حسام غالي

“يا شرق فيك جو منور... والفكر ضلام
وفيك حراره يا خساره... وبرود اجسام
فيك تسعميت مليون زلمه... لكن اغنام
لا بالمسيح عرفوا مقامهم... ولا بالاسلام
هي الشموس بتخلي الروس... كداهو بدنجان؟”
― بيرم التونسي

“يارب سلطان جمالك يتعبد للــذات
خالص لوجـهك لا للـنيران ولا الجنات

لكن عبيـدك و خلـقك يعبدوك لغايات
صبحوا ونا عبد منهم كلهم ترسات

التاجر اما افتقر صلى و صام الفرض
و العمدة لما اترفت جالك وقع فى العرض

و القطن لما اتحرق صاحبه سجد عالأرض
و كلـهم عالعبـــادة يطلبـــوا حسنـــات”
― بيرم التونسي, المجموعة الكاملة لشاعر الشعب: بيرم التونسي

“ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!

ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم

من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم

ليه تهدمونى وناللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الأسيّه وانا راحل وسايبكم؟”
― بيرم التونسي, المجموعة الكاملة لشاعر الشعب: بيرم التونسي

“الأولة في الغرام و الحب شبكوني
و الثانية بالامتثال و الصبر أمروني
و الثالثة من غير معاد راحوا و فاتوني
الأولة في الغرام و الحب شبكوني
بنظرة عين
و الثانية بالامتثال و الصبر أمروني
و أجيبه منين
و الثالثة من غير معاد راحوا و فاتوني
قولوالي فين
الأولة في الغرام و الحب شبكوني
بنظرة عين قادت لهيبي
و الثانية بالامتثال و الصبر أمروني
و أجيبه منين احتار طبيبي
و الثالثة من غير معاد راحوا و فاتوني
قولوالي فين سافر حبيبي
سافر في يوم ما واعدني
على الوصال و عاهدني
و كان وصاله وداع
من بعد طول امتناع
حطيت على القلب ايدي
و انا بودع وحيدي
و أقول يا عين اسعفيني
و ابكي و بالدمع جودي
من يوم ما سافر حبيبي
و انا بداوي جروحي
اتاري في يوم وداعه
ودعت قلبي و روحي
طالت عليّ الليالي
و انت يا روحي انت
لا قلت لي فين مكانك
و لا حترجع لي امتى
الأولة في الغرام و الحب شبكوني
بنظرة عين
و الثانية بالامتثال و الصبر أمروني
و أجيبه منين
و الثالثة من غير معاد راحوا و فاتوني
قولوالي فين
الأولة وقادت و السبب نظرة
و الثانية ما طلت غير الصبر و الحسرة
و الثالثة انا اللّي جرى لي عمره ما يجرى
سافر حبيبي .......”
― بيرم التونسي