Egyptians Good Readers discussion

كل واحد فينا ليه عادات وطقوس وليه مزاج في القراية ... كلمنا عن قرايتك ..

بتحب تقرأ في أيه ؟ لمين ؟ وليه ؟
بتحب تقرأ فين ؟ وأمتي ؟ وازاي ؟
خد راحتك وقلنا عن طقوسك في القراية ... واسلوبك الخاص .. وايه معاييرك في اختيار الكتب .. وليه تشتري كتاب وكتاب لا ..


كلمنا مثلا عن دور النشر اللي بتحب تقرالها وتحترمها .. والمكتبات اللي بتحب تشتري منها ...

ارغي برااااااااااااااحتك

Tell us about your Reading Rituals!
Who's your favorite: writer .. books .. Publishers ..
Favorite time & Place to read ..
Your style and how you choose your books ..
take your time and tell us everything you want about your Reading Rituals ... let's know you better :))

ويل ويل ويل.. أنا بقرأ في كل الموضوعات.. ولكل الناس .. وعشان القراءة حاجة حلوة ومفيدة .. بحب أقرأ في المواصلات :) .. وبالليل في الهداوة .. من الوضع راقدا .. القراءة على الكومبيوتر بالنسبالى مهمة جدا لانها بتوفر كل الكتب اللى عايزها بسرعة وبلاش :) .. أنا كنت زمان بختار الكتاب من عنوانوا.. يعنى .. وبعدين بقيت بقرأ الكتب اللى بشوف عنها نقد مميز أو ترجمات للكاتب بتاعها .. ودلوقت بختار الكاتب واحاول اقرأ اعماله بشكل معين بحيث اعرف افكارة وتوجهاته.. وطبعا اى موضوع بفكر فيه بحاول اقرأ عنه اهم الكتب اللى عنه ..
اكتر دور النشر اللى بحبها الشروق، والمصرية اللبنانبة وميريت ومكتبة مصر ونهضة مصر وحبيبة قلبى ( مكتبة الاسرة، طبعا بغض النظر عن سورة سوزان اللى ورا ) .. بشترى طبعا من سور الازبكية والرصيف أولا .. وطبعا اخرى لما ادخل دار الشروق أو مكتبات ديوان أو ألف اسأل ع الاسعار واطع (ماشى ياحمد) وربنا يخلى النت اللى بيوفر كل الكتب باسعار في متناول الجميع :)
خر حاجة بقى.. ودى اتعلمتها من موقع جود ريدز لما بقرأ حاجة لازم اكتب ري فيو عنها .. ودا عشان تعرف انت اتعلمت اية من الكتاب وموقفك اية من الافكار اللى اتعرضت عليك.

السلام عليكم ، كل سنه وانتوا طيبين

في البدايه انا دودة قرايه ، من زمان بس اول مرة اجرب القراءة من الانترنت كان من شهر

عشان كدا اكسبوا فيا ثواب وحد يقولي ازاي احمل كتاب من الموقع دا عشان بحاول ومش عارفه
هستنيه حد يرد عليا
شكرا خالص

اهلا بحضرتك نورت الجروب....
الموقع دا مهمته بشكل اساسي مش تحميل الكتب .. يعني احنا بنضيف اغلفه الكتب ومعلوماتها عشان بس نقول اننا قريناها او بنقراها ... ولو حابين ممكن كمان نرفع الكتاب نفسه .. بس دا مش بيحصل كتير ..

فيه مواقع تانية كتير ع النت جميلة وتقدر تحمل منها كتب كتيييير .. زي الموقع دا

http://www.maktbtna2211.com/

ودايما حاول تنزل نسخ حلوة من الكتب
عشان متتعبكش ف القراية ...

السلام عليكم،
موضوع جميل للنقاش و استكشاف الأذواق المختلفه للقرّاء :)
بالنسبة لي، أحبّذ التنويع في أصناف الكتب الي اختارها ، بحيث اني اتاكد من تكوين فكره عن كل منها حتى تساعدني في اختيار كتبي المفضله ، الكاتب عادة بيشكل عامل الجذب الاكبر، يليه العنوان فالغلاف ،
مكاني المفضل للقراءه هو الحديقه :) و بفضل القراءة في الفتره ما بين الظهر و العصر لانها من أهدأ ساعات فراغي و الي بامكاني اركز فيها الى اكبر حد
صراحه لا اتابع دور النشر كثيرا لكني دائما ما افضل الشروق ،
Penguin Books
Wordsworth Classics

معظم مؤلفيّ و كتبي المفضله تنتمي للقرنين الثامن و التاسع عشر اضافه الى بعض الكتّاب المعاصرين بأفكارهم الخارجه عن حدود الواقع حيناً و العاكسه لأدق تفاصيله في أحيانٍ أخرى

في نظري تولستوي الذي التقيته في
Anna Karenina
من أعظم المؤلفين الذين اتوق دوما للتعرف على مصادر الهامهم و ابداعهم

الرائعان الفلسطينيان غسان كنفاني و يحيى يخلف يندرجان ضمن قائمة كتّابي المفضلين

ماركيز ، ديكنز، جين اوستين، توماس هاردي، و الشقيقات برونتي من الكتّاب الذين أسعى دوما لاقتناء كتبهم :)

كملخص ،أنا لا امانع تجربه اي كتاب، و احاول ان اقطف زهرة من كل بستان، و استمتع ايما استمتاع بكتابه و قراءة الريفيوهات من هنا و هناك، من مختلف الاعمار و الاجناس، ليتسنى لي رؤية مختلف وجهات النظر، و تحديد المنظور الذي يناسبني :)

اشكرك على طرح النقاش و دعوتي للمشاركه !

Mira wrote: "السلام عليكم،
موضوع جميل للنقاش و استكشاف الأذواق المختلفه للقرّاء :)
بالنسبة لي، أحبّذ التنويع في أصناف الكتب الي اختارها ، بحيث اني اتاكد من تكوين فكره عن كل منها حتى تساعدني في اختيار كتبي ا..."

استمعت بقراءة مشاركة حضرتك ..
واللي شوفتني اٌقرأ لناس مقرتلهاش قبل كدا .. او مكنتش نويت لسه ادخل عوالمهم زي تولستوي ..

وكمان عجبني حرص حضرتك ع القراية وتخصيص وقت ليها في اوقات نشاطك وتركيزك لان دا مهم جدا للقراءة الجادة ...

