Asmaa Elsamligy > Asmaa's Quotes

“يأسك وصبرك بين ايديك وانت حر
تيأس ما تيأس الحياة راح تمر
أنا دقت من دة ومن دة وعجبي لقيت
الصبر مر وبرضه اليأس مر

عجبي”
― صلاح جاهين

“لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره

عجبي!”
― صلاح جاهين, رباعيات صلاح جاهين

“أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام

عجبي !!”
― صلاح جاهين

“يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول

عجبي !”
― صلاح جاهين

“يابخت من يقدر يقول ....
واللى فى ضميره يطلعه...
يابخت من يقدر يفضفض بالكلام ...
وكل واحد يسمعه...
يقف فى وسط الناس يصرخ .. أأأأه ياناس
ولاملام
يجى الطبيب يحكى له ع اللى بيوجعه ...
يكشف مكان الجرح ويحط الدوا ...
ولو أنكوى
يقدر ينوح
وأنا اللى مليان بالجروح ...
مأقدرش أقول
ماأقدرش أبوح
والسهم يسكن صدرى ماأقدرش أنزعه”
― صلاح جاهين, عن القمر والطين

“قتلوه من التعذيب وقالوا انتحر..
فكرت لحظة وقلت: آه يا غجر!..
لو جنسكم سبناه يعيش في الحياة..
اللي انتحر راح يبقى جنس البشر!”
― صلاح جاهين, رباعيات صلاح جاهين

“ مرغم عليك يا صبح . .مغصوب يا ليل.
لا دخلتها برجليا ولا كان لي ميل.
شايليني شيل دخلت أنا في الحياة.
وبكرة هاخرج منها شايليني شيل”
― صلاح جاهين

“أنا قلبي مزيكا بمفاتيح .. من لمسة يغني لك تفاريح
مع إني مفطرتش وجعان .. ومعذب ومتيم وجريح”
― صلاح جاهين

“أنا قلبي كان شخشيخة أصبح جَرس
جلجلت به صحيوا الخدم والحرس
أنا المهرج .. قمتو ليه خفتو ليه
لا فْ إيدي سيف ولا تحت مني فرس
عجبي !!”
― صلاح جاهين

“في ناس بنشوفها بالالوان وناس جواها مش بيبان
وناس اسود وناس ابيض وناس محتاجه بس امان
واكتر ناس تآمنهم ما بيجي الجرح غير منهم
وناس انت بعيد عنهم بتنسي معاهم الاحزان”
― صلاح جاهين

“عبثا باقول واقرا في سورة عبس / ماتلومش حد إن ابتسم أو عبس / فيه ناس تقول الهزل يطلع جــــد / و ناس تقول الجد يطلع عبـــــث”
― صلاح جاهين, رباعيات صلاح جاهين

“ليل بعد ليل .. و نجم ورا نجم اتحدف ..
و انا باغني ... لكن لوحدي للأسف ..
لحني الجميل مش لاقي إنسان يسمعه
يا ريته ما اتغنى .. يا ريته ما اتعزف”
― صلاح جاهين, رباعيات صلاح جاهين

“غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع

عجبي !!”
― صلاح جاهين, رباعيات صلاح جاهين

“ياماما... ياأما...يا أماتي
سلاماتي .... احتراماتي .... قبلاتي
صباح الخير يامولاتي
ياماما ....يا أما ....يا أماتي
أبوس الأيد ,,,وقلبي سعيد
يا أول حب في حياتي
يا أمي
علشانك النهاردة
الدنيا كارت معايدة
لا الربيع أركانها
بمليون ألف وردة
والكون بقى جوة بيتك
وأنا قبل الكل جنبك
ياللي
أنا وأنتي حاجة واحدة
تحبيني وأنا أحبك
وأعيش بالقرب من قلبك
عيوني معجبة بيكي
وروحي كلها تجاوبك
تفضل تقول لك وتقول لك
دايما وابدا اقول لك
صباح الخير يامولاتي
بأغني للأمومة
واليد الخدومة
وأقول الله ياأمي
ع الدفء والنعومة
ياست يافدائية
ياللي قضيتها هي
تجعل حياتي جنة
ولو تبات مهمومة
تعبتي كثير عشان خاطري
عشان أمشي .. عشان أجري
لما جريت بعيد خالص
في عيدك جيت ووفيت نذري
أضمك بفرحة وأقول
صباح الخير يامولاتي
ما أنساش الإبتسامة
ومش هنسى ياماما
الشخطة اللي تعلم
وما تهينش الكرامة
علمتيني المعاني
والصبر ع الأماني
والضحك والأغاني
وبكتيني ياماما
باجيكي وأهنيكي
وأقول يارب يحميكي
كل ما أشوف أمل وحياة
أشوف صورتك وأناديكي
يا ماما...يا أمة ...يا أماتي
صباح الخير يامولاتي”
― صلاح جاهين

“يا عندليب ماتخــافش من غنوتك
قول شكوتك واحكى على بلوتك
الغنوة مش ح تموتك إنما
كتم الغنا هو اللى ح يموتك
عجبى!”
― صلاح جاهين, رباعيات صلاح جاهين