مصباح المهدي > Quotes

“مافيش حد قادر يقول بطلوده
مافيش حد قادر يقول إسمعواده
مافيش حد قادر يقول الغراب
البلد من ضباب الرؤية في المرايا
بتكسر ورايا إذا هربت زير
و أنا مش أمير
مش سفير للنوايا
ولا يوم سندت بنواياتي زير
البلد مهما قالوا العدالة – الكرامة
الكلام كتير البلد ع الفقير
ابن نفس الفقير اللي قامت عليه البلد من زمان
مش هامان اللي سارح بعلبة ترامادول
و قاروصتين سجاير و بوظة و لبان
أمان يالميدان اللي فرّغ وعبَّا
و دخل مكان النحاف التخان
الفقير هو نفس الفقير
اللي ساكن عشش ترجمان
علي العكس منه تلاقي خبير استراطيشي فاهم
محلل و عالم فقيه يعني إيه مش مهم
المكرر مقرر علينا بخمسين لسان
يالميدان اللي خلوه شديد القباحة
و قال لما كان للميدان صولجان
كان إباحة و تحرش
و صبيان ناقصها العلام و الإيمان
كانت بنت تزحف عليه
جردوها من البنطلون كان أبوها المُدان
و دي الوقت عايزنها تنزل معاهم و إلا
فلا خير في الخير كمان
يا الرغيف مش لاقيه حتي معجون بدمي
و أنا بدمي دهنوا الحيطان و البيبان
أنا اللي دفعت الفواتير زمان
أنا اللي تصورت هاخد نفسي
بعد عهد الأمان
راح أدفع كمان فواتير صراع الجبابرة الديابة
علي ما تبقي من الهيلمان”
― مصباح المهدي

“أشتال قلم
و أشتال قَدُوم
و اشتال من البِرَك الهموم
أستأذنِك لما آجي أنام
و استأذنِك لما آجي أقوم
و لزوم حاجات مالهاش لزوم
أسجد ف غير وقت الصلا
و أصوم
و ليل كامل أقوم
دمي اللي خارج م الهدوم
مفروط
نجوم الضهر تطلع لي النجوم
ف مكاني مطرح ما انطرحت
أطرح شجر دُوم ف الخلا
و اطرح كروم
و استأذنِك لما آجي أفتح بُقِّى
و ارضع م الغيوم
و استأذنِك لما آجي ألوم
نفسي علي التقصير
و المّ الشوك لَمُوم
أستغفر السجان و أسبّح كل يوم
أشتال قلم
و اشتال قدوم
و اشتال من البِرَك الهموم”
― مصباح المهدي

“- كلام ابن عم الكلام -

رِكِب هز رجليه وشَدّْ اللجام
وعفَّر على النائمين ف الخيام
وحرّم علينا "الصبَّا والخزام"
وقال دا تمام
ودا مش تمام
كلام ابن عم الكلام محتاجينه
أنا يا عزيزي اتنشل منّي عين
و ف وقفة تانية اتنشل منّي عين
عشان بانتخاب ييجي ريس أمين
دخّلنا ف متاهة
ومين فين تباهى
بحجم الزبيبة ونور الجبين
إذا الفجر أذِّن وما صلِّتوش
هتُرزق منين ؟!
هتُرزق لأن اللي رازق إله
رزَق ف الجحر دودة مالهاش إدين
وتسألني مين السبب ف المحبة
أقول حبَّة حبَّة
هتسألني مين السبب ف الخصام
ائتلاف / اختلاف /
اكتشاف فوضى عَمِّتْ
بدت وادلهمت
وهمَّت وهمَّ بها لأ بلاش
أنا يا عزيزي اتقتلت ببلاش
وقوِّمت ثورة عشان تبقى باش
باشمهندس / أكاديمي / أستاذ
رئيس
وانا اللي انتخبتك رئيس
مش خيالي
وانا اللي دعيت أهلي ياخدوك
رئيس
عشان مصر مش أهل / أحباب / جماعة
عشان مصر تفضل وطن مش جماعة
عشان مصر تفضل وطن للجميع”
― مصباح المهدي

“لوحدك لإمتى ؟!
وفيه لسه ف العمر كام إمتى باقي ؟!
زرعت اشتياقي
في أرضي الشراقي
طرح فيا موت
طرح بيت تداعى
عليه الجواعى
تداعت عليهم أمم م الشباعى
لوحدك لآخر محطة ف حياتك
سُكاتك مماتك
مماتك مُقدّر عليك كل ساعة
عليك
لا سلاح جو رادع هجوم
ولا مدفعيات تأمن تخوم
ولا برماءك منع سرب بوم
لوحدك تصوم اللي فاضل ف عمرك
تطفِّل في جمرك
وتنزف أنين
حنين لاستطاعة
وبيت طاعة عابد بلاطُه وحيطانُه
لوحدك مهاود ملاكُه وشيطانُه
وسايق جنانُه الشعور بالتلاشي
تقول إنت عايش
على الأرض ماشي
على الأرض ماشيه عليك الجموع
لجوع ، محض جوع
جوه منك صحاري
جوه منك شعور بانكسار
له ضوافر
وميت ألف حافر
دماغك مشاع
مشاع لاحتفالات بعيد أو بطولة
مشاع لاختراق هدنة الحرب غولة
مشاع لانتفاع القبايل بدمك
تموت حيّ تتباع قطع للغيار
تموت
"طوبة يعلا بها يا ليل جدار "
لا كان اختيار لك ف لحظة ولادة
ولا اسمك ورسمك وشكل العبادة
مقدر ركوب سادة فوق ساده أصغر
ركوبهم جميعاً عبيد كالمطايا
ركوب هم ناقع على الكل زيت
لوحدك لإمتى ؟!
وفيه لسه في العمر كام إمتى باقي ؟!”
― مصباح المهدي