شرفتي الجروب وفي انتظارك مشاركاتك الفعالة .. والمثمرة .. والاستفادة من خبراتك وقراءتك ...

Mira wrote: "السلام عليكم،
موضوع جميل للنقاش و استكشاف الأذواق المختلفه للقرّاء :)
بالنسبة لي، أحبّذ التنويع في أصناف الكتب الي اختارها ، بحيث اني اتاكد من تكوين فكره عن كل منها حتى تساعدني في اختيار كتبي ا..."

استمعت بقراءة مشاركة حضرتك ..
واللي شوفتني اٌقرأ لناس مقرتلهاش قبل كدا .. او مكنتش نويت لسه ادخل عوالمهم زي تولستوي ..

وكمان عجبني حرص حضرتك ع القراية وتخصيص وقت ليها في اوقات نشاطك وتركيزك لان دا مهم جدا للقراءة الجادة ...

شرفتي الجروب وفي انتظارك مشاركاتك الفعالة .. والمثمرة .. والاستفادة من خبراتك وقراءتك ...

السلام عليكم ..... وبعودة الايام

انا بعشق حاجه اسمها القراءة وبحزن قوي من اللي مش بيقدر الكتاب " اذا اردت الدنيا فعليك بالعلم ،واذا اردت الاخرة فعليك بالعلم ، واذا اردت الدنيا والاخرة فعليك بالعلم ....السيده عائشه" احب اقرا قبل م انام واقرا في المواصلات لان دا اكتر وقت بيضيع ف مصر ،،، ولما اتخنق من اللي حواليا بهرب منهم واروح ارمي نفسي بين الكتب

..... مش بيفرق معايا دور النشر لكن يمكن دار الشروق طبعتها حلوة ، بس اللي يفرق اكتر الكاتب والمحتوي اللي مكتوب


الاول كنت بفضل الكتب الدينيه بس بعد كدا لقيت انه من المفترض القراءة في كل المجالات بحب مصطفي محمود جدا ومحمود عوض
.... مش بحب القراءة م الانترنت بحب يكون الكتاب ف ايديا لان ف العاده بيكون نفسي ارجع له في اي وقت او حتي لان ديما متعوده اخطط علي الحجات اللي بتعجبني
مش بحب الكتب اللي مش باللغه العربيه واللي بتكتب باللغه الشباب يعني مش بحبح ادفع فيها فلوسي بس لو مع حد ممكن اقراها بس مرجعش لها تاني لاني بعتقد انها كتب قطار اخرها

فشلت اني اقرا للعقاد كان صعب شويتين عليا بس هرجع له انشاء الله ، نفسي اقرا روايات بس بتخنق منها لما بطول عشان كدا اتجهت لكتب كتيررررررر الا الروايات والخيال العلمي

انا مؤمنه بان "في كتب هي اللي بتختارنا مش احنا اللي بنختارها " بس ف العاده بختار الكتاب اما علي حسب المؤلف او الموضوع اللي الكاتب يقصده واهم حاجه الاسلوب

Love wrote: "السلام عليكم ..... وبعودة الايام

انا بعشق حاجه اسمها القراءة وبحزن قوي من اللي مش بيقدر الكتاب " اذا اردت الدنيا فعليك بالعلم ،واذا اردت الاخرة فعليك بالعلم ، واذا اردت الدنيا والاخرة فعليك بال..."

منورة المناقشة ..
بالنسبة للروايات ... زمان كنت بسأل نفسي : أيه لازمة أن الواحد يقرأ رواية ؟ مضيعة وقت .. هستفيد ايه يعني ..؟

بس عارفه ... الروايات (الجيدة خصوصا) اكتر حاجه تعيشك حياة غير حياتك .. اكتر حاجه تديكي خبرة ومشاعر .. تخليكي تجربي حاجات مجربتيهاش ... وتعرفي اكتر عن نفسك واللي حواليكي ..
لو بتحبي السينما فالرواية زي السينما الفرق بس .. انها سينما بتاعتك انتي وبخيالك انتي ..

معاكي في موضوع الكتب الشبابي وان الواحد ميدفعش فيها فلوسوا .. خصوصا انك تلاقي الكتاب ميقلش عن 20 ج مثلا ... طب علي ايه ؟؟؟
جايز عشان فيه ناس كتير بتستسهل وبتحب تقرا حاجات هايفه ...

العقاد اسلوبه صعب ومجعلص ... بس جربي تقريلو العبقريات كدا .. خصوصا عبقرية محمد ص

شكرا خالص يا احمد انا بالفعل جربت للعقاد العبقريات بس فعلا ارهقتني وخليتني افتكر طه حسين لما قال عنها "قرأتها ولم افهمها " انا بس مستنيه شويه كدا واقرا له تاني ،،،، هو مهم اكيد بس انا حاليا بحب اقرا للناس اللي مش هترهقني يعني مثلا كتاب من حي القلم للرافعي جميل جدا

اما الروايات ف هحاول بس لسه مش عارفه ابدا ب مين ؟!!! صحابي بيشجعوني اقرا روايات عبير بس بصراحه محبيتش حتي افتحها ولا ابص لها

خالي كان سبب حبي للقراية .. تقريبا اوضته كانت مكتبة .. وفرق السن بينا 5 سنين بس

عندي مكتبة كتب ضخمة ع الكمبيوتر ... بحب قراية اه وخصوصا لتوفر كتب كتير .. بس برضو عمري ما افقد عشقي للكتاب المطبوع ... الكمبيوتر وجع عنين من غير متعة حقيقة ولا تركيز ع المادة المقرءة ..

يعني م الاخر : انا من مدمني الورق المطبوع .. خصوصا ورق الكتب الاصفر ... :)

المواصلات بالنسبة ليا فرصة جميلة جدا للنوم ... او للقراية .. بركز فيها سبحان الله .. وبحب كمان اقرا شوية قبل ما انام .. القراية عموما امتع وانا بره البيت ... يا سلام لو في مكان مفتوح زي جنينة مثلا ..

بمر ساعات بالازمة النفسية اللي بيمر بيها كل محبي القراية :امتي هلحق اقرأ كل اللي نفسي اقراه؟ الكتب اللي تستاهل القراية اكتر من اللازم بكتير ... دا غير اللي تحت الطبع ..

