محمد شاهين > محمد's Quotes

“ما دامت مصر ولاده
وفيها الطلق والعاده
حتفضل شمسها طالعه
برغم القلعه
الزنازين”
― أحمد فؤاد نجم, أحمد فؤاد نجم: الأعمال الشعرية الكاملة

“كل عين تعشق حليوة وإنتِ حلوة ف كل عين
يا حبيبتي قلبي عاشق واســــمحي لي بكلمتين
كلمتين يا مصر يمكن هما آخر كلمتين
حد ضامن
يمشي آمن
أو مآمن يمشي فين ؟”
― أحمد فؤاد نجم, أحمد فؤاد نجم: الأعمال الشعرية الكاملة

“يا اسكندريه
بحرك عجايب
يا ريت ينوبني م الحب نايب
تحدفني موجه
على صدر موجه
والبحر هوجه
والصيد مطايب
أغسل هدومي
وانشر همومي
على شمس طالعه
وانا فيها دايب”
― أحمد فؤاد نجم, أحمد فؤاد نجم: الأعمال الشعرية الكاملة

“قال: البلد عاوزه ولد

ياخد بتار المظلومين

ولد يعوض اللي راح

ويعلا فوق كل الجراح

ويمد إيده في الضباب

ويشد أنوار الصباح


فيكم ولد يا سامعنين ؟

..

يا ابن البلد يا ابن البلد

الوقت وقتك يا ولد”
― أحمد فؤاد نجم

“مر الكلام زى الحسام
يقطع مكان ما يمر
أما المديح سهل ومريح
يخدع.. لكن بيضر
والكلمة دين من غير ايدين
بس الوفا عالحر.”
― أحمد فؤاد نجم, أحمد فؤاد نجم: الأعمال الشعرية الكاملة

“ياويلك بصبرك
عالظالم وظلمه
في الدنيا وياويلك
من يوم الحساب”
― أحمد فؤاد نجم, أحمد فؤاد نجم: الأعمال الشعرية الكاملة

“آه يا رفاقة
يا للي علمتوا الصلابة
للحجر
بانده لكم وسط الرتابة
والكآبة
والضجر

يا مقربين الفجر نوره
ومطلعه
مدوا المسامع
في المجامع
واسمعوا
صرخة مغني الحي من جوف العدم:
اتجمعوا
اتجمعوا
اتجمعوا”
― أحمد فؤاد نجم

“..وكل يوم في حْبِك تزيد الممنوعات .. وكل يوم بحبِك أكتر من اللي فات”
― أحمد فؤاد نجم, أحمد فؤاد نجم: الأعمال الشعرية الكاملة

“يعيش أهل بلــــــــــــــــــــدي
و بينهم مافيــــــــــــــــــــــش
تعارف يخلي التحالف يعيــش
تعيش كل طايفـــــــــــــــــــة
من الثانية خايفــــــــــــــــــــة
و تنزل ستاير بداير و شيـــش
لكن ف الموالــــــــــــــــــــــد
ياشعبي يا خالـــــــــــــــــــــد
بنتلم صحبـــــــــــــــــــــــــة
و نهتف يعيــــــــــــــــــــــش
يعيش أهل بلــــــــــــــــــــدي

يعيش المثقف على مقهى ريش
يعيش يعيــــــــــــــــــــــــــش
محفلط مزفلط كثير الكـــــلام
عديم الممارســــــــــــــــــــة
عدو الزحـــــــــــــــــــــــــام
بكام كلمة فاضيـــــــــــــــــة
و كام اصطـــــــــــــــــلاح
يفبرك حلول المشاكل قـــوام
يعيش المثقف يعيش يعيش يعيش

يعيش التنابلة ف حي الزمالك
و حي الزمالـــــــــــــــــــــــك
مسالك مسالــــــــــــــــــــــــك
تحاول تفكــــــــــــــــــــــــــر
تهوب هنالــــــــــــــــــــــــــك
تودر حياتــــــــــــــــــــــــــك
بلاش المهالـــــــــــــــــــــــك

لذلك إذا عزت توصف حياتهم
تقول الحياة عندنا مش كذلك
مش ممكن تشوفهـــــــــــــــم
ف وسط المدينــــــــــــــــــة
اذا مر جنبك اوتومبيل سفينة
قفاهم عجينــــــــــــــــــــــــة
كروشهم سمينـــــــــــــــــــــة
جلودهم بتضــــــــــــــــــوي
دماغهم تخينــــــــــــــــــــــة
سنانهم مبــــــــــــــــــــــــارد
تفوت ف الجليــــــــــــــــــــد
مفيش سخن بـــــــــــــــــــارد
بياكلوا الحديـــــــــــــــــــــــد
مدام نهر وارد
و جي م الصعيد
تزيد الموارد
كروشهم تزيد

