الرصيف رقم (3\4) فقط لغير العامة discussion

هل ثورة 25 يناير هى بداية النهاية ؟؟
هل تثق ان يفعلها الشعب المصرى ؟؟؟
هل ستنزل لتسجل احتجاجك غدا ام انك ستننتظر ما تؤول اليه الاحداث ؟
ما رأيك ف التظاهر السلمى وما هو تعليقك على ا حدث فى تونس ؟
هل الثورة نجحت قبل ان تولد ؟؟؟
باستعدادات رجال الامن لها وحالة الاستنفار النفسية ؟
هل تعتقد بالظروف الحالية وفى نهاية هذه السنة هل سيتغير من يحكمنا ؟
هل تتابع احداث الثورة ولو من بعيد لبعيد
فى رأيك ما هو دور المثقفين او اللى بيقروا او اللى عندهم وعى فى هذا الموضوع

25 يناير، ثورة؟!
أشك بشدة، هي مجرد مظاهرة، قد يكبر حجمها أو يصغر، لكن الثورة لا يخطط لها مسبقا يا نشوى.
وقلق الحكومة من هذه المظاهرات أقل بكثير مما يصر البعض.

اما دور المثقفين فللأسف لا أرى لهم دورا، لسبب بسيط، أن المثقفين الحقيقيين في عالما العربي قليلين جدا، وأغلب من يظهر على الساحة الآن من المدعين.
المثقف الحقيقي يقضي وقته في تثقيف من حوله أكثر مما يقضي في الهتاف والتظاهر.
اعذروا تشاؤمي لكن انا من مدرسة التغيير التدريجي الواثق، وليس التغيير السريع المتطاير.
لا أثق أبدا في قدرة ثورة على إحداث تغيير حقيقي، فالتغيير السريع الذي يأتي بعدها يتلاشى بنفس السرعة.

متخليهاش تحبطك يا نشوى. التغير التدريجى الواثق دا هنشوف تاثيره بعد كمان 7 الاف سنة.

والذين إذا أصابهم البغي هم ينتصرون

Ng wrote: "25 يناير، ثورة؟!
أشك بشدة، هي مجرد مظاهرة، قد يكبر حجمها أو يصغر، لكن الثورة لا يخطط لها مسبقا يا نشوى.
وقلق الحكومة من هذه المظاهرات أقل بكثير مما يصر البعض.

اما دور المثقفين فللأسف لا أرى لهم دو..."

اعذروا تشاؤمي لكن انا من مدرسة التغيير التدريجي الواثق، وليس التغيير السريع المتطاير.
لا أثق أبدا في قدرة ثورة على إحداث تغيير حقيقي، فالتغيير السريع الذي يأتي بعدها يتلاشى بنفس السرعة
مش فاهماكى يا انجى بجد
انا شايفة ان التغيير التدريجى يكون ف ثقافة وف وعى
لكن مطالب سياسية وبلد بتتسرق وفلوس بتتهرب بره فاحنا عقبال لما نتغير هنكون متنا من الجوع
وكل الثورات التاريخية مجتش بالتغيير التدريجى خالص

Muhammad wrote: "مطالب منظمى المظاهرات صعب جدا تتحقق كنتيجة لمجرد مظاهرة مهما كان عدد المشركين فيها"

بالنسبة لتونس هل كانت مطالبهم منطقية ؟؟؟

اما بقى دور المثقفين الحقيقى فى توعية الشعب
انا هنا مبتكلمش عن المثقفين اللى بيطلعوا ف التلفزيون
انا هنا بتكلم عن اى واحد عنده وعى حقيقى ودوره ف المجتمع
بتكلم بمعنى اصح عنى وعنكم تفتكروا مش لازم يكون لينا دور ؟؟؟؟؟؟؟؟؟؟؟؟؟

اعتقد ان الثورة لما بتطلع مبتكونش اسمها ثورة
غير لما نشوف تأثيرها بعد كده
بتكون اسمها ثورة غير بيقين اصحابها
اعذرونى يا جماعة على حماسى انا عندى يقين تام وثابت ان ده هيحصل يا بكره يا تبعات بكره

Muhammad wrote: "مطالب منظمى المظاهرات صعب جدا تتحقق كنتيجة لمجرد مظاهرة مهما كان عدد المشركين فيها"

نفس الكلام اتقال من شهر ونص فى تونس وبن على طلع يقول كل اللى تسول ليه نفسه وما تسولش وهنعمل ونسوى ورعاع و يا جبل ما يهزك ريح وبعدييييييييييييييييين

فهمتكم

هههههه بس جت بعد فوات الاوان

Ahmed wrote: "متخليهاش تحبطك يا نشوى. التغير التدريجى الواثق دا هنشوف تاثيره بعد كمان 7 الاف سنة.

