Noura

“عارف لما تشوف الصبح بيطلع .. و انت قاعد
لما تلاقى قلبك بيدق وانت بارد
أو تنام و انت شارد .. و تجرى وانت واقف .. و تبكى وانت ساكت
عارف لما عينيك تشوف جوه ناس .. و تحس بإحساس
عارف لما تبقى كل حاجا غلط صح .. و كل حلال حرام
المية تبقى نار و النار تبقى مطر
عارف لما تسكت و جواك مليان كلام
و تتكلم وانت مش طايق الكلام
تشوف الكدب من العينين باظظ
وإن اتكلمت هاتبقى عينيك بتشوف مش زى مانت باصص
تمشى مش زى مانت رايح
تتمنى تموت و انت عايش
او تعيش بس مش على الهامش
لما تحس انك نصين لحاجة واحدة بس مش بتوع بعض
نص برق و التانى رعد”
― أحمد حلمي, 28 حرف

“(يوم ذكرى ميلادك ابقى فكر قبل ماتطفى الشمع انت عملت ايه السنه اللى فاتت لو لاقيت عمايلك بيضاء زود شمعه على شمع سنينك اللى انت حاططها فى تورته عمرك هتعرف ان عمرك زاد سنه مفيده .. اما بقى لو لقيت نفسك مش مفيد ولا مهم علطول شيل من شمع سنينك شمعة نقص من عمرك سنه عدت من غير ما تعمل فيها اى حاجه مهمه ساعتها لازم تعرف ان عمرك نقص سنه وكل سنه هينقص سنه) .. عيد ميلادى ..
(عارف لما تشوف الصبح بيطلع وانت قاعد .. لما تلاقى قلبك بيدق وانت بارد .. او تنام وانت شارد .. وتبكى وانت ساكت)”
― أحمد حلمي, 28 حرف

“أحب الميم لأننا مصريون , و الصاد لاننا صابرون , و الراء لأننا راضون ... نعم نحن مصريون صابرون راضون”
― أحمد حلمي, 28 حرف

“عرفت إن أبويا مرتبه علي قده.. مايفرقش كتير عن الراجل اللي كان بيتكلم جنبي.. طيب إزاي إحنا عايشين .. ويا تري عايشين بالتلتميت جنيه ولا عايشين بالستر ولا عايشين ببركة دعاء الوالدين.. في ناس بتبص للتلتميت جنيه علي إنهم «ستميت نص جنيه»، وناس تانيه بتصبر نفسها أكتر وبتبص للتلتميت جنيه علي إنهم «ألف ومتين ربع جنيه».. ده غير بقي اللي شايفينهم «تلات تلاف عشرة صاغ»، وغيرهم شايفينهم «سته تلاف خمسة صاغ»، وفي بقي اللي شايفنهم «تلاتين ألف قرش».
أنا مش عارف هي الناس طماعة ولا إيه.. لما يبقي في موظف مرتبه «تلاتييييين ألف قرش» في الشهر.. عايز إيه تاني؟!.. أقولك حاجة ياللي بتاخد تلتميت جنيه في الشهر.. لو حد سألك بتاخد كام في الشهر.. إبقي قوله تلاتين ألف.. واسكت أو اقفل السماعة قبل ما تقول كلمة «قرش».. لأنك مش هاتعرف تكدب عليه وتبدل القرش بجنيه.. أصل لو ليك في الكدب.. كان بقي مرتبك فعلا تلاتين ألف جنيه..
الله يرحمك يا والدي.”
― أحمد حلمي, 28 حرف