Maged Taha > Maged's Quotes

“أنا اللي بالأمر المحال اغتوى
شفت القمر نطيت لفوق في الهوا
طلته مطلتوش - إيه أنا يهمني ؟
وليه ما دام بالنشوى قلبي ارتوى

عجبي !!”
― صلاح جاهين

“يأسك وصبرك بين ايديك وانت حر
تيأس ما تيأس الحياة راح تمر
أنا دقت من دة ومن دة وعجبي لقيت
الصبر مر وبرضه اليأس مر

عجبي”
― صلاح جاهين

“أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام

عجبي !!”
― صلاح جاهين

“لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره

عجبي!”
― صلاح جاهين, رباعيات صلاح جاهين

“يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول

عجبي !”
― صلاح جاهين

“يوم قلت آه...سمعونى قالوا فسد
ده كان جدع قلبه حديد و اتحسد
رديت على الملايين انا و قلت
لو تعرفوا معنى زئير الاسد

عجبي”
― صلاح جاهين

“يابخت من يقدر يقول ....
واللى فى ضميره يطلعه...
يابخت من يقدر يفضفض بالكلام ...
وكل واحد يسمعه...
يقف فى وسط الناس يصرخ .. أأأأه ياناس
ولاملام
يجى الطبيب يحكى له ع اللى بيوجعه ...
يكشف مكان الجرح ويحط الدوا ...
ولو أنكوى
يقدر ينوح
وأنا اللى مليان بالجروح ...
مأقدرش أقول
ماأقدرش أبوح
والسهم يسكن صدرى ماأقدرش أنزعه”
― صلاح جاهين, عن القمر والطين

“أوقات أفوق ، ويحلّ عني غبايا
وأشعر كأني عرفت كل الخبايا
وافتح شفايفي عشان هقول الدرر
مقولش غير حبة غزل في الصبايا

عجبي !!”
― صلاح جاهين

“دخل الشتا وقفل البيبان ع البـــيوت
وجعل شعاع الشمس خيط عنكبوت
وحاجات كتير بتموت في ليل الشــتا
لكن حاجات أكتر بترفض تمــــــوت

عجبي !!”
― صلاح جاهين, رباعيات صلاح جاهين

“ مرغم عليك يا صبح . .مغصوب يا ليل.
لا دخلتها برجليا ولا كان لي ميل.
شايليني شيل دخلت أنا في الحياة.
وبكرة هاخرج منها شايليني شيل”
― صلاح جاهين

“إنسان .. أيا انسان ما أجهلك
ما أتفهك فى الكون وما أضألك
شمس وقمر وسدوم وملايين نجوم
وفاكرها يا موهوم مخلوقة لك؟
عجبى”
― صلاح جاهين, رباعيات صلاح جاهين

“عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق

!!!عجبي ”
― صلاح جاهين, رباعيات صلاح جاهين

“أنا مش تبع مخلوق يا سيدنا البيه
أنا حُر في إللي يقول ضميري عليه
وإن كنت تُحكم جوا ملكوتك
الشارع الواسع فاتح لي إيديه”
― صلاح جاهين, رباعيات صلاح جاهين