فيه مجالات زمان مكنتش احب اقرا فيه .. قال يعني مش مقتنع باهميتها .. بس مع الزمن اتعلمت ان حتي ورقة الكتاب القديمة المقطوعة ممكن تفيد ... كل حاجه بنقراها بنستفيد منها في وقت من الاوقات .. او ع الاقل بتمتعنا في وقتها ..

تقريبا بحب اقرا في كل المجالات بس لاني شخص سريع الملل فلما بركز علي مجال معين لفترة بمل منه وببقي محتاج ابطل فيه قراية شوية ...
وبسبب الملل السريع دا برضو .. تلاقيني بقرأ كذا كتاب مع بعض ... دا بيجدد دم القراية ..
بس فيه كتب معرفش اسيبها من ايدي غير لما اخلصها ..

بجب اووي كتابات د. مصطفي محمود وزكي نجيب محمود ... انيس منصور بحب اقراله بس مش منبهر بيه ..
بحب كمان اقرأ لــ
د. حسين مؤنس
راغب السرجاني
احمد بهاء الدين
العقاد
طارق سويدان
محمد حسين هيكل
محمد حسنين هيكل
الاتنين غير بعض طبعا))

وناس تانية كتيييير .. بس اللي بحترمه بجد وبتعجبني دماغه ... أحمد خالد توفيق .... ما استغربتش انو برج الجوزاء زي حالاتي .. رغايين زي بعض :)

دور النشر عندي من الحاجات المهمة ... لان مش كل الدور بتحترم قيمة الكتب للاسف .. خصوصا في الكتب المترجمة .. يعني مش بس فكرة جودة الطباعه والتصميم .. بس جودة المحتوي نفسه .. فمثلا في كتب التنمية المترجمة بحترم اوي العبيكان وجرير والابداع الفكري ...

بقت عادة عندي اني اقلب في اي كتاب قبل ما اشتريه .. ابص ع الفهرس والغلاف الخلفي .. والقط كام كلمة من جوه الكتاب ... وكمان تاريخ النشر ودور النشر ..

كدا الواحد يشتري كتب تستاهل فعلا .. وفيه كتب بشوفها متستحقاش اشتريها .. فاحيانا اخد الاسم وابقي انزلها من ع النت ..


مش من عادتي اني اقرأ كتاب مرتين ... بس اكيد فيه كتب تستحق القرية او الرجوع ليها ع الاقل ...

كفاية كدا .. ولو كنت وصلت لحد هنا .. فأكيد كرهتني بسبب اللت والعجن دا كله ... نفسي ابطل رغي بس اعمل ايه بقا الكيبورد هي اللي سريعه في الكتابة هههههههههه

Love wrote: "شكرا خالص يا احمد انا بالفعل جربت للعقاد العبقريات بس فعلا ارهقتني وخليتني افتكر طه حسين لما قال عنها "قرأتها ولم افهمها " انا بس مستنيه شويه كدا واقرا له تاني ،،،، هو مهم اكيد بس انا حاليا بحب اقر..."

معلش اقولك ع الروايات مع اني كنت ناوي ..

بس انا مقرتش عبير .. بس عبير وهدير وفيحاء وكل الاسامي الغريبة للروايات دي ... م الاخر حاجات مبتذلة ... روايات رومانسية بزيادة مترجمة .. .

وبعيدا عن الاسفاف فيها .. فانتي عارفه ان قراية الرواية مترجمة بيفقدها كتير من جمالها الفني .. ما بالك لو الترجمة ركيكة او مش فنية ...
=======
لو حابة تقري روايات مترجمة ... وعشان تحبي الموضوع
** سلسلة روايات عالمية للجيب
اي اصدارات ترجمة د. احمد خالد توفيق ... ودي كتير ..
=======
خالتي صفية والدير - بهاء طاهر ... ابداع

اللي كانت معموله مسلسل دي ... حتي لو كنتي سمعتي المسلسل ... جربي تقريها كدا
=======
روايات مصرية للجيب ...
سلاسل د. احمد خالد توفيق
- ماوراء الطبيعة
- فانتازيا
- سفاري

اقري السلاسل دي ويفضل تبداي باول اعداد عشان تبقي فاهمه الاطار العام ...

بجد هتحسي معاها ان الروايات دي ممكن تبقي قمة الامتاع (ماوراء الطبيعة) قمة التعمق وعرض المعارف (فانتازيا) قمة الافادة العلمية (سفاري) ... جربي وابقي قوليلي رأيك

السلام عليكم
بالنسبة لي فالقراءة هي مثل الحاجات الضرورية و المؤكدة التي يجب أن أقوم بها يوميا كالأكل و النوم
و بالنسبة لاختياراتي فأنا أحاول أن أمشي وفق مخطط
فمثلا حاليا متابع مخطط كتاب الدكتور طارق سويدان ماذا أقرأ
و بحكم أن مكتبة طارق سويدان خالية من الكتب العلمية و الروايات فأنا أحاول أن أنوع قراءاتي من حين لآخر

---------------------------

أود أن أشكركم على الكروب الحلو
و أود أن أهنئكم على الثورة و إن شاء الله تصبح مصر مثال يحتدى به للتطور و التكنولوجيا و العيش الكريم في جميع البلاد العربية

تحياتي أخوكم في الله يونس من المغرب

Jonas wrote: "السلام عليكم
بالنسبة لي فالقراءة هي مثل الحاجات الضرورية و المؤكدة التي يجب أن أقوم بها يوميا كالأكل و النوم
و بالنسبة لاختياراتي فأنا أحاول أن أمشي وفق مخطط
فمثلا حاليا متابع مخطط كتاب الدكتور ..."

اخي يونس .. تحية لحضرتك ولكل اهل المغرب ..
كتاب ماذا أقرا فعلا وضع مخططات ومناهج جميلة في القراية .. وان كانت من وجهة نظري في الجانب التكنولوجي وتعليم الكمبيوتر مش ع المستوي المطلوب .. وبرضو ناقصها زي ما حضرتك قلت الكتب العلمية .. بس هي مناهج جميلة وقيمة من استاذ كبير الكل يحترمه ويقدر علمه ..

