Basma

“و حبك ليا مش عشوة
وتذكرتين
وبوكيه ورد يصالحني لما نتخاصم
ولا خناقة مع الواد اللي عينه عليا ومدايقك
عشان بتغير
و مش صح ان لو واحد
أكل حبة سوداني يطير
ولا ضفدع بقدرة قادر اتحول ف يوم لأمير
وبياض التلج ماتت قبل
ما يجيلها البطل بكتير
ولا الأشرار بيبقى شكلهم معروف
ولا بيتفقسوا م الأول
ولا بيتمسكوا ف الآخر
ف مالآخر
و م الانصاف
محدش كامل الأوصاف
يجوز فعلاً
في كل منا شئ مجنون
وانا حابة الجنان لكن
ياريت تفهمني وتصدق
على عكس اللي تتمناه
حياتنا بجد
مش كارتون”
― مي رضوان, الشنطة البمبي

“عمرك حسيت
إنك محتاج .. حُضن؟
مش شرط يكون من حد مُعين
أو عارفك
وكفاية أوي إنه يكون دافي
ومش متكروت
ف سلام مستعجل
ومجرد بس بروتوكول
(للحضن أصول)
فتحة دراعين ما تاخدش الا انت
وتسيب تفاصيلك برَّك
من غير تفسير
لتصرُّفها
غير رغبة لـ بث الدفا
جواك”
― مي رضوان, الشنطة البمبي

“وحيث بقا كل شئ عكسي
فانا شايفه الحياه ورطة
فلو لازم تكون غلطان
لانك حد م العايشين
يفضل لو بقينا اتنين
بجِملت .. كمِّل الغلطه”
― مي رضوان, الشنطة البمبي

“فسيب مشاعرك ف الفطام هتطيب
و حب لكن حب وانت غريب
القرب .. اصعب حكم اعدام ف التاريخ
و الصورة أجمل طول ما هي بعيد”
― مي رضوان, الشنطة البمبي