Basem Gerges

“مين بقي فاضل معاك ؟
حبة باعوا لليهود
حبة باعوا لآل سعود
وانت يا شعبي كعادتك
عمر ما حد اشتراك
مشيوا أصحاب المصالح
ومشيوا ثوار السواك
والميدان دايما كعادته
مش هيفضل فيه ... سِواك”
― مصطفى إبراهيم, المانيفستو

“تفرانيل 100

انا شعرى غامق
بس قلبى مطقطق ابيض من زمان
جايز عشان
الناس ساعات بتلاقى ناس
تعرف تشوفها بجد
و انا قلبى لسه عمره ما اتكشف علي حد
بقابل اد ما اقابل
و افارق اد ما افارق
و ما اتعلمش
بلخبط ف الاسامى عشان
بخاف انسى
بلخبط ف الدنيا عشان
بخاف لا ما اعيشش
بقالى كتير ما بتكلمش
بخاف يبقى الكلام متعاد
ما كملتش ف اى رحيل
ما كملتش ف اى قعاد
و بدى للحياة بالكاد
ما يكفيها
و يكفينى
شرور البهدلة فيها
مليش ف البنت طلبات غير
تنسينى اللى قبليها
و بدخل ف حاجات تخاطيف
و عينى ع اللى بعديها
رقصت كتير علي السلم
بخاف اطلع
و اخاف من الارض
اكيد الخوف مش الفكرة_
و حتى يا ستى يعنى بفرض
اكيد الخوف مهواش عيب
طبيعى الناس تخاف من الغيب
و من المقدور
برغم كدة
بحب الضلمة اكتر ما بحب النور
ساعات بتمنى شقة ف برج شايفة النيل
و اوقات انى اعيش مستور
و بزهد .. ف كل ما ف الرحلة من زخرف
و ما زهدهاش
ما دام فيها رمق يتعاش
اكيد ف الرحلة يوم متحاش
و مستنى اعدى عليه
و تعرف عنه اصلا اية ؟_
مفيش غير انه لسه مجاش
بنام ؟
طبعا .. كتير جدا
و بالايام
و طول الوقت بحلم ان انا بجرى
و بشبع من الحاجات بدرى
و رغم كدة لسه ما شبعتش
من الجرى و من الاحلام
بخاف من الموت
عشان خايف ساعتها اكون
عبيط .. كل اللى سيبته كلام
بشوف افلام
عن الدنيا
و عن حكايات
لناس عاشت حاجات تانية
و عن حكايات لناس ماعاشوش
و بتأثر
و بتحسر
ع كل اللى كان ممكن
اكونه
بس ما بقيتهوش”
― مصطفى إبراهيم, المانيفستو

“ياشعب مستناش
خد حقه بدراعه .
ياوطن مبيسعناش
واحنا اللي بنساعه.
الدم لون واحد
مفيهوش عبيد ولا سيد
وان بعتوا دم شهيد بكره ... هتتباعوا”
― مصطفى إبراهيم, المانيفستو

“صدقنى انا زاهد بالصدفة .. او من غير قصد
انا طاير آه .. لكن علشان مش لاقى الارض
صدقنى انا كان نفسى اتعلق .. ف حاجات ياما
وأعيش احساس ان انا فعلا من غيرها هموت

انا اعرف اعيش
من غير ما احتاج انى اقرا الوقت
من غير ولا واحد م اللى اعرفهم دلوقت
انا اعرف اعيش من غير اسمى
او سنتوف بره حدود جسمى”
― مصطفى إبراهيم, المانيفستو