حسن الدهراوي > حسن's Quotes

“عارفة ..
كل ماجي ابعت كلام ..
برجع تاني و امسحه ..
كل محاول امحي الخصام ..
وارجع الحب مطرحه ..
الاقي كلامي مبيوصفش ..
اد ايه قلبي من غيرك ..
مبقتش حاجه تفرحه ..

عارفة ..
لو كتبت فيكي مليون قصيدة ..
مش هعرف اوفيكي حقك ..
مهما كنتي عني بعيدة ..
جوة قلبي حفرت اسمك ..
مهما شوفت وشوش كتيرة ..
برضه عيني شايفة صورتك ..

عارفة ..
لو كنت بس بعرف ارسم ..
كنت هرسم كل يوم ..
كل حركة بتعمليها ..
وكل بسمه بترسميها ..
وكل ثانيه فيها شوفتك ..

عارفة ..
مهما كنت ف قلبي بكتم ..
برضه قلبي لساه حبيبك ..
بيحكي لكل الدنيا عنك ..
اكيد عارفة ..
ان كلامي كله عليكي ..
وان كل رسالة ليكي ..
دايماً كانت تنتهي ..
بكلمة بحبك ..”
― حسن الدهراوي

“جاهزة يا حاجة" ..!


- ألو ..
- ايوه يا فندم ..
- معايا المعلم بركات ..
- تمام يا فندم ..
- معاك فرقة مكافحة المخدرات ..
- اهلاً يا فندم ..
-ان شاء الله هنفبض عليك بكرة ..
علي معادنا من الاجتماع اللي فات ..
- تشرف يا فندم ..
- متنساش تلبس الحته اللي ع الحبل ..
دي صورك هتملا الجرايد و المجلات ..
- جاهز يا فندم ..
-وزي ما اتفقنا بقا ..
هنعمل معاك زي ما عملنا مع المشير ومبارك ..
وملوك الحديد و العربيات ..
- شرف ليا يا فندم ..
-يلا خد بالك من نفسك ..
وابقي جهز كام حته سلاح مع المخدرات ..
- مستنيك يا فندم ..”
― حسن الدهراوي

“علمنا الاستاذ مرزوق
واحنا صغيرين
نبقي لمضين
نسأل علي كل حاجة
دي ايه و بتحصل ليه
سمعت كلامه
بقيت دكتور
ماشي في شارع نور
مسكوني تحري
مع اني بريء
قلت للظابط ليه
قاللي هو كده .. تلفيق
حبسني 4 ايام علي ذمة التحقيق

قلت بكرة تروق

ركبت في المواصلات
لقيت السواق بيقول
يا جماعة .. الاجرة زادت جنيه
ومش عايز كلام كتير
كفايه اني من الصبح بسوق
بقوله ليه
قاللي هو كده يا بيه
واللي مش عاجبه ينزل
يعمل ثورة ف التحرير

قلت معلش بكرة تروق

قلت اشتري عربية
وانا بطلع رخصه
الموظف قاللي عايز رشوة مشفية
بقوله ليه
قاللي ايه
مفيش ذوق
وراح مسقطني في امتحان السواقة
مع اني بعرف اسوق

قلت معلش بكرة تروق

حبيت واحدة
وفضلت معاها سنين
قلت اتقدملها
اهلها رفضوا
قولتهم ليه
قالولي انتا مين؟
بطل تبص لفوق

ميلت علي قلبي
وسألته ليه
قاللي اصبر
بكرة تحلي و تروق
قلتله بقوللك ايه
فوق
منك لله انتا و الاستاذ مرزوق
يارتني ما سمعت كلامكم
يا ريتني دخلت حقوق”
― حسن الدهراوي

“في حاجات ..
تايه في وسط الحاجات ..
عايشة من غير احتياجات ..
لا بتفكر ولا بتقرر ..
ولا بتشارك في استفتاءات ..

وحاجات ..
مش بنشوفها ..
غير في الحكايات ..
ان الشرطة دي بتحمينا ..
وان العسكر دول اهالينا ..
وان احمد و مينا اخوات ..