شرفتنا وفي انتظار تفاعلك الدائم في الجروب ان شاء الله

اهلا وسهلا استاذ يونس من المغرب وكل اهااااااااااااااااااالينا هناك كل عام وانتم بخير


واستاذ احمد انا كنت بشوف احمد توفيق ومش بحمل كتبه بس هجرب نصيحتك واشوفها وشكرااااااااا خالص لك وبارك الله فيك

Love wrote: "اهلا وسهلا استاذ يونس من المغرب وكل اهااااااااااااااااااالينا هناك كل عام وانتم بخير


واستاذ احمد انا كنت بشوف احمد توفيق ومش بحمل كتبه بس هجرب نصيحتك واشوفها وشكرااااااااا خالص لك وبارك ال..."

جربي حضرتك كمان تقري مقالته ... هتعرفي اد ايه دماغ الراجل دا مميزة في وسط العك اللي احنا عايشين فيه ...

البلوج دا بيتابع مقالاته في كل حته ..

http://ahmed-khaled-tawfik.blogspot.com/

بداية دراستى كلها كانت أزهرية مما جعل إهتمامى ينصب فى الأساس على كتب الحديث والتفسير والفقه والأصول، لكن ما إن أنهيت المرحلة الجامعية حتى أخذت أقرأ فى مؤلفات أخرى، وخاصة السير الذاتية والتى أعشقها كثيراً. ثم أصبحت الآن أقرأ أكثر فى مجالات عديدة ومختلفة.
أكثر زيارتى لمكتبات بوسط البلد (الشروق، و نهضة مصر، والمعارف، و حراء، وغيرها).
أحب وقت للقراءة بعد صلاة العصر وخاصة قبيل الغروب، كما أحب القراءة الليلية كثيراً حيث يسود الهدوء المكان الذى أعيش به، وخاصة فى فصل الشتاء.

Ahmed wrote: "بداية دراستى كلها كانت أزهرية مما جعل إهتمامى ينصب فى الأساس على كتب الحديث والتفسير والفقه والأصول، لكن ما إن أنهيت المرحلة الجامعية حتى أخذت أقرأ فى مؤلفات أخرى، وخاصة السير الذاتية والتى أعشقها ..."

اهلا بيك يا استاذ احمد ..
نورت الجروب ... وان شاء الله نستفيد من قراءاتك حضرتك الدينية ودراستك .. كتير مننا بيبقي محتار يعرف الكتب الدينية الاهم واللي يبدأ بيها ويدرج .. والتفاسير الانسب للقراية الخ الخ ..

وفي انتظار المزيد من تفاعل حضرتك وتواجدك معانا

أنا برضو السبب الاساسي في حبي للقراءة هو خالي ومرات خالي وهما كمان اللي ادوني اول كتب قريتها وكانت من ترجمات الادب العالمي وبعدها قريت صرخة الرعب وبعدين روايات يوسف السباعي وإحسان عبد القدوس ومن 4 سنين اتعرفت على كتابات د.أحمد خالد توفيق .. عجبني جدا اسلوبه وافكاره ودلوقتي اي حاجة عليها اسمه لازم اقراها.

عامة قرايتها كلها أدبية (روايات أو قصص قصيرة ) بحب الرواية عشان الحبكة الدرامية اللي فيها
بقرا كتب بس مش كتير ... قريت لمصطفى محمود، أحمد بهاء الدين، الشعراوي، سيد قطب،الشيخ الغزالي
في الروايات قريت لعلاء الاسواني، يوسف زيدان، محمد عبد الحليم عبد الله، رضوى عاشور، يحيى الطاهر عبد الله، محمد حسين هيكل وكتاب كتير تانيين

دور النشر مش مهمة عندي لاني بهتم بالكتاب واقرا اراء الناس عنه واعرف هو دار نشر ايه واروح اجيبه بغض النظر عن دار النشر

افضل اوقات القراءة عندي بالليل قبل النوم (طبعا قبل النوم ده ممكن يكون نص ساعة وممكن يكون 4 ساعات ) ده حسب الكتاب اللي بقراه
وبحب اقرا في القطار لاني بسافر كتير لظروف الدارسة و
مش بعرف اقرا في المواصلات او في الاماكن الزحمة لاني مش بعرف اركز.

Amal wrote: "أنا برضو السبب الاساسي في حبي للقراءة هو خالي ومرات خالي وهما كمان اللي ادوني اول كتب قريتها وكانت من ترجمات الادب العالمي وبعدها قريت صرخة الرعب وبعدين روايات يوسف السباعي وإحسان عبد القدوس ومن 4..."

اهلا بيكي يا امل وبكل جوود ريدز اسكندرية :)
انا بحترم كل اللي بيحب كتابات احمد خالد توفيق ومصطفي محمود .. بحس ان موجات افكاره مظبوطة وعرف يختار يقرأ صح ... في وقت الغلط فيه كتير ...

كويس اوي انك بتستغلي وقت القطار .. المواصلات دي لو استغفليناها هنزود معدل قرايتنا جدا ..

Dina wrote: "ياااه و ان بدينا نبتدى منين الحكايه :

انا بقرا من و انا عندى 9 سنين و كنت وقتها عاشقه لانيس منصور ...و لما رجعت له لما كبرت استمتعت بيه اكتر

شراء الكتب بيتحكم بيه السعر بشكل كبير لكن عموما ال..."

عاجبني فكرة تفصيص دم كاتب او موضوع شهريا دي .. وان كانت ممكن متنفعش معايا اوي لاني سريع الملل ... بس ومالو احتمال اجربها ...

معاكي في الكتب اللي بتكرهيها .. بكرهم جدا نا كمان

مختلف معاكي بس ف اخر نوع وهو التنمية الذاتية .. بفرق فيها .. بين كتب بيع الهوا والكلام المكرر ... والكتب العلمية المتخصصة فعلا ..

للاسف مدرسة ابراهيم الفقي وتلاميذه خصوصا سودت سحاب التنمية ... وبقت سلعة وتجارة .. والكتب نفسها فيها كدا كتير ... بس مثلا كتاب توني بوزان بتاع القراءة السريعه مهو تنمية .... او كتابه عن الخرائط الذهنية مثلا الخ الخ ..

يعني بكره كتب التنمية المستهلكة المكررة الغير علمية وبتعتمد علي تاجات .. النجاح المجد الخ الخ كيف تصل لكذا في كذا الخ الخ ..

