Roma

“وطلعت لفوق جدا جداا ..
صليت وكإنى بودعكوا ..
معلش كلامى هيوجعكوا ..
فـ إقروه للآخر لو حابيين ..
كلنا مساكين ..
أموات عايشين أو بين لـ إتنين ..
انا كنت مفكر وانا عيل إن الأيام أفلام سيما ..
ورضيت بالواقع لما فهمت ..
حكمة ربنا فـ التقسيمه ..
كلنا جايين الدنيا بنقص
وبحاجه زياده عن الباقيين ..
ويارب إزاى .. وانا مش بسأل ..
ليه حُكمه فـ كل اللى بيحصل ..
سبحانك قسّمت الأرزاق ..
أشكال أنواع ..
ولغات أسماء ..
وشوارع فيها بيوت وحارات ..
وجوامع وكنايس وبارات ..
لا بتمنع رزقك عن كافر ..
ولا سايب مؤمن فـ الضيقه ..
ربنا موجود والنبى موجود ..
والموت زى حسابنا حقيقه !”
― محمد إبر اهيم, فلوماستر أبيض

“هل تعلم أنك أحيانا ..
بتحس بإنك مش حاسس ؟!
وكإنك خدت فـ إحساسك
100 حقنة بنج ..
وضلوعك بقوا حبة خُرده
وتشوف الدنيا بعين بارده
ويتحول قلبك يومها لتلج
والناس يتساووا قصاد عينك
وتشوف الفارق مش فارق
وتشوف اللمه بتفكك
وتشوف الحلو ملوش قيمه
وكإنك قاعد فـ السيما ..
وحياتك فيلم قديم شوفته
ولذلك بقى مش بيضحك !”
― محمد إبر اهيم

“ياللى انتو قاعدين فـ السما ! ..
بقالكوا فتره مزورتونيش فـ الحلم ليه ؟!
يا جدتى : طب عامله إيه ؟!
أخبارك ايه فـ الجنه من بعد الممات
دانا لسه فاكر كل قاعده قعدتها
وياكى نحكى بالساعات
من بعد موتك حبى للشاى
قل خالص ..
يمكن عشان الشاى أساسا
حلاوته كانت فـ إجتماعنا
مبقتش أحس لأوضتك المقفوله
معنى ..
وكرهت حتى الوقفه فـ الشباك
انا روحت مره بعد موتك بعدها
مبقتش عايز أروح هناك”
― محمد إبر اهيم