Abou Reda > Abou's Quotes

“في الطريق

أربع عساكر جبابرة يفتحوا برلين

ساحبين بتاعة حلاوة جاية من شربين

شايله على كتفها عيل عنيه وارمين

و الصاج على مخها يرقص شمال و يمين

إيه الحكايةيا بيه ؟ جال خالفت الجوانين ؟

إشمعنى مليون حرامى فى البلد سارحين

يمزعوا فى الجيوب و يفتحوا الدكاكين ؟

أسأل وزير الشئون و لا أكلم مين”
― بيرم التونسي, المجموعة الكاملة لشاعر الشعب: بيرم التونسي

“هو صحيح الهوى غلاب ما عرفش انا
والهجر قالوا مرار وعذاب واليوم بسنة
جاني الهوى من غير مواعيد وكل مادا حلاوته تزيد
ما أحسبش يوم ح ياخذني بعيد
يمني قلبي بالأفراح
وارجع وقلبي كله جراح
إزاي يا تري ؟
أهو ده اللي جرى!
وانا ما عرفش
نظره وكنت أحسبها سلام وتمر قوام!
أتاري فيها وعود وعهود وصدود وآلام !
وعود لاتصدق ولا تنصان
عهود مع اللي مالوش أمان
صبر على ذله وحرمان
وبدال ما اقول حرمت خلاص
أقول يارب زدني كمان
إزاي يا تري ؟
أهوه ده اللي جرى!
وانا ما عرفش
يا قلبي آه
الحب آه
أشجان والم
واندم واتوب
وعلى المكتوب
ما يفدش ندم
يا ريت أنا أقدر أختار
ولا كنت اعيش بين جنة ونار
نهاري ليل وليلي نهار
أهل الهوى وصفوا لى دواه
لقيت دواه زود في أساه
إزاي يا تري ؟
أهو ده اللي جرى!
وانا ما عرفش”
― بيرم التونسي

“يااهل المغنى دماغنا وجعنا

دقيقه سكوت لله

داحنا شبعنا كلام ماله معنى

ياليل وياعين ويااّه
ــــــــــــ

طلعت موضه غصون وبلابل

شابط فيها حزين

شاكى وباكى وقال موش عارف

يشكى ويبكى لمين

واللى جابت له الداء والكافيه

طرشه ماهش سامعاه

يااهل المغنى دماغنا وجعنا

دقيقه سكوت لله
ـــــــــــــــــــ

ردى عليه ياطيور بينادى

وارمى له الجناجين

وانت كمان يابور الــــوادى

قل له رايح على فين

قل له اياك يرتاح يابابـــــوره

ويريحنــــــــــا معــــــاه

ياهل المغنى دماغنا وجعنا

دقيقه سكــــــوت لله
ــــــــــــــــ

كل جدع فرحان بشبابه

يقول فى عنيه دمـــوع

ياللى جلبتى شقاه وعذابه

حلّى لنــــا الموضــــوع

طالع نازل يلقى عـــــوازل

واقفــــــــه بتستنــــــاه

ياهل المغنى دماغنا وجعنا

دقيقه سكوت لله
ــــــــــــــ

حافضين عشره اتناشر كلمه

نقل من الجـــــــــورنال

شوق وحنين وأمل وأمانــــــى

وصد وتيـــــــه ودلال

واللى اتعـــاد ينزاد ياخــــــــــوانا

وليل ونهــــــــار هـــوّاه

ياهل المغنى دماغنا وجعنـــــــــــا

دقيقه ســكوت لله”
― بيرم التونسي

“مش ضروري تدرس الناس كلها ، ادرس روحك انت واعرف نفسك لما تحب تكدب أو تغش ، شوف إيه اللي بيجرالك ، وقيس عليه بقية الناس.”
― بيرم التونسي, السيد ومراته في باريس

“جــدع معـلـم قــــــــــال لخـالـتـك ام هــــــــلال
شوفي لنـا بنـت حـــلال تكـون لطيفـة و عــــــال

بنـات كتيـر حلــــــــويـن عنـد اهلهـم قاعـديـن
ما بين طبيـخ و عجــــيـن و بخـتـهـم بـطــــــــــال
...
عايزهـا لحـم فصـــــــوص مش عود قصب ممصوص
و محربقـه بعصعــــــوص و عامله روحهـا غـزال

