خميس عز العرب > Quotes

“اقولك حكاية ؟!عرفتك مرايا في بيوت الصحاب
و شفت في نفسي
و نفسك ما شوفتي
لحد ما طوفتي بمواني العذاب
و دارت سواقي العطاشي في سرابك
ما كنش الا دمي مسقسق ترابك
عرفتك بريئة و إنتي الخطيئة
و لما الحقيقية قصادي تفوت
بكدّب عينيا
و أحبك
و أموت”
― خميس عز العرب, وسط البله

“كان يا ما كان
كان فيه عصفور
قلبه صغير
ريشه قصير
حلمه يرفرف بره السور
كان إنسان من طين ، من نور
كان بيدور ع اللى يخضر
قلب الناس القاسى البور
كان ياما كان قلب الحدوتة رق و حن
على البنوتة فى زمن اتجن
زمن الناس فى قلوبها وحوش
زمن الغاب و الناب و وشوش
تحزن غش و تضحك زور
كان ياما كان أحلام بضفاير قلب و بس
ذنبها إيه لو قلبها طاير حب و حس
بنوتة فى حدوتة تنام
و بتجرى وراها الأيام
هى و كل بنات الحور”
― خميس عز العرب

“الضيق صديق يملا الودان باللوم
و الحزن تحويمة قلق محموم
و الغيظ غليظ .. إنما جوه الدما محكوم
و الغل غول محروم
مستني يوم معلوم
و كله كوم
و الصمت كوم ...”
― خميس عز العرب, وسط البله

“أنا والوطن مش بس تأشيرة دخول بترطبنا
أنا و الوطن فرطن في بيوتنا
طفنا بكل السكك متسولين قوتنا
و اما الكلام ابتدي نقطنا بسكوتنا
أنا والوطن عشنا
أنا والوطن موتنا”
― خميس عز العرب, وسط البله

“لما أنتي أهلك بياعين
يا هل تري مين يشتري .. ؟”
― خميس عز العرب, وسط البله