والذين إذا أصابهم البغي هم ينتصرون"

هو مش احباط احنا عايزين نتناقش بجد ف الموضوع ده
انا عندى يقين تام ان ده هيحصل
انه اليقييييييييييين

http://www.facebook.com/home.php#!/Ah...

الكاتبة احلام مستغانمى تضع صورة صفحتها صورة تدعو ل 25 يناير

أنا مش مقتنع بالثورة و بكرة هزاكر الصبح و انزل بالليل اعد ع القهوة و مش هتابع الأحداث عشان مش هيحصل حاجة

يا نشوى انت سميتيها ثورة، في البوست الاول، وده اللي خلاني اعلق بان دي مش ثورة لان الثورة ما بتتنظمش، بتيجي بشكل مفاجئ.

المثقفين بيشكلوا الوعي ده صحيح، لكن فيه كتير ممن يدعون الثقافة بيمشوا في المظاهرات وبيتكلموا في السياسة وهما اصلا مش فاهمينها بهدف الظهور مشس أكتر.. مثقفي الشاشة دول هما اللي باتكلم عنهم هنا وباقول ان دول ما لهمش دور.. زي ما انتي كمان قلتي هنا.

اما التغير التدريجي فيجي زي ما ييجي.. في كل الحالات انا لا اقتنع بالثورات الفجائية.
ما شفتش ثورة لحد دلوقتي اقتنعتني بإنها عملت حاجة..
اما تونس فأدينا حنشوف..
بجد، يا رب تخيب ظني وتعمل حاجة فعلا.

طب يا انجى ممكن تقوليلى ثورة واحدة ف العالم مش فجائية ؟؟؟؟؟؟؟
وبعدين يمكن انا سميتها ثورة تفائلا او انا مقتنعة انها ثورة حتى لو مش هتعمل نتيجة لحظية الا انها هتحرك الادمغى شوية والناس هتفوق شوية معتقدتش ان فيه حد ف مصر لغاية دلوقتى ميعرفش موضوع بكره وده تفاؤل لان المعرفة تعتبر احيانا مكسب حتى لو بكره مكانش ثورة 19 ولا الثورة الفرنسية ولا ثورة تونس حتى الا انه هيساهم وهيأثر بشكل جذرى واعتقد هيكون له تأثير ع المدى البعيد اللى هو مذهبك يعنى

وف الختام احب اقولوكم اخر خبر طازة جاى من الحكومة

أعلنت الحكومة المصرية أن اليوم الاثنين هو المتمم لشهر يناير عام 2011 و أن غدا الثلاثاء هو أول ايام شهر فبراير.. وخلاص مافيش 25 يناير
وبكرة العيد يااخوانا

الفكرة اني مش شايفة اي فرق بين مظاهرات يوم 25 واي مظاهرات اتعملت قبل كده.. ما هي برضه مظاهرة..
يمكن انا مش عارفة كل التفاصيل فمش فاهمة ايه سر الاعجاب بحجمها وتحويلها لثورة، لكن فعلا مش شايفة فرق عن المظاهرات اللي فاتت..

نشوى الثورة دايما فجائية، انا ما قلتش انها تدريجية ابدا.

عموما للي حيشارك فيها النهاردة، جود لاك لكم جميعا..

انا لسه جاية حالا
والناس موووووولعة وبجد الاعداد مهولة وانا كان نفسى ابات ف التحرير لكن عندى امتحان بكره ومخلصتش مذاكرة
انتظروا تفاصيل المتظاهرين والامن والناس العادية وحتى الناس اللى ف المترو معتقتش حد غير لما سالته
والناس لو باتت ف التحرير النهارده واستمرت هطلع من الامتحان عليهم
وادعوووووووووووولى وادعولهم

كويس انك جيتي يا نشوى كنت لسه داخلة اسأل حد عنده اخبار ولا لأ...
من ساعة تويتر ما اتحجب وانا مش عارفة اجيب اخبار خالص.. كله بيردد موضوع الحجب لكن ما حدش بيبعت اخبار فعلية عن اللي بيحصل، وانا من الاساس مش عاجباني تغطية تويتر..عايزة تغطية بجد للحجم الحقيقي للمظاهرات..
نشوى لو كنتي شاركتي فيها، ناويين يعتصموا في الميدان لحد بكره ولا حيفضوها النهاردة؟

انا لسه مصرة اللي بيحصل ده بعيد قوي عن انه يكون ثورة، ومستبعد انه يوصل لحاجة فعلا.. لكن واثقة ان الرسالة منه وصلت كاملة للنظام..
والله اعلم بكره فيه ايه.