Dina wrote: "اهو ابراهيم الفقى ده هو سبب كرهى لكل الكتب دى ...قريت له فتره على نفس طريقتى بمعنى كذا كتاب ورا بعض مهم كتب كتير قوى مخلصتهاش من كتر تكررها ...اكتر حاجه بتضايقنى فيهم ان اسم الكتاب اروع بكتير من مح..."


جبتي الخلاصة في اسلوب كشف زيف المعلم الفقي ورجالته ... الناس فعلا تلاقيها منبهرة لما يسمعوه اول مرة او بمجرد الشهرة وخلاص ..

طب يا جماعه احضرولوا كذا ندوة .. اقروله كذا كتاب وانتوا تشوفوا قد ايه .. الراجل دا مكرر .. مفبرك .. مبيديش علم قد ما بيدي شو لنفسو .. واعلانات عن حاجه مش موجودة اصلا ..


بحترم اووووي د. طارق سويدان .. مدرسة فعلا في اتقان العلم وتعليمه والاخلاص فيه ..

بتحب تقرا في ايه ؟ لمين ؟ وليه ؟

فى الفترة دى بقيت اهتم بالكتب الدينية والتنمية البشرية و أى كتاب بحس انه بيفهمنى الواقع اكتر .. زمان كنت واقعه فى حكاية الروايات و القصص القصيرة و الشعر و القراءة الأدبية عموماً و مشكلة القراءة الأدبية ان اللى بيتعود عليها بيبقى صعب عليه انه يغير من نمط قرائته لحاجة تانية ، لذلك لما ابتديت انوع و اغير من نمط القراءة كان صعب عليا فى الأول .. بس بعد كده لما بقيت اضغط على نفسى و اقرا اى كتاب بعيد عن الأدب و اوسع من قراءاتى عرفت ليه كل المفكرين و الأشخاص اللى زى د.طارق السويدان و عبد الكريم بكار و أحمد الشقيرى و بلال فضل فى برنامجه عصير الكتب كانوا بينادوا بضرورة القراءة ليه .. فعلاً لما بتنوع القراءة و تقرا قراءة منهجية بتلمس التغيير اللى بيحصل جواك ، مش بتقرا يعنى علشان تقضى و قت و تتسلى و خلاص ( هو اى نعم الواحد مش منظم قرائته اوى يعنى بس الموضوع فرق كتير عن الأول ) ، وآه حاجة عاوزه أأكد عليها كلامى اللى فوق ده مش معناه ان قراءة الأدب مش كويسه .. لا اكيد احنا محتاجين نقرا فى الحاجات دى بس متبقاش هى دى محور قرائتنا كلها ، فى حاجات تانى كتير اهم



اكتر الناس اللى بحب اقرالهم :

د.احمد خالد توفيق
د.مصطفى محمود
د.عبد الكريم بكار
بلال فضل >> بحب مقالاته اوى
صافى ناز كاظم

فى تانى بس دول اكتر ناس

،،،،،،،،

بتحب تقرأ فين ؟ وأمتي ؟ وازاي ؟

بحب اقرا فى البيت :)
و بحب وقت الليل فى القراءة و حاليا بقيت احب وقت العصر بردو

،،،،،،،،

خد راحتك وقلنا عن طقوسك في القراية ... واسلوبك الخاص

دلوقتى بقيت احب اقرا و انا معايا مفكرة صغيرة و قلم رصاص .. القلم الرصاص اخطط بيه الحاجات اللى بتعجبنى المفكرة بتبقى تقريبا لتسجيل الأفكار والأسئلة اللى بتخطر على بالى أثناء قراءة الكتاب و كمان بتكون مفيدة جدا لما تقرا عن حاجة الكاتب موضحهاش اوى فى الكتاب فببتدى ادور عليها بنفسى سواء فى النت او فى أى كتاب تانى و الكتاب بيوصلك لكتاب

،،،،،،،

كلمنا مثلا عن دور النشر اللي بتحب تقرالها وتحترمها .. والمكتبات اللي بتحب تشتري منها ..

مش بتفرق معايا دور النشر قد ما بيفرق معايا الكاتب بس ده بردو ميمنعش ان فى دور نشر محترمة زى الشروق بغض النظر عن الأسعار :) و جرير



معلش قعدت طولت فى الكلام بس انت اللى قولت ارغى براحتك
*:D

_ _ _ _ _

المخطط اللى ذكره يونس فوق لو تحبوا اقولوا ليكوا هنا يبقى مفيش مشكلة بس استحملوا شوية لان المخطط اللى ذكره طارق السويدان مقسمه من أعمار لأعمار

كفاية بقى :)

Manar wrote: "بتحب تقرا في ايه ؟ لمين ؟ وليه ؟

فى الفترة دى بقيت اهتم بالكتب الدينية والتنمية البشرية و أى كتاب بحس انه بيفهمنى الواقع اكتر .. زمان كنت واقعه فى حكاية الروايات و القصص القصيرة و الشعر و القراءة ..."

اهلا بحضرتك استاذة منار .. نورتي الجروب
وان شاء الله نشوف تفاعلك اكتر واكتر معانا ... وشكرا لحضرتك علي طرحك تنزيل قوائم الكتاب او المخطط .. هو الكتاب نفسه موجود ع النت وكنت حطيته للناس في الجروب .. وادي اللينك مرة تانية ... وجزاكي الله كل خير

http://www.4shared.com/document/tctWq...

وشرفينا حضرتك كمان في جروبنا علي الفيس . من هنا

http://www.facebook.com/groups/199597...