و تسمع و تسلم
بان التنابلة أو الأكالين
حيسمح كبيرهم
و يعمل مقابلة مع الفلاحين
و يحصل تحالف مابين الجميع
و نملا المصارف
بدم القطيع
أطيع الخليفة
أطيع والديك
أطيع التنابلة
دا مفروض عليك
و تزرع و تبعت لحي الزمالك
و حي الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك اذا حد جاب لك سيرتهم
تبسمل تكبر
و تهتف كذلك
يعيش التنابلة
يعش يعيش يعش
يعيش أهل بلدي

يعيش الغلابة في طي النجوع
نهارهم سحابة
و ليلهم دموع
سواعد هزيلة
لكن فيها حيلة
تبدر تخدر جفاف الربوع
مكن شغل كايرو
ما يتبعش دايروه
لا ياكل و لا حتى يقدر يجوع

يا غلبان بلدنا
يا فلاح يا صاتع
يا شحم السواقي يا فحم المصانع
يا منتج يامبهج يا آخر حلاوة
يا هادي يا راخي ياعاقل ياقانع
ما تتعبش نفسك
ف شغل السياسة
و شوف انتشغلك
بهمة و حماسة
و عود عيالك فضيلة الرض”
― احمد فؤاد نجم

“هما مين واحنا مين

هما الامر والسلاطين

هما المال والحكم معاهم

واحنا فقرا ومحكومين

حزر فزر شغل مخك

شوف مين فينا بيحكم مين

احنا مين وهما مين

احنا الفعلا البنايين

احنا السنه واحنا الفرض

احنا الناس

بالطول والعرض

من عافيتنا تقوم الارض

وعرقنا يخضر بساتين

خزر فزر شغل مخك

شوف مين فينا

بيخدم مين

هما مين واحنا مين

هما الامرا والسلاطين

هما الفيلا والعربيه

والنساوين المتنقيه.. طبعاً

حيوانات استهلاكيه

شغلتهم حشو المصارين

حزر فزر شغل مخك

شوف مين فينا بياكل مين

احنا مين وهما مين

احنا قرنفل على ياسمين

احنا الحرب حطبها ونارها

احنا الجيش اللى يحررها

واحنا الشهدا ف كل مدارها

منتصرين او منكسرين

حزر فزر شغل مخك

شوف مين فينا بيقتل مين

هما مين واحنا مين

هما الامرا والسلاطين

هما مناظر بالمزيكه

والزفه وشغل البولوتيكا

ودماغهم طبعا استيكه

بس البركه فى النياشين

حزر فزر شغل مخك

شوف مين فينا بيخدع مين

هما مين واحنا مين

هما الامرا والسلاطين

هما بيلبسوا اخر موضه

واحنا بنسكن سبعه ف اوضه

هم بياكلوا حمام وفراخ

واحنا الفول دوّخنا وداخ

هم بيمشوا بطيارات

واحنا نموت في الأوتوبيسات

هم حياتهم تمضي جميلة

هم فصيلة واحنا فصيلة

حادي يا بادي يا عبد الهادي

راح تفهم قصد الغنوة دي

لمّا الشعب يقوم وينادي

يا احنا يا هم في الدنيا دي

حزر فزر شغل مخك

شوف مين فينا حيغلب مين!!!”
― أحمد فؤاد نجم

“بكرة لما قمركو يطلع

والشمس تطلع

ونهاركو يطلع

حيقولوا كان في المكان دا ناس

فيهم طيابه

وفيهم حماس

وكانوا آخر الامر

ناس

وكان زمانهم سجون

وكانوا

مابين سجونه وأمريكانه

وبين ضباب الطريق حيارى

ماحد قادر يشوف مكانه

حتقولوا كانوا

وياما كانوا

وياما شربوا

وياما عانوا

وياما جالهم

وياما جيلهم دفع

وكان التمن أمانه

وياما ناس فى المسيره

مشيت

وناس ف نص المسيره خانوا

حتقولوا كانوا

أو ياما كانوا

لكن ح يبقى فى الأمر حاجه

إن اللى عربد

ما سابش حاجه

وساب كلابه

على كل حاجه

تهبش وتنهش

فى كل حاجه

ماقدرش يقتل فى اى حاجه

روح التفاؤل

بكل حاجه
_____________
القاهرة 1973”
― أحمد فؤاد نجم, أحمد فؤاد نجم: الأعمال الشعرية الكاملة