وحاجات ..
بتقرر تعملها ..
وتكون مبسوط ..
بس بييجي الوقت عليها ..
بتروح زهوة أحلي ما فيها ..
وبسرعة تموت ..
من غير نهايات ..

وحاجات ..
بتفكر علي طول فيها ..
ضاعت منك وانت شاريها ..
بس مفيش حاجة هترجع ..
وكل ما تفتح حاجة بتوجع ..
ومبقاش في بينكوا حاجات ..

وحاجات ..
مرمية في دواليب ..
ساعة و نضارة و دباديب ..
عينك شايفاها كراكيب ..
مهما بتزهق م التوضيب ..
برضه هتفضل اغلي حاجات ..

وحاجات ..
جوايا و جواك ..
ده قلبه ناسيك ..
وده قلبه معاك ..
وده طول عمره بيستناك ..
تفضل تهرب من حدوته ..
تستناك أصعب حكايات ..”
― حسن الدهراوي

“مبحفظش ارقام تليفونات ..
لا ارقام ولاد ولا ارقام بنات ..
الا رقم واحد ..
فيه سبعه و تمانيه ..
و اربعة و سته و وواحد ..
مش سهل يعني ده وشه زي قفاه ..
بس مش عارف ليه اشمعنا ده بالذات ..
مش عارف انساه ..
يمكن من كتر المكالمات ؟؟
يمكن عشان المكالمات كانت بالساعات ؟؟
والرسايل بالالافات ؟؟
طب اغير انا رقمي ولا اعمل ايه ..
مكانش رقم يعني فيه سبعين و تمانيين ..
طب احفظ كل ارقام الناس التانيين ..
الارقام السهلة و المكلكعين ..
يمكن بعدها ..
القي الارقام زي بعضها ..
وانسي كل الارقام وقتها ..
ميبقاش فيها رقم رخيص و رقم غالي ..
ولا رقم فقير و رقم عالي ..
ولا رقم حبي القديم ..
اللي مات و انتهي ..”
― حسن الدهراوي

“مطلوب للتحقيق .

ايوه يا فندم ..
انا مدير الوحدة الصحية ..
بالبلاد المنفيه ..
بس الشهادة لله ..
الوحده ميه ميه ..
ومن انضف الوحدات ..
نعم؟؟
جاي عشان التحقيق؟؟
ربنا يستر ان شاء الله ..
ويبعد عننا شر التحقيقات والجزاءات ..
متغيب عن العمل؟؟
اه للاسف مكنتش موجود ..
لا الاتنين ولا التلات اللي فات ..
كنت فين؟؟
كنت دايخ عند الميكانيكي ..
منها لله بقا الطرق و المطبات ..
منتا مش واخد بالك ..
اصل انا شغال سواق بعد الظهر ..
تحسين دخل لحد ميزودوا المرتبات ..
بس الوزير الشهادة لله ..
امير و طيب ..
وان شاء الله ينظفلنا المستشفيات ..
اقوال اخري؟؟
اه ياربت تبلغله سلامي ..
وتوصله كلامي ..
وتقوله يإما صلحلنا الطرق ..
او يعملنا تصريح نفتح عيادات .. !”
― حسن الدهراوي

“وحشتني الكلام في الهيافة ..
والضحك من غير سبب ..
وحشتني البجاحة ..
وقلت الادب ..
راحت فين الايام ..
لما كنا بنحكي ..
كل الفضايح ..
للي جاي و اللي رايح ..
ونسهر و نشرب من غير تعب ..
عايز الصراحة ..
هيا الضحكة اه ..
بقت بتطلع بالعافيه ..
بس لما بتطلع ..
ببتقي صافيه ..
ضحكة تحسها ..
مكتومة من سنين ..
اختفي الاحساس ..
اللي بين البينين ..
اه بقينا بنضحك ..
كل فين و فين ..
بس ضحكة من القلب ..
بتهز الدنيا ..”
― حسن الدهراوي