الهدوء اهم حاجة عندي وانا بقرأ

القرايه عندى ادمان بس ادمان ايجابى الحمد لله
بحب طبعا أقرأ فى مجالات متنوعه رومانسيه تنمية بشرية روايات كتب مترجمة
أعشق أعشق أحلام مستغانمى وبعتبر نفسى مستغانمية
بحب جدا اقتناء الكتب أكتر من أنى اقرأ كتاب من النت
عشان كدا مخلصه فلوسى على الكتب مش اللبس زى البناويت
بحترم دار الشروق وكنت فاكره ان أسعار الكتب بتاعتها هيا اللى عاليه بس اكتشفت ان فى مكتبات هيا اللى بتزود فى أسعار الكتب
أكتر متعه بحس بيها لما أكون بقرأ فى كتاب ومستمتعه بيه وبحب جدا أحافظ على الكتب بتاعتى عشان كدا مش بحب أدى الكتب بتاعتى لحد زى اللوح بتاعتى أيام الجامعه
توبك جميعا تسلم عليه

انا كنت فاكرة زمان ان انامابقراش كتير لاني كنت بزهق بسرعة وساعات كتيرة كنت اجيب كتب ما كنتش بكملها بس الفكرة ان المشكلة كانت في الكتب نفسها مش فيها ان الواحد لما بيلاقي كتب حلوة نفسه بتفتح للقراة و بقرا كتير انا في الاغلب بحب اقرا روايات يعني ممكن تكون اغلب الحاجات الي بقراها و بحب تكون قراتي متنوعة يعني لكتاب مختلفين يعني بحب اقرا لكتاب المغرب العربي ..زي الطاهر بن جلون و الكتاب اللبنانين زي حنان الشيخ وعلوية صبح و لما بلاقي كتاب حلو لكاتب و ببقي عايزة اقرا بقية
الحاجات الي كتابها

بحب الرواية بذات لان كل رواية بتقدملك جاجة جديدة وتعيشك حياة وتجربة جديدة صعب ان تعيشها يعني بتفتحك عالم جديدة تخيل واحد يقوللك تعالي بص ده حياتي انا حاخليك تعيشها معايا ... بحس ان الرواية بتقدمي معلومات كتيرة عن البيئة و الثقافة الي الكاتب جاي منها وبتعرف معلومات بطريقة سلسة و غير مباشرة عن التاريخ و الجغرافيا و بلد الوضع العام للبلد و المجتع بشكل عام كمان ممكن حاجة تستفزني و تخليني ادور فيها بشكل منفصل يعني بسبب رواية معينة ممكن افرا كتاب عن تاريخ بلد معين او احب ازور بلد معين علشان رواية معينة

يعني مثلا لما قريت غرناطة حبيت اقرا اكتر عن تاريخ غرناطة وعن العرب بعد سقوط الاندلس و عن الموريسكيين و عن حياتهم
لما قريت واحة الغروب حبيت سيوا لدرجة ان انا بفكر بجدية
ان انا ازورها

اما بالنسبة للكتاب الي انا بحب اقراهم انا زي ما انا قلت احب روايات الي انا بقراها تكون متنوعة و الكتاب كمان
يعني من مصر انا بحب رضوي عاشور
و المنسي قنديل, بهاء طاهر, و علاء الاسواني ,يوسف زيدان
ومن لبنان بحب حنان الشيخ و علوية صبح
و كان بحب من المغرب الطاهر بن جلون ... ومن السودان احب الطيب الصالح,, و احب من السعودية غازي القصيبي
باختصار بحب اي رواية حلوة لا ي كاتب من الدنيا ان شاء لو كان من الصين

و بحب اقرا الشعر كمان ومحمود درويش شاعري المفضل و امل دنقل كمان و بس الشعر كمان ده ليه مود معين لازم تكون في مود معين علشان تقراه ميزة الشعر انك لما تشتري ديوان بيفضل معاك لاخر عمرك تقرا فيه بس الرواية طالما قراتها مرة وممكن تقراها مرة كمان و خلاص .. الشعر كل مرة بتقراه بتحس بحاجة جديدة و بتكشف حاجة جديدة انت ماكنتش واخد
بالك منها

اما عن المكتبات الي انا بحبها انا بحب لما اروح
مكتبة الاقي ناس هناك يكونوا فاهمين و مثقفين يعني عارفين هما بيبعوا ايهو لما ادور علي كتاب لما يكون مش موجود عندهم يقوللك تجيبه منين بصراحة المكتبات دي قليلة الي تلاقي فيها ناس كده يعني مدبولي مثلا بحس انهم فيهم ناس كده يعني لما اكون بادور علي كتاب معين من اول ما قول اسم الكتاب يقولي اسم الكاتب ومين دار النشر بتاعته ما ينفعش واحد يكون بييع كتب ومايكونش بيقرا و مثقف بحس ان هي بايخة بس هما الاغلبية كده فعلا
غير مدبولي
انا بحب ديوان بس فروع معينه يعني انا بحب فرع هليوبوليس و فرع الزمالك ...و الف كمان بس مروحتاش غير مرو واحدة

عموما انا بحب المكتبات بحس انا في مكاني المفضل ممكن اعد بساعات و الله ....يعني لما بقي زهقانه بروح ابص علي الكتب ممكن ماشتريش حاجة اتفرج علي الكتب

وكمان مابحبش اقرا من علي الكمبيوتر بحس ان هي مالهاش لازمة لازم امسك الكتاب و احس بالورق و اشم ريحة الورق المطبوع جديد وريحة الحبر و تسمع صوت خرفشة الورق اما قراية من الكمبيوتر انت مش حتقدر تشم الكمبيوتر
في الغالب بحب اقرا يوم الاجازة يوم الجمعة الصبح كده اشرب القهوة و اعقد اقرا علي السرير .. او الكنبة ممكن اقبل مانام كمان .... وساعات الواحد تبقي نفسه مفتوحة للقراية لدرجة ممكن يقرا 5 او خمس كتب في الشهر و ساعات باعد بشهرين مش ليا نفس اقرا او اقرب من الكتب ..... القرايه عندي حالة مزاجية بس نفس الوقت حاجة ما اقدرش استغني عنها

