“لوحدك لإمتى ؟!
وفيه لسه ف العمر كام إمتى باقي ؟!
زرعت اشتياقي
في أرضي الشراقي
طرح فيا موت
طرح بيت تداعى
عليه الجواعى
تداعت عليهم أمم م الشباعى
لوحدك لآخر محطة ف حياتك
سُكاتك مماتك
مماتك مُقدّر عليك كل ساعة
عليك
لا سلاح جو رادع هجوم
ولا مدفعيات تأمن تخوم
ولا برماءك منع سرب بوم
لوحدك تصوم اللي فاضل ف عمرك
تطفِّل في جمرك
وتنزف أنين
حنين لاستطاعة
وبيت طاعة عابد بلاطُه وحيطانُه
لوحدك مهاود ملاكُه وشيطانُه
وسايق جنانُه الشعور بالتلاشي
تقول إنت عايش
على الأرض ماشي
على الأرض ماشيه عليك الجموع
لجوع ، محض جوع
جوه منك صحاري
جوه منك شعور بانكسار
له ضوافر
وميت ألف حافر
دماغك مشاع
مشاع لاحتفالات بعيد أو بطولة
مشاع لاختراق هدنة الحرب غولة
مشاع لانتفاع القبايل بدمك
تموت حيّ تتباع قطع للغيار
تموت
"طوبة يعلا بها يا ليل جدار "
لا كان اختيار لك ف لحظة ولادة
ولا اسمك ورسمك وشكل العبادة
مقدر ركوب سادة فوق ساده أصغر
ركوبهم جميعاً عبيد كالمطايا
ركوب هم ناقع على الكل زيت
لوحدك لإمتى ؟!
وفيه لسه في العمر كام إمتى باقي ؟!”