ححاول ما ادخلش تاني على جودريدز في الموضوع ده لاني مش طايقة فكرة ان جودريدز يتحول لسياسة بالنسبة لي! :S
انا زهقانة منها طول اليوم يا ربي، وباجي هنا اهرب منهاده ! :(

انا كنت غلطان و اعتذر انا مع الثورة
انا روحت المظاهرات
و رحت ميدان التحرير
و ان شاء الله هنزل يوم جمعة الخلاص
اكرر اعتذارى على ما بدر مني من كلام كتبته

هيييييييييه
فى حد هينزل جمعة الخلاص احسن الناس بتقول علينا خونة وبنحب الفتنة

مش فاهمة ايه اللي حصل؟ ما كانت الناس كلها متحدة على حاجة واحدة.. ازاي يتقسموا ما بين رأيين كده؟
ما اقدرش اقول انه مش متوقع على اي حال..
واحنا في وقت لا يسمح ان حد يسمع حد..
والكارثة اللي حصلت امبارح بدخول البلطجية والضرب في المتظاهرين انا فعلا مش عارفة حتودينا لفين..
ربنا يحفظ بلدنا ويحفظنا جميعا..
عندي احساس ان الاسوأ لسه ما جاش..
يا رب اكون غلطانة.. يا رب!

انت ف الايام اللى فاتت كنت ع بالى اوى يا انجى
بعد خطاب مبارك اصبحت تتصارع ف راسى فكرتين الثورة ام الاصلاح
ومالت كفتى الى الاصلاح وقلت الراجل عقل وبلاش فوضى
لكن ما حدث ف ميدان التحرير كان قمة الفوضى قلنا بلاش فوضى عندنا حكومة لكن لا الحكومة ولا اى حد اخد خطوة من اللى بيحصل ف التحرير
واعتذارات احمد شفيق ليست كافية ل8 قتلى ف 12 ساعة متتالية كان من الممكن ان ياخذ خطوة فيها مش تانى يوم
فكرنى ببطئ النظام المصرى الشديد ف التعامل مع الكوارث ومهانته للضحايا زى العبارة كده
كل ذلك خلانى اقول مفيش فايدة لازم ننزل يوم الجمعة
انا خايفة جدا جدا ومرعوبة ومتوترة لكن فى امل ف ربنا كبير

nashwa we engy انا مش نازل بكرة بعد كلام أحمد شفيق و عمر سليمان
لا استفادة بالمرة من تظاهر الجمعة سوى المزيد من الفوضى و الوقوع الاقتصادي
أعتذر على تغير موقفى كل حين
و لكني كنت مشتت جدا
اللهم اهدنا الصواب

Mohamed wrote: "أنا مش مقتنع بالثورة و بكرة هزاكر الصبح و انزل بالليل اعد ع القهوة و مش هتابع الأحداث عشان مش هيحصل حاجة"

اسف جدا يا اجمل شباب شباب 25 يناير الجميل
و لا للتظاهر مرة اخرى استنوا نشوف هنوصل لايه

بعد خطاب الرئيس الأخير وكلامه عن تعديل الدستور من هنا لحد انتخابات شهر 9 انبسطت قوي..
لان الحل ده وصلنا لنقطة نقدر نعمل فيها اللي احنا عايزينه منغير ما نسيب فراغ في السلطة يسمح بأن كل مدعي يفرض علينا رأيه، أو الألعن، فراغ يسمح للقوى السياسية كلها، أحزاب وغير أحزاب بأنها تتصارع على السلطة..
لو ده حصل حتبقى مجزرة اول امبارح عبارة عن رحلة لدريم بارك جنب اللي حيحصل لسه!

