Syria Readers Association discussion

وينكن يا جمااااااااعة؟
وين تلخيص أفكار الكتب يلي عم تقرؤها؟
وين النقاشات؟

بحكيلكن أنا عن الثقوب السوداء ها
!!!!!!!!

"لا تندهي ما في حدا"
لذلك يفضل تحكيلنا عن الثقوب السوداء
كن البادي بالنقاش
مع الشكر مقدماً

الثقب الأسود هو وليد الجاذبية
فهو في الأصل نجم مضيئ كان قطره أصغر أو يساوي مجال جاذبيته مما أدى إلى انكماشه
أي تجمع أكبر كمية من المادة في أصغر حيز من المكان
ويملك حقل جاذبية يعجز حتى الضوء عن اختراقه ولذلك قد تبقى أكثر الأجرام السماوية سطوعا في الكون غير مرئية
!!!
تحتوي مجرتنا على ملايين الثقوب السوداء وتعد من أعظم مصادر الطاقة في كل الكون
يمكن السقوط فيها ولكن الخروج منها مستحيل
وهي ليست قابلة للزيادة على حساب المادة المتساقطة فيها

توقعت منك أن تحدثنا عن الثقوب السوداء في العقل العربي، وهي أيضاً بالملايين. على كل شكراً فبالنهاية هي كلها ثقوب يمكن السقوط فيها، والخروج مستحيل، ومع اختلاف بسيط، هو أن الثقوب السوداء في العقل العربي قابلة للزيادة.

الثقوب السوداء في العقل العربي
كتير حلوة الفكرة
!!!!
على فكرة أنا بنت
اسمي آلاء
انت فكرت إني علاء مثلا؟

أعتذر منك آنستي، ولكي أجد حلاً لخطئي، أنا أحياناً أتكلم باللسان الشركسي، فأقلب المذكر مؤنثاَ و vis-à-vis (كونك طالبة أدب انكليزي). وبالمناسبة إذا قرأت إحدى قصصي بعنوان قبحي، ستعرفين أن أفكاري هي أجمل ما أملكه، مع أنني لا أمتلك شيئاً ليمتلكني.
وسلام

أنا علاء= Alaa :D:D:D

أهلا أهلا أهلا
حدثنا-شو عم تقرأ هالإيام
؟

سيكولوجية العلاقات الجنسية ... لـ تيودور رايك

أكثر من رائع ... أولى تجاربي مع علم النفس المتخصص ... وبداية موفقة جداً

الكتاب يفتح مجالات وأبواب واسعة للتفكير في تصرفاتنا اليومية وعلاقاتنا ومشاعرنا ... بغض النظر عن الموضوع ... ولكن طريقة تناول الموضوع ومناقشته هي ما حاز على إعجابي

سهل ولّا معقد؟

معقد نوعاً ما ... ربما لأنه أول تجاربي ... يحتاج إلى إعادة لاستيعابه بشكل كامل

ولكن بشكل عام علم النفس مثير جداً وممتع ... وأتحدث عن علم النفس وليس سيكولوجية العلاقات الجنسية تحديداً

وحضرتك ... شو عمتقرأي ؟

طالما معقد ف رح إقرؤ بعد الامتحانات
كتير حابّة إقرأ شي بعلم النفس

صرلي فترة عم إقرأ شغلات صعبة نوعا ما
ف قررت إنتقل للروايات
عم إقرأ :زوربا
لحد هلأحلوة

وعم إقرأ كمان
Dr faustus
مسرحيةمن "عصر النهضة" عم ندرسها بالجامعة
كتييييييييييير حلوة

بدي أنصحك تقرأي شي بعلم النفس ولكن يمكن حاولي تختاري غير هالكتاب ... اليوم اجاني هدية كتاب ( التخلف الاجتماعي : مدخل إلى سيكولوجية الإنسان المقهور ) ويبدو من الريفيوهات عليه أنه رائع ... أعتقد هاد أحلى ... لانو موضوع سيكولوجية العلاقات الجنسية مو كتير مهم واختصاصي جداً وما بفيد كتير بالحياة اليومية إلا ببعض النقاط ... يلي جذبني هو طريقة تناول الموضوع وتحليلها وربطها بأفكار تانية ... يعني باختصار علم النفس هو يلي جذبني أكتر من الكتاب بحد ذاته

رواية زوربا سمعت عنها وحاططها
to-read
بس تباً للامتحانات !ونيالك على دراستك اذا
فيها روايات :)

التخلف الاجتماعي
.........
قرأتو
"بيشل" بس الفكرة إنو أحيانا بيتهم الاسلام إنو سبب تخلف العرب
بغض النظر عن هي الفكرة
الكتاب
أكتر من رائع
وقت قرأتو كان التعليق يلي كتبتو
إنو هيك كتاب لازم يتدرس بالمدارس
.........