عايـز قــــــــــــــوام يتـهـز إن دزيـتـــــــيـه يـنــدز
و ف كـــــــل مفصـل حـز يـفـكـرك بــهـــــــــلال

عايـز نتايـه صحـــــــيـح من ربـع شمـع تسيـح
مهـوش بشكــــل قبـيـح لـكـن بــذوق و دلال

عنـدك بنـات جمــــــالات مقلوظــــيـن نـتـايـات
و دمـهـم شـربـــــــــــات يسكـر نسـا و رجــال

تحققـي فـــــــي الـزيـن البنـت ترخـي العـيـن

دي مهـــــــرهـا ألـفـيـن أحطهـم فــي الـحـال

أما اللي عامــلـة سبـور و جــــــــدهــا بـلـفـور

و عايـزه واد دكــــــتـور خسـارة فيهـا ريــــــال

و لا اللـي عامـلـة إياه و شعـــرهـا قـصــــــاه

و بأكســــجيـن صابـغـاه دي تجـــلـب الإسـهـال

و ان جبتي واحده بكرش من الحمير مـا تغيـرش

مانيش واخدهـا بقــرش و احـط فوقـــهـا شـوال”
― بيرم التونسي, المجموعة الكاملة لشاعر الشعب: بيرم التونسي

“يارب سلطان جمالك يتعبد للــذات
خالص لوجـهك لا للـنيران ولا الجنات

لكن عبيـدك و خلـقك يعبدوك لغايات
صبحوا ونا عبد منهم كلهم ترسات

التاجر اما افتقر صلى و صام الفرض
و العمدة لما اترفت جالك وقع فى العرض

و القطن لما اتحرق صاحبه سجد عالأرض
و كلـهم عالعبـــادة يطلبـــوا حسنـــات”
― بيرم التونسي, المجموعة الكاملة لشاعر الشعب: بيرم التونسي

“هاتجن يا ريت يا خوانا ما رحتش لندن ولا باريس
دى بلاد تمدين و نضافه و ذوق و لطافه و حاجه تغيز
ما لقتش جدع متعافى و حافى و ماشى يقشر خص
ولا شاب مشمرخ افندى معاه عود خلفه و نازل مص
و لا لب اسمر و سودانى وحمص و انزل يا تقزقيز
حاتجن يا ريت يا خوانا ما رحتش لندن ولا باريس”
― بيرم التونسي, مختارات من شعر بيرم التونسي

“الأوله آه والتانيه آه والتالته آه

الأوله عيرونى . إن نا فلاح

والتانيه أزرع وأقلع اللى نام وارتاح

والتالته آه للى أحبه شط منى وراح

* * *

الأوله عيرونى ان نا فلاح – بدفيه

والتانيه أزرع وأقلع اللى نام وارتاح – فى دهبيه

والتالته آه اللى أحبه شط منى وراح – فى صبحيه

* * *

الأوله عيرونى ان نا فلاح بدفيه – وعيشى حاف

والتانيه أزرع وأقلع اللى نام وارتاح فى دهبيه – بمقداف

والتالته آه اللى أحبه شط منى وراح فى صبحيه – ما قال لى عواف

* * *

الأوله مش بإيدى دا قضا محتوم

والتانيه ومسيرها ناس تغرق وناس حتعوم

والتالته ميت هم يرحل ألف هم يدوم

الأوله آه والتانيه آه والتالته آه”
― بيرم التونسي

“احب بنت البلد والحب بهدلني
ومن بروج الأدب والفن نزّلني
احب عوجه لئيمه اشتكي للّه
من غلبي منها وتشكي غلبها مني
جاهله اذا تفرّجت في جنينة الحيوان
تقول على النمر قطه والوعول خرفان
وتقول على البنك سيما والبلوز فستان
لكن يصيبني البكم لما تجادلني
جبانه تصرخ من النمله بعزم الصوت
والبورص طلّع عليها عزرائيل الموت
لكن يفوت رمش عينها من فؤادي فوت
ان كنت ميت قتيل هوهّ اللي قاتلني
راكبه على الكارو تتسامر مع الحمار
والشمس فوق جسمها تشعل وتقدح نار
ولما يوم ينتظرها ابن الذوات ببكار
تقول له روّح على امك وابقى قابلني
احب بنت البلد من فرط خفتها
هوليود على بدعها ما تجيبش عصبتها
ولا بنات لندره تتلف لفتها
أدي اللي جاب لي البلا أدي اللي هابلني”
― بيرم التونسي, المجموعة الكاملة لشاعر الشعب: بيرم التونسي

