Egyptians Good Readers discussion

# 8 نصايح لتنمية عادة القراءة :-
لو لسه داخل عالم القراءة جديد .. او حتي دودة كتب بس مكسل ومش زي الاول ... دي نصايح ترجعك تاني للمود عشان تقرأ أكتر وتبقي القراية جزء من عاداتك اليومية وتتعلق بيها اكتر ..

البوست علي صفحتكم في الفيس .. اقراها وشير وتابعنا ع الفيس :)

اقتراحات حلوه جدا

Mohamed wrote: "اقتراحات حلوه جدا"

طب كمل جميلك واعمل لايك للصفحة :D

اقتراحات حلوه
بس انا مبقدرش اسيب كتاب خانقنى ممكن انط سطور بس اسيبه مش بقدر
بقول اميد حاتعلم من وحاشته حاجه حلوه و هى الصبر

Hala wrote: "اقتراحات حلوه
بس انا مبقدرش اسيب كتاب خانقنى ممكن انط سطور بس اسيبه مش بقدر
بقول اميد حاتعلم من وحاشته حاجه حلوه و هى الصبر"

ههههههههه الصبر سيد الفضائل ..
وفعلا بتتعلمي من الكتاب الوحش .. ع الاقل تجنب الاسلوب الوحش دا لو هتكتبي ، وانك متقريش للكاتب دا تاني .. وبينمي عندك الحاسة السادسة بتاع القراية وتجنب الكتب الوحشة ..

بس دا لو عندك وقت كافي تتعلميه بقا .. العمر مهما استغلناه صح مفيهوش اللي نضيعه علي كتاب وحش او مش مفيد.. .

بالنسبة لى بنفذ 4،5،6
بس صراحة اللى بيدفعنى للقراءة هو حالة النشوى والتسامى اللى بحسها .. يوم بدون قراءة .. يعنى لى يوم كئيب

ما شاء الله اقتراحات مميزة يا استاذ احمد .... بس احنا محتاجين نعرف افضل الكتب والروايات علشان نختصر على نفسنا كتير

Eman wrote: "بالنسبة لى بنفذ 4،5،6
بس صراحة اللى بيدفعنى للقراءة هو حالة النشوى والتسامى اللى بحسها .. يوم بدون قراءة .. يعنى لى يوم كئيب"

هو دا الادمان :)

amira wrote: "ما شاء الله اقتراحات مميزة يا استاذ احمد .... بس احنا محتاجين نعرف افضل الكتب والروايات علشان نختصر على نفسنا كتير"


فيه قسم كامل للاقتراحات والترشيحات في الجروب يا اميرة ، خديلك لفة فيه .. من هنا
https://www.goodreads.com/topic/group...

وفي اللينك دا انا عامل فهرس لمواضيع الجروب المهمة وبحاول احدثه كل فترة .. شوفيه وهتلاقي مواضيع ان شاء الله تهمك .
https://www.goodreads.com/topic/show/...

واخيرا فيه كتاب مهم لـ د. طارق سويدان في موسوعة الثقافة المكونة من اربع كتب، وهو كتاب اسمه ماذا اقرأ .. دا لينك تحميل الكتاب .. حجمه كبير بس كتاب مهم جداا ودليل للقراءة فعلا .. ومتقسم حسب الموضوعات والمرحلة العمرية والبنات والولاد .. الخ
http://waqfeya.com/book.php?bid=7403

فين النصايح؟

فيه لينك للموضوع فوق ... والمقال الاصلي على صفحتنا ف الفيس بوك

انامش شايف ايتها نصايح :D !

سؤال :انا عايز لينك الصفحه على الفيس لانى مش عارف اقرا النصايح

https://www.facebook.com/Egyptian.Boo...

اللينك اللي انته حاطه بيوصل لصفحتكم وانا ما اعرف اي شي في الفيس تهت والله
نفسي اقرأ المقال

# 8 نصايح لتنمية عادة القراءة :-
8 Tips to Develop a Reading Habit

1- زور واشترك في المكتبات .. استعير الكتب ..
لان ميعاد اعادة الكتب والفترة اللي لازم تخلص فيها الكتب هتكون محفز ليك انك تقرأ اكتر وتنجز ..

2- اقرأ في اي مكان .. أي وقت ..
اربط القراءة بعاداتك اليومية واماكن تواجدك (في المواصلات، قبل النوم،لما النور يقطع ع الموبايل :) اثناء انتظار الصلاة، او الاعلانات اللي وسط المسلسل اللي تقدر فيها بس تخلص كتاب في اسبوع :) .. او اوقات الانتظار عموماً ... الخ)
خليك معاك دايما كتاب جيب، سيب كتاب في الشغل .. اوديو بوك في العربية او الموبايل ... كتاب خفيف او كوميكس مثلا في الحمام :) .. ع الموبايل والتابلت وياريت لو نفس نسخ الكتب الورقية اللي بتقراها عشان تنجز ..

