Amalmortada2gmail.Com

“كان ياما كان
كان فيه شهيد
كانت نهايته أو بدايته لما يوم حفروا القنالْ
خلف شهيد
كانت بدايته لما يوم عبروا القنالْ
خلف شهيد عاش كالرجالْ
حربه اسمها اللقمة الحلالْ
كان فيه شهيد عايش سؤالْ
مين اللي ماسك دفة المركب و حادف ليه شمالْ؟."
مين اللي خرَّب مركِبك يا مصر
مين اللي داس الكوخ برجل القصر
كان ياما كان
كان فيه شهيد رافع علامة النصر
يوم كان في عبَّاره ، ويوم في القطر
وليله بايت في الدويقه جوَّا بيت من صخـْر
وليله جوَّا القسم .. أو في المُعتقل
راضي وسعيد
خالد سعيد
عاش كالرجال
سيد بلال
كان ياما كان
كان فيه شهيد
خلف شهيد جاور شهيد
كان جد جده كمان شهيد
صاحب شهيد ناسب شهيد
جوّز بناته الخمسة لولاد الجيران
طلعم ولاد عم الشهيد
جارهم شهيد
عاشُ و ما عاشُ يقاموا القتل في الطوابيرْ
ماشيين علي المساميرْ
و الكل بيعظّم سلام لعصابة الخنازيرْ"
و الظلم فاضْ
هات طوبة ياضْ
داخلين علينا البلطجية طوال عراضْ
راكبين جمال شبه القراضْ
حصّلني دوغري عند عب منعم رياض
بتقوللي عب منعم رياض؟
مش قلت لك؟
كان فيه شهيد خلف شهيد خلف شهيد
طب ايه الجديد؟
ربك يريد!”
― عبد الرحمن يوسف