عندي قناعة راسخة أن اللي حصل ما تمش بعلم مبارك من الأساس.. هو مش عبيط علشان يضيع مكاسب كان بدأ يحصدها على استحياء..
كلنا عارفين فيه كام واحد نافذ في النظام ده اخافه الكلام عن "محاسبة المتسببين في الفوضى"..
ده طبعا ما ينفيش مسؤولية رئيس الدولة، لكن برضه ما يمنعش ان كلامه اللي قاله في الخطاب مش كدب، وهو ما رجعش فيه.. وأنه من الآن فصاعدا منتبه للي بيلعبوا من تحت لتحت..فلسه شايفة ان الفترة الجاية لو اخد فيها خطوات قوية حيقدر يطهر النظام ده شوية شوية من اللي فيه، من هنا لحد الانتخابات على ما ييجي حد جديد ويقلب النظام ده كله ويبنيه من جديد..
وفيه اكتر من حل يسمح بتعديل الدستور بالشكل القانوني السليم بعيدا عن ايدين المخربين في البرلمان والحزب.

لكن هذا لا يمنع أنه ضروري المظاهرات تستمر.. لانها بتشكل وسيلة ضغط قوية على النظام..
خاصة وإن كل الافتراضات اللي انا حاطاها دي ممكن تطلع غلط، ويطلع مبارك مش مسيطر زي ما انا متصورة.. أو الألعن، يطلع الحزب ده بيخطط لحاجة جديدة، وده وارد جدا.

لكن فعلا مش عارفة ممكن يقدروا يستمروا لامتى؟ وجودهم في الميدان طوال الفترة اللي جاية انتحار! وكل ما يتعبوا أكتر كل ما اعصابهم تفلت أكتر ويبقى سهل قوي استفزازهم على اقل شيئ، وتبدأ مجزرة جديدة..

إن شاء الله الفوضى مش حتتكرر تاني.. وإن شاء الله الأمور حتتحسن من الآن فصاعدا.
لكن فقدان الثقة شيئ بشع... وفعلا ده اللي انا مش لاقية له حل..
والشقاق اللي بدأ يحصل بين الناس على طريقة حل الأزمة، رغم انه ممكن ينتهي بحوار بسيط، لكن ما حدش قابل انه يسمع، الأعصاب كلها تعبانة ومتوترة بعد اسبوعين تقريبا من البهدلة دي.. وده بيهدد بإن كل مكاسب الفترة اللي فاتت تضيع..

Mohamed wrote: "أنا مش مقتنع بالثورة و بكرة هزاكر الصبح و انزل بالليل اعد ع القهوة و مش هتابع الأحداث عشان مش هيحصل حاجة"

hwa anta bada2t mozakra ??

أنتوا مش كنتوا قلتوا بلاش سياسة في جودريدز.

Ghada wrote: "أنتوا مش كنتوا قلتوا بلاش سياسة في جودريدز."

حقيقي!
هذا المكان الطاهر لازم يفضل بعيد عن دنس السياسة!
:P

I'm out of here...

gebril elkalam dah elly fel awel kan ayam el exams

I'm sorry Ng if i offended you, I was so fed up with all that is going on and loged in to goodreads for a breath, please don't let my comment upset you.

Oh, sweet heart, of course I'm not offended!!
On the contrary you are absolutely right! you reminded me of a very important thing I promised to myself than forgot it!
I should thank you for this!
Like you, I come to GR for a breath!
:D :D :D

LONG LIVE THE BREATH, LONG LIVE THE BREATH :D

Hip Hip.. Hurray!
Hip Hip.. Hurray!

فى ذكرى الثورة :)))

احببت اعادة قراءة تلك الكلمات

الثورة مستمرة حتى تنتصر :)

قراءة الحوار ده تبعث فى نفسى الأمل فى انتعاش الثورة من جديد :)

حتى النصر
و النصر عندى هو ألا يراق دم مصرى على أرضه (خصوصا و المفروض إن مصر مش محتلة )

انا بقى هقول
يسقط يسقط حكم العسكر

يسقط إيه؟؟ حكم العسكر؟ يسقط ليه؟ علشان دم شباب من مصر؟ رفضوا يوالوا كلاب القصر؟ ... ... علشان فيهم واحد حُر ؟؟! رفض القهر و رفض المُر ؟؟! رفض الفيلم دا يبقى عليه !! علشان لسه فى ناس مش فاهمة إن سكوتهم أصبح أزمة !! و لسه بتسأل يسقط إيه؟ طيب يسقط يسقط حُكم العسكر