Hassan Aly

“لو النجوم تنزل و تمشى فى الشوارع
و لو العمارات تطير
و لو الضفادع فى الشتا عرقت
و الجو فى أغسطس أصبح مطير
و لو الحمير أتكلمت بفصاحة
و النملة صبحت فى ضخامة الفيل
مش حأندهش
بعد اللى فات
علشان أنا من سنة
إحساسى بالدهشة مات”
― فؤاد قاعود, الصدمة

“لو نزلت المحروسة ملفوفة القوام
أم العيون بنفسجى
من قصرها العالى و شاورت لى
لوحدى من دون الأنام
حأغض بصرى
و مش حرد السلام
علشان أنا من سنة
نفضت إيدى من الغرام”
― فؤاد قاعود

“يا ولدي قول الشعر بلا إعلان
وانشد بلا استئذان
وإن جيت ف عصر إنحطاط
امشى لوحدك ع الصراط
واعلا فوق الأوان
الشعر أكبر م المكان والزمان”
― فؤاد قاعود, الصدمة

“لو خصنى الفيلسوف
بحكمته المحفورة فى ذهن الزمن
و بدأ يوجه لى الحديث
حأخد طريق غير طريقه
و أمشى بعيد عن ندوته و الزحام
علشان أنا من سنة
مؤمن بلا جدوى الكلام”
― فؤاد قاعود