Mohamed Ossman

“الجهل مريح يا فاطمة
الجهل مريح
عدم العلم مليح
يا أم أولادي يا إنسانة زي الناس
عدم العلم مليح
عدم العلم عيون تنعس في الليل
ضحكة من القلب
من القلب صحيح
عدم المعرفة بيخلي الرجالة عيال
يضحكوا يبكوا
و دايما للدنيا طعم جديد”
― عبد الرحمن الأبنودي, جوابات حراجي القط

“أيه هيه الغربة يا فاطنه؟
وميتى يبقى الواحد منينا في غربه.؟

لما يسيب بلده.؟

الواحد بلده الحته اللي بيغواها.
بيته . الفرشة اللي عينه تنعس جواها.
مش يامنه اب بعرور متجوزة حفني العطار.؟
مش دي حكاية يا فاطنه قارياها انتي وحافضاها.؟
مش قاسمين لا الفرش ولا اللقمة.
مش دايقين أيامهم بلسانهم
وجنوبهم في الليل..
بتبات تتقلب.
أهي دي الغربة يا فاطنه.
جبلاية الفار بلده وبلد جده وده بيت والده
لكن متغرب فيه .”
― عبد الرحمن الأبنودي, جوابات حراجي القط

“مش ماشيه معايا حكاية الجوهرة والدرة المكنونة دي.
إنتي يا فاطنة أغلى من الجوهرة واجدع م الدرة.
وحتى انا مش عارف منة كلمة درة.
إنتي يا فاطنه أغلى ما ماسك في ايديا.
تحويشتي وعرقي ..
واكتر من كل كنوز الدنيا.
والمسألة في القول مع فاطنه مش محتاجة كلام.
يعنى أنا لو قلتلك جوهره حتقولي معزته زادت؟
إنتي عارفه حراجي وعارفه مقدارك.
أنا ربنا جابني الدنيا من غير ورث
واداني منابي فيكي
وما طالب منه غير بس يبارك فيكى
ويديني الجهد ف دراعيني أقدف بيكى.
أغلى عندى من الولد لو ان الولد
نضر عيني ..
لكن لسه احنا قادرين نعمل ولد.
لكن انتي لا قدر رب الناس.
ما قدرشي أعكز ف طريق
إلا بيكي.
ان مالت بيا الدنيا اتكى عليكي.
تسندني إيديكي ..
وإذا كنت باقول إني في أسوان عال ..
فأنا عال
لأن العمر منفد ع الجبلاية.
والجبلاية
فيها فاطنه اللي واخدها
بسنة رب الدنيا ورسوله.
فمنين جوهره ولا ميه
حينوروا زي عنيكي المليانين طيبه وحنيه
ف لياليا ..؟”
― عبد الرحمن الأبنودي, جوابات حراجي القط