No OR > No's Quotes

“أنا أحسن واحد يقنعك تحكي…

ومابيحكيش…

وأحسن واحد يقنعك تبكي…

...وما بيبكيش…

أنا أحسن واحد يقنعك تفرح….

وأحسن واحد يقنعك تجرح…

أنا أحسن واحد ميت….

يقدر يقنعك….تعيش…”
― مصطفى إبراهيم, المانيفستو

“واللي إنكتب بالجاف مبيتمسحش خلاص
و الدُنيا مفيهاش حرف بينكتب برصاص !”
― مصطفى إبراهيم

“يا ناس يا عبط يا عشمانين..
ف فرصه تانيه للقا..
بطلوا اوهام بقي..
وكفايه أحلام واسمعوا..
عيشوا بذمه و ودعوا..
كل حاجة بتعملوها..
وكل حد بتشوفوه..
وكل كلمه بتقولوها..
وكل لحن بتسمعوه..
عيشوا المشاهد... كل مشهد..
زي مايكون الأخير..
واشبعوا ساعة الوداع ….
واحضنوا الحاجه بـضمير..
دا اللي فاضل مش كتير ….
اللي فاضل..
مش كتير”
― مصطفى إبراهيم, ويسترن يونيون فرع الهرم

“يارب
ياللي سايبلي الحبل ع الغارب
أنا غرقان بدون قارب
ومعرفتش أعوم وحدي
وكل ما امدلك يدي
وتنشلني
وأعوم شبرين
إديا يفلفصوا الاتنين
وأقولك سيبلي انا الباقي
تسيبلي الحبل ع الغارب
تخش المية حلقي .. اشرق
فاصرخلك .. وأقول بغرق
وأقولك عمري ما حسيبك
فتنشلني
أعوم شبرين
إديا يفلفصوا الاتنين
وأسيب إيدك
وأعيد الكرّه ميت مره
وماتخذلنيش ولا مره
تقوللي حضنهم بره
لا عمره يساع دراع سيدك
ونا لسه
بسيب إيدك !”
― مصطفى إبراهيم, ويسترن يونيون فرع الهرم

“العيال اللى كانت بتقعد ف أول ديسك وبيتصاحبوا على المدرسين ويفتنوا على أصحابهم، غالبًا لما يكبروا بيبقوا إخوان. والعيال عديمة الموهبة اللي نفسهم يبقوا حاجة بالعافية، بيكبروا ويبقوا ظباط. والعيال اللى كانت بتجيب معاها حلويات مستوردة والمقلمة أم دورين، هم وأصحابهم بيبقوا فلول. والعيال اللى كانت بتقعد معاك ورا تقشّر يوستفاندى وتقزقز لب سوبر وتقلب ريحة الفصل، بيكبروا يبقوا ليبراليين ويطلع ميتين أبوهم علشان علّموا على كل العيال دى وهمّ صغيرين.”
― مصطفى إبراهيم

“رقصت كتير علي السلم بخاف أطلع و أخاف ن الأرض
-أكيد الخوف مش الفكره
وحتي يا ستي يعني بفرض , اكيد الخوف ما هوّاش عيب , طبيعي الناس تخاف م الغيب وم المقدور , برغم كده بحب الضلمه أكتر ما بحب النور,
ساعات بتمني شقه ف برج شايفه النيل, واوقات اني اعيش مستور وبزهد .. كل ما ف الرحله من زخرف ومازهدهاش ما دام فيها رمق يتعاش, اكيد ف الرحله يوم متحاش ومستني اعدي عليه,
-وتعرف ايه عنه اصلا؟
مفيش غير انه لسه مجاش”
― مصطفى إبراهيم, المانيفستو

“و بتأثر
و بتحسر
على كل اللى كان ممكن
أكونه
بس ما بقيتهوش”
― مصطفى إبراهيم, المانيفستو

“أنا أصلاً هبقى كويس
و مفيش حاجة مضيقانى”
― مصطفى إبراهيم, المانيفستو

“صاحب المكان..ينده عليا و يقوللى ها..نفسك ف ايه؟ اسكت واتهته و اقول رضاك يقول تعبت ولا ايه؟ اقوله خدنى افضل معاك..”
― مصطفى إبراهيم, ويسترن يونيون فرع الهرم

“فقالي قريب .. ما تزعلشي”
― مصطفى إبراهيم

“الأوّله… أرزاق ...
والتانيه…. أسماء...
والتالته…. بشتاق....
الأوّله… أرزاق مفيش حيلة ولا سكّة....
والتانيه…. أسماء عيال بتحب ع الدكّة....
والتالته… بشتاق لطعم الفرح والضحكة.....
الأوّله… أرزاق مفيش حيلة ولا سكّة غير المكتوب....
والتانيه…. أسماء عيال بتحب ع الدكّة و راسمة قلوب....
والتالته… بشتاق لطعم الفرح والضحكة يا شيخ أيوب ....
الأوّله… أرزاق مفيش حيلة ولا سكّة غير المكتوب مقّسِم كلّه بالحتة…
والتانيه…. أسماء عيال بتحب ع الدكّة و راسمة قلوب لكل الخلق إلا انت....
والتالته… بشتاق لطعم الفرح والضحكة يا شيخ أيوب أنا ملّيت ..حدوق امتي ؟....
الأوّله… أرزاق مفيش حيلة ولا سكّة غير المكتوب مقّسِم كلّه بالحتة وكله نصيب.....
متزعلشي…..
والتانيه…. أسماء عيال بتحب ع الدكّة و راسمة قلوب لكل الخلق إلا انت ملكش حبيب ...
متزعلشي….
والتالته… بشتاق لطعم الفرح والضحكة يا شيخ أيوب أنا ملّيت..حدوق امتي ؟ ف قاللي قريب ....
متزعلشي…..”
― مصطفى إبراهيم, ويسترن يونيون فرع الهرم