مشان دراستي
ف
عنجد نيالي
أدب الانكليزي بيجنننننننننننننن
ألف الحمد لله يلي عم ادرس شي بحبو

معناها الحمد لله ... الهدية محرزة

اذا هيك معناها بتقدر تقرأي سيكولوجية العلاقات الجنسية ... عندك تجربة من قبل

وعنجد نيالك عالأدب الانكليزي .. دراسة ومتعة في آن معاً

بس تقرؤ ل"التخلف الاجتماعي"خبرني
منتناقش في

انت هلأ بكالوريا
؟

طيب اوكي ... قريباً إن شاء الله

:))) لا شو بكالوريا
انا طالب طب بشري سنة تانية ... والله يعينني على ما ابتلاني

عمرك 18 وطالب سنة تانية
!!!!!!!!!!!!

يس ... انا مسبق سنة ...

هو صحيح نوادر يلي من عمري بالكلية بس يعني انا مالي الوحيد ... لحتى في بعض الطلاب اصغر مني ... لا تستغربي كل شي وارد

حلو

و إلى اللقاء في مناقشات أخرى
....

Alaa wrote: "التخلف الاجتماعي
.........
قرأتو
"بيشل" بس الفكرة إنو أحيانا بيتهم الاسلام إنو سبب تخلف العرب
بغض النظر عن هي الفكرة
الكتاب
أكتر من رائع
وقت قرأتو كان التعليق يلي كتبتو
إنو هيك كتاب لازم يتدرس ب..."

الفكرة صحيحة، ولكن التعبير هو الخطأ.. ليس الإسلام هو سبب التخلف، ولكن السبب الحقيقي هو المسلمون.. وأحد الأدلة هو أول آية نزلت على النبي: إقرأ.. وهي فعل أمر ويعتبرها البعض أول عبادة أوجبها الله على عباده.. ولكن المسلمون لا يقرأون..

شعور غريب هلأ وقت السَّحَر قريت هيك نقاش من الماضي. ما انكتبت هالرسائل بوقت ومكان عاديَّين.. هي كانت 2011.. سوريا.
ياترى كيف كانت توقعاتكن للمستقبل، حدا كان خاطر عبالو ولو جزء من هالكابوس المرّ يلي عشناه؟ ما حدا كان عرفان بأينا دولة وبأنيو مستقبل بدو ينتهي فيه المطاف، هاد لمن بقي على قيد الحياة، أو على قيد الأمل، ومتل ما قال محمود درويش "هنا نفعل ما يفعل السجناء والعاطلون عن العمل.. نربّي الأمل" رجعت بذاكرتي وتخيّلت هالمشاهد، توتّرات أمنية كانت بهالأوقات، طَيف حرّية عم يتردد في الجو وبكلّ حرص وخوف عم ينسمع، اعتقالات وهتافات. أجواء باردة بكانون الأول، بدأت عجلة الزمن تدور متسارعة لتطحن السوريين بأيام تخبئها لهم، أيام مظلمة لم يخبر مثلها بشر ولن يعرف مثلها يوماً أحد. هتاف فتعذيب، ثم سلاح وموت، قصف وتدمير، تلاها لجوء وتشريد، أو ربما غرق. أعتذر فذاكرة السوريين تحنّ وتتوق لسرقة لحظات تتذكر فيها حياةً هادئة عاشوها يوماً فيما مضى. لفتني أن آخر رسالة هنا هي في ليلة الثامن من كانون الأول.. أي ثلاث عشرة سنة و خمس ساعات كاملين. ماذا حدث خلال هذه السنوات، كم شاباً رأى حلمه يضيع أمام عينيه، وكم من أسرة شُتت شملها، وكم من فقد أهله، أو أطفاله، كم من عذّب وقضى في سجونِ وأقبيةِ الإجرام، كم من مات تحت الركام، كم وكم وكنا نقول إلى ديّان يوم الدين نمضي.
فهل نقول أخيراً أن كابوسنا قد انتهى، هل نستطيع أن نبارك استئناف حياتنا بعد هذا العام 2011 ؟
هذا ما نرجو كُلّنا ونتمنّى.

