Ziad Khsheife

“يوم قلت آه ... سمعوني قالوا فَسَدْ
ده كان جدع قلبه حديد و اتحسد
رديت على اللايمين أنا و قلت ..آه
لو تعرفوا معنى زئير الأسد
عجبي !!”
― صلاح جاهين, ..صلاح جاهين فيلسوف ولاد البلد

“ولد و بنت
ولد و بنت
كل الجنينة
ولد وبنت
يا حب حاسب من هنا
وردة ولد
و وردة بنت

كان فيه بِنَيّه
خرجت شويه
في المغربيه
قابلت وليّد
بص لها حوَد
و قال أهيا
سلم عليها
فهمت إيديها
قالت عينيها
خلاص آمنت

خجلانة هيا
و مستحيّة
لكن هنيّة
قال كلمة هوّه
و ف قلبه جوه
ناره القوية
قال يا آمالي
قالت يا غالي
غيرت حالي
ساعة ما بنت
الوقت مسَّا
و هي لسه
و لا هي حاسّه
آدم و حوّا
هي و هو
اتنين في قصة
لكن ساعتها
شافت ساعتها
رجعت لبيتها
و أنا ...؟
حزنت ....

أنا اللي كاتب الغنوة ديّا
أنا الوليّد
صاحب البنيّة
اللي عيونها
قالت آمنت...”
― صلاح جاهين, ..صلاح جاهين فيلسوف ولاد البلد

“ح أجري كأن فوق حصان
وح اطير كأني بأجنحه
جميله جدا الغيطان
و الفسحه فيها مفرحه

لو كنت رسام كنت جيت
و معايا شنطه فيها زيت
و رسمت كل غيط و بيت
لو كنت شاعر كنت اقول
عن الجداول و الحقول
قصيدة فيها ألف بيت
لو كنت ده أو كنت ده
مش ح افرح اكتر من كده
مافيش لزوم أقول ياريت

و النسمة بتمر بحنان
و الشمس حلوه مصحصحه
جميلة جدا الغيطان
و الفسحه فيها مفرحه”
― صلاح جاهين, ..صلاح جاهين فيلسوف ولاد البلد