عزيزة علي > Quotes

“كُرسي فـ جنينة
وشَجرة مايلة
و أرض مَفروشة بـ تُراب
وعيال بتجري .. و مَبسوطين
و أنا و إنتَ و الشوق و الحَنين
مِتكَلفتين فـ النَظرتين
و الغيمة تغمِز للسما
و عيون عَجوزة بـ نضارات
دُخان سجاير
عُملة واقعة
وفَرع مال بالذكريات
و إيديا بتحَضَن إيديك
و المَعني إني أخطَف دَفا
بس العيون المَرصوصين
نظرات بتصرُخ فـ الخفا
و الحَسرة طالة عـَ الوجوه
هي الشتا دايماً كِدة
رُكن الأحبة المُشتاقين
رُكن الحيارا المُحرومين
رُكن القلوب مِستنين
نُقطة بـ ترياق الشِفا
كُرسي الجنينة ان كان حَزين
أنا و إنتَ جبنالهُ الصفا
و الله فـ عون المَنسيين
من يجي مية مليون شِتا
أنا أصلي حَبيت الشِتا
___
فـِ الشتا”
― عزيزة علي

“إن كُنت هتسأل عـَ التاني
من باب لازم
علشان واجب
و هتعمِل فـ الحُزن مراكبي
و سؤالَك عادي و عـَ الطاير
التاني ماهوش حِِمل خساير
فـَ اسكُت أحسن
\
خليك الصاحب أبو مَعلِش
و مشاغِل
و الدُنيا تلاهي
و مَخدتش بالي من الرنة
كيفَك و ازيَك و أحوالَك
\
اوعى تطبطب بالزيف عـ القَلب
هَتحِس بـ ذّنب !؟
احسن مـِ الكِدب
الكِدب يا صاحبي إن بان مِنَك
أصعَب مـِ الصَعب
\
فـَ متسألشي
و أنا حبة و هنسى و أعيش تاني
و أرن عليك”
― عزيزة علي