Jana Mohammed

“التاريخ ضمن الغنايم .. وبيكتبه الكسبان”
― مصطفى إبراهيم, المانيفستو

“ثم دارت اللمونة
دورة كاملة… ثم داخت
ثم جه إخوانّا ولامونا
ثم إن الثورة باخت
ثم هُمّا هُمّا برضه
اللى باعوا الطول وعرضه
يِصحُوا يتخانقوا ويعارضوا
ثم إن الرِّيحة فاحت
ثم مش نازلين معاكو
ثم إن الجيش حمونا
ثم تاخدوا على قفاكو
ثم دارت اللمونة…….
ثم قال حانزل لوحدى
ثم دقن ف كل حتة
ثم يعمل مليونية
ثم يمشى الساعة ستة
ثم يعمل فيها عنتر
ثم ياخد علقة سخنة
ثم حيخزوقنا عسكر
ثم يطلع من نافوخنا
ثم فيه أصلا مؤامرة
ثم ناس مش لاقية تاكل
ثم تيت الثورة حمرا
إحنا مش عايزين مشاكل
ثم دارت اللمونة
دورة أكبر… ثم دخنا

ثم فجأة الكل يتعب
ثم إن الجيش حيقتل
ثم إحنا حمارنا يغلب
ثم جيم الدومينو يقفل
ثم مصر عاوزة زَقَّة
ثم ناس ماتقولش لأه
يركبوا عَ الثورة تانى
ثم نخسر… ثم نكسب”
― مصطفى إبراهيم

“يا أيُها العَبد الملول
ربَك طِلع مش زيِنا
و طِلع بيرضى مِننا
حتَّى بأنصاف الحِلول”
― مصطفى إبراهيم, ويسترن يونيون فرع الهرم

“رقصت كتير علي السلم بخاف أطلع و أخاف ن الأرض
-أكيد الخوف مش الفكره
وحتي يا ستي يعني بفرض , اكيد الخوف ما هوّاش عيب , طبيعي الناس تخاف م الغيب وم المقدور , برغم كده بحب الضلمه أكتر ما بحب النور,
ساعات بتمني شقه ف برج شايفه النيل, واوقات اني اعيش مستور وبزهد .. كل ما ف الرحله من زخرف ومازهدهاش ما دام فيها رمق يتعاش, اكيد ف الرحله يوم متحاش ومستني اعدي عليه,
-وتعرف ايه عنه اصلا؟
مفيش غير انه لسه مجاش”
― مصطفى إبراهيم, المانيفستو