“يا مصري و انت اللي هاممني من دون الكل
هزيل و يحسبك الجاهل عيان بالسل
من دي الكيوف اللي تصبر على كتر الذل
و نمت و العالم فايق قوم بص و طل
و شوف الشعوب و اتغص و دوب و ارجع إنسان”
― بيرم التونسي, المجموعة الكاملة لشاعر الشعب: بيرم التونسي

“الحق إسم من أسماء الله الحسنى ، يعني ربنا ذاته اسمه الحق، والحق هو ربنا ، فلما يجتمع من الآدميين ميت ألف ديشيليون مكار عشان يخفوا الحق ميقدروش، إن مظهرش الكذب في عيونهم يظهر في أصواتهم أو في حركاتهم ، لأن ربنا نفسه عايزه يظهر صوت الكذاب المخادع بيبقى نشاز ، مهواش سالك مفيهوش مقامات موسيقية، كله من طبقه واحدة مالوش طعم”
― بيرم التونسي, السيد ومراته في باريس

“ابواب جهنم فى يونيو تنفتح رسمى
للى على الشط قالت : يا جمال جسمى
يدخل جهنم وراها المعجبين ملايين
وف كل فوج الزبانيه تلتقى اسمى


ح ادخل جهنم ورا اللى جسمها من عاج
النص مفتول ونصه مكتنز.رجراج
تمثال من الحسن وسط البحر ,والامواج
وفود تسلم على التمثال وتمسى


وادخل جهنم ورا اللى جسمها ممشوق
وخصرها بالمايوه المختصر مخنوق
الكوره يحدفها فى وجهى ,ونا مفلوق
تجينى وتقول : ناولنى الكوره يا عمى


وادخل جهنم مع اللى اتشعلقت ع البار
وتلتوى وتنفردلى ,فى ادب ووقار
خلتنى اروح للمره مراتى ,شيطان الدار
اقول لها إمتى تبقى طالقه زى أُمى


واقول له يارب تحرقنى ونا عبدك
واللى عشق-اتعشق .خلقك ومن عندك
انا كنت فى الدنيا بتفرج على فنك
قال لى هناك صنعتى ,لكن هنا حكمى”
― بيرم التونسي

“و فى السما رب للطاغين يوريهم
لما ياخدهم على بغته و أخده أليم
إذا حكم ربنا عاللى طغا بالحد
يعمى بصيرته و يجعل له المسالك سد
و يضحك الناس عليه يوم الوقار و الجد”
― بيرم التونسي, المجموعة الكاملة لشاعر الشعب: بيرم التونسي

“من هفوة او كلمة هايفة نتحمق ونقوم ..
نسب وندب ويدور العراك بالشوم
وكل محموق وله فرقة تقوم بهجوم
من قبل ما تعرف الظالم من المظلوم
ومنين نشوف العدل ولا السفينة تعوم
مادام فوق قلبها قاعدين لبعض خصوم
تضحك علينا الحدادي في السما والبوم”
― بيرم التونسي

“ليه يا بنفسج بتبهج وانتَ زهر حزين
والعين تتابعك وطبعَكْ محتشم ورزين
ليه يا بنفسج بتبهج وإنتَ زهر حزين
ملفوف وزاهي يا ساهي لم تبوح للعين
بكلمة منك كأنك سر بين إتنين
ليه يا بنفسج بتبهج وإنتَ زهر حزين
حُسنك في كونك، بلونك، تبهج المقهور
اللي يضيره، ضميره، بالظلام مغمور
ليه يا بنفسج بتبهج وانتً زهر حزين
حطُوك خَميله.. جميله.. فوق صدور الغيد
تسمع وتسرَق يا أزرق، همسة التنهيد
ليه يا بنفسج بتبهج وانتَ زهر حزين
إسمع وقُللي من اللي قال معايا آه آه آه
بقولها وحدي.. لوحدي، والأسى هُوّاه
ليه يا بنفسج بتبهج وانتَ زهر حزين
 ”
― بيرم التونسي