3- إقرأ لـ .. اطفالك ، المسنين ، للمناقشات .. للتلخيص..
القراءة بهدف بتخيلها اسهل علي قلبك واحب ، وبتستفيد حتي وانت بتقرأ للاطفال، ع الاقل بتستفيد التعود علي القراءة في حد ذاتها لوقت اطول ..
والقراءة بهدف المناقشات او تلخيص الكتب وكتابة تقييمك ليها ... الخ واهو كله ثواب .. دا مفيد جداا ليك ولغيرك ، وهيخليك دودة كتب ..
شاركنا في مناقشتنا كل شهر .. ع الجود ريدز ..

4- خليها نشاط اجتماعي ..
زي ما قلت في رقم 3 .. القراءة مع جروب والمناقشات بتحفزك وبتربطك اكتر بالقراءة ، والتزامك بالقراءة خلال وقت معين مفيد جدا وبيعلمك تنجز وتقرأ اكتر في وقت اقل ..
دايما في اي حاجه خليك مع القطيع هتتقدم اسرع :) متغردش لوحدك ..

5- اختر كتبك بعناية ..
الحياة قصيرة . عمرك ما هتقرأ كل اللي نفسك فيه مهما عملت .. ولا عمرك هتخلص كل اللي مفروض تقراه .. وبافتراض انك بتقرأ يومياً ولمدة كبيرة . فانت برضو في غني عن تضييع وقتك في كتاب ملوش لازمة .. او مخنوق منه .. اختار كويس واسال واقرأ التقييمات.

6- اديله فرصة لحد الـ 50
If after 50 pages, the book’s not floating your boat, move on.
بعد 50 صفحة من الكتاب لو حاسس انك اتخنقت ومش قادر تكمله او مش هيفيدك او انك بتضيع وقتك ... فكك منه ..
* اتعلم ثقافة الاستغناء .. انت مش مجبر تقرأ كتاب من الجلدة للجلدة، فيه كتب تقرأ منها فصول تهمك وبس ، وفيه كفاية اوي تقرأ كام صفحة ، وفيه كتب تتاكل اكل .. وفيه كتب تبدأ فيها وتبقي مش طايق تكمل .. وعشان واهم نفسك بانك لازم تقراه كله بتوصل لنفسك لكره القراية في حد ذاتها .. وبتبطل تقرأ الكتب دا او غيره وتبعد عن الكتب عموماً ..
اقرأ اللي يفيدك .. يشدك ... يستحق ... وارمي الباقي او متكملوش ..

7- اربطها بعادة تانية اساسية.
مثلا لو متعود تغسل اسنانك يومياً قبل النوم.. اوعد نفسك انك مش هتغسلها غير لما تعرف لمدة 10 دقايق ...
المهم العادة الاساسية تكون قوية عندك .. عشان هي اللي هتخليك تلتزم بالقراية .. ويوم بعد يوم من غير ما تحس الوقت دا هيزيد وهترتبط بالقراية اكتر ..
# في رمضان : ممكن ببساطة تربط القرآن بالصلاة .. عشان تختم ختمات اكتر .. التزم انك مش هتصلي غير لما تقرأ مثلا 5 صفحات او اكتر .. ودا هيخليك تروح الجامع بدري شوية وتكتب ضربت عصفورين بحجر ;)

8- تابع وسجل انجازك ..
حسس نفسك بقيمة العادة الجديدة دي .. قيم انت بقيت تقرأ كم كتاب في الشهر مثلا .. او كام صفحة في اليوم .. او كام دقيقة ... الخ
- الجود ريدز من ضمن الوسائل الكويسة لكدا .. هتعرف قريت كام كتاب في السنة ع الاقل ..
- حط هدف واقعي انك مثلا تخلص كتاب شهريا (او حسب مستواك) وحاول تزيد منه او تحقق اكتر ... وحط اهداف اعلي بعدين ...

===================================
عناوين الخطوات مستوحاة من المقالة الاصلية بالانجليزي .. والشرح تحتها خاص بينا ..

شكرًا احمد وجيه و كل الأصدقاء

شكرًا
النصيحه رقم 6 صعبه عليا شويه لكن انا مقتنعه بكل الكلام لكن مش بقدر اسيب كتاب ابتديت فيه ضميرك بيوحعنى و بحس أنى بظلم الكاتب و مش بقدر أقيمه بشكل جيد لكن فعلا معدل القراءة عندى بيقل و بتوصل لمرحله أنى مش عايزه اقرء كأنه هم عليا
حاحاول ان شاء الله أفتكر رقم ستة احتمال أتشجع و اسيب كتاب ممل بياخد من وقتى اكتر ما بيضيف ليا جديد

Hala wrote: "شكرًا
النصيحه رقم 6 صعبه عليا شويه لكن انا مقتنعه بكل الكلام لكن مش بقدر اسيب كتاب ابتديت فيه ضميرك بيوحعنى و بحس أنى بظلم الكاتب و مش بقدر أقيمه بشكل جيد لكن فعلا معدل القراءة عندى بيقل و بتوصل ل..."

كلنا عندنا نفس المشكلة بنسب مختلفة .
جربي هتفرق معاكي كتير ..
وبعدين الكتاب لو يستحق هترجعيله تاني ..

Ahmed wrote: "شكرًا احمد وجيه و كل الأصدقاء"

عفوا :)

تسلم ايديكو :)