Egyptians Good Readers discussion

عندي مشكله وآحدة بس فى قراءة أي كتاب او اي حاجه عامةً

وهي إني بعاني من إني بعد ما أقرا حاجه مابكونش متأكدة إذا كنت فهمتها أو لا

وأرجع أعيد القراءة من جديد لدرجة إن ممكن توصل لـ 4 او 5 مرات مثلاً .. وده بيتكرر معايا كتير
خصوصاً لو إن المعلومة جديدة عليا

وده بياخد من وقتي وأنا فى أمس الحاجة إليه

وعايزة اعرف إذا كان فيه حل للموضوع ده ولا لا ؟ ياريت حد يقدر يفيدني لإني بعاني منه جدا

حاولى تهيئى الجو المحيط بيكى ,يعنى لو تركيزك منخفض حاولى تقعدى فى مكان بلا ضوضاء ,حاولى تقعدى فى وضع استرخاء يعنى بدل ماتقعدى على كرسى اقعدى على كنبة ,حاولى تخلصى المهام المطلوبة منك قبل القراءة عشان ماتقعديش تفكرى فيها وانتى بتقرى ,حاولى تختارى نوعية كتب لغتها سهلة

مـُتشكرة هحاول اعمل كده

دائما تعملى مع اى كتاب كمسرحيه او فيلم وحاولى تنبسطى اكثر من التركيز لانك لمحولتك النركيز بتفقدى التسلسل وممكن تعلمى بقلم رصاص او بالورق اللازق عن الحجات الى انتى عاوزة تحفظيها او شدتك
وبالتوفيق

عندك حق يا ايمي ميرسي يا قمر ^^

اعتقد انك ساعتها مش بتكوني منجذبة للكتاب او الفقرة اللي انت بتقرايها بما يكفي لما بحصلي كده بسيب الكتاب لحد ما يرجعلي الحماس تاني

لأ والله بالعكس ده حتي بخصص وقت معين للتفرغ للقراءة و يكون عقلى صاف تماماً وبقرأ المواضيع التي يشتمل عليها الكتاب فى الفهرس قبل البداية ومع ذلك مابركزش

حاولى تعملى زيى ,لما بقرأ الكتاب بجمع منه الافكار اللى عجبتنى (وبحطها على الفيس بعد كده ,بس لو مش بتستخدمى الفيس )ممكن تحطيها فى كشكول ,يعنى وانا أقرأ اركز على معنى الكلمات وهل هى ترقى لمستوى انى احتفظ بيها او اشاركها او لا ,وماتستغربيش لو الافكار قليلة ,ساعات اقرأ كتاب 280 صفحة وماطلعش منه غير ب4 افكار ,كمان ماتجبريش نفسك تقرى كتاب من بدايته انتى شايفة ان اسلوبه مش حلو او لغته مش حلوة ,لو الكتاب ماشدكيش من الاول ,بلاش تكمليه ,اركنيه يمكن ترجعيله بعد كده

صح أنا فعلاً بعمل كده على فكرة ^^

احنا اتكلمنا عن المشكلة دي في موضوعي عن القراءة السريعة والاعضاء قالوا كلام ممتاز فاتمني اللي هضيفوا يفيدك ان شاء الله..
واخر فكرة بتاع الكشكول اللي قالها احمد مش هكرر الكلام عنها طبعا وجزاه الله عنها كل خير .. الكشكول دا فعلا هيفيدك .. وتقدري تشيري كمان فيه للصفحات المهمة في اي كتاب او تحطي خلاصة كل كتاب مهم تقريه في صفحة او خريطة ذهنية ...


المهم ... ببساطة يا ياسمين..
انتي لما بتتفرجي مثلا علي فيلم مترجم .. عينك بتتابع الترجمة بسرعة .. ساعات تحسي ان بداية الفهم مش فاهمه منها اي حاجه وتحاولي تركزي بس اصلا مش هتفهمي حاجه غير بعد شوية .. ودا طبيعي

وساعات يفوتك شوية ترجمة .. ولو الفيلم في السينما او التلفزيون طبعا مش هتقدري توقفي وترجعي ... فبتضطري تكملي الفهم ..

واللي بيحصل !!! انك بعد شوية بتفهمي القصة ولا كأنوا فاتك اي حاجه ...

ودا ليه ؟؟؟

المعلومات في اي كتاب او الاحداث في الفيلم تنقسم ل 3 انواع :-
- افكار مهمة
ودي الكاتب هيعيد ويزيد فيها في اكتر من مكان فمتقلقيش منها وهتفهميها بعدين حتي لو مش دلوقتي

- افكار مش مهمة
ودي هو حاططها علي سبيل الحشو او رغي زايد منه او زيادة توضيح يتوه ساعات ... ودي لو فاتك مش هتخسري حاجه! فكملي ومترجعيش تاني ..

- افكار بعيدة او زيادات
مثلا كتاب سياسي او فلسفي والمؤلف حاطط فيه ابيات شعر ... تتعبي نفسك ليه وتقعدي تفهميها ! لو يهمك المحتوي العلمي وانك تنجزي وتفهمي فعلا عدي الحاجات دي الا لو حابه تستمتعي مثلا بالشعر دا ..