الموضوع أشبه بالسفر عبر الزمن

ما بعرف
يمكن نحنا عم نرجع للماضي أو يمكن أهل الماضي عم يقرؤوا المستقبل من خلالنا

أنا مصرية، لكن من زمان عمري ما حسيت إن سوريا مجرد بلد بعيد عني. يمكن لأن ليّا فيها أكتر من ذكرى، أكتر من وجع، وأكتر من رابط يخليها محفورة في روحي للأبد.

سوريا بالنسبة لي مش مجرد اسم على الخريطة، دي كانت قصة نضال حقيقي، قصة ناس قاومت بكل ما تملك، قصة كرامة ما رضتش تنكسر. وكنت شاهدة عليها مش من بعيد، لكن من أقرب نقطة ممكنة…من ناس من أهلي كانوا هناك، في قلب المعركة، شايلين أرواحهم على كفوفهم، مؤمنين إن اللي بيعملوه مش مجرد واجب، لكنه حق لازم يتاخد. مش كلهم رجعوا، واللي رجعوا كانوا ناس تانية، شايلين جواهم حكايات ما ينفعش تتقال لأي حد، وجع ما يتنسيش، وصور بتفضل تعلق في الذهن للابد، كل تفصيلة عن سوريا كنت بحسها جوايا، مش مجرد خبر بيعدي. كل مرة كنت بسمع فيها صوت عبد الباسط الساروت، كنت بحس إن كلماته مش مجرد أنشودة، كانت بتعبر عن كل اللي جوايا. يمكن عشان كده فضلت أتعلق بيه، وأحس إن روحي متعلقة بالمكان ده، بالناس دي، بالنضال اللي عمري ما كنت جزء منه، لكن كان جزء مني

سوريا بالنسبالي مش مجرد قضية أو تعاطف، دي حاجة محفورة فيا وجعها وجعي، وأملها أملي، وهتفضل جوايا حتى لو الدنيا كلها نست

احتفالي معلّق حتى تستقر الأمور و يتوقف الدم, و الا لن نرى فرقا عما مضى.

عجيبة الكومنتات هون!
فعلاً فترة طويلة اللي مرت، خلصت اليوم كتاب أدب الصداقة مع أنه رسائل بين عبد الرحمن منيف الكاتب السعودي المستقر بدمشق والرسام الدمشقي مروان قصاب اللي مستقر بباريس فيها كم هائل من المشاعر الغريبة المؤلمة وخصوصاً على مغتربة متلي بدها تعانق أرض بلادها بعد سنين عجاف،حتمية الموت وأنه دائما في رسالة أخيرة، بلادنا يا رب نشوفها خضراء وحلوة متل ما بنتمنى.

في شباب وصبايا لسا نشطين هون بس أهملوا الغروب ومنهم من عام 2011 ، أتمنى يرجعوا يشاركوا لنشوف أخبارهم وشو تغير عليهم خلال سنوات الثورة

أعتقد لأنو رسايل الكروب ما بتبعت إشعار بالتالي ما رح يشوفوا الرسايل غير لمّا يفوتوا عليه ف يمكن ما انتبهوا

نعم ، خاصية المحادثة بالتطبيق بدائية

فعلا التطبيق بدو تطوير لانو بدائي ... ولمن انبسطت انو اخيرا حدا عم يتفاعل هون

بس مافي طريقة لنرجع الحياة للكروب؟ أو خلص
هل عم تصير مناقشات للكتب او غيرها؟

أحاول فهم كيف يدور غودريدز ووجدت نفسي هنا، يحتاج هذا الموقع "نفضة" في تصميم تجربة المستخدم. عموماً من اللطيف أن أقرأ نقاشات من ٢٠١١، أحسست نفسي نت الأجيال القادمة التي ستستخدم فيسبوك مادةً لدراسة التاريخ