كان يا مكان _ صندوق الحكايا المسحور discussion

كان مرة من زمان ... جاجة وعندها تلت صيصان صغار ...بيوم من ذات الأيام أخدو الصيصان الصغار اذن من أمهم يروحو يتمشو جنب البيت ...طلعو يمشو ..وبطريقهم لقو سنبلة قمح ..فرحو فيها كتييير وركدو مشان ياكلوها ...بس من بعيد شافهم الديك الرومي والوزة ...وبسرعة ركدو لياخدو السنبلة وبرجليهم الكبيرة دفشو الصيصان الصغار ووقعوهم ..وأكلو السنبلة لحالهم ..... زعلو الصيصان كتير وقعدو ع طرف الرصيف يبكو ....أمهم لما لقتهم تأخرو طلعت تدور عليهم ...ولما لقتهم زعلانين سألتهم شو صاير معهم ولماعرفت طلعت حواليها ...ولقت في حبة قمح وقعانة ع الأرض من السنبلة اللي سرقوها الديك الرومي والوزة ... طيبت خاطر الصيصان وقالتلهم هاتو هالحبة معنا ع البيت ولا تتخانقو عليها رح اعمللكم منها شي حلو كتير .....
لما وصلو ع البيت أخدتهم ع الجنينة اللي ورا البيت .. وخلت واحد من الصيصان يحفر التراب والتاني يزرع حبة القمح والتالت يسقيها وهي عم تساعدهم ....وعملت دور للسقاية بين الصيصان الصغار ..كل يوم واحد ..ودور لحتى يقيمو الأعشاب الضارة هيييييك لحتى طلع عرق أخضر فيو سنبلة خضرا صغيييرة ...صوصو الصيصان ...صيص صيص ...وركدو لياكلو السنبلة قالتلهم امهم لاااا ...استنو ..لسا بدها وقت كمان ...سمعو كلام أمهم وبقيو عم يديرو بالهم على محصولهم لحتى صارت سنبلة صفرا كبيرة وحلوة ...وقتها أمهم قالتلهم هلق صار فينا نقطفها ...وبعدين أخدتها بالعربايةوراحت عالمطحنة ...جابت الطحينات وفاتت ع المطبخ وطبعا بمساعدة الصيصان عملت قالب كاتو وخبزتو بالفرن ....مين شم الريحة؟ الديك الرومي والوزة اللي اجو ووقفو ع الشباك يتفرجو ع الصيصان وهنن عم ياكلو الكاتو الطيب ...ولما خلصو طلعو يلعبو قدام الباب وأمهم معهم قاعدة عم تشتغل بالصوف ...قربو منها الديك الرومي والوزة وقالولها يا ست فرخة ..طعمينامن الكاتو الطيب اللي عملتيه......قالتلهم شو نسيتو شو عملتو بالصيصان الصغار لما لقو السنبلة ....وهيك انحرمو من الكاتو الطيب بسبب أعمالهم السيئة وتوتة توتة خلصت الحدوتة
كم مرة مرقت كلمة الصيصان :)