كان يا مكان _ صندوق الحكايا المسحور discussion

كان يا مكان في قديم الزمان
كان في ست فرخة ...وكانت للأسف محرومة من الأولاد ....كانت حزينة وكانت تدعي ربها دائما ....يبعتلها شي ولد صغير
بيوم من ذات الأيام كانت ماشية بالطريق لقت بيضة !!!......فرحت كتير وصارت تشكر ربها ....وأوام (يعني بسرعة)أخدت البيضة وراحت عالبيت عملتلها عش وصارت تدفيها وتدير بالها عليها .....وهيك لإجا اليوم اللي ح تفقس البيضة فيه
وفقست البيضة !!!!!!!! بس طلع منها زلحفة صغيرة مو حلوة ...تفاجأت وبالأول خافت ...بعدين قالت هاد نصيبي ...وهاد ابني وأنا لازم ربيه ودير بالي عليه.....وهيك صار ...لحتى اجا اليوم اللي لازم يروح فيه "زلحف"عالمدرسة ......الست فرخة جابتلو الصدرية والشنطة وجهزتلو السندويشة والتفاحة وبعتتو عالمدرسة....لما راح لهنيك لقى كل الطلاب صيصان وما في غيرو زلحف :|....ولقى الصيصان الصغار عم يلعبو لعبة الشرطة والحرمية وهوه بيحب هاللعبة كتييير ....حاول يروح يلعب معهم ....بس خانقوه وما رضيو يلعبو معو ....راح عالبيت ...حزين ...مكسور الخاطر ....قامت أمو "الست فرخة" مسحتلو دموعاتو وطيبت خاطرو ....وقالتلو " ولا يهمك .....خود شوية هالبزر والقضامة وروح كلهم على النهر " ...."زلحف " عمل متل ما قالتلو أمو وراح قعد على شط النهر وصار ياكل هالبزرات والقضاميات ...وهوه قاعد اجو الصيصان الصغار جايبين معهم مركب صغير وعم يلعبو لعبة البحرية ....زعل بينو وبين حالو لأنو ما بيقدر يلعب معهم ....بس صار يتفرج عليهم ....شوي واذ الجو بيتغير !!! ....وبتهب الرياح وبيعلى الموج .....وبينقلي الزورق الصغير !!!!! هون "زلحف"السباح الماهر بيشلح قميصو ....وبينزل لعندهم وبيسبح باتجاههم لحتى يوصللهم وبيركبهم على ضهرو وبرجعهم عالشط سالمين :)
وهيك ومن يوميتها اعتذرو منو الصيصان الصغار .....وصارو يلعبو مع "زلحف الشجاع" دائما ......
وتوتة توتة خلصت الحدوتة :)

قرأت هذه القصة سابقاً، بس كل ما اقرأها بضحكني، أسلوب الكتابة فيها مسلي ومضحك والقصة مهضومة متل صاحبتها..

البزر والقضاميات ههههه

سعيدة بتعليقاتك دوماً يا خانم :)

بدنا مشاركاتك بقا...