“مستني ايه ..
من طفل صغير ..
متربي ع الشتيمه ..
مبيشوفش من اهله ..
غير ذل و ضرب و قلة قيمه ..
كلام الدلع بالنسباله ..
يا فاشل ..
يا صايع ..
وابقي قابلني لو فلحت ..
والفسح المتاحة قدامه ..
انزل من سكات ..
جيب الحاجات دي من تحت ..
اما تنميه المواهب ..
اخرص خالص ..
مسمعلكش حس ..
وامشي جمب الحيط ..
واوعاك تقول للقطة بس ..
اما التقة بالذات ..
بتيجي من المقارنات ..
ده جارنا برقبتك ..
و اشطر منك ..
اصلاً انتا مش نافع ..
كشفت راسي و دعيت عليك ..
يجيلك و يتحط عليك ..
نفسي افهم ..
هتيجي منين العزيمة ..
هييجي منين الدافع ..
يبقي المشكلة ..
انك تختار صح من الاساس ..
مش مهم الجمال ..
مش مهم كلام الناس ..
وصدق الحكيم اللي قال ..
اختاروا لنطفكم فان العرق دساس ..”
― حسن الدهراوي

“سألوها عني
سكتت
ردت قالت معرفوش
مع انهم
لو يسـألوني
حبها لسا ف قلبي
منستوش

كنا بنتلكك لبعض كتيير
وبنقف لبعض ع الواحدة
هيا تقصد تخليني اغير
وانا اعرف عليها في اليوم 100 واحدة

كانت اجمل حاجة فينا
الاختلاف
ولما كتر الخلاف
محدش بقا علي جرح التاني
بيخاف

و تسمع الحكاية
وتيجي عند النهاية
متلاقيهاش
متعرفش مين مظلوم
ومين غشاش
ومين جرحه صعب
ومين جرحه ببلاش

هي دي الدنيا
وهو ده الحال
مش كل حاجة بنحلم بيها
بنلاقيها
ولا كل كلمة صح فوقتها بتتقال
وخلاصة الموال
لو هتسألوني عنها
مقدرش أقول غير عاشق
ولو حتي ف الخيال”
― حسن الدهراوي

“السيد الطيار صاحب أول ضربة جوية ..
بعد التحية ..
فينك كده مش ظاهر ..
واحشنا كتير يا راجل ..
بقالك زمن لا جتلك غيبوبة ..
ولا حتي ازمة قلبية ..
وازاي ساكت ع الناس اللي بتهرب ديا ..
مش تشد حيلك انتا كمان يمكن تروح السعودية ..
قدم تظلم و استئناف ..
واطمن قضاءنا بيخاف ..

وحكومتنا بقت توافقية ..
ومكانوش يعني كام قضية ..
منصور بإذن الله ..
والبراءة مضمونه ميه ميه ..
وهتطلع منها زي الشعرة من التقليه ..
وامانه عليك ..
بلغ سلامي لابنك جمال ..
ويارب يكون مزاجه عال العال ..
وخليه يقول لحسين ..
شعبنا تعب خلاص و جاتله اللحمية ..
فياريت يضربلنا الشخرة الفشيخة الفولاذية ..”
― حسن الدهراوي

“اه مش جريء ..
ومش ذنبي اني اتعلمت اهرب وقت الحريق ..
اه مش جريء ..
واللي يخاف موج البحر عمره ما بينقذ غريق ..
بس قلبي يمكن كان فيوم طيب بريء ..
لما كان بيتلخبط بين العدو و الصديق ..
وكان لازم القي النور لما ضليت الطريق ..
مش مهم عملت ايه ..
عمر الناس ما بتهتم بالوصف الدقيق ..
لو سرقت .. اسرق جمل ..
والجمل بما حمل ..
تبقي فلاتي تسهر يوماتي ..
بكرة حالك يتعدل ..
منطق سخيف ..
مش مهم الدنيا تخفي طول ما بتلاقي الرغيف ..
مش مهم الحق يظهر طول مانتا حاكم بسيف ..
حاكم بزيف ..
برضه عند الناس بطل وبالهطل دمك خفيف ..
ويصبح كلامك دستور منزه ..
وفي الذكاء عقليه فزه ..
وانت كلامك .. حبه تخاريف ..
والظريف ..
بعد كل سنوات التحقيق .. تطلع بريء ..
وعشان كده ..
هعيش واموت ..
وانا مش جريء ..”
― حسن الدهراوي

