالت ...
مره قلت ...
و هى قالت ..
لما مدت ايدها شالت ..
دمعة وقعت غصب عنى ....
جوه كراسة الحساب ..
كنا لسه صفحه بيضه فى الكتاب ...
الوشوش كانت بسيطه ....
طاهرة لكن مش عبيطه ...
نرسم الأحلام خريطة ...
فى قلبها نقطة تلاقى ...
واحنا لسه فى أبتدائي ..”
― علي سلامة

“بمنتهى البراءة
سألتنى بنتى نور
فى أربع خمس أمور
مش ف كتاب القراءة
قالتلى بابا يا بابا
مش انت يا بابا
بتكتب أغانى
وتقول أشعار
طب أنا سمعت الشيخ يا بابا
بيقول إنك يا بابا
ها تروح النار
زى الناس الوحشين
الحراميين الكفار
قوللى يا بابا
يعنى إيه استعمار
يعنى إيه نيل
ويعنى إيه هرم
ومين اللى حط النسر ده
فوق العلم
يعنى إيه يا بابا
استفتاء
ويعنى إيه انتخاب
ويعنى إيه حر
ويعنى إيه نصاب
ويعنى إيه اغتصاب
يعنى إيه اختلاس
يعنى إيه هجاص
ويعنى إيه خصخصة
يعنى إيه يا بابا دستور
يعنى إيه معارضة
ويعنى إيه مظاهرة
وليه النهارده
خدنا أجازة من المدرسة
قوللى يا بابا
يعنى إيه قهر
وأين يقع خط الفقر
ويعنى إيه حظ
ويعنى إيه زهر
يعنى إيه يا بابا حرية
يعنى إيه إنسان
ويعنى إيه سرطان
يعنى إيه يا بابا
خربوها
ومين دى سمارة يا بابا
وإزاى يا بابا ضاعت من قلبك
وحضرتك كنت فين
لما خربوها
يا بابا..
بابا..
إنت معايا
فيه يا بابا ناس
بتقول كفاية
وفيه عساكر
ماسكين عصايا
وبنات متعورين
وتانيين ماشيين بيضحكوا يا بابا
هم دول إسرائيليين
قولتلها
نور
ممكن أسألك سؤال
قالتلى اتفضل يا بابا
قلتلها
هى قناة سبيس تون رقم كام
وخدتها عشان تنام..!”
― علي سلامة

“تيجي نهرب ...
م الحقيقة ..
م الصور ..
من خبر عاجل يخض ..
تيجي …
لا نفهم ..
ولا نعرف ..
ولا نقدر نرد ...
تيجي ….
نتعلم سخافة ..
بشويش كده ..
بصنعة لطافة ..
وتبقي بياع الكنافة ..
وأبقي بياع الكلام ...
تيجي نهرب ...
م الألم ..
م الحزن ..
م الأحلام ....
تيجي نتعلم ننام ..
تيجي نتباع بكام ..
تيجي ….
نعمل عملية تجميل ..
و نشيل .....
ولا حرام .......
تيجي ….
نبقي طوب .. خشب .. إزاز
بلاطة جنب بلاطة ....
تيجي ….
ننسي بعض ببساطة ....
وتبقي بياع البطاطا ....
وأبقي بياع الهوا ...
تيجي ….
سوا … سوا
نهرب …
م الأمل ....
نطلع بطاقة ...
بدون عمل ...
نأجر عجل ..
نركب جمل ...
تيجي …
نبقي ف اللذاذة ..
وأجيب مصاصة ..
تجيب بزازة ....
تيجي نبقي ...
ملناش عازة ...
زي كل شئ جميل .....
تيجي ….
مستحيل …..
هي كده ....
وملهاش بديل .....
تيجي رجلك ...
تيجي …
تهرب بجلدك تنجرح .....
يوجعك قلبك بجد .......
لا تقبل أي حاجة ...
ولا تبقي أي حد ....
تيجي …..”
― علي سلامة

“ل ما اعرفك اكتر ..
اكتشف أد إيه انا كنت جاهل
لا بيحس .. ولا بيشوف .. ولا بيقدر
واخاف اعلن عن جهلي .. واستكبر
واقول لقلبي انساها
يقول ياريتني كنت اقدر ..
أعاند .. استقوي علي قلبي
تغرني قوتي .. اتغر
وبس تألمني سنتي
احس اني من غيرك ضعيف
زي حتة إزاز ..
ترميها ع الأرض .. تتكسر
اعاند ..
استبدل حنانك بأزايز الميه البلاستك
اشرب .. اعطش
اشرب .. اتعكر ..
أعذري جهلي يا حبيبتي
و قوليلي فيكي إيه حلو اوي كده
رغم العتمة دي كلها
قادر ينور
♥”
― علي سلامة

“أنا المواطن نقط نقط نقط ..
يكون ف علمك أنا مش جبان ...
ولا بتهان وأسكت زي زمان ..
أنا بصرخ وأكتب وأبعت وأتكلم ..
وأسمع بقي يامعلم ..
أنا المواطن نقط نقط نقط ..
رقم قومي نقط نقط نقط ..
محل الأقامة نقط نقط نقط بجوار البنزينة ..
بصراحة حرام تعملوا فينا نقط ونقط ونقط ..
وتطلعوا نقط و نقط أهالينا ..
عملتوا إنتخابات وكلها نقط نقط نقط ..
وشيلتوا وحطيتوا حاجات نقط ونقط ونقط ..
بصراحة ....
أنا بقيت قدام مراتي حاسس إني مش نقط خالص ..
وأقول لها نفسي أبقي نقط بجد ..
تقوللي يا خويا متحرقش دمك ..
محدش بينفع حد ..
حسك ف الدنيا ..
بكره تبقي نقط ونقط ونقط .. !”
― علي سلامة

“نفسي قوي فـ قصة غرام
لحظة هدوء تحميني من حزني ومن مرالكلام
ماعدش ينفع أبقي ريشة في الهوا
ولا عادش ينفع تبقي عيشة والسلام”
― علي سلامة