مثلا كتاب "طوق الحمامة" لابن حزم انا لما قريته ورغم حبي للشعر .. بس هو كل فقره لازم يرزع بعدها بيتين تلاته يشرحوا معني الفقرة .. وكدا مش هخلص مانا فهمت يا عمنا .. وشكرا لقريحتك الشعرية بس مش لازم تعطيل ..

وهكذا .. متتعبيش مثلا نفسك في قراية المقدمة والاهداءات لماما وبابا وحماتي .. الخ وتقديمات المشاهير للكتاب .. اي حاجه مش في عمق الموضوع عدي عليها بسرعه..

======
طب يعني عايز اقولك ايه ؟؟
وتعملي ايه برضو ؟؟؟

مبدئيا .. كل مرة هتعيدي فيها الفقرات اللي بترجعيلها دي ..... مش هتفهمي حاجه اصلا !رغم انك غالبا كنتي فاهمه!!!

ببساطة ....
ركزي بس باستمتاع ... يعني عيشي جو الكتاب من غير توهان ..

وبعدين ..
اقري بسرعة... ومتقفيش ابدا ... وهتحسي انك مش فاهمه فقرات عدت ... كملي قراية واضغطي علي نفسك عشان مترجعيش تاني (دي اصلا مشكلة معروفة من اهم مشاكل القراءة البطيئة) لحد ما الفصل او المقال ينتهي

>>
طب الفصل خلص !!

اما انك هتكتشفي فعلا ان عدم الفهم دا كان وهم وان الموضوع اتجمع في دماغك لما شوفتي الصورة الكاملة ..

او هتفهمي الموضوع بس هيبقي فيه حتت لسه مضلمه وهتبقي مخسرتيش حاجه ولا ضيعتي وقت لانك قريتي بسرعه وشفتي المتاهة كاملة مش مشيتي فيها خطوة خطوة ... ولما ترجعي المرة دي هتبقي اسرع ومجرد بس بتقفلي الثغرات ..

========
حلو الكلام ؟ بس فعلا انا مش فاهمه او الموضوع صعب او بتذاكري ولازم تفهمي ؟؟!!

يبقي امسكي في ايد سعادتك قلم رصاص او خلي معاكي لون احمر وازرق مثلا ...

وحددي لنفسك علامات ورموز معينة ليها معني محدد .. زي مثلا ..

؟ علامة استفهام
اي جزء مش فاهماه او لسه غامض

! علامة تعجب
حاجه غريبة او محتاجه توضيح اكتر مثلا او لطيفة او او براحتك

لمبة منورة
لو مثلا قابلتي فكرة حلوة وعايزة تطبيقها

واي علامات تانية ( للفقرات المكررة بنفس المعني - للرغي والهتي الفاضي - للاجزاء المهمة - للمقولات الحلوة - .... الخ)


وكل ما تقابلك جزئية مش فاهماها ارزعي علامة استفهام لطيفة تهدي عقلك اللي بيتنطط ويقول فهموني ياهووو ... وكملي قراية فورا وهو هيسكت ويهدا ...

ولما تخلصي الموضوع ابقي ارجعي للاجزاء والعلامات دي واربطي الدنيا ببعض وافهمي الغامض وهكذا ..

----------------------------------------
حاجه اخيرة ...

فيه تقنيات تانية واساليب خاصة بالقراءة السريعة واللي بتعالج مشكلتك دي لان القراءة البطيئة اصلا هي اهم سبب لعدم الفهم احيانا ..

بس كفاية كدا لتدعي عليا من كتر الرغي ... وتكرهي اليوم اللي رديت عليكي فيه ...

وراجعي الموضوع دا لو تحبي .. هو كبير اوي بس ان شاء اللي هتلاقي في المناقشات اجابات تساعدك ..


http://www.goodreads.com/topic/show/6...
--------------------------------------
اخيرا اسف جدا ع التطويل ... بس هو الكلام كتير ... جربي بس وافتكري .. انك تقري ومترجعيش تقري الفقرات تاني وتستخدمي القلم الرصاص تأشري بيه بس وتكملي قراااية ..

جربي وقوليلي النتيجة

هههههههههههههههههه لا والله مش تطويل ولا حاجة أفدتني جداً جزاك الله خيراً ^^

ماشي هجرب

Ahmed wrote: "احنا اتكلمنا عن المشكلة دي في موضوعي عن القراءة السريعة والاعضاء قالوا كلام ممتاز فاتمني اللي هضيفوا يفيدك ان شاء الله..
واخر فكرة بتاع الكشكول اللي قالها احمد مش هكرر الكلام عنها طبعا وجزاه الله ..."

شكرا ليكي يا ياسمين على السؤال .. اللي بسببه عرفنا معلومات جديدة من اللي احمد قالها .. بجد جزاك الله كل خير يا احمد

Esraa wrote: "Ahmed wrote: "احنا اتكلمنا عن المشكلة دي في موضوعي عن القراءة السريعة والاعضاء قالوا كلام ممتاز فاتمني اللي هضيفوا يفيدك ان شاء الله..
واخر فكرة بتاع الكشكول اللي قالها احمد مش هكرر الكلام عنها طب..."


اها والله المعلومات دي فادتني أوي