“المشكلة في انك تعرف بنات
مش انك هيتقال عليك صايع
ولا حتي انك مقطع السمكة
ومقضيها وضايع
وواكل من كل مخبر رغيف
لأ
المشكلة انك بتبقي خلاص
مش اي حاجة بتعجبك
ولا اي كلام يأثر فيك
من الاخر
قلبك مبقاش نضيف

قلبك مبقاش ضعيف
مش اي حاجة تحركه وترسيه
وصعب حد بالساهل يسكن فيه
هتفضل تقارن و تجرب
وتبعد عنه و تقرب
وفي الاخر
علي فشوش
واللي اخطر
لو كان أول حب في حياتك
مبتنساهوش
وتكون موهوب زيي في حفظ الوشوش
ساعتها هتتعب سنين
اه يخلق من الشبه اربعين
بس كلهم فالصو
فالصو ومينفعوش”
― حسن الدهراوي

“ملعون ابو ده احساس ..
انك ترسم بسمة علي شفايفك قدام الناس ..
ومحدش داري ايه جواك ..

انك تكره اللي باقي فعمرك ..
وسنك وفقرك ..a
وكل اللي فحياتك بيستناك ..

لما تعجز ويشيب شعرك ..
وانتا لسا مش عارف ..
مين ضدك ..
ومين علي طول الخط معاك ..

لما تخسر حاجات كتيير ..
كنت دايماً بتتمناها ..
ولما يسيبك اغلي ناس ..
كنت ناوي تعيش معاها ..
ولما يوصل بيك الحال ..
انك عايش كده وخلاص ..
يبقي اقل كلام يتقال ..
ملعون ابو ده احساس ..”
― حسن الدهراوي

“متأكده ..
هصحي يوم ..
والاقي الخصام انتهي ..
تبعتلي رساله ..
عتاب أو لوم ..
واتقل عليك ..
واقولك ازاي كان بيجيلك نوم ..
وتسيبني نايمه متنكده ..

متأكده ..
هتقوللي سامحيني ..
وادلع عليك ..
واطلع عنيك ..
واقولك في الاخر ..
بحبك ..
مبسوط كده ..

متأكده ..
مهما يكون بينا خناق ..
بيننا اتفاق ..
ومفيش في حياتنا كلمه فراق ..
وايه بس جاب ده ل دا ..

متأكده ..
من انك بتحبني ..
وانك شاريني ..
وبتتمني مني الرضا ..
مش كده ؟؟”
― حسن الدهراوي

“نصيحة من فلان ..
احسنلك تبقي وحيد ..
عايش زهقان بردان ..
من انك تشغل نفسك ..
بقلب ملوش امان ..
وحاول ترسم بسمه ..
وفرحة في كل مكان ..
واوعاك تصاحب حد ..
قلبه مالوش عنوان ..
ده ساعات بتكون الرسمة ..
احلي بدون الوان ..”
― حسن الدهراوي

“محدش يقول للي مات ..
انه مخدش منا غير السكات ..
محدش بقا بيقول بلطجي ..
ولا حد بقا بيقول مقتول ..
ولا ايه اللي وداه اشتباكات ..
سكات ..
نسمع الخبر ..
نجري نفتح التليفزيونات ..
ونشوف القتل المسلسل ..
زي حلقة متعاده من مسلسل ..
من ضمن المسلسلات ..
أما رد الناس اللي بترفع الاذان ..
ان الموت يا جماعة مذكور في القرآن ..
و لازم نؤمن بالقضاء و القدر ..
ولا ايه هو الشعب كفر ..
كله بيفوت زي اللي فات ..
اما رد مؤسسة الرياسة ..
المعروفة بالفطانة و الكياسة ..
زياره عاجلة لقطاع غزة ..
وامدادهم بالادوية والمعونات ..
وقيادات الاخوان ..
في زيارة اخري لباكستان ..
لجمع المزيد من الشهادات ..
مع وضع شريطة سودا ..
علي جميع القنوات ..
كإنها وصفه مدروسة ..
من النظام اللي فات ..
يا ريسنا يا رصين ..
يا تري هتصلي الجمعة الجاية فين ..
ويا تري هتبقي جمعة بس ..
ولا معاها صلاة علي روح الاموات ..”
― حسن الدهراوي