ابتدى من لما كان عندى 11 او 12 سنه لما وقعت فى ايدى اول روايه لرجل المستحيل و نبيل فاروق وملف المستقبل و بعدين بدات اشترى روايات القراءة للجميع و اول روايه شدتنى للاادب الانجليزى كانت جين اير ل شارلوت برونتى اللى بعتبرها اجمل ما قرئيت فى حياتى و لازم كل سنه تقريبا اقرئها مره على الاقل و لقيتنى عندى بعدها حمى ادب انجليزى كل روايه مترجمه اشتريها و فى طريقى قرئت لجين اوستن و اميلى برونتى و شكسبير اما بالنسبه للادب العربى جه متاخر و انا فى اول الكليه و كانت اول قرئاتى للقصص القصيره ليوسف السباعى و يوسف ادريس و بعدين الروايات وبعدين دخلت دنيا نجيب محفوظ و بقيت دودة قراءه فى طريقى عشت مع ماركيز و بارجس يوسا و الجو الاتينى ده و كملت مع ناس كتير زى دان براون اللى مش بقدر اسيب روايته الا لما اخلصها و من سنتين اكتشفت اكتشاف اسمه يوسف زيدان مش عارفه ليه كل اللى بحبهم اسمهم يوسف ما علينا و عزازيل دى لخبطتنى جامد قوى و مكمله فى طريقى فى القراءه
و مؤخرا اكتشفت رضوى عاشور لما قرئت الطنطوريه و بدأت اجيب من القديم و أقرئلها رحلتى لسه مكمله نفسى اقرأ كتب كتير لو حد عنده اقتراح ما يبخلش
---------------
ما بحبش كتب التنميه البشريه برده و لا الكتب الخفيفه المأخوذه عن المدونات
بموت فى حاجه اسمها الجرايد ربنا يخللنا التحرير
-------------------
ما عانديش و قت معين للقرائه لما بمسك كتاب غالبا وراه لغايه ما خلصه
بس ماقدرش انام قبل ما اقرأ شويه
---------------
بحب اقرا ليوسف السباعى
و يو سف زيدان
د- مصطفى محمود
الشيخ الغازالى
جبران
بهاء طاهر
احلام مستاغنمى
و الانجليزى-----
شالوت برونتى
جين اوستن
ديتوفسكى
شكسبير و خصوصا the sontes
دان براون
ماركيييييييز
البرتو مورافيا
والشعر
نزار
و فاروق جويده
محمود درويش

هو لو أنا زهقانة اخر حاجة
وفاقدة الرغبة ف كل حاجة ....ترشحولى ممكن اقرأ أية ؟؟؟

at Toqa:
أرشحلك وبقوة - تراب الماس - لأحمد مراد. ودا لأنه شيق جداً لدرجة اني مكنتش بسيبه من ايدي وخلصته تاني يوم!!! لغته درجة وسهله غير الإفيهات الظريفة اللي بتخرجك من الموود والأحداث المتتابعة السريعة بعيد عن الملل في السرد.

اقرأيه وابقى قوليلنا رأيك.

Mohamed wrote: "at Toqa:
أرشحلك وبقوة - تراب الماس - لأحمد مراد. ودا لأنه شيق جداً لدرجة اني مكنتش بسيبه من ايدي وخلصته تاني يوم!!! لغته درجة وسهله غير الإفيهات الظريفة اللي بتخرجك من الموود والأحداث المتتابعة الس..."

خلاص ماشى وهقولك :)

Ok, Enjoy :)

بحب اقرأ وانا فى مود كويس وبحب جدا اقرا لما اكون رايحة مشوار بعيد بحس ان الطريق قصر من كتر توحدى مع الكتاب واستمتاعى به
مفيش وقت معين للقراءة لكن غالبا بالنهار
بحب اقرأ فى كل المجالات لكن لسة مقراتش فى التاريخ وجاى على بالى جدا ابدأ بالثورة الفرنسية مش عارفة ليهوعاوزة منكم اقتراح للكتب اللى اتكلمت عنها بس باسلوب سلس
افضل المؤلفين بالنسبة لى
عبدالوهاب مطاوع.. كريم الشاذلى.. عمر طاهر... على احمد باكثير..انيس منصور..د\خالد ابوشادى..الشيخ محمد الغزالى..

على فكرة انا بحب القراءة جدا من زمان لكن مابدتش اقرأ من كتير يعنى يمكن 5 سنين بس وانا عندى 21 سنة حاليا يعنى ممكن نقول من اولى جامعة مثلا

نفسى اقرأادب عالمى ما قرأتش غير روايات اجاثا كريستى
بردو عاوزة اقتراحات

بتحسسينا بالعجز ليه يا هند؟؟؟ حضرتك أنا بادئ قراءة مكملتش سنة :))))) دا طبعاً بعد انقطاع حوالي 14 سنة كان ختامهم رجل المستحيل وملف المستقبل والشياطين ال 13 و عx2 :)
عموما كويس ان الواحد يعمل حاجة بيحبها حتى ولو بدأ متأخر!

Toqa wrote: "هو لو أنا زهقانة اخر حاجة
وفاقدة الرغبة ف كل حاجة ....ترشحولى ممكن اقرأ أية ؟؟؟"

الحاكم لصا
لمحمد عباس
:) و ادعيلي

Amr wrote: "Toqa wrote: "هو لو أنا زهقانة اخر حاجة
وفاقدة الرغبة ف كل حاجة ....ترشحولى ممكن اقرأ أية ؟؟؟"

الحاكم لصا
لمحمد عباس
:) و ادعيلي"

ربنا يستر :))
وهقولك برضك

بحب اقرأ على الاكل والا معرفش اكل انشالله يكون جرنال بايت من قرن

الروايات فى المقام الاول :)
بكل انواعها و اشكلها
و بفضل القرائة على سريرى و يفضل لو لوحدى فى البيت عشان الهدوء :)
لو حواليا اى صوت مش بعرف اركز !

القراءة بالنسبة لي ادمان بردة و استمتعت جدا بقراءة تجارب المشاركين في الموضوع و حسيت ان في تشابه عام كدة بين مدمني الكتب
انا بردةبدأت بما وراء الطبيعة و كتابات العظيم احمد خالد توفيق بس انا بدأت بدري اوي لما كنت في ابتدائي و عشان كدة كملت من ساعاتها في الادب الانجليزي تأثرا بأحمد خالد و اختياراته و كمان روايات عالمية للجيب و الادب للناشئين بس زهقت من المختصرات و اتجهت للاعمال الكاملة و عشان عندي مشكلة في اختيار الترجمات الكويسة بدأت اقرا كل حاجة بالانجليزي و اتعرفت على انواع كتيرة من الروايات
قراءاتي في العربية للاسف مش كتير جربت كام حاجة كدة و طلعوا مش اوي
ياريت لو اقتراحات لكتب قيمة مفيدة و مش مملة و اسلوبها* متماسك و ممتع :)
كتابي المفضلين:
احمد خالد توفيق
Paolo Coelho
classics like: Jane Austen, Gaskell,Bronte sisters,Shakespeare of course, Shaw,Ibsen,Poe, Twain,ٍStoker...
Russians like: Dostoevsky and Chekhov, I find Russian literature is especially unique!
thrillers like: King, Dan brown, Robin Cook, Christie
J.K Rowling
طقوسي:
غالبا بحب القراءة باليل في هدوء او الصبح بدري او لما يكون الكتاب حلو مش بسيبه :) بحب اسمع موسيقى مع القراءة و بحب رائحة القهوة مع الورق!

