Tareq > Tareq's Quotes

“في الغربة

سلملي ع الكراريس و ع الأوتوبيس وفرن العيش
سلملي ع العشــــاق ومشـــــيتهم على الكــورنيش
سلملي ع البنت اللي فـاتحـة من زمـــان شـــــــباك
يمكن يعــدّي ابن الحـــــلال لابس هـدوم الجــــيش

سلملي ع الجــرنـان .. موظف شــايله تحت البـاط
سلملي ع الدلـع اللي بيكــهــرب و ع الحـــــركات
يامــــا ألف شـــاعر للعـــيـون والغــــمازات غنّى
سلملي ع الـواد اللي عقله من غـــرامهم شــــــاط

سلملي ع الحـــلــوة وعلى غــنـــوة قــــالتــهــالي
فـاتت عـلـيـهـا ســــنين وتــاه اللـحــن من بــــالي
سلملي ع الصـــــحـبـة و ع الســـــهـيرة وفـلـوكة
مـاشـــية في وسط النيـــل تغني والمـــــزاج عالي

سلملي ع الحــــكايات من الجــــدات و ع البراويز
سلملي على ســـاعة العصارى وضـحكة العواجيز
سلملي على مكنة خـــياطة قـديمـــة في لاظوغلي
سلملي على طـبقين "كـريم كرامِّل" طـعمه لذيـــذ

ســكران و قلبي بالغـنـــــا والفــضــفــضــة والـع
ســكران ببـحـر إســـــكـنـدرية وســـرها البــــاتع
ســكران بليــل القــــــــاهـرة ... سـلّم وســمعـني
دقـة حـوافـر خـيل في عـز الليــل على الشـــارع”
― أحمد حداد

“من غير بكا وضحكة أمل
تبقى الحياة لا تحتمل
من غير ما ننسى من غير ما نحلم
من غير مانغلط من غير ما نندم
من غير ما نكره إزاى ح نعشق
وإزاى ح نوصل من غير ما نبدأ
من غير صحاب...
راحة وعذاب....
تبقى الحياة أكبر سراب

-أكبر سراب”
― أحمد حداد, حبة تراب

“غني و لو حسك مدبوح
الصمت داء بيموت .. بوح
و لو نسيت الغنا صرخ
إنشالله حتي يا صاحبي تنوح”
― أحمد حداد, حبة تراب

“ممنوع تمنع نفسك تحلم
احلم و أكيد مش راح تندم
بس الحلم بتاعك برضه
في الغالب ح يكون ممنوع”
― أحمد حداد, حبة تراب

“أنا مخاصم ..
ساعة على الحيطة بتسبقنى
و زمن بيسرقنى ..”
― أحمد حداد, دولاب الهدوم

“ده مكتبى و ده شبشبى
و ده سريرى ...
اللى حَضن ضحكى و تكشيرى
ده الشباك ..
باصص أكيد ع الشمس
هى هناك ..”
― أحمد حداد, دولاب الهدوم

“! يا مخربين يا قلة يا مندسة
بألقي في عذابكم لذة
نام يا وطن و اتمسي
الليل بيفتح سجون
!! اتلهي
النور صحي ، و احنا تلاتة مليون
بنغني في التحرير
و إذا كنت رافض للتغيير
بالعند فيك الدنيا بتتغير
و إذا كنت مصر تبقي صغير
الثورة قامت في الميدان
قولتلها بحبك في الميدان
قالت لي و أنا كمان !”
― أحمد حداد

“الأولة آه من وجع قلبى
و التانية آه ع اللى انقتل جنبى
و التالتة الله كريم و منتقم جبار ارحمنا يا ربى”
― أحمد حداد

“برواز قدام برواز
إسكندرية تقدر تشوف القاهرة
و يشموا بعض
بس اللى مانعهم .. قزاز”
― أحمد حداد, دولاب الهدوم

“على شط جمصة ضاع مني صندل
على شط بحر المتاهة ضعت
و طعم بوسة في قلبي حنضل
و رغم كل الوجع رجعت”
― أحمد حداد, حبة تراب

“الحب طير أهبل و قط عبيط
و حنان ..
و فستان سهرة متعلق و له حواديت”
― أحمد حداد, دولاب الهدوم

“طار الولد فى سما القاهرة
شاف الملايكة و الممرات القديمة
و إعلانات السيما
و حس إنه بعيد
و فى نفس الوقت قريب
من إيديها الشريفة”
― أحمد حداد, دولاب الهدوم

“الجزمة بتشيلنا و تودينا و تجيبنا
لحضرة الشارع حبيبنا”
― أحمد حداد, دولاب الهدوم

“البنت مكسوفة على الشبابيك
و ودنها مندوهة من مزازيك”
― أحمد حداد, دولاب الهدوم

“وحشتنى قوى لمتنا
يا ريتنا نقدر ننزل
و نشوف لها الفنجان
يا ريتنا ساعة الأدان
نفرش لها مصلية”
― أحمد حداد, دولاب الهدوم

“ما كنتش عمري أتخيل ان الحياة مش غابة
و ان احنا مش مساكين و غلابة
ان احنا بجد زي ما كتب التاريخ و الحواديت ما قالت
و لا عمري كنت أتخيل نفسي في إشارة مع دبابة
ساعات بقول مش فاهمة
و ساعات بقول بكرة أحلي
و ببتسم بهدوء
و ساعات بقول زي ما بيقولوا
ارفع راسك فوق
انت مصري”
― أحمد حداد

“آه يا نوفمبر ..
الحنين لزمان مدمر”
― أحمد حداد, دولاب الهدوم

“الحياة أخرجها هتشكوك من زمان
الحياة هادية و فى منتهى الروقان”
― أحمد حداد, دولاب الهدوم

“يا خالق كل شئ ناقص .. كمالته معاك
يا شايل م الحاجات حتة .. بنترجاك
بحق المشهد الكامل
و اسمك اللى أنا عرفته
تسيب اللى يكفينا
و تكفينا بما سبته
ما تحوجناش
لجاى مجاش
و ترضينا بما جبته”
― مصطفى إبراهيم, المانيفستو