“صحيت اقلب في الجرايد والمجلات جالي اكتئاب ..
قلت اسمع شوية اغاني لقيتها كلها عن الغدر و الغياب ..
قلت اشغل التليفزيون اشوف فيلم ولا حاجة ..
لقيت في شريط الاخبار ..
سحل المتظاهرين في استمرار ..
وانخفاض مؤشرات البورصة و الاستثمار ..
والاقتصاد المصري في انهيار ..
والريس لسا بيوعد الناس بالاستقرار ..
بس ياريت تتبرعوا وده رقم الحساب ..
قلت لازم اخرج اشم شوية هوا ..
لقيت الناس مطحونة في المواصلات ..
ومفيش جديد لساه نفس العذاب ..
قعدت علي القهوة شربت عناب ..
قلت يمكن يروق دمي شوية ..
ويهون ايامنا الهباب ..
رجعت البيت بطلع المفتاح ..
افتكرت اني نسيته في الشقة ..
ومفيش حل غير اني اكسر الباب ..”
― حسن الدهراوي

“صورني يابني صورة علي مقاسي ..
منا بقيت اهم واحد في عشيرتي و ناسي ..
الرجل المحنك الطيب الراسي ..
و في الشرق الاوسط اهم سياسي ..

صورني كده صورة وانا مش واخد بالي ..
اصل الحكم بالنسبالي مجرد تسالي ..
تموت الناس تولع انا اصلاً مالي ..
عبيط لو فكرت اني بفكر براسي ..

صورني صورة بقا مع صاحب القرار ..
بديع الوديع الفظيع ابو الثوار ..
وتعليقاً علي موضوع ضرب النار ..
قاللي يا ريس فكك تبات دمار ..
يصبح تاني يوم الشعب ناسي ..

صورني صورة من قريب تبين العضلات ..
وانشرها بكرة بالامر في كل المجلات ..
واكتب عليها بالفونت العريض ..
الريس في الشده شديد ..
وقلبه الحديد في الاسيه قاسي ..

صورني صورة وانا فاتح صدري ..
عشان الشعب علي طول يسمع امري ..
ويقول نعم في استفتاء ام صبري ..
وخلاص هنثبت نفسنا في الكراسي ..
زغرطي يام ايمن بقيت اهم سياسي ..”
― حسن الدهراوي

“انا لما بحب اكتب بكتب علي النوت باد ..
وبشرب الشاي عادي متلأم في البراد ..
يجري ايه لو رجعنا نزرع بالفاس من غير سماد ..
يجري ايه لو سبنا الحكم ع الناس لرب العباد ..”
― حسن الدهراوي

“كلام شبه الكلام بس الطعم متغير ..
وايام بتفوت اوام وبرضه القلب متحير ..
يا تري اوقاتنا الحلوة هتدوم ..
ولا كالعــاده .. عمرها قصير ..”
― حسن الدهراوي

“ضرب الودع قاله مستني اقولك ايه ؟!
ماضيك خلاص انتهي و الجاي انت بانيه ..
بكره في علم الغيب تزرعه هتلاقيه ..
مكنتش هبقي ودع لو كنت بفهم فيه ..”
― حسن الدهراوي