القرايه .. عاملة زى الغاية اللى بنجرى وراها مبعرفش ابدا رواية الا لازم تخلص بتسحرنى فبقرا الروايات فى الاجازة .
بحب جدا القراية فى الفن حسب تخصصى يعنى فى كل انواع الفن واتجاهاته وتفكيره ..
بحب كمان التاريخ جدا وبالذات القرن 19 والعصور القديمة جدا جدا ..
بحب اقرا فى العقيدة واغوار النفس البشرية الغزالى ابن القيم والتفاسير الطبرى ابن كثير
بحب كمان Science Fiction وافكاره الجديدة الغريبة
ساعات بحس انى بقرا اى حاجة وكل حاجة ممكن تقع عليها ايدى لكن مما بنحط فى اختيار اللى فوق دا بيغلب .. المجال اللى مبحبوش نهائى التنمية البشرية بحس انه نصب قووووووى كقراية بس بحب احضر كورسات ..
طقوسى لكل مكان كتبه : مواصلات بيت اجازة سفر
احسن الاوقات قبل النوم ومتبقاش روايه
والصبح من 6-8 ص
وممكن العصر لو فاضية .

اتعودت ع القرايه من وانا صغير اوى .. 7 سنين تقريبا مش قرايه الحروف قصدى ك هوايه...
اتدرجت بقى ميكى وسمير مرورا ب ع ف2 ورجل المستحيل ف ماوراء الطبيعه وسافارى وفانتازيا والمؤسسه كلها ..
انتقالا لمرحله روايات الضخمه والاعمال الادبيه لكل الكتاب
ساعدنى ف دا اننى كبرت لقيت مخزون لاينفذ من الكتب عندى
كانت ملكاَ لأخوتى ..
اعيش مع القراءه ف اى وقت ف اليوم وكأننى ف عالم تام منفصل
اندمج ب حواسى ف القرايه .. اكتر ما بيحصلى وانا بتفرج
على فلم مثلا ..

اكتر ناس قريتلهم وبأستمتع بيهم
الأسوانى واحمد خالد توفيق و العملاق خيرى شلبى :)
اتمنى فعلاَ ان كل الناس تكون متعوده ع القرايه ..
بأحس ان اللى مش متعود على دا فايتو جزء كبير جداَ من العالم ..
الحمدلله :)

Mohamed wrote: "بتحسسينا بالعجز ليه يا هند؟؟؟ حضرتك أنا بادئ قراءة مكملتش سنة :))))) دا طبعاً بعد انقطاع حوالي 14 سنة كان ختامهم رجل المستحيل وملف المستقبل والشياطين ال 13 و عx2 :)
عموما كويس ان الواحد يعمل حاجة ب..."

مش مهم بدأت امتى المهم انت ماتنقطعش تانى بقى :)

غالباً بتبقي الكتب ع الكومبيوتر بس لما دخلت الجامعة وانتظار ساعة في المواصلات للوصول لحلوان فبقيت أقرأ في المترو
مجالات الكتب التى أحب قريتها
الكتب التاريخية
روايات أجنبية
بدأت في قراءة كتب د/مصطفي محمود وإبراهيم الفقي
ممكن أقرأ لـ د/أحمد خالد توفيق أيضاً

طيب :) .. بحب اقرا في كل حاجة .. ولكل الكتاب تقريبا ... غالبا بقرا كتب منزلاها علي الكمبيوتر او الموبايل .. والكتب الورق اللي معايا غالبا بتبقي استعارة من المكتبة :D
اما بقي عن مزاج القراية ممكن اقرا في اي مكان بس المهم الهدوء وبس

انا بحب اقرا في كل حاجه .. صحيح لسه مقرتش في كل حاجه .. بس بحاول اقرا لكل المؤلفين وكل المجالات
ومبحبش الكتب الالكترونية بصراحه بتوجعلي عيني .. وخصوصا اني بحب امسك الكتاب في ايدي واقرا ونا نايمة على السرير .. وخصوصا بليل قبل ما انام .. وبعدين احط الكتاب تحت المخده عشان احلم بيه :D

ولما باجي اشتري كتاب بيشدني العنوان الاول وبعدين اسم المؤلف وبعدين ببص في الفهرس ولو عجبني بشتريه وخصوصا لو من دار الشروق عشان كتبها بتبقى نضيفة اوي .. وانا مكنتش باخد بالي في الاول من حكاية دار النشر دي .. بس بقيت احطها في الاعتبار :)
وسعات بقرا الكتاب من على الكمبيوتر الاول او اقرانصه ولو عجبني بشتريه .. المهم اني اشتري الكتاب في الاخر عشان يبقى عندي مكتبة كبيرة :)

ومش بحب اقرا برا البيت .. الا لو في مكتبة الاسكندرية وميكنش حد معايا من صحابي عشان ميقاطعنيش كل شوية .. مع اني بفضل برضه اقرا في البيت في هدوء لان في المكتبة في مثيرات كتير ممكن تشتت انتباهي ..

رأيكم فى "مئة عام من العزلة "؟؟؟؟

كانت رائعة بالنسبالى !
هى من نوع الكتب القوية جدا ادبيا,
يعنى بعد ما تخلصها هتحس فعلا انك قريب كناب عملاق
بس يمكن تبقى صعبة شوية لغويا على حسب الترجمة اللى معاك

Toqa wrote: "رأيكم فى "مئة عام من العزلة "؟؟؟؟"

من أجمل الروايات التى يمكن قرائتها لـ ماركيز

Toqa wrote: "رأيكم فى "مئة عام من العزلة "؟؟؟؟"

هى مشكلتها اثناء قرائتها فيها مجرد سرد للاحداث زى تاريخ
يعنى وكان الشخصيات منفصلة والاحداث منفصلة ..ومافيش شخصية محورية او بطل بتدور حواليه الاحداث

كانت احيانا مملة جدا واحيانا فيها تشويق ..
لكن فى النهاية راى فيها ان ضيعت فيها وقت كتير كان معايا كتب احسن منها كان ممكن تكون احسن بكتيير