“لما تقارن الاجور بيننا و بين الاجانب ..
هتلاقي من الفجور انك تكون عازب ..
هتشكر المسئولين .. علي تخفيض سعر الحشيش ..
وتلاقي ان تجاره .. بيتحبسوا علي مفيش ..
وتستغرب ليه المصري في الغربه عمال يحارب ..
مع انه كان في بلده بيرمي رغيف العيش ..”
― حسن الدهراوي

“يمكن تكون غلطتي اني مكنتش بقول اسمك وبقول دايما حبيبي..
وكنت بدعي في كل صلاه انك تبقى من نصيبي..
بس النصيب غلاب.. وياما فرق أحباب..
وكان القدر مكتوب.. انك لازم تغيبي..”
― حسن الدهراوي

“انا شاعر فمتسالنيش عن حالي عشان انا كل دقيقه بحال..
بفرح وبغني 100 غنوه واغرق بدموعي في موال..
لو شوفتني زعلان يوم طنش ومتلحش وتزيد في سؤال..
قادر اطلع من حزني وافرفش ساخر انا طول عمرى وبألش..
بضحك ع الحزن بكام كلمه واهرب من الواقع بخيال..
عجباني حياتي بتفاصيلها محلاها حياه الترحال..”
― حسن الدهراوي

“باين في عنيا السهر و الحيره و الحرمان..
انا كنت بحبك بس ولا ده كان ادمان..
كنت زمان شايف الدنيا ب 100 لون..
دلوقتي الدنيا في عيني بدون ألوان..”
― حسن الدهراوي

“كنت لما اشترى موبايل اوريهولك.. تقوليلي حلو.. مش بطال..
آخر موبايل لما عرف اللي حصل قال.. والله منا شغال..
هتفرق في ايه تجرب صوتي مدام مش بصوتها..
وتفرق في ايه تجرب كاميرتي مدام مش صورتها..
ميهمنيش باقي الناس.. أصل خلاص.. راحت اللي كانت لما تفرح بيرتاح البال”
― حسن الدهراوي

“بقوله لما بنام بحس بألم وساعات ينزل من عيني دموع..
قاللي خد القطره دي تلات مرات..
قولتله مفيش حاجة تنسى اللي فات..
قاللي في .. بس ممنوع..”
― حسن الدهراوي

“كنت واعدها بطقم جديد في العيد..
وكنت محوش معاها كل اللي اقدر عليه..
وفيوم قالتلي خد فلوسك.. قولتلها خير.. ليه..
قالتلي يمكن تحتاجها قريب..
قلت طيب..
انتي حره..
مفهمتش ساعتها أن دي كانت اخر مرة..
ولأول مره.. ادوق طعم الغدر..
دنا كنت نادر ندر..
اديكي كل عمري باللي فيه..
سبتي كل ده يروح هدر و بعدتي ليه..
تشهد عليكي كل سكه مشينا فيها في الشوارع..
تشهد عليكي كل لحظه في عمري اللي ضايع..
تشهد عليكي أوراق الورد و ليالي البرد في الشتا..
وكل نبضه قلب صاحيه تهزني وكل نبضه ميته..
اني كنت معاكي مخلص وانتي كان فكرك شريد..
والقدر قال كلمته.. مش هييجي تاني عيد..”
― حسن الدهراوي

“بقنع نفسي انا بحاجات ..
واطلع في الاخر موهوم ..
واتوسم في الناس بالخير ..
وابات اخر اليوم مصدوم ..
مظلوم قلبي معايا تملي ..
مبيعملش حساب الخاينين ..
فيا قلبي عشان خاطري تخلي ..
جولك كده حبه تخوين ..
مش عيب لما تخاف من بكره ..
وتفكر تعمله حساب ..
بيعيش الانسان يتمني ..
يقدر يقفل علي نفسه الباب ..
اصل اللي متقدرش تعيشه ..
في الدنيا غدر الاحباب ..”
― حسن الدهراوي

“كلام كتير في القلب مينكتبش ع الورق ..
كلام قد السنين و العمر اللي فجأه اتسرق ..
ساعات تقدر بكلمه تحيي كل اللي مات ..
لكن ميفيدش الكلام انسان جواه اتحرق